Wednesday, January 25, 2012

සිංහල, දෙමළ ජනතාවට අසාධාරණයක් නොවන ලෙස බලය බෙදන්න සූදානම් - පුවතක්

එක්කෝ මේ කාලකන්නි ආණ්ඩුවට පිස්සු. නැත්නම් අපට පිස්සු. බෙදුම්වාදීන්ට ස්වයං පාලනය දුන්නා නම් මේ රටේ අවුරුදු 30 තිස්සේ යුද්ධයක් ඇති වෙන්නේ නෑ.

රටේ සිංහල දෙමළ දහස් ගණනකගේ ජීවිත විනාශ වෙන්නේ නෑ. දළඳා මාළිගාව ඇතුලු රටේ මිල කළ නොහැකි සම්පත් විනාශ වෙන්නේ නෑ. අත පය නැතුව රටේ තරුණයින්ට ජීවත් වෙන්න සිද්ධ වෙන්නේ නෑ. කොටින් ම ප්‍රභාකරන් කෙනෙක් නෑ.

ඕක 1948 නිදහස හිඟද්දි බෙදා ගත්තා නම් ඉවරයි. අපරාදේ රටේ ඒකීයභාවය වෙනුවෙන් විනාශ වුණු සම්පත්. ඔක්කොම ගඟට කපපු ඉනි වුණා අන්තිමට.

මේ රටට අවශ්‍ය බෙදා පාලනය කිරීම නොව එකාවන්ව නැගී සිටීම. සියලු බෙදා දුරලා ජීවත්වීම. නාමල් රාජපක්ෂ වගේ අය දෙමළ ගෑණු ළමයෙක් විවාහ කරගත යුතුයි. එමගින් ඔවුන්ගේ විශ්වාසය දිනාගත හැකියි.

ඒත් මුන් ආයෙමත් හදන්නේ රධිර ගංගා හෙළා දිනාගත් නිදහස ආරක්ෂා කළ ඒකීයත්වය දොන් ජුවාන් ධර්මපාල වගේ තෑගි ඔප්පුවකින් ලියලා දෙන්න හදන්නේ.

Sunday, January 22, 2012

අන්තවාදී ආගම් පතුරුවමින් සිටි විදේශිකයන් 161ක් පිටුවහල් කෙරේ. පුවතක්

විවිධ දුෂ්කර ප්‍රදේශවල ඉස්ලාම් භක්තිකයින් අතර අන්තවාදී අදහස් ප්‍රචාරය කළ රංචුවක් වහාම රටින් පන්නා දැමීමමට ආණ්ඩුව පියවර ගෙන තිබේ. ඔව් හොඳ වැඩක් මේක. කාටවත් අන්තවාදී ආගමික මතවාද කූට උපාය මාර්ගවලින් ජනතාවගේ හිස්වලට පොම්ප කරන්න ඉඩ දියයුතු නෑ.

හැබැයි මේක ඉස්ලාම් ආගමට විතරක් එල්ල වෙච්චි තර්ජනයක්ද? මීට වඩා දරුණු තර්ජනයකට අද වෙද්දි දුෂ්කර ප්‍රදේශවල ජීවත් වෙන අහිංසක බෞද්ධයින් මුහුණ දී නැද්ද? විවිධ අන්තවාදී කල්ලි නිකාය රංචුවලට අයත් මූලධර්මවාදීන් විවිධ භින්න ඇද බාමින් නේක භෞතික වරප්‍රසාද ලබා දෙමින් බෞද්ධයින් ඉතා වේගයෙන් ඔවුන්ගේ මධ්‍යස්ථානවලට ඇද ගන්නවා. ලොතරැයි කූඩූ වගේ හැම තැන ම එවුන්ගේ පල්ලි හතු පිපෙන්නැහේ මතු වෙනවා. බුදු දහම පිළිබඳ අසත්‍ය මතවාද මේ අහිංසක බෞද්ධයින්ගේ හිත්වලට පොම්ප කරනවා.

ඒ විතරක් නෙමේ දෙව්දත්ගෙන් පැවත එන ඇතැම් චීවර ධාරීන් පවා මෙරට සම්භාවිත ථේරවාදී බුදු දහමට එරෙහිව විවිධ ආගමික දුරාචාකම්වල නිරත වෙනවා. මේ නිසා සාමාන්‍ය බෞද්ධයින් තුළ සිය ආගමික හර පද්ධති පිළිබඳ සැක සංකා උපදිනවා. ඒ තත්ත්වය අන්තවාදී කල්ලිවලට සරු බිමක් සැකසීමක්. මේ විදිහට බෞද්ධයින් විනාශය කරා දක්ක ගෙන යන කල බෞද්ධ කටයුතු අමාත්‍යංශය යෙහෙන් වැජඹෙනවා. ලේකම්තුමාත් යෙහෙන් වැජඹෙනවා. ජනාධිපතිතුමා පෝයට බණ අහනවා. මහා නායක හිමිවරු ආණ්ඩුවේ සහ විපක්ෂයේ මැති ඇමතිවරුන්ගේ රූපවාහිනි බැහැ දැකීම්වල ගරු රඟපෑම් කරනවා.

ඒ විතරක් නෙමේ උතුරු නැගෙනහිර හිංදු භක්තිකයින් ද මේ විදිහට ම සිය ආගමික රංචුවල දක්ක ගෙන යන්න පෙර කී අන්තවාදීන් කටයුතු කරනවා. දුප්පත්කම, කුළ පීඩනය, නූගත්කම ඔවුන් ඒ සඳහා භාවිත කරනවා. ආණ්ඩුව විධිමත් අධ්‍යයනයක් කළොත් පෙනේවි පහුගිය යුද්ධ කාලය මේ අන්තවාදී රංචුවලට උතුරු නැගෙනහිර සිය මූලධර්මවාදී ආගම් පතුරුවන්න අහිංසක හිංදු ජනතාව සරු බිමක් වී ඇති බව. 1980 විතර හිංදු භක්තික ප්‍රතිශතය අද කීයක් වෙලා ඇද්ද? එහෙත් මේ පිළිබඳ කතා කරන්න කිසිවෙක් නැහැ. ද්‍රවිඩ සංධානය අර අර අහිංසකයින්ගේ හිස් මතින් පාර්ලිමේන්තු ඇවිත් ඒ ජනතාව කොහොම ද තමන්ගේ වහල්ලු විදිහට සදාකල් තියා ‍ගන්නේ කියලා කල්පනා කරනවා.

සිංහල දෙමළ කියන්නේ රටේ ප්‍රධාන ජන කොටස් දෙක. එහෙත් ඔවුන්ගේ ආගමික අයිතිය සුරක්ෂිත කරන්න කිසිම රජයක් පියවර ගන්නේ නැහැ. එහෙත් ඉස්ලාම් ආගම වෙනුවෙන් ඕන දෙයක් කරන් මේ ආණ්ඩු සුදානම්. ඉස්ලාම් භක්තිකයින් බෞද්ධ සිද්ධස්ථාන සංහාරයේ යෙදෙමින් ගෙන යන නින්දිත ක්‍රියා මේ ආණ්ඩුව පේන්නේ නෑ. ඒවට විරුද්ධ කිසිම තීරණයක් ගන්නේ නෑ. මොකද ඒක ආගමික සහජීවනයට හානියක්ලු. එහෙම නම් අර ඉස්ලාම් ආගමික අන්තවාදී රංචුවලට සාමාන්‍ය ඉස්ලාම් භක්තිකයින් නොමග යවන්නත් අයිතියක් තියෙනවා නේද? ඒකට බාධා කරලා උන් ටික රටින් පැන්නීම ආගමික සහජීවනයට බාධාවක් කියලා ඇති අපේ අගමැතිතුමාට නොතේරෙන්නේ?

මම කියන්නේ එවුන් ටික රටින් පැන්නීම නරකයි කියලා නෙමේ. ඒ අයිතිය මේ රටේ අනෙක් ආගමිකයින්ටත් හිමි විය යුතු බවයි. ඒ විදිහට ම මේ රටේ බෞද්ධ හිංදු ජනතාවත් සුරක්ෂිත කරන්න ආණ්ඩුව පියවර ගතයුතුයි කියලයි. හොඳ හෝ නරක ත්‍රස්තවාදය කියලා දෙයක් නෑ කියලා ජනාධිපතිතුමා කලකට පෙර කීවා. ඉතින් හොඳ හෝ නරක ආගමික අන්තවාදයක් තියෙනවා ද කියලා එතුමාගෙන් අපට අහන්න සිද්ධ වෙනවා. සියලු අන්තවාදී ක්‍රියා නතර කළ යුතුයි.

Monday, January 9, 2012

අප උගත යුතු පාඩම්!!!

උගත් පාඩම් හා සංහිඳියා කොමිසම සිය වාර්තාව නිකුත් කර තිබේ. එහිලා ඔවුන් කරන ඇතැම් යෝජනා සිය බලය ඉක්මවා යාමක් ලෙස ද විවේචනයට ලක්ව තිබේ. කෙසේ වුව ද ඔවුන් කරන එක් යෝජනාවක් නම් ස්වාධීන පොලිස් කොමිසම සහ ස්වාධීන රාජ්‍ය සේවා කොමිසම යළි ස්ථාපිත කළ යුතු බවය. ඒ යෝජනාව ඉතා කාලෝචිත බව නොකිවමනා ය.

මේ වනි විට පොලිසිය ශක්‍රයා පොලිස්පති ධුරයට පත් කළ ද ගළවා ගත නොහැකි තරමට දේශපාලනීකරණය වී තිබේ. මෙකී දේශපාලන අතපෙවීම් කෙතරම් ද කුඩු කාරයින් මැරයින් පාතාළයින් නීතිය හමුවට පැමිණිවීමට ඇති පොලිසියට උන් ආරක්ෂා කරන්නට ද උන්ට පුද සත්කාර කරන්නට ද සිදුව තිබේ. එසේ නොකළහොත් වහාම දැනට සේවය කරන පොලිස් ස්ථානයට දුර ම පොලිස් ස්ථානයට මාරුවිමට අදාළ පොලිස් නිළධාරියා සිය ඇඳුම් මල්ල සුදානම් කරගත යුතුය.

රාජ්‍ය සේවය ද මේ වන විට ඇමතිවරුන්ට මන්ත්‍රීවරුන්ට සිය ගෝළ බාලයින්ට රැකියා ලබා දෙන ස්ථාන බවට පත්ව තිබේ. කෙතරම් සුදුසුකම් සපිරුව ද දේශපාලන මුක්කුවක් නැතිව රාජ්‍ය ආයතනයක කසළ ශෝධක තනතුරක්වත් ලබා ගත නොහැකි බව ජනතාවගේ පරම විශ්වාසයයි.

මේ නිසා උගත් බුද්ධිමත් තරුණයින් පවා සිය ආත්ම ගරුත්වය බල්ලාට ගියාදෙ‍න් කියා අට අසමත් පළාතේ දේශපාලකතුම‍ගේ පෝස්ටර් ඇලවීමට පාප්ප බාල්දී ඔසවා ගෙන යති. ඔහු වෙනුවෙන් විපක්ෂයේ අපේක්ෂකයින්ගේ පෝස්ටර් ඉරීමට නිවසට ගල් ගැහීසට පමණක් නොව අවශ්‍ය නම් ඔහුට අතින් පයින් සප්පායම් කිරීමට ද තරුණයෝ නොපසු බට වෙති. ඒ කිසිවක් නිසා නොව තමන් ඉල්ලාම් කරන රැකියාව සඳහා අවශ්‍ය දේශපාලන මුක්කුව ගසා ගැනීමටයි.

මේ සමාජ ඛේදවාචකය අවසන් කිරීමට නම් වහා ම උක්ත කොමිසයන් සභා දෙක ස්ථාපිත කළ යුතුය. එය අකර්මන්‍ය විමට බලපෑ සාධක සලකා බලා ඒ සඳහා අවශ්‍ය පියවර ගත යුතු ය. එසේ නොකර තාක් අපට අසන්නට ලැබෙනු ඇත්තේ "මුලින් ම වෙඩි තබා ඇත්තේ මළ එකාය" වැනි විහිළුය.

මෑත දී හම්බන්තොට මරා දැමූ විදේශිකයා මුලින් ම ප්‍රාදේශීය සභා සභාපතිතුමා ඇතුළු පිරිසට එළව එළවා පහර දී ඇති බවත් කෙතරම් ආයාචනා කළ ද පළා යාමට උත්සාහ කළ ද ගැළවීමක් නොවූ තැන සිය ජීවිත ආරක්ෂාව සඳහා පිරිස අසල හෝටලයේ තිබූ පිරිත් පැන් බෝතලයක් කඩා ඉන් සුදු ජාතිකයාට පහර දී ඇති බවත් පොලිසිය සොයාගත හොත් පුදුම නොවන්න.

එමෙන් ම ලිංගික අතවරවලට ලක්ව ඇතැයි සැක කරන ඔහුගේ පෙම්වතිය සිය ඇඳුම් ගළවා දමා පිරිස කුපිත කොට ඇතැ ද ඉන් නොනැවතුණු ඈ මේ දේශපාලක උතුමාගේ හිරිඔතප් බිඳ ඇතැයි ද පොලිසිය කිවහොත් පුදුම නොවන්න. එහෙත් පොලිසිය සමග උරණ නොවන්න. එය පොලිසියේ වරද නොව ඔවුන්ට නිදහසේ රාජකාරී කිරීමට පරිසරයක් නිර්මාණය නොකිරීමේ වරදය.

Tuesday, January 3, 2012

උඳු වපුරා මුං පැතීම

යුද්ධයේදී රණවිරුවන් කළ කැපවීමම සංවර්ධන යුද්ධයේදී රාජ්‍ය සේවකයින් සිදුකළ යුතු යැයි නව වසරේ ආරම්භ කරමින් විමල් වීරවංශ ඇමතිවරයා තමා මෙහෙම කීවේ. දැන් ඉතින් යුද්ධය කළේ කවුද? කොහොමද කියලා ටිකක් පැහැදිලි කරන්න ඕන.

මේ යුද්ධය කවදාවත් දිනන්න බෑ. සාම සාකච්ඡාවලින් මිස විසඳුමක් නෑ කියන මතයේ තමා 2005 වන තුරු මේ රට සිරකරලා තිබුණේ. ඒත් මේ රටට ආදරය කරන දෑ හිතැති විද්වත්තු දශක ගණනාවක් තිස්සේ කීවා මේ සඳහා එක ම විසඳුම ත්‍රස්තවාදය විනාශ කිරීම කියලා. ඒ මතය 2005 පස්සේ අතු ඉතිලා වැඩිලා විශාල වෘක්ෂයක් වුණා.

මහින්ද රාජපක්ෂ මේ මතවාදී කඳවුරේ නායකයා බවට ජනතාව විසින් පත්කර ගත්තා. ඊට පස්සේ සාම සාකච්ඡා බිඳ දමා කොටි මාවිල්ආරූ සො‍රොව්ව වැහීමත් එක්ක ම ඔහු ජනාධිපති, ආරක්ෂක ඇමති සහ සේනාධිනායකයා ලෙස ත්‍රස්තවාදය විනාශ කරන සටනට නායකත්වය දුන්නා.

ගෝඨාභය ආරක්ෂක ලේකම් කරලා චන්ද්‍රික, රනිල් විසින් විශ්‍රාම යන තැනට වැඩ සලස්වා තිබූ ෆොන්සේකා හමුදාපති කළා. හමුදාවට අවශ්‍ය ආයුධ පහසුකම් දුන්නා. අවශ්‍ය චිත්ත ධෛර්යය දුන්නා.

ජනතාව අතර ත්‍රස්වාදය යුද්ධයෙන් විනාශ කළ යුතුව කියන මතවාදය තව තවත් තහවුරු කරන්න මාධ්‍ය ඔස්සේ කටයුතු කළා. ජනතාව එකපෙළට රජය සහ හමුදාව සමග හිට ගත්තා. තරුණයෝ සිය දහස් ගණනින් හමුදාවට බැඳුණා. සෙබළු රණවිරුවන් ලෙස ඔසවා තැබුවා.

මේ අතර කොටි ගැති මාධ්‍ය සහ විවිධ NGO මේ ඒකාත්මිකභාවය බිඳින්න කළ හැකි සියල්ල කළා. බටහිර රටවල් ඒකට උදව් කළා. කොටි වියරුවෙන් මහ මග මිනී මැරීම දෙගුණ තෙගුණ කළා. මේ වෙලාවේ UNP නායකයෝ හමුදාවට හිනාවෙමින් ගරහමින් මේ රටේ විපක්ෂය (ආණ්ඩුවේ නොවේ රටේ) විදිහට තමන්ට කළ හැකි දේ කළා.

ආණ්ඩුවේ මැති ඇමතිවරුත් සිය පඩියෙන් කොටසක් නැවත ආණ්ඩුවට යැව්වා. (සුළු ගාණක් තමා. හැබැයි ඒක ආදර්ශයක්.) ජනතාව නොසැලි හිටියා. තමන්ට හැකි පමණිත් තම පෞද්ගලික වස්තුව පවා හමුදා සෙබලුන්ගේ සුභ සාධනයට දුන්නා. රෝහල්වලට ගිහින් ඔවුන්ට උදව් උපකාර කළා. පන්සල්වල බෝධි පූජා තිබ්බා. හමුදුරුවරු යුද බිමට ගිහින් සෙබලුන්ගේ අතේ පිරිත් නුල් ගැට ගැහුවා.

යුද්ධය අතරමග නතර කොට කොටි රංචුව බේරා ගැනීම සඳහා බටහිර ප්‍රමුඛ බෙදුම්වාදීන් කළ හැකි සියල්ල කළා. රජය ඒ සියල්ල මැනවින් කළමනාකරණය කරමින් හමුදාවට නිදහසේ යුද්ධය කෙළවර කරන්න අවස්ථාව ලබා දුන්නා. හමුදාව තම රුධිරය, අත පය, ජීවිත මව්බිමේ නිදහස වෙනුවෙන් පූජා කරමින් රටට නිදහස ලබා දුන්නා. මෙය සුළුපටු දෙයක් නෙමේ.

හමුදා ඇඳුම දාගත් සොල්දාදුවාට යුද්ධය භාර දීලා ජනතාව වෙන දෙයක් කළා නෙමෙයි. හැමෝම ඒ වෙනුවෙන් කැපවුණා. තමන්ට කළ හැකි දේ කළා. ඒ නිසා මේක හමුදාවේ ජයග්‍රහණයක් නෙමේ ආණ්ඩුව, ත්‍රිවිධ හමුදාව, සිවිල් ආරක්ෂක බලකාය, පොලිසිය පෙරටු කරගත් දේශමාමක ජනතාවගේ ජයග්‍රහණයක්. ඒ වෙනුවෙන් කැපවුණු සැමගේ ජයග්‍රහණයක්. රටේ ජයග්‍රහණයක්. මේ සියලු පෙරමුණු එකමුතුව එකාවන්ව නැගී නොසිටින්න අපට අදටත් ත්‍රස්තවාදය පරාජ කිරීම සිහිනයක් විතරයි.

ඒ නිසා රටක් විදිහට ලද යුද ජයග්‍රහණය ආදර්ශයට ගෙන රට ගොඩ නඟන්න නම් ඒ සඳහා අවශ්‍ය දේශපාලන නායකත්වය රජය ලබා දිය යුතුයි. ඒ වෙනුවෙන් ජන මතයක් ගොඩ නැගිය යුතුයි. ඒ සඳහා රාජ්‍ය සේවකයින්ට අවශ්‍ය දැනුම සම්පත් ආකල්ප ලබා දිය යුතුයි. මුළු රට ම ඒ වෙනුවෙන් පේ විය යුතුයි.

එහෙත් මේ වන විට ආණ්ඩුව ඒ සඳහා ගෙන ඇති ක්‍රියා මාර්ග මොනවාද? ආණ්ඩුවේ ප්‍රධානීන් මහ දවල් වෙඩි තබා මරා ගැනීම, රටට පැමිණෙන සංචාරකයින් ප්‍රාදේශිය දේශපාලකයින් විසින් මරා දැමීම, පළාත් සබ මැති ඇමතිවරුන්ගේ වාහන බලපත්‍ර වටිනාකම ඉහළ දැමීම, ප්ලාස්ටික් ඇසුරුම් භාවිතය වැනි රටට ඉතාමත් වැදගත් තීන්දු තීරණ පවා ආණ්ඩුව සහ ජනතාව අතර අරගල ඇති වන ආකාරයට ක්‍රියාත්මක කිරීම. ඒ විතරද?

නෑ නෑ. හම්බන්තොට වරායේ ගල, විභාග ප්‍රතිඵල ආදී ආණ්ඩුව සහ වගකිව යුතු අංශ අතින් සිදුවූ යම් යම් වැරදි පවා පිළි නොගෙන ජනතාව ගොනාට ඇන්දවීමට උත්සාහ කොට ජනතා කෝපයට සහ අවඥාවට ලක්වීමට කටයුතු කිරීම. මෙවන් ගොන් තකතීරුකම් කරමින් කරනු ලබන උක්ත වර්ගයේ ප්‍රකාශවල උඳු වපුරා මුං පැතීමට එහා දෙයක් ඇතැයි අපට නොසිතේ. එහෙයින් ආර්ථික යුද්ධය ද ජය ගන්ට නම් ආණ්ඩුව සිය වැරදි නිවැරදි කරගෙන ජනතාවට ආදර්ශයක් දිය යුතුය. ඒ සඳහා ලැබුවා වූ 2012 වසර හොඳ අවස්ථාවකි.
 
සිය රට දේ සිරි සැප දේ !