Tuesday, June 30, 2015

තුන් කොන් සටන් මිත්‍යාව පරදමු!

ඉදිරි මැතිවරණය මහින්ද-රනිල්-සිරිසේන තුන් කොන් සටනක් වනු ඇති බවට ප්‍රවාදයක් නිර්මාණය කිරීමට පිරිසක් උත්සාහ කරන බව පෙනේ. මේ පිරිස රනිල්ගේ ජයග්‍රහණය පතන පිරිසකි. එමෙන් ම කිසියම් හේතුවක් හෝ හේතු නිසා බෞද්ධ විරෝධි සිංහල විරෝධි පිරිසකි. ඒ ආගම, සංස්කෘතිය, අධ්‍යාපනය හෝ සිය දේශපාලන මතවාද නිසා ය. එම දේශපාලන මතවාදය මාක්ස්වාදය හෝ ලිබරල්වාදය හෝ විය හැකි ය. මේ හේතු විසින් ඔවුන් සිංහල විරෝධීන් හෝ බෞද්ධ විරෝධීන් බවට පත් කර තිබේ. එහෙයින් එකී හේතුවලට මිස පලවලට අමතා පලක් නැත. මේ පිරිසට අමතරව උපන්ගෙයි UNP දායාද කොට ගත් පිරිසක් ද සිටින බව අමතක කළ යුතු නොවේ. ඔවුහු පක්ෂයේ ඉහළ නායකත්වයේ බෞද්ධ විරෝධි ආකල්පය පිළිබඳ සවිඥානික නොවන අහිංසක බෞද්ධයින් ය. 

කෙසේ වුව ද මේ පිරිස උපකල්පනය කරන්නේ මහින්ද-සිරිසේන දෙපිරිසක් ලෙස තරඟ කළහොත් ශ්‍රීලනිප ඡන්ද දෙකට බෙදෙන බවත් ඒ අනුව රනිල්ට තරඟය ජයගත හැකි බවත් ය. පේමදාසට පසු ස්ථාවර ආණ්ඩුවක් සෑදීමට අසමත් වූ රනිල් වික්‍රමසිංහ ජයග්‍රහණය කරනුයේ ඔහු සමඟ තරඟයට නොන්ඩි අශ්වයෙකු පැමිණිය හොත් පමණක් බව මේ පිරිස දැනටමත් පිළිගෙන තිබීම උත්ප්‍රාසජනක ය. කෙසේ වුව ද එය යථාර්ථයයි. 2010 හෝ 2014 මහින්ද සමඟ ජනාධිපතිවරණ තරඟ බිමට රනිල් ඉදිරිපත් කිරීමට හෝ මේ පිරිස කැමති නො වී ය. එහෙත් ඒ සියල්ල අමතක වී රනිල් පාරම්බානු දුටු විට අපට සිහිවන්නේ වෙරි වූ මීයා පුසා සටනට කැඳවීමයි.

මේ පිරිස රනිල් පිළිබඳ යථාර්ථය තේරුම් ගත්ත ද රටේ ජන මනස තේරුම් ගත් බවක් නම් නොපෙනේ. එය එක් අතකින් රටට හිතකර ය.  බොහෝ දුෂ්කරතා මැද පාර්ලිමේන්තු මන්ත්‍රීවරු 10ක් සමඟ එදා පෙබරවාරි 18 වෙනිදා නුගේගොඩින් ඇරඹි යහ පාලන විරෝධි උඩුගං බලා පිහිනීමේ මහා ක්‍රියාන්විතයට මේ වන විට සන්ධාන පාර්ලිමේන්තු මන්ත්‍රීවරු 100ක් පමණ ද පළාත් සභා සහ පළාත් පාලන ආයතන නියෝජිතයින් 95%ක් පමණ ද එක්ව තිබේ. ඒ සටන දැන් මහින්ද අගමැති කිරීමේ දැවැන්ත මෙහෙයුමක් බවට පත්ව තිබේ. 2010 ආසන 120ක් පමණ ලබා ශ්‍රීලනිපය ඉතිහාසයේ ස්වර්ණමය යුගය සටහන් කළේ මහින්ද රාජපක්ෂ සමයේ ය. එපමණක් නොව ඔහු බිඳී වෙන්ව යන්නට ඔන්න මෙන්න කියා තිබු මාතෘ භූමිය එක්සේසත් කළ දැවැන්ත නායකයා ය.   

ඊට සමගාමීව පක්ෂයට ද්‍රෝහි වී පක්ෂ අපේක්ෂකයාට විරුද්ධව තරඟ කර ශක්තිමත් සන්ධාන ආණ්ඩුව පෙරලා දැමුවේ සිරිසේන ය. වැටී පණ අදිමින් සිටි එජාපයට පණ නළ ලබා දුන්නේ සිරිසේන ය. පක්ෂය සිරිසේන ප්‍රජාතන්ත්‍ර විරෝධි ලෙස තමන්ට එරෙහිව ඡන්දය ලබා දුන් 58 ලක්ෂයක් නියෝජනය කළ ශ්‍රීලනිප බලය ඩැහැ ගැනීම පිළිබඳ ජනතාව තුළ කිසිදු පැහැදීමක් නැත. එවන් පසුබිමක ඔවුන්ගේ අපේක්ෂා බිඳ දමමින් මහින්දට අගමැති අපේක්ෂකත්වය ලබා නොදුනහොත් සිදු විය හැක්කේ කුමක් ද? 

එහි දී සිදු වන්නේ 58 ලක්ෂයක් ඡන්ද දායකයින් ඔවුන්නේ 100 වැඩි පාර්ලිමේන්තු මන්ත්‍රීවරු ද පළාත් සභා සහ පළාත් පාලන ආයතන නියෝජිතයින් 95%ක් පමණ ද සමඟ වෙන ම බලවේගයක් ලෙස මැතිවරණයට ඉදිරිපත් වීම ය. ඊට සමගාමීව සිරිසේනට ජනාධිපතිවරණයේ දී ලැබුණු ඡන්ද ලක්ෂ 62 එජාපය, ද්‍රවිඩ ජාතික සන්ධානය, මුස්ලිම් කොංග්‍රසය, ජනතා විමුක්ති පෙරමුණ, ප්‍රජාතන්ත්‍රවාදී පක්ෂයට බෙදී ගිය පසු ඔහු සමඟ ඉතිරි විය හැක්කේ බොහෝ විට හෙළ උරුමයේ ඡන්ද ලක්ෂය පමණි. බලය සහ බලය වෙනුවෙන් හෙළ උරුමය ද සිරිසේන අතහැර යනු ඇත. එවිට ශ්‍රීලනිපය 1977 දී මෙන් ආසන අටේ තැනට වැටෙනු ඇත. බොහෝ විට ශ්‍රීලනිපය තුන් වැනි හෝ හතර වෙනි බලවේගය බවට පත් වනු ඇත්තේ දෙමළ ජාතික සන්ධානය ඔවුන්ට වඩා ආසන ප්‍රමාණයක් දිනාගත හැකි හෙයිනි.

එහෙත් මහින්ද රාජපක්ෂ ප්‍රමුඛ සන්ධානයට ඉදිරි මැතිවරණයේ දී ජනාධිපතිවරණයේ දී ලැබුණු ඡන්ද ලක්ෂ 58න් ලක්ෂ 50ක් වත් අවම වශයෙන් දිනාගත හැකි වනු ඇත. එය දිනෙන් දින ඊට වඩා වැඩි වනු මිස අඩු වන්නේ නැත. සුපුරුදු පරිදි රනිල් වික්‍රමසිංහට මෙවරත් විපක්ෂ නායක පුටුව හිමි වනු ඇත. එහෙයින් මේ සටන කෙළවර වනු ඇත්තේ රනිල්ගේ ජයග්‍රහණයෙන් නොවේ. පරාජයෙනි. එහෙත් වඩාත් දරුණු පරාජය ලබනු ඇත්තේ සිරිසේන ය. ඔහු පක්ෂයේ බෝඩ් ලෑල්ල සමඟ අගාධයට ඇද වැටෙනු ඇත. මේ වන විට පක්ෂ බෝඩ් ලෑලි නම් තීරණාත්මක දෑ නොවන තත්ත්වයට පත්ව තිබේ. පසුගිය ජනාධිපතිවරණයේ දී සිරිසේන දිනුවේ නම ගිය පක්ෂයකින් හෝ ලකුණකින් නම් නොවේ. එය අනාගතයට ද එසේ ම වලංගු ය. සිරිසේන බලෙන් උදුරා ගත් බෝඩ් ලෑල්ල, පක්ෂ මූලස්ථානය හෝ සලකුණ සීගිරි ගලෙන් පතුරක් පමණි. සීගිරි ගලෙන් පතුරක් ගිය කල්හි ගල් දෙකක් ඇතැයි අපි නොකියමු. 

එහෙයින් ඉදිරි මහා මැතිවරණය මහින්ද-රනිල් ද්වන්ධ සටනකි. එය සිරිසේනට ත්‍රිත්ව සටනක් කළ නොහැකි අනෙක් මූලික කරුණ නම් ඔහු රනිල් අගමැති කිරීමේ අරමුණින් ගන්නා තීන්දු තීරණ මත එය ද්විත්ව සටනක් නොවන බව ය. සිය ආසනයත් පැරදුණු නිමල් සිරිපාල අගමැති විය යුතු යැයි කිසිවකු නො සිතන අතර සිරිසේනට කළ හැක්කේ වෙනම තරඟ කොට කිසියම් ආසන ප්‍රමාණයක් දිනා ගෙන ඒ ආසන රනිල් අගමැති කිරීමට ලබා දී ශ්‍රීලනිපයට නැවත ද්‍රෝහී වීමට පමණි. එහෙත් ඒ සිහිනය ද මෙවර ඉටු කර ගත නො හැකි ය. 2004 මහ මැතිවරණයේ දී සිංහල ඡන්ද දෙකට බෙදා සුළු ඡන්දවලින් රනිල් අගමැති කිරීමට හෙළ උරුමය වෙන ම තරඟ කළ ද ඔවුන්ගේ සිහිනය බිඳ වැටිණි. 

සිරිසේන වෙන ම පිරිසක් සමඟ ශ්‍රීලනිපයෙන් තරඟ කිරිමට තීරණය කළ හොත් 2005 වසරේ මෙන් ම අවසන් ප්‍රතිඵලයට කිසිදු බලපෑමක් සිදු නොවේ. එහෙත් එදා බණ්ඩාරනායක මහතා එජාපයෙන් එළියට බැස බිහි කළ ශ්‍රීලනිපය නැවත එජාපයට අවශෝෂණය වීම වැළැක්විය නොහැකි වනු ඇත. එහෙත් ඒ නම, මූලස්ථානය සහ ඡන්ද සලකුණ මිස පක්ෂයේ අධ්‍යාත්මය වන පාක්ෂිකයින් නොවේ. ඔවුන් 1956 එජාපයෙන් මිදි මහජන එක්සත් පෙරමුණ වටා රොක් වූ පරිදි මහින්ද බලවේගය සමඟ එක් වනු ඇත. එහෙයින් මෙවර කිසිදු තුන් කොටසක් නැත. එය මිත්‍යාවකි. ජනවාරි 08 යහ පාලන බේගල්වලින් ජාතිය නිර්වින්දනය කළ පිරිස් මේ උත්සාහ කරන්නේ ජනතාව අධෛර්යමත් කොට ජයග්‍රහණය පැහැර ගැනීමටයි. මේ තුන්කොන් සටන් මිත්‍යාව වහා පරාජය කළ යුත්තේ එහෙයිනි. 

Wednesday, June 17, 2015

Mister Clean කතා වස්තුව!!!

තමන්ට ජන වරමක් නොමැතිව පිනට අගමැතිකම් කරන හාදයා Mister Clean ය. පිට රටින් හොරෙකු ආනයනය කර මහ බැංකුවේ රුපියල් බිලියන 04ක් හොරකම් කළ හාදයා Mister Clean ය. ඒ හොරා අධිකරණයට ඉදිරිපත් නො කරන හාදයා Mister Clean ය. එකී හොරා තමන්ගේ තවත් මිතුරන් තිදෙනෙකුගේ කමිටුවක් මාර්ගයෙන් නිදොස් කොට නිදහස් කරන හාදයා Mister Clean ය. 

පොලිස්පතිට වග නොකියන ඍජුව තමන්ට වග කියන පොලිස් කොට්ඨාශයක් පිහිටුවා හිට්ලර්ට අදින්නා හාදයා Mister Clean ය. ජනපතිටත් නොදන්වා එය පිහිට වූ හාදයා හාදයා Mister Clean ය. 
තමන්ට අවනත නොවන තම දේශපාලන ගමනට බාධාවන් වන සියලු දෙනා කුමන හෝ චෝදනාවක් එල්ල කර කුදලා ගෙන ඒමට එකී පොලීසියට අණ කරන හාදයා Mister Clean ය. තමන්ගේ බෙදුම්වාදී සිංහල විරෝධි දේශපාලන න්‍යාය පත්‍රයට එරෙහිව එදා මෙදා තුර මතු වූ සියලු බලවේග පසුපස සිටින්නාගේ ගෙදර උන්දෑගෙන් ද පළිගැනීම සඳහා හැඳුනුම්පතේ සිදුව ඇති වරදක් අල්ලා ගෙන හඹා යන හාදයා Mister Clean ය. 

කෝප් වාර්තාවෙන් වැඩි ම චෝදනා එල්ල වූ හාදයාට මුදල් ඇමතිකම ලබා දෙන හාදයා Mister Clean ය. උදෑසන අධිකරයේ චූදිතයෙකු ලෙස සිට හවසට පාර්ලිමේන්තු පැමිණ අයවැය ඉදිරිපත් කරන මුදල් ඇමති පත් කළ හාදයා Mister Clean ය. 

නෙළුම් කොළේ මත පේපර් ප්ලේට් එකක් තබා නෙළුම් කොළේ කිරිබත් කන හාදයා Mister Clean ය. සිංහල අලුත් අවුරුදු මේසයට ටයිකෝට් ඇඳ එන හාදයා Mister Clean ය. තොප්පිගල කැලයක් බව සොයා ගත් හාදයා Mister Clean ය. පස් දීම නිසා පස්දුන් රට යන නම සැදුනු බව සොයා ගත් හාදයා Mister Clean ය. වංචාව, දූෂණය, නාස්තිය සංඝ නායක ධුර බව සොයා ගෙන බුදු දහමට නින්දා කළ හාදයා Mister Clean ය. 

නැඟෙනහිර ගොස් මහින්ද සිංහලයින්ගේ වීරයා බව පවසා ජාතිවාදය වපුරන හාදයා Mister Clean ය. 1505 පරංගි මේ රටට කඩා පැන කැලණි විහාර ඇතුළු වෙහෙර විහාර ගිනිබත් කොට, භික්ෂූන් ඇතුළු ලාංකිකයින් සමූල ඝාතනය කරමින් මහා සංහාරයක් කර වසර 500ක් පිරීම පෘතුගාල අගමැති මෙ රටට කැඳවා සැමරීමට සැලසුම් කළ හාදයා Mister Clean ය. 

1815 සුද්දාට රට පාවා දීමට විශාලතම කාර්යභාරයක් කොට සුද්දාගෙන් මුදලි තනතුරු ඇතුළු නේක සම්පත් දිනා ගත් තම්බි මුදියන්සේගේ පරපුරට නෑකම් කියන හාදයා Mister Clean ය. 1978 මේ රට පාදඩ බටහිර ධනවාදයේ තිප්පොළක් කළ ‍තම්බි මුදියන්සේගේ මී මුනුබුරෙකු වන ජේ.ආර්. උතුමාගේ බෑනා වන හාදයා Mister Clean ය. කොටි වෙනුවෙන් පෙනී සිටි ක්‍රිස්තියානි පල්ලියේ පූජක මාමාගේ බෑණා වන හාදයා Mister Clean ය.   

කිසිදා ජනතා අකමැත්ත නිසා මැතිවරණයෙන් පරාජය නොවූ එහෙත් අනෙක් පක්ෂයේ කිසි යම් වරදක් නිසා ම මැතිවරණ 29ක් පරාජය වූ හාදයා Mister Clean ය. චන්ද්‍රිකා දිනුවේ හොර ඡන්ද නිසා බවත් මහින්ද දිනුවේ කොටි නිසා බවත් කියන හාදයා Mister Clean ය. 30 වෙනි පරාජය වෙනුවෙන් සැදී පැහැදී සිටින හාදයා Mister Clean ය. 

Tuesday, June 16, 2015

නිකන් දුන්නත් ජවිපෙ කඩේ බඩු රට්ටු නො ගන්නේ ඇයි?

ජවිපෙට අනුව ශ්‍රීලනීප කඩේ බඩු හොඳ නැත. එජාප කඩයේ බඩු ෂුවර් නැත. එහෙත් ජවිපෙ වත්මන් නායක අනුර කුමාර කාටත් හොරා එජාප කඩයට යෑමට ඒමට ආස ය. එහි සීනි කිරීමට, අරුමෝසම් චුවින්ගම්, බේස්ල්ට් තොල් උල් කර කෑ ගසා විකුණා තරුණ වස්සන් සහ වැස්සියන් ඇන්දවීමට දක්ෂ ය. එසේ එජාපයට සීනි කිරා චාටර් වූ විට බොරුවට එජාපයට බැන වදින්නේ සිය ළෙන්ගතුකම හිතේ තබා ගෙනම ය. අඹු සැමියන් අතර ඇති වන ඒ සොඳුරු ගැටුම් බත ඉදෙන තුරු පමණි. බොළඳ පෙම්වතුන් අතර ඇති වන නොහොඳ නෝක්කාඩුකම් ද එසේ ම ය.
කඩ දෙකේ ම බඩු අප්ෂට් වුවත් රට්ටු ජවිපෙ කඩයෙන් නිකන් දුන්නත් බඩු නොගනිති. ඒ මන්දැයි ජවිපෙ හිටපු නායක සෝමවංශ අමරසිංහ අපෙන් අසයි. මේ පැනයට අතීතය දෙස බැලුවහොත් පිළිතුරු ලබා ගත හැකි ය. ජවිපෙ ජාතිකත්වයේ කොඩිය අත දැරූ සමයේ මේ රටේ ප්‍රගතිශීලි ජනතාව ඒ කොඩිය වටා ඒකරාශි වූහ. 2004 මහා මැතිවරණයේ දී බොහෝ දිස්ත්‍රික්කවල 1, 2, 3 ස්ථාන ජවිපෙට හිමි විය. ඔවුහු ආසන 42ක් දිනා ගත්හ.
එහෙත් පක්ෂයට විජයග්‍රාහණ රැගෙන ආ ඒ ගමන තමන් අතින් සිදු වූ ඓතිහාසික වරදක් බව ජවිපෙ වත්මන් නායක අනුර කුමාර පාපෝච්චාරණය කර තිබේ. ඒ ජනතාව ඔවුන් සමඟ එක පෙළට සිට ගත් අවස්ථාවේ දැරූ දේශපාලන මතවාදයට සපුරා විරුද්ධ අන්තයේ සිට ගෙන ය. රටට සතුරු පිළේ සිට ගෙන ය. සිය පක්ෂය පිළිගන්නා බව පවසන සමාජවාදයට සතුරු අන්ත දක්ෂිණාංශික පිළේ සිට ගෙන ය. අධිරාජ්‍යවාදී කඳවුරේ ඉදිරි ආරක්ෂක වළල්ලේ සිට ගෙන ය.
ඉතින් මේ ගමන කෙළවර වන්නේ ජවිපෙ වික්‍රමබාහු කරුණාරත්නගේ පක්ෂය මෙන් තවත් ත්‍රීවිල් පක්ෂයක් බවට පත්වීමෙන් පමණි. දැන් එම ඉරණම ජවිපෙ නළලේ කොටා තිබේ. කෙසේ වුව ද පක්ෂය ජාතිකත්වයෙන් ඉවත් වීම මේ සෝදාපාළුවට හේතුව බව අවබෝධ කර ගැනීමට තරම් සෝමවංශ අමරසිංහ තවමත් තරුණ ය. ඔහු එදා ජවිපෙ සන්ධාන ආණ්ඩුවෙන් ඉවත්වීමට ගත් තීරණයට ද එරෙහි වූ බව නැත්ත වෙනුවට ඇත්ත කියවූ අයට අමතක නැතැයි සිතමි. ඒ අර්ථයෙන් ගත් කල අනුර, ටිල්වින් ජෝඩුවට සාපේක්ෂව සෝමවංශ තවමත් තරුණ ය.
රට්ටු ජවිපෙ කඩයෙන් ඉල්ලා සිටින බඩු නොව අනුර ලා විකුණන්නේ එජාපය ප්‍රමුඛ බටහිර මුදලාලි ලා ලාබෙට සපයන කල් ඉකුත් වූ කුණු බඩු ය. ඇතැම් විට ජවිපෙ කඩයේ විකුණන්නේ තට්ටයින්ට පනා ය. ඇතැම් විට ඇස්කිමෝවරුන්ට ශීතකරණ ය. මේවා ජනතාවට වැඩක් නැත. ජවිපෙ කඩෙන් නිකන් දුන්නාත් රට්ටු බඩු නොගන්නේ එහෙයිනි. ජවිපෙ දැරූ ප්‍රගතිශීලි චින්තනය කොල පාට චින්තයට බිලිවීමේ ඛේදවාචකයයි මේ.

Wednesday, June 10, 2015

ත්‍රස්තවාදය පරාජය කළේ කවුද?

"පරාජය අවජාතකයි. ජයග්‍රහණයට පියවරු සියයයි" යනුවෙන් කතාවක් තිබේ. එය සැබෑවකි. 2009 ත්‍රස්තවාදය මේ රටින් ජයග්‍රාහී ලෙස අවසන් කළ අවස්ථාවේ සිට ඊට පියවරු බොහෝ ය. 2010 ජනාධිපතිවරණ සමය වන විට ජෙනරාල් ෆොන්සේකා වීරයා බව ඔහුට එතෙක් ගැරහූ විපක්ෂය කියා සිටියේ ය. චන්ද්‍රිකා 75%ක් යුද්ධය අවසන් කර තිබුණු බව ඇය කීවා ය. කරුණා කොටින් සමඟ විරසක කරවූයේ තමන් යැයි රනිල් ප්‍රමුඛ එජාපය කියන්නේ ඒ ජයග්‍රහණය පීතෘත්වය තමන්ට ද හිමි බව කියා පාමිණි. කෙසේ වුව ද වැරදිලාවත් මහින්ද රාජපක්ෂ කොටි ත්‍රස්තවාදය හමුදාව යොදවා විනාශ කිරීමට ගත් තීන්දුව ජයග්‍රහණයෙන් කෙළවර නොවිණි නම් මේ පියවරු සියලු දෙනා ඒ පරාජයේ පීතෘත්වය මහින්ද මත පැටවීමට කිසිසේත් නිර්ලෝභි නොවන බවට කවර නම් සැකයක් ද? එසේ නම් පියවරු සියයක් නිසා දැන් අවජාතක වී ඇති මේ විජයග්‍රහණයයේ පියවරු අපට සොයා ගැනීමට ද නො හැකි වනු ඇත.   

කෙසේ වුව ද අපට වැදගත් වන්නේ මේ එකිනෙකා ත්‍රස්තවාදය අවසන් කළේ කවුද යන්න පිළිබඳ කරන විග්‍රහ නො වේ. අපට වැදගත් වන්නේ දෙමළ සමාජය විශේෂයෙන් ඊළාම්වාදීන් සහ ඊනියා ජාත්‍යන්තර ප්‍රජාව කියන බටහිර ත්‍රස්තවාදය අවසන් කළේ කවුද යන්න පිළිබඳ දරන අදහසයි. ඒ රටට සහ ත්‍රස්තවාදය අවසන් කළ නායකයින්ට අභුත චෝදනා එල්ල වන්නේ ඔවුන්ගෙන් හෙයිනි. ඔවුන් සිය ඊනියා ඊළාම් විමුක්තිවාදී සටන පරාජය කළේ මහින්ද බවටයි චෝදනා කරන්නේ. ඉරාකයට ගැහුවේ ජෝර්ජ් බුෂ් මිස කමන්ඩර් ඩේවිඩ් පෙට්‍රෝස් හෝ කමන්ඩර් ජෝර්ජ් කේසි හෝ යැයි කියන කිසිවෙක් ලොව නැත. ඒ ආක්‍රමණය සඳහා දෙවියන් වහන්සේ බුෂ්ට අණ දුන් බවට ඔහු කියන කතාව වෙන ම සාකච්ඡා කළ යුතු ය. එළාර නමැති ආක්‍රමණිකයා පරාජය කොට රට එක්සේසත් කළේ ඵුස්සදේව යැයි කියන අය ද නොමැත. එහෙයින් ෆොන්සේකා යනු මහින්ද විසින් ත්‍රස්තවාදය අවසන් කරන සටන සඳහා යොදා ගත් හමුදාපතිවරු තිදෙනාගෙන් කෙනෙක් බව පැහැදිළියි. මේ ජයග්‍රහණයේ උරුමය චන්ද්‍රිකා පවරා ගැනීම ගැමුණු ලද ජයග්‍රහණය අවප්‍රමාණ කිරීම සඳහා එහි ගෞරවය එළාර රජු අතින් මැරුම් කෑ අසේලට පැවරීමට දෙවැනි නැත. උතුරේ හමුදාව ලැබූ බරපතළ පරාජයන් බොහොමයක් අප ලැබුවේ චන්ද්‍රිකා සමයේ වන අතර අවසාන ඇසක් ද අහිමි විය. අප මේ කරුණු පැහැදිලි ව අවබෝධ කර ගත යුතු ය.


ත්‍රස්තවාදය කෙළවර කර වසර 600කට පමණ පසු නැවත මේ රට එක්සේසත් කිරීමේ ගෞරවය මහින්දට දීමට විරුද්ධවාදීන් එකඟ නො වුණ ද එය මහින්දගේ වැඩක් බව දෙමළ බෙදුම්වාදීන් වගේ ම ඒ පිටුපස සිටින බටහිර සහ ඇමරිකාවත් මැනවින් දනියි. 2010 ඊළාම් සිතියම සහිත ප්‍රදේශ ජනාධිපතිවරණයේ දී ෆොන්සේකා දිනන්නේ එහෙයිනි. 2015 ජනාධිපතිවරණයේ දී 80%ක් උතුරු නැඟෙනහිර ඡන්ද සිරිසේනට ලැබෙන්නේ එහෙයිනි. මහින්ද පරාජය වන්නේ ද එහෙයිනි. මහින්දට යුද අපරාධ චෝදනා එල්ල වන්නේ එහෙයිනි. ෆොන්සේකාට සහ සිරිසේනට ඡන්දය දෙන දෙමළ බෙදුම්වාදීන් මහින්දගේ පඹයෝ පුළුස්සන්නනේ එහෙයිනි. (මැතිවරණයේ දී නැඟෙනහිර මුස්ලිම් කළාප වරදාන ලබා දී මුස්ලිම් ඡන්ද ලබා ගැනීම කුට්ටිය ලබා ගැනීම ප්‍රතික්ෂේප කළ බව ද සඳහන් කර යුතු ය.) හිටපු ඊශ්‍රායෙල් අගමැති බෙන්ජමින් නෙතමියාහු ප්‍රකාශ කී පරිදි ම සතුරාගේ සතුරා ඔවුහු මිතුරා ලෙස සලකති. එසේ ගත් කල සිරිසේන මෙන් ම ෆොන්සේකා ද කොටින්ගේ මෙන් ම බටහිර මිතුරෝ ය. 

මහින්ද කොටින්ගේ මෙන් ම බටහිර හතුරා ය. ඒ ඔවුන්ගේ විමුක්ති සටන විනාශ කළ නිසා ය. බටහිර කොටි පිල්ලිය පරාද කළ නිසා ය.  අප මහින්ද ආරක්ෂා කරනුයේ ඔහු බෙදී වෙන් වන්නට ඔන්න මෙන්න කියා තිබූ රට එක්සේසත් කළ නිසා ය. ඒ රටේ අද සිංහල, දෙමළ, මුස්ලිම් සියලු දෙනා නිදහසේ ජීවත් වන නිසා ය. 2009 මැයි මස 18 වෙනිදා සිට ගෙවී ගිය වසර 5 තුළ මාතෘ භූමිය මත සිදුවීමට නියමිතව තිබූ මිනිස් ඝාතන නවතා දැමූ නිසා ය. ගලා යාමට නියමිතව තිබූ රුධිර ගංගාව නවතා දැමූ නිසා ය. රට එක්සේත් කර ජාතියට අභය ධානය දුන් වරදට රටේ සතුරන් ඔහු බිලි ගැනීමට සුදානම් වන නිසා ය. එසේ ඔහු දඩයම් කරන තුරු බලා සිටීම කළගුණ දත් ජාතියකට තරම් නොවන නිසා ය. රටට එක්සේසත් කොට ජාතියට අභය ධානය දුන් නායකයා රැක ගැනීම අපි අපේ ජාතික වගකීමක් කොට සලකන නිසා ය.

Thursday, June 4, 2015

නියම සුද්දා සහ නිවට කළු සුද්දා!!!

බ්‍රිතාන්‍යය ක්‍රිස්තියානි රටක් බව ද එය කීමට අප බිය විය යුතු නැති බව ද බ්‍රිතාන්‍ය අගමැති ඩේවිඩ් කැමරන් තම රටේ ජනතාවට කියයි. මේ අතර අපේ රට සිංහල රට යැයි ජනතාව කියන විට අපේ පාලකයෝ වියරු වැටී ලංකාව සිංහලයින්ගේ රට නොවන බවත් එසේ කියන්නේ ජාතිවාදීන් බවත් පවසා ජනතාවට ගරහති. නින්දා කරති.

බයිබලය සිය රටේ සංස්කෘතිය, හර පද්ධතිය නිර්මාණය වීමට පදනම සැපයූ බව වසර 1300 ක්‍රිස්තියානි ඉතිහාසයක් හිමි ලිබරල් රටක් වන බ්‍රිතාන්‍ය අගමැති එරට ජනතාවට කියන කියයි. රටේ මහා සංස්කෘතියට පදනම සැපයූ වසර 2500කටත් එපිටට පැතිර යන බෞද්ධ පදනමක් සහිත ඉතිහාසයක් මෙරටට තිබුණ ද ලංකාව බහු-සංස්කෘතික, බහු-ආගමික, බහු-ජාතික රටක් බව අපේ පාලකයෝ අපට කියති. 

ජාතික ගීය දෙමළෙන් ද ගැයිය යුතු බව කියති. ජාතික කොඩියේ සිංහයා පන්නා දැමිය යුතු බව කියති. ඒ සඳහා ජනතා ඇසට වැලි ගසමින් නේක උපා යොදති. බලය බෙදා රට ෆෙඩරල් කොට බෙදිය යුතු බව කියති. උතුරේ ජනතාව තුළ බෙදුම්වාදී අදහස් ව්‍යාප්ත කිරීමට ඉඩ දෙමින් ඊළමට පාර කපති. ඒ කිසිවක් නැතිව බ්‍රිතාන්‍යයෝ කතිර කොඩිය සෙවණේ ඉංග්‍රීසි බසින් ජාතික ගීය ගයමින් අභිමාණයෙන් වෙසෙති. ඔවුහු පක්ෂ විපක්ෂ භේදයකින් තොරව ස්කොට්ලන්තය බ්‍රිතාන්‍යයෙන් වෙන්ව ස්වාධීන රාජ්‍යයක් වීමට එරෙහි ස්කොට්ලන්ත ජනතාව බල ගන්වා ස්වාධීන වීමේ තීන්දුව ජනමත විචාරණයෙන් පරාජය කරති. ඔවුහු සිය රටට ආදරය කරන නියම සුද්දෝ වෙති. කළු සුද්දන් මෙන් සිය උපන් බිමට ද්‍රෝහීකම් නොකරති.

සිය රටේ ඉතිහාසය සමඟ නිවැරදිව සිට ගෙන බ්‍රිතාන්‍යය ක්‍රිස්තියානි රටක් බව නොබියව කී ඩේව්ඩ් කැමරන් එරට ජනතාව විසින් 2015 දෙවන වාරය සඳහා ද අගමැති ධූරයට පත් කර තිබේ. එසේ නම් මේ රටේ ඉතිහාසයට ගරහන නින්දා කරන නිවට පාලකයින්ට ජනතාව ඉදිරි මැතිවරණයේ දී ලබා දිය යුතු වැදගත් පණිවිඩයක් ඇත්තේ නො වෙද? මෙවැනි අමන සංස්කෘතික විහීන මෝල්ලුන් යටතේ පාලනය වීම අපට සැබවින් ම ලැජ්ජාවක් නොවන්නේ ද? මෙවැනි නිවට කළු සුද්දන් අපේ මාතෘ භූමිය සිතු සේ අපහරණය කරන්නේ රට වෙනුවෙන් අපි අපේ යුතුකම පැහැර හැරීමක් නොවන්නේ ද?



සිංගප්පූරු පාඩම!

අපි සිංගප්පූරුවෙන් හොරු ආනයනය කර රට මකර කටට දක්කන අතර සිංගප්පූරුව අපෙන් සැබෑ දක්ෂයා ආනයනය කරවා ගෙන සිය රට තවත් ඔසවා තැබීමට උත්සාහ ගනී. සිංගප්පූරුව යුද්ධයෙන් 75%ක් අවසන් කළ චන්ද්‍රිකාට හෝ තනිව යුද්ධය දිනූ ෆීල්ඩ් මාර්ෂල් ෆොන්සේකාට හෝ ආරාධනා නො කරයි.
පිවිතුරු රවීලාට සහ බලය සහ බලය වෙනුවෙන් ඕනෑ ම පාවදීමකට සුදානම් පාඨලිලාට සිය මාධ්‍ය ඔස්සේ බොරු ප්‍රචාරය කරමින් රටේ අමන පිරිස් ඇන්දවිය හැකි වුව ද ලෝකය රැවටිය නො හැකි බව මේ සිංගප්පූරු ආදර්ශයෙන් සනාථ වෙයි.

තව දුරටත් තමන් යුද්ධය කළේ යැයි දැන් කිසිවෙකු පාරම්බෑ යුතු නැත. අනුන්ගේ දරුවන්ට උප්පැන්න ලිවීමට තරඟ නොකළ යුතු ය. මේ රටින් ත්‍රස්තවාදය අවසන් කිරීම පිටුපස සිටි සැබෑ නායකයා ලෝකය විසින් හඳුනා ගෙන තිබේ.

අනෙක් අතට සිංගප්පූරුව තමන්ගේ නොවන දක්ෂයා සිය රටට ගෙන්වා ගැනීමට උත්සාහ කරන විට අපේ පාලකයින් උත්සාහ කරන්නේ තමන්ගේ ලොවක් පිළිගත් දක්ෂයාගේ චරිතය ඝාතනය කර බොරු චෝදනා එල්ල කර හිරේ විලංගුවේ දැමීමටයි. දශක කිහිපයක් තුළ ශ්‍රී ලංකාව සහ සිංගප්පූරුව අතර ආර්ථික, සමාජ දේශපාලන වශයෙන් අහසට පොළව වැනි පරතරයක් නිර්මාණය කරන්නේ මේ අකෘතඥ අමන ගඳ ගහන ගතිගුණ නොවෙද?
 
සිය රට දේ සිරි සැප දේ !