ආනන්ද සංගරි මහත්තයා අපූරු ඉල්ලීමක් කරලා ටී.එන්.ඒ.මන්තිරිලාගෙන්. වෙනදා ප්‍රභාකරන් මල්ලියේ කියලා ලියුම් ලියන සංගරී මහත්තයා ගැන රාල තුළත් ලොකු ගෞරවයක් තියෙනවා. එතුමාට ගෞරව කරනවා කියන එකෙන් එතුමාගේ ෆෙඩරල් විසඳුමට රාලලා කැමතියි කියලා නම් අදහස් වෙන් නෑ ඕන්. කොහොම වුණත් අපේ රටට ආදරය කරන සිය ජනතාවට ආදරය කරන ඒ මිනිසාට අපේ ප්‍රණාමය. 'හමුදාව අලිමංකඩ යනවා කියලා පාමංක යනවා' කියපු සිංහල නාමදාරී ද්‍රොහීන්ට එතුමා කදිම ආදර්ශයක් කියලයි රාලට හිතෙන්නේ.
කොටි ග්‍රහණයේ සිටින දෙමළ ජනයා බේරා දෙන ලෙසත් එසේ බේරා දිය නො හැකි නම් මන්ත්‍රී ධුරවලින් ඉල්ලා අස්වන ලෙසත් දෙමළ සන්ධානයේ පාර්ලිමේන්තු මන්ත්‍රීන් 20 දෙනා වෙත ලිපියක් යවමින් ද්‍රවිඩ එක්සත් විමුක්ති පෙරමුණේ නායක වී. ආනන්ද සංගරී ඉල්ලා ඇත. යුද හමුදාව කිලිනොච්චිය අල්ලා ගැනීමට මග එන බව ආරංචි වීමත් සමඟම ප්‍රභාකරන්ගේ මිනීමරුවෝ එහි සිටි ලකෂයක පමණ පිරිස රුගෙන ධර්මපුරම් නමැති ගම්මානයට පළා ගියහ. මේ කුඩා ගම්මානයට බෝම්බ දැමුවහොත් සිවිල් වැසියන් විශාල පිරිසක් මියයන බැවින් රජය එවැනි පියවරක් නො ගන්නා බව කොටි ඉතා පැහැදිලි ලෙස දනිති. ඒ නිසා ඉතිරිව සිටින කොටි රුළ මේ සිවිල් වැසියන් සමඟ මිශ්‍ර වී, ඔවුන් පළිහක් ලෙස තබාගෙන ධර්මපුරම් ගම්මානයේ ජීවත් වෙති. මේ අනුව ධර්මපුරම් ගම්මානයේ සංයුතිය, කොටින්, මිනිසුන්, ගැහැනුන්, ළමයින්, බෝම්බ, කාලතුවක්කු, මෝටාර්, පතරොම් යනාදියෙන් සැදී තිබේ. කොළඹට ලැබෙන ආරංචිවලට අනුව සහ ධර්මපුරම් ගම්මානයෙන් පැන ආ දෙමළ ජාතිකයන් කියන ආකාරයට ධර්මපුරම් හි වෙසෙන සිවිල් ජනයා නිරාදුක් විඳින්නා හ. ප්‍රභාකරන්ගේ ඊළම මුලදී උතුරෙ\ත් නැගෙනහිරත් යන දෙකේම තිබිණ. ඊළඟට එය උතුරට සීමා විය. අනතුරුව කිලිනොච්චියට සීමා විය. ඊටත් පසුව අලිමංකඩට සීමා විය. දැන් එය ධර්මපුරම් නමැති කුඩා ගම්මානයට සීමා වී තිබේ. ප්‍රභාකරන් විසින් සාමාන්‍ය ජනයා මිනිස් පළිහක් ලෙස තබාගෙන සිටීම ජාත්‍යන්තර යුද නීතියට සම්පුර්ණයෙන් ම විරුද්ධ ය. එහෙත් ම්ලේච්ඡ දාමරිකයකු සමඟ ජාත්‍යන්තර යුද නීතිය ගැන කතා කිරීම විහිළුවකි. ධර්මපුරම් ගමෙන් පැනයෑමට සුදානම් වන ඕනෑම කෙනකු ස්ත්‍රී පුරුෂ ළමා ලපටි භේදය නොතකා මරණ ලෙස ප්‍රභාකරන් නියෝග කර තිබේ. දැනට කොටි සංවිධානය තුළ අකුරටම ක්‍රියාත්මක වන නීතියක් වන්නේ නම් එසේ පැන යන අය මැරීම ය.
මේ වැසියන් නිදහස් කරන ලෙස ආනන්ද සංගරී මහතා කරන ඉල්ලීම ඉතාම හොඳ ඉතාම වැදගත් එකකි. එහෙත් සැබෑ කතාව නම් එවැනි යමක් කිරීමට ද්‍රවිඩ ජාතික සන්ධානයේ මන්ත්‍රීවරුන්ට කිසිදු හැකියාවක් නැති බව ය. ද්‍රවිඩ ජාතික සන්ධානය යනු රුකඩ සංවිධානයකි. මේ රුකඩ කණ්ඩායම නටවන්නේ ප්‍රභාකරන් ය. ද්‍රවිඩ ජාතික සන්ධානයේ කෙටි ඉතිහාසය මෙසේ ය: කොටි සංවිධානය ත්‍රස්තවාදී සංවිධානයක් නිසා පාර්ලිමේන්තුව තුළට ඔවුන් වැද්ද නො ගන්නා ලදී. ඒ නිසා තමන් වෙනුවෙන් පාර්ලිමේන්තුව තුළ හඬක් නැගීම සඳහා දේශපාලන සංවිධානයක් ප්‍රභාකරන්ට වුවමනා විය. එවිට ද්‍රවිඩ එක්සත් විමුක්ති පෙරමුණ දෙසට හැරී වෙඩි දෙකක් පත්තු කළ ප්‍රභාකරන් එහි නායක ඒ. අමිර්තලිංගම්ට අත් වු ඉරණම මතක් කර දුන්නේ ය. එහි ප්‍රතිඵලයක් වශයෙන් බියට පත් ද්‍ර.එ.වි.පෙ. මන්ත්‍රීවරු රුසක් දෙමළ ජාතික සන්ධානය නමැති කොටි හිතවාදී පකෂයක් සංවිධානය කළහ. එහෙත් වී. ආනන්ද සංගරී මහතා දිගටම ද්‍රවිඩ එක්සත් විමුක්ති පෙරමුණේ රුඳී සිටි අතර ප්‍රභාකරන්ගේ තර්ජනවලට බිය වුයේ නැත. ටී. ආර්. ඕ. සංවිධානය ප්‍රභාකරන් වෙනුවෙන් මුදල් එකතු කරමින් ලොව පුරා ඇවිද ගිය අතර ටී. එන්. ඒ. පකෂය ප්‍රභාකරන්ට දේශපාලන සුදු හුණු ගෑම සඳහා කොළඹ - නෝර්වේ, කොළඹ - ඉන්දියාව, කොළඹ - කැනඩාව යන ගමනාන්තවලට "පෞද්ගලික බස් සේවයක්" ආරම්භ කළේ ය.
දෙමළ සන්ධානයේ බලය ප්‍රභාකරන් සමඟ බද්ධ වී තිබිණි. ප්‍රභාකරන් පිරිහෙන විට ඔවුන්ගේ බලය ද පිරිහිණ. මේ නිසා ධර්මපුරම් ගමේ වැසියන් නිදහස් කරන ලෙස ප්‍රභාකරන්ගෙන් ඉල්ලා සිටියොත් ඔහු ටී. එන්. ඒ. මන්ත්‍රීලාගේ කටට වෙඩි තබනවා ඇත. ආනන්ද සංගරී මහතා තැත් කරන්නේ අනාථයන්ගෙන් ආධාර ඉල්ලීම වැනි දෙයකි. මේ වෙලාවේ අපගේ යුතුකම වන්නේ දේශපාලන හිඟන්නන් වී ප්‍රභාකරන්ගෙන් පසු තමන්ට මුහුණපෑමට වන ඉරණම ගැන සිතමින් ටී. එන්. ඒ. කාරයන්ට සතයකින් දෙකකින් ආධාර කර ඔවුන් ජීවත් කරවීම ය. ඉරණම පෙරුළෙන හැටි බලන්න. ටී. එන්. ඒ. කාරයන් හිතා සිටියේ ඊළාම් ජනාධිපති බවට ප්‍රභාකරන් පත් වු පසු එහි ඇමැතිවරුන් වීමට ය. අද ඔවුන්ගේ තත්ත්වය නාගරික මන්ත්‍රී කෙනකුගේ තත්ත්වයටත් බාල ය.
(09/01/13)
Subscribe to:
Post Comments (Atom)
No comments:
Post a Comment