Tuesday, January 26, 2010

මගෙ සිහිනය මට දකින්න ඉඩ හරින්න

මැතිවරණ ප්‍රතිඵල අද මැදියමේ නිකුත් වනු ඇත. මම හවස පොඩි නින්දකින් සැනසුනේ අද ටිකක් රෑ වන තුරු නොනිදා සිටිය යුතු හෙයිනි.මේ අපූරු සිහින දුටුවේ ඒ නින්දේ දී යැ.

එක සිහිනෙක අනුර කුමාර හිටපු සහෝදරයා (ඔහු සහෝදයා වූයේ යූඇන්පිය සමග එකගෙයි කෑමට පෙර හෙයින් දැන් හිටපු සහෝදරයා යැයි පවසමු)දත් කූරුකමින් මැදියම පහන් කරමින් හුන්නේය. බලාගත් අත බලාගෙන මංගල, හකීම්, මනෝ ගනේෂන්,සම්බන්ධන් හුන්නෝය. රනිල් නම් චුවිම්ගම් එකක් හපමින් සැහැල්ලුවෙන් හුන්නේය. හිස් කොලයක් මේසය මත ද පෑනක් අතේ ද විය. කඳුලු පිස දා ගෙන සුසුමක් හෙළා ලියන්නට විය මෙසේ.

"මේක ජනතා මතය රජය නිල බලය මැර බලය යොදා ගෙන අමු අමුවේ කොල්ලකෑමක්. ඉතිහාසයේ අප දැකපු දූෂිත ම මැතිවරණය මේක. මේ සැබෑ ජන මතය නෙමේ. විකෘතියක්. රාජ්‍ය මාධ්‍ය කෙතරම් නින්දිත විදිහට පාවිච්චි කළා ද කිව්වොත් මැතිවරණ කොමසාරිස්ට සිය නිසි බලධාරියා ඉවත් කර ගන්න වුණා.රජය ඉතාම නින්දිත විදිහට විපක්ෂයේ අපේක්ෂකයාට මඩ ගැහුවා. ඒ හරහා ජනතාවගේ ඇස්වලින් තමන්ගේ හොරකම් වහගන්න ආණ්ඩුවට හැකි වුණා.අපි අපේ පන්සලක දේව පූජාවකට ගෙනැවිත් තිබූ ටී 56 තුවක්කු, බෝම්බ මේ ආණ්ඩුව අත් අඩංගුවට අරන් ඒක දේශපාලන වාසි ගන්න පාවිච්චි කළා.මොන තරම් නින්දිතද?අපි ඡන්ද වැඩ කරලා මහන්සි නිසා රට පු‍්‍රා තියෙන පූජනීය ස්ථාන වන්දනා කරන්න අපේ අය යැව්වා. මේ ආණ්ඩුව මොකද කළේ අපි ඡන්ද දූෂණවලට යනවා කියලා රටට ම කිව්වා.අපි සිරිමා සහ පේමදාස ජනාධිපතිවරණය වෙලාවේ හැසිරුණු විනීත විදිහ දන්න රාජපක්ෂ ජුන්ටාව අපිට ඉතාම දරුණු විදිහට මඩ ප්‍රහාර එල්ල කළා.අපි කියන්න ඕන මහින් ද මහත්තයට මේක අවසානය නෙමේ ආරම්භය කියලා.

නමුත් ආණ්ඩුව නිතර කියපු කතාවක් එයාලා ජනාධිපතිවරණයට එන්නේ වැඩි ඡන්ද ලක්ෂ 25ක් එක්ක කියලා. ඒක මොනතරම් ලොකු බොරුවක් ද? ආණ්ඩුවට මහජනතාව බය ගන්වලා,පහරදීලා, මරලා මර්දනය කරලා ලබා ගත්තේ වැඩි ඡන්ද 24 99 999ක් විතරයි. ඒ කියන්නේ ආණ්ඩුවේ බහින කලාව ආරම්භ වෙලා. එදා ආණ්ඩුව සමග සිටි ජනතාව අද ආණ්ඩුව අතහැරලා ගිහින්.ඇත්තට ම ජනතාව මේ ආණ්ඩුව ප්‍රතික්ෂේප කරලා ඉවරයි. අපි ඊළඟ මහ මැතිවරණයේ දී මේ ආණ්ඩුව ගෙදර යවන්න ජනතාව පෙළ ගස්වනවා."

"මේ තමුසේ අපිට කියන්න දෙයක් ඉතුරු කරන්නේ නැද්ද? ඔය ඇති හොඳටම" යැයි බෙරිහන් දෙමින් මංගල,රනිල්,හකීම්,සම්බන්ධන් කඩා පැන්නේ මේ අතරය.

"හරි හරි අපි මේ ටික බෙදා ගෙන කියමුකෝ"

හතර අතින් ඇසෙන රතිඤ්ඤා හඬ නොවන්නට ඒ සිහිනය මට තව බොහෝ වෙලා දකින්නට ඉඩ තිබිණි.ඒ අස්සේ නන්නදා මාලනි අපේ රේඩියෝ කටුවට වී මෙසේ ගයන්නට වූවාය.
"මගේ සිහිනය මට දකින්න ඉඩ හරින්න"
ඒ සමග මට අනුර කුමාර හිටපු සහෝදරයාගේ මුහුණ නැවතත් මැවී පෙනිණි.

Monday, January 25, 2010

අපි පාව දුන්නේ නෑ

සිකුරාදා මරදානේ පැවති අවසන් ජන හමුවේදී රනිල් වික්‍රමසිංහ පැවසුවේ සිය ප්‍රතිපත්ති පාව නොදුන් බවය. අපට ඇති ප්‍රශ්නය ද එයයි. රනිල් පාව දුන්නේත් නැත. සම්බන්ධන් සිය ප්‍රතිපත්ති පාව දුන්නේත් නැත. පාව දුන්නේ ෆොන්සේකා ය.

රනිල්ගේ ප්‍රතිපත්තිය කුමක්දැයි 2002 වසරේ කොටි සමග ඇති කර ගත් ඊනියා සාම ගිවිසුමෙන් පැහැදිළි ය. රටේ කොටසක් කොටියාට ලියා දී වෙනම ඊළාම් රාජ්‍යයක් සඳහා මංගල පස් පිඩැල්ල කැපූ රනිල් සියලු හමුදා බැරැක්කවලට සීමා කර බුද්ධි අංශ සමූල ඝාතනය කරන්නට ඉඩ දුන්නේය. කොටි පොලිසි උසාවි බැංකු ආරම්භ කරන්නට ඉඩ දුන්නේ ය. A 9 මාර්ගය විවෘත කර කොටින්ට බදු අයකරන තුරු බලා සිටියේ ය. ජාත්‍යන්තරයේ කොටින්ට රිසි සේ ක්‍රියා කරන්නට ඉඩහසර දුන්නේ ය. කොටින් ම ඊළම මුළු හදින් ම අනුමත කර ඊට හැකි පමණ උදව් කළේ ය. එය ඔහුගේ ප්‍රතිපත්තියයි. එය වෙනස් වී නැත.

සම්බන්ධන් ඊයේ උතුරේ ජනතාව අමතා කීවේ ෆොන්සේකා ජයග්‍රහණය කළ වහා ම නැවත උතුර නැගෙනහිර එක් කිරීමට සාකච්ඡා අරඹන බවය. එසේ ම සිය ඉල්ලීම් පෙර පරිදි ම බවත් කිසිදු වෙනසක් සිදු වී නැති බවත් ඔහු කීවේ ය. ඔහුගේ ප්‍රතිපත්තිය නම් උතුරු නැගෙනහිර දෙමළ නිජබිම් බවත් ඒ ප්‍රදේශ සඳහා තමන්ට ස්වයං පාලනයක් අවශ්‍ය බවත් ය. කොටින් ම කීවොත් රටේ උතුරු නැගෙනහිර කොටසේ ඊළම තමන්ට හිමි විය යුතු යැයි සිතන බෙදුම්වාදියෙකි; සම්බන්ධන්. ඔහුගේ ප්‍රතිපත්තිය ද වෙනස් වී නැත.

ඒ අනුව වෙනස් වී ඇත්තේ ෆොන්සේකා බව පැහැදිළි ය. නැතහොත් බටහිරට සහ බෙදුම්වාදීන්ට අනුව නැටවිය හැකි රූකඩය ෆොන්සේකා බව පැහැදිළි ය. ඔහු දැන් ඇමරිකන් ඉත්තෙක් ලෙස හැසිරෙන ආකාරයෙන් හෙට දවසේ ඔහුට මේ රටට එරෙහිව කළ නොහැකි ද්‍රෝහිකමක් නොමැති බව පැහැදිළි ය.

දකුණේ ජනතාව අතරට ගොස් යුද්ධය දිනුවේ කොටි සංහාරය කළේ ෆොන්සේකා බවත් යුද වීරයා ඔහු බවත් පවසන එජාපය උතුරට හෝ බටහිරට ගිය කල පවසන්නේ අනෙකකි. ෆොන්සේකා කළේ මහින්දගේ අණ ක්‍රියාත්මක කිරීම පමණකැයි රනිල් වික්‍රමසිංහ GTV වැඩසටහනකට සහභාගී වෙමින් කීවේ ඒ අනුව ය. ඉන් පැහැදිළි වන්නේ ඔවුන්ගේ කුහක දෙබිඩි ප්‍රතිපත්තියයි. දකු‍ණේ යුද්ධය මාර්කට් කර උතුරේ යුද්ධයේ බරපැන මහින්ද මත පටවා සිංහල දෙමළ දෙජාතිය ම රවටා ඡන්දය ලබා ගැනීම ඔවුන්ගේ අරමුණයි.

මේ කුහකත්වය මොනවාට ප්‍රදර්ශනය කරමින් 23 වෙනිදා යාපනේ පැවැති ෆොන්සේකාට සහය දැක්වීමේ රැළියකදී ඝාතනය වූ කොටි සමරමින් විනාඩි දෙකක නිශ්ශබ්දතාවක් පවත්වා තිබේ. දකුණේ ජනතාව රවටමින් උතුර නැවත කොටියාට පවරා දී රට ලේ විලක් කරන්නට මේ ද්‍රෝහී සන්ධානය ගෙන යන දුෂ්ට මෙහෙයුම ජනතාව වහා අවබෝධ කරගත යුතුය. ඊට එරෙහිව සිය ඡන්දය පාවිච්චි කොට මව්බිම මේ උගුලින් ගළවා ගතවා යුතුමය.

ෆොන්සේකා වටේ ඉන්නේ කවුද? අද ඔහුට විරුද්ධව නැඟී සිටින්නේ කවුද? යන්න ඔබ අවධානයට ලක් කළ යුතු ප්‍රධාන කරුණකි. එදා යුද්ධයට විරුද්ධ වූ ඊට කළ හැකි සියලු අපහාස කළ අඩපණ කිරීමට සියලු ගල් පෙරළු එජාපය ද 2007 අයවැය පරදවා ආණ්ඩුව ගෙදර යවන්නට බැරු වූ තැන විවිධ වැඩ වර්ජන කැඳවා රජය අපහසුතාවයට පත් කර යුද්ධය නවතාලීමට උත්සහ කල ජවිපෙද කොටි වෙනුවෙන් පාර්ලිමේන්තුවේ පෙනී සිටි ටීඑන්ඒ කොටි ද අද ඔහු වටා රොක් වී ඇත.

විදෙස් රටවල සිටින කොටි ඩොලර් මිලියන ගණනින් එවමින් ෆොන්සේකාට හුරේ දමමින් සැණකෙළි කරති. එදා ඔහු වෙනුවෙන් පෙනී සිටි රට වෙනුවෙන් පෙනී සිටි යුද්ධයේ ජයග්‍රහණය වෙනුවෙන් පෙනී සිටි සියලු දේශප්‍රේමී බලවේග ඔහුගෙන් වෙන් වී ඇත. එහෙයින් එදා අපේ වීරයා අද ද්‍රොහීයා වී ඇති බවට තවත් සාධක කුමකට ද?

මුළු රටක් ජනතාවක් සමස්ත හමුදාවක් ලද ජය සිය පෞද්ගලික ජයකැයි ද්‍රෝහීන් ලවා සිය භූක්තියට සවි කරගෙන ෆොන්සේකා මේ හැසිරෙන්නේ ප්‍රභාකරන්ගේ අවතාරය ආවේශ වී නොවේදැයි ජනතාව බුද්ධිමත් ලෙස සිතා බැලිය යුතුය. මව්බිම නැවත 1505ට ගෙන යාමට මේ මොහොතේ ඔබ දායක වී ආත්ම ගණනකට ගෙවිය නොහැකි පවක් කර ගන්නවාද? මව්බිමේ සුබ අනාගතය වෙනුවෙන් පෙළ ගැසේනවාද යන්න ඔබ තීරණය කළ යුතුය.

Sunday, January 24, 2010

දකුණේ සිට ලියමි අමතකද සගයිනි එදා ප්‍රැන්සිස්‌කුකරණය

ජනාධිපතිවරණයට තවත් ඇත්තේ හරියට ම දවස්‌ තුනකි. අපේක්‍ෂකයන් විසි දෙදෙනකු තරග කරතත් හටන ඇත්තේ ජනාධිපති මහින්ද හා ඔහුගේ හිටපු හමුදාපතිවරයා වූ විශ්‍රාමික මාණ්‌ඩලික ප්‍රධානි ජෙනරාල් සරත් ෆොන්සේකාත් අතරය. එය සැබවින්ම මහින්දගේ පැත්තෙන් බැලුවොත් සැබවින් ම ඔහුට දෛවය විසින් කරනා සරදමකි.

ඉකුත් ජනාධිපතිවරණයේ දී මහින්දට බොක්‌කෙන් ම උදව් කළ ජවිපෙය මෙදා ඔහු හා උරණ වී ඔහුට එරෙහිව ජෙනරාල් ෆොන්සේකා හටන් බිමට කැඳවීමට පුරෝගාමී වී හිටපු හමුදා ප්‍රධානියා රාජ්‍ය නායකයා කරවීමට පෙරමුණ ගෙන සිටියි. ඒත් ජෙනරාල්ට උදව් කරනා බව කියන්නා වූ එජාපයේ ලොක්‌කන් නම් කරන්නේ ඔහුගේ මූණ අත ගගා ඇහැ ඉලිප්පීමක්‌ යෑයි පොදු මහජනයා කියන්නේ හුඟක්‌ ලොක්‌කන් වැඩ කරනා බව මවාපාමින් ෂේප් නියායෙන් කාල භක්‌ෂණයේ යෙදෙනවාය කියායි.

එජාපයේ ලොක්‌කන් කරනා වැඩේම මහින්දගේ පාර්ශ්වයේ සමහර මැති ඇමැත්තන්ද කරනා බවට උනට චෝදනා මුඛයෙන් ගම්වල ශ්‍රී ලංකා කාරයෝ කියති. ඒ තවත් මාසයකින් දෙකකින් පැවැත්වෙන මහ මැතිවරණයේ දී තම තමන්ගේ මනාප කෙළියට විය පැහැදම් කරන්නට ඔවුනට සිදු වෙන නිසා බව ඒ අයගේ කතාවෙන් අපට වැටහේ.

අද ප්‍රධාන විපක්‌ෂය මෙන්ම ෆොන්සේකාගේ ජයග්‍රහණය උදෙසා කැපවී සිටින ජවිපෙ ඇතුළු සෙසු පක්‌ෂ විසින් මහින්දට එරෙහිව එල්ල කරනා ප්‍රධානතම චෝදනාව නම් රාජපක්‌ෂ සමාගම ඉතා බරපතල අයුරින් දූෂණයේ යෙදී සිටින බවයි. ගෙවී ගිය සිව් වසරක මහින්දගේ පාලන කාලය තුළ මේ රටේ සංවර්ධනය උදෙසා රාජපක්‌ෂ ආණ්‌ඩුව විසින් කරනා ලද සංවර්ධන ක්‍රියාවලිය පසෙකට තල්ලු කොට විපක්‌ෂයෙන් නඟනා දූෂණ චෝදනාවට පමණක්‌ පිළිතුරු සැපයීමට වෙහෙසක්‌ දැරීම නිසා මේ රටෙත්, අනාගත පරපුර වෙනුවෙනුත් කෙරී හා කෙරෙමින් ඇති සංවර්ධන වැඩසටහන් පිළිබඳව කිසිදු කතාවක්‌ බතාවක්‌ වේදිකාවලින් නොඇසීම ගැන ජනතාව දුක්‌වෙති.

ආණ්‌ඩුවට එරෙහිව විපක්‍ෂය දූෂණ චෝදනා එල්ල කළද ඒවා හුදෙක්‌ අවලාද පමණකි. ඔවුන් විසින් කියනු ලබන කිසිදු දූෂණ චෝදනාවක්‌ ඔප්පු කිරීමට මේ වන තුරුත් ජනතාවට පිළිගත හැකි කිසිදු සාක්‌ෂියක්‌ ඉදිරිපත් කර නැත.

විපක්‌ෂයේ දූෂණ චෝදනා එකක්‌වත් මේ දක්‌වා සාධාරණ සැකයකින් තොරව අනාවරණය කරන්නට කිසිදු ආකාරයක පියවරක්‌ නොගත්තත් විපක්‌ෂය විසින් බටහිර බලවතුන්ගේ අවශ්‍යතාවන් අනුව ආණ්‌ඩු පක්‌ෂයේ මහජන නියෝජිතයන්a බිලී බා ගන්නට කෝටි ගණනින් අල්ලස්‌ දී ඇති බවට කදිම සාක්‌ෂිකයක්‌ මහින්දගේ ජයග්‍රහණය වෙනුවෙන් ඇප කැපවී සිටින පිලේ හිටපු ජවිපෙ පාර්ලිමේන්තු මන්ත්‍රී කණ්‌ඩායම් නායකයා වූ විමල් වීරවංශ ඇතුළු ඔහුගේ ජාතික නිදහස්‌ පෙරමුණේ මාධ්‍ය ප්‍රකාශක මුසාමිල් මන්ත්‍රීවරයා විසින් රටට අනාවරණය කර ඇත. එක්‌සත් ජාතික පක්‌ෂයේ මයෝන් මුස්‌තාපා යොදාගෙන බටහිරයන්ගේ ඕනෑකම මත මේ රටේ සංවර්ධන ක්‍රියාවලිය අවුල් කොට ශ්‍රී ලංකාව අරාජිකත්වය කරා ඇද දමන්නට මාන බලනා විපක්‌ෂය් අවස්‌ථාවාදීන් රුපියල් කෝටි තුනක මුදලක්‌ අල්ලස්‌ වශයෙන් දී ඔහු මෙල්ල කර ගන්නට ගන්නා ලදැයි කියන අසාර්ථක උත්සාහය පිළිබඳව දැන් රට තුළ ඇත්තේ මහත් ආන්දෝලනයකි.

මේ ගැන විපක්‌ෂයේ විවිධාකාර කතා කියයි. ඔවුන් ජනතාවට කියන්නේ එය පට්‌ටපල් බොරුවක්‌ බවයි. එමෙන්ම මහින්ද ජනාධිපතිවරණයෙන් අන්ත පරජයකට ලක්‌වෙන නිසා මෙවන් අමූලික බොරු ජනතාව අතරේ පතුරුවා හරින්නට කැස කවන බවයි.

මහජන නියෝජිතයන් බිලි බා ගැනීSමට සල්ලි වීසි කළ අයුරු අප දැක්‌කේ 1964 දීය. ඒ පත්තර පනතට එරෙහිවයි. එදා සිරිමා බණ්‌ඩාරනායක මැතිනියගේ ආණ්‌ඩුව බිඳ දමන්නට ඇමැතිවරුන් ප්‍රමුඛ මන්ත්‍රීවරුන් දහතුන් දෙනෙකුට අල්ලස්‌ දී ලේක්‌හවුස්‌ පත්තර කන්තෝරුව ජනසතු කිරීම වැළක්‌වීමට බව දන්නෝ දනිති. ඒ නාඩගමේ තිරයේ පිටුපස සිටි චරිතයද ප්‍රසිද්ධය. සිරිමා බණ්‌ඩාරනායක මැතිනියගේ ආණ්‌ඩුව බිඳහෙළීම පිළිබඳව එදා ජනතාව කෝප සහගතව ඒ මන්ත්‍රීවරුන් දහතුන් දෙනා හැඳින්වූයේ "පිහි පාටිය" යනුවෙන් බව අද පරපුර නොදන්නවාට වැඩිහිටියෝ හොඳින් දනිති.

මේ වෙලාවේ මගේ මතකයට නැඟෙන්නේ එක්‌සත් ජාතික පක්‌ෂය 1993 දී දෙවන දකුණු පළාත් සභාවේ බලය දිනාගත් අමරසිරි දොඩන්ගොඩට එහි පාලනය නොදී අවනීතිය රජකරවමින් ඇම්. ඇස්‌. අමරසිරි මහ ඇමැති පුටුවේ රැඳවීමට ගත් නින්දනීය ක්‍රියා මාර්ගය අධිකරණයේ නියෝගයට පවා පිටුපා කන් නොදී, රනිල් වික්‍රමසිංහ ලා කටයුතු කළ හැටිය. එච්චර විතරක්‌ නොවේ. අධිකරණයේ නියෝගයට අනුව දොඩන්ගොඩ මහ ඇමැතිවරයා එසේ දිවුරුම් දීමට සූදානම් වෙද්දී එදා එජාපෙ උපදෙස්‌ පිළිපදිමින් දකුණේ ආණ්‌ඩුකාරවරයා වූ අල්හාඡ් බාකිර් මාකාර් මාතලේ වත්තක සැඟව සිටි අයුරු අපට නම් මතකය. ඊටපසු දොඩන්ගොඩ මහ ඇමතිවරයා සේ දිවුරුම් දුන්නදා එ.ජා.පෙ. නියමය පිරිදි පොලිසිය නර බිලි දෙකක්‌ ගත්තු හැටි දැන් හුඟ දෙනකුට අමතකය. මහ ඇමැතිවරයා සේ දොඩන්ගොඩ වැඩ කරගෙන යද්දී ඔහුගෙන් බලය ආපසු උදුරා ගන්නට කුමන්ත්‍රණයක්‌ දියත් කළ එජාප ය පොදුජන එක්‌සත් පෙරමුණේ හම්බන්තොට දිස්‌ත්‍රික්‌කය නියෝජනය කරමින් ආණ්‌ඩු පක්‌ෂ කණ්‌ඩායමේ පළාත් සභා මන්ත්‍රී විමල් ෆ්‍රeන්සිස්‌කු පැහැරගෙන ගොස්‌ කොළඹ සඟවා ගෙන සිටි හැටි දකුණේ ජනතාව අදටත්a කතා කරන්නේ ඔවුන් මැරී උපන්නන් නොවන බව කියමිනි.

ෆ්‍රeන්සිස්‌කු පැහැරගෙන ගියේ දොඩන්ගොඩ මහ ඇමැතිවරයා සිය ප්‍රථම අයවැය නැතහොත් මුදල් ප්‍රකාශනය දකුණු පළාත් සභාවට ඉදිරිපත් කළ දිනට පසුදින විවාදය

ඇරැඹි හෝරා දෙකක්‌ ඉක්‌ම ගිය පසුව බව දකුණේ ඇත්තන් පිරිසක්‌ කරන්නේ බටහිරයන්ගෙන් කඩා ගන්නා ලද කෝටි ගණනක මුදල් කන්දරාවෙන් සොච්චමක්‌ මොහොමඩ් මුසාමිල් මන්ත්‍රීවරයාට දුන් දසරාජ ධර්මයෙන් රට පාලනය කරන්නට සැරසෙන හංසයාගේ තටුවල එල්ලී දිව්‍යලෝකයට යන්නට කැඳවන්නා වූ අදමිටුවන්ගේ මහින්ද පැරදවීමේ එස්‌.එෆ්. කුමනත්‍රණ මෙහෙයුමේ නිරුවත රටටත්, ලෝකයාටත් පෙන්වමින් යෑයි දකුණේ ඇත්තන් අතරේ කෙරෙන කතාවේ ප්‍රධාන මාතෘකාවයි.

එදා ෆ්‍රeන්සිස්‌කු පැහැරගෙන ගියේ කොළ පාට සොරෙකු යෑයි ගාල්ලේ ජනයා කියන්නේ උපහාසයටද? අපහාසයකට දැයි කියන්නට මට නම් නොතේරේ. කොහොම වුණත් ෆ්‍රeන්සිස්‌කු පැහැර ගන්නට ලියුම්කරුගේ මිතුරකුද හවුල් වූ බව පසුව අනාවරණය විය. පළාත් සභාවේ සැසිය දිවා විවේකයට අත්හිටුවූ පසු එහි පරිශ්‍රය තවත් හිතවතකු සමග පැමිණි අපේ මිතුරා ෆ්‍රeන්සිස්‌කු හමුවීමේ අපේක්‌ෂාවෙන් සිටින බැව් ඔහුට දන්වා ඇත්තේ මීට වසර ගණනකට පෙර අපෙන් වියෝවූ ඇමැතිවරයෙකි. ඒ ඇමැතිවරයා මොවුන්ගේ යටි අරමුණ දැන නොසිටි බැව් ෆ්‍රeන්සිස්‌කු ඔහු වෙත කැන්දාගෙන ගිය අපේ හිතවතා මෑතදී සඳහන් කළේය.

ෆ්‍රeන්සිස්‌කු පැහැරගෙන ගියේද කලින් ඇති කරගත් එකඟතාවකට අනුවයි. දොඩන්ගොඩ මහ ඇමැතිවරයාගේ අයවැය පරාජය කිරීමට උදව්වීම වෙනුවෙන් ඔහුට ශ්‍රී ලංකාවේ වලංගු මුදලින් රුපියල් ලක්‌ෂ තිහක්‌ හා කොළඹින් සුඛෝපභෝගී නිවසක්‌ ද දරුවන්ට ගෙන්දගම් පොළොවේ ඇති ජනප්‍රිය පාසල් වරම් ද සපයන බවට අල්ලස්‌ දිගුකර දොඩන්ගොඩට දකුණේ ඡන්දදායකයන් ලබාදුන් ජනවරම කොල්ලකෑමට කළ කුමන්ත්‍රණය ගැන සිහිපත් කරනා දකුණු කරේ ජනතාව මෙදා කරැති කුමන්ත්‍රණය කළවුන්ට නිසි පාඩම ඉගැන්වීමට දින ගනිමින් සිටින්නේ යෑයි අප අමතමින් කියන්නේ රටට එදා දුන් ආදර්ශයද සිහිsපත් කරමින් රටවැසියාට "දකුණේ සිට ලියමි" තීරුව ඔස්‌සේ දැනුවත් කරන්නැයි ඉල්ලා සිටිමිනි.

ඒ අහිංසකයාට රුපියල් ලක්‌ෂ තිහක්‌ දෙනවා කීවාට මේ කුමන්ත්‍රණකරුවන් ඒ මුදල ඔහුට දුන්නේ නැත. කොළඹින් නවීන පන්නයේ ගෙයක්‌ දෙනවා කියා පොරොන්දු පිට පොරොන්දු දුන්නට දීපු ගෙයක්‌ නොව අතු පැලක්‌වත් නැත. අද වන විට ෆ්‍රeන්සිස්‌කු වීරකැටිය ප්‍රාදේශීය සභාවේ මන්ත්‍රීවරයෙකි. ඔහු ලද එකම දායාදය එච්චරය. මේ බොරුකාරයන් කෙරෙහි බලවත් ලෙස කලකිරී සිටින හෙතෙම මහින්ද රාජපක්‌ෂගේ ජයග්‍රහණය වෙනුවෙන් ඇප කැපවී සිටිනා වග අපට කීවේ ෆ්‍රeන්සිස්‌කුගේ ඉතා හොඳ මිතුරෙකි.

මිනිස්‌සු කියන්නේ මේ රටේ රණවිරුවන් මෙහෙයවමින් අපේ යුගයේ සැබෑ රණශූරයා යුද වීරයා වූ ජෙනරාල් සරත් ෆොන්සේකා ශ්‍රී ලංකාවට එරෙහි අද අධිරාජ්‍යවාදීන්ගේ හා සෙසු සියලු ප්‍රතිගාමී බලවේගයන්ගේ කුමන්ත්‍රණයකට හසුවී සිටින කතාවකි. යුරෝපීයයන් අපේ රට කෙරෙහි දක්‌වනා වූ ගිජුකමට හේතුව ඉතා කෙටි කලකින් ලොව මහා බලවතා සේ හිස ඔසවා නැඟී සිටින චීනය වැනි ආසියාකරයේ රාජ්‍යයන් විනාශ කරන්නට නම් ඔවුනට අපේ බිමත්, මෙහි රූකඩ පාලනයකුත් අවැසි බවයි. මහින්ද රාජපක්‌ෂ බටහිරයන්ට නැටවිය නොහැකි අං ගිලපු පුද්ගලයකු සේ තකනා මේ දුෂ්ට හැතිකරය ඌරගෙ මාලු ඌරා පිට තබා කපන්නට කළ කුමන්ත්‍රණයක්‌ ලෙස දකුණු කරේ මිනිසුන්ගේ මතයයි.

බණ්‌ඩාරනායක ඝාතනයෙන් අපේ යුගයේ මේ හැත්ත බුරුත්ත ඇරැඹූ කුමන්ත්‍රණ මාලාවේ දෙවැන්න 62 දී රොයිෂ් ද මැල් ඇතුළු නාවික හා ගුවන් හමුදාවන් හි ලොක්‌කන් ලවා සිරිමා මැතිනියගේ පාලනය අවුල් කරන්නට උත්සාහ ගත්තේ ද යූ.ඇන්.පී යයි. ඊට පසු යූ.ඇන්.පී. කුමන්ත්‍රණකරුවන්ගේ සැලසුම ක්‍රියාත්මක වෙන්නේ ෆ්‍රeන්සිස්‌කුකරණයෙනි. ෆ්‍රeන්සිස්‌කුකරණය නිසා දාහත් වසරක එජපයේ පාලනය අහිමි කර ගන්නටද එදා අගමැතිකම දැරූ රනිල් උන්නැහෙට සිද්ධ විණි. හැම විටකම මේ රටේ ප්‍රගතිශීලී ආණ්‌ඩුවක්‌ රටේ පාලනය ලබාගත් විට කුමන්ත්‍රණයක්‌ කොට එය අවුල් වියවුල් කරන්නට දක්‌ෂකමක්‌ ඇති එජාපයේ නායකයන් චන්ද්‍රිකාගේ පාලන සමයේදී ඇගේ පාර්ලිමේන්තු බලය ඩැහැ ගන්නට ඇගේ ඇමැති මණ්‌ඩලයෙන් පිරිසක්‌ පොදුජන එක්‌සත් පෙරමුණින් කඩාගෙන 2001 දී කළ නාඩගම වසර දෙක හමාරකින් නිමා නොකරන්නට, ජවිපෙ හවුල් නොවී නම්, අද මේ රටින් හරි අඩක්‌ පිරබාහරන්ට ඔප්පුවකින් පවරාදීම නිසා මෙලහකටත් ඊළාම් සිහින රාජ්‍යය ස්‌ථාපිත වී හමාරය.

තිස්‌ වසරක්‌ පුරා පැවැති කුරිරු යුද්ධයේ සාපයෙන් අපේ මව්බිම ගලවා ගන්නට ඇමරිකාව ප්‍රමුඛ සකලාකාර දුෂ්ට බලවේගයන් විසින් කරන ලද තර්ජන ගර්ජන කෙරෙහි දශමයකිනිදු නොසැලී රට ගැනම පමණක්‌ සිතා ත්‍රස්‌තවාදය මේ භූමියෙන් අතුගා දමන්නට එඩිතර වූ උන් හමුවේ ධීරකම් පෑ මහින්ද රාජපක්‌ෂ පන්නා දමා තමනට ඇවැසි රූකඩයක්‌ මේ රට පාලනයට පත් කරගන්නට කැස කවනා නරුමයනට අත්වැල් අල්ලන්නට තරම් ජවිපෙ සගයන් අඳ බාල වූයේ කවර හේතුවක්‌ද, කුමන කාරණාවක්‌ නිසාදැයි අපෙන් දකුණේ හිතවතුන් විමසන්නේ අප ඔවුන් කෙරෙහි පෑ ලෙන්ගතුකම් දන්නා නිසා විය හැක. ස්‌වකීය අතීතය අමතක කරැති ජවිපෙ නායකත්වය කෙරෙහි දකුණේ ජනතාව එක්‌ අතකින් කනගාටු වෙති. විටෙක ඔවුන්ගෙන් නැඟෙන්නේ දෙස්‌ දෙවොල් ය.

පසුගිය දිනෙක නන්දා මාලිනියගේ ගීතයක පද මාලාවක්‌ කිසිවකු විසින් ලිපියක්‌ සමග මගේ නමට එවා තිබිණි. මේ ඒ ගීතයයි.

ලේ කිරි කර දුන් - අපගේ දරුවන්
බිලිගත් මරුවන් - කවුරුද විමසන්
ගෙපැල පහන් සිල නිව්වෝ කවුරුද
රන්කිරි කළ හත බින්දෝ කවුරුද

උතුරෙත් අපගේ කුසහොත් දරුවන්
කවුරුද උන් බිලිගත් මරුවන්
දකුණෙත් අපගේ කුසඔත් දරුවන්
කවුරුද උන් ඩැහැ ගන්නා මැරයන්

අම්මේ පෙම්බර පිසදා කඳුළැලි
ඇසට කඳුළ දුන් තැන් විමසමු අපි
පිටුදැක ඒ ලොව ගන්නා නරබිලි
ගොඩ නඟමුව යහපත් ලෝකය යළි

මහාචාර්ය සුනිල් ආරියරත්නයන්ගේ මේ ගී පබැඳුම ඇය ගායනා කරන ලද්දේ 1992 ජුනි මස 23 වැනිදා කොළඹ නව නගර ශාලාවේ මුළු දුන් මව් පෙරමුණේ දෙවැනි ජාතික මහා සම්මේලනයේ දී රැස්‌වූ දහස්‌ ගණනක මාපියන්ගේ නෙතු උල්පත්වලින් රූරා උණුq ඇහි දිය ඔවුනගේ දෙකොපුල් දිගේ දෝර ගලා බසිද්දී යෑයි එහි සඳහන්ව තිබිණි. මේ වූ කලී දැහැමි සමාජයක්‌ මේ පින් බිමේ ස්‌ථාපිත කෙරනා බවට දිවුරා පොරෙන්දු දී බලයට පත් අදමිටුකමින් ඉහවහා ගිය පාලනයක රුදුරු බව අපූරුවට කියා පන්නා වූ ඓතිහාසික වූ ෙ€දනීය කතාන්තරයක පුංචි සටහනකි. මගේ විශ්වාසය නම් නමක්‌ ගමක්‌ ගැන කිසිදු සඳහනක්‌ නැතව මේ ගී පද මාලාව මා වෙත එවන ලද්දා වූ තැනැත්තේ ඒ මහා කුරිරුවූත් රුදුරු වූත් අවාසනාවන්ත අඳුරු සමයෙහි බැට කෑ මවක හෝ පියකු ය යන්නයි. ඔහු හෝ ඇය හෝ මෙයින් අපේක්‌ෂා කරන්නේ කුමක්‌දැයි අපේ පාඨකයන්ට වැටෙහනු ඇත.

ප්‍රජාතන්ත්‍රවාදය මූලික මිනිsස්‌ අයිතිවාසිකම් හා භාෂණයේත් ප්‍රකාශනයේත් නිදහස මහින්ද රාජපක්‌ෂ සහ සහෝදර සමාගම විසින් ජනතාවගෙන් උදුරාගෙන ඒකාධිපතිත්වයක්‌ කරා මේ පින්බිම ගැන තල්ලු කරනවා යෑයි කියන්නා වූ ඒ සියල්ලෙහි මහා ගැලවුම්කාරයන් සේ කිඹුල් කඳුළු හෙළනා කපටි වූත් කුහක වූත් දේශපාලනඥයන් ගැන මෙනෙහි කරන්නට අප හැමට දැන් කාලය එළඹ ඇතැයි ඒ නිර්ණාමික ලිපිය එවූ තැනැත්තේ වැඩිදුරටත් අකුරු අමුණා සඳහන් කර තිබිණි.

සැබවි... මේ අපට ඒ ගී පදවැල කෙරෙහි වඩාත් අවධානයෙන් සිතා බලන්නට එළඹ ඇති හෝරාවයි.

තවත් හරියට ම දවස්‌ හතරකින් ශ්‍රීලංකාද්වීපයේ හයවැනි රාෂ්ට්‍රාධිපතිවරයාණන් කවුරුන් දැයි ඔබ තීන්දු කර හමාර ය. සිංහල, දෙමළ, මුස්‌ලිම්, මැලේ, බර්ගර් ඈ මේ බිමේ ජීවත් වන්නා වූ සකල ශ්‍රී ලංකාවාසීන් හැම දෙනාටම එක ධජයක්‌ සෙවණේ සාමයෙන්, සහෝදරත්වයෙන්, සහජීවනයෙන්, සහයෝගීතාවයෙන් ජීවත් විය හැකි පසුබිමක්‌ මේ බිමේ ස්‌ථාපිත කොට තුන්වැනි ලෝකයේ තවදුරටත් බඩගාමින් ඉදිරියට යන්නට උත්සාහ කරනවා වෙනුවට වසර දෙදාස්‌ පන්සියයකට වඩා දිගු ඉතිහාසයකට උරුමකම් කියාපාන්නා වූත් ශ්‍රේෂ්ඨ සංස්‌කෘතියකට හිමිකම් දරන්නා වූත් අප ඒ සැම තවදුරටත් සුරක්‌ෂිත කර ගන්නට අවැසි නැණ නුවණින් යුක්‌තව බුද්ධිමත් තීන්දුවකට එළඹුණහොත් එය මේ රටේ වාසනාවකි. ජාතියේ වාසනාවකි. අනාගත පරපුරේ වාසනාවකි.

සුගතපාල මැන්දිස්‌

(ඉරිදා දිවයින - 2010/01/24)
ටිප්පණිය - සුගතපාල මැන්දිස් අප හොඳින් දන්නා අවංක පත්තරකාරයෙකි. හිතවතෙකි. රටට ආදරය කරන්නනෙකි. හරි වැරැද්ද හරියට හඳුනාගත් මිනිසෙකි. දකුණේ ජනමතයේ කැඩපතක් වන් මේ ලිපිය බොහෝ දේ නැවත ගැන සිතන්නට ඔබ පොළඹවනු ඇත.

Friday, January 22, 2010

විජය ඉවත් කළේ ඇයි?

විජය කුමාරතුංග නම් සොඳුරු නළුවා ගායකයා ගැන නොදන්නා ශ්‍රී ලාංකිකයෙක් නොමැත. ඒ සොඳුරු රැඟුම් ගැයුම් කිසිදාක අමතක කළ හැකි ද? අපි කිසිදු පක්ෂ පාට භේදයකින් තොරව ඔහුගේ රඟපෑම්හි ආස්වාදය වින්දෙමු. මියුරු ගී රස වින්දෙමු. ඔහුට ආදරය කළෙමු.

එහෙත් මේ සොඳරු මිනිසාට 1988 පෙබරවාරි 16 වැනි දා වෙඩි තබා මරා දැම්මේ ය. ඒ ජනතා විමුක්ති පෙරමුණේ නියෝගයෙන් ලයනල් රණසිංහ හෙවත් ගාමිණි නම් එහි සාමාජිකයෙකු විසිනි. ඒ ඝාතනය සාධාරණීකරණය කරමින් සිය සාමාජිකයින් අතර ජනතා විමුක්ති පෙරමුණ 'විජය කුමාරතුංග ඉවත් කළේ ඇයි?' යනුවෙන් කුඩා පත්‍රිකාවක් බෙදා හැරියේ ය. එහි සඳහන් වූයේ එදින විජය ඇමරිකන් තානාපති කාර්යාලයේ දිවා ආහාරය සඳහා යාමට සුදානම් ව සිටි බවකි.

මෙයින් පෙනෙන්නේ ජනතා විමුක්ති පෙරමුණට අනුව විජය කුමාරතුංගට ඇමරිකන් එම්බසියේ ආහාර වේලක් සඳහා යාමටවත් අයිතියක් නැති බවය. ඔහු ජවිපෙ සාමාජිකයෙක් නොවේ. වෙනත් දේශපාලන මතවාදයක් දැරුවෙකි. ඔහුගේ දේශපාලන මතවාද අද වුව අප අනුමත කරන්නේ නැත. එහෙත් අතේ ආයුධයක් නැති මිනිසෙක් සමග අප සටන් කළ යුත්තේ මතවාදවලින් නොවෙද?

එහෙත් ජවිපෙට වෙනස් දේශපාලන මතවාදයක් දැරීමේ වරදට එදා විජයට සිය ජීවිතයෙන් වන්දි ගෙවන්නට සිදු විය. ඒ මොහොතේ කිසිදු පක්ෂ භේදයකින් තොරව මුළු රට ම මළ ගෙයක් වූ ආකාරය එවක කුඩාවුන් වූ අපට හොඳින් මතකය. අධිරාජ්‍ය විරෝධි දැඩි මතවාදය වෙනුවෙන් අවංකව ලෙස පෙනී සිටින ජවිපෙ තම සතුරෙකු විනාශ කළේ යැයි සිතා එදා ජවිපෙ සාමාජිකයින් සිත හදා ගත්තා යැයි සිතමු.

එහෙත් අද තත්ත්වය කුමක් ද? ජවිපෙ එදා දැරූ සියලු මතවාද එකිනෙක පාව දෙමින් එහි සාමාජිකයින් වූ අප එම පක්ෂයෙන් පළවා හරිමින් සිටියි.
කලක් මාක්ස්වාදය ද කලක් දේශප්‍රේමය ද නමින් රටේ තරුණයින් 70 000ක් ඝාතනය සඳහා නොමසුරුව සම්මාදම් වූ ජවිපෙ අද තවත් එවන් බිහිසුණු යුගයක් කරා රට වේගයෙන් ඇද ගෙන යමින් සිටියි.

එදා ඇමරිකන් එම්බසියේ කෑම වේලකට යාමට සිටීමේ වරදට විජය මරා දැමූ මොවුන් අද රටට කියන්නේ ඇමරිකන් ග්‍රීන් කාඩ් කාරයෙකුට අපේ රට භාර දෙන්න කියා ය. ඒ වෙනුවෙන් ඡන්දය දෙන්න කියා ය. එදා ප්‍රජාතන්ත්‍රවාදී ලෙස බලයට පත් වූ සිරිමා බණ්ඩාරනායක මරා හෝ පණ පිටින් හයිඩ් පිටියට රැගෙන එන්නට මහා බිහිසුණු කුමන්ත්‍රණය කළවුන් අද කිසිදු හිරිකිතයක් නැතිව හයිඩ් පිටියේ ම ප්‍රජාතන්ත්‍රවාදයේ රන් දෙවොල තනන්නට ගිරිය පුප්පගෙන උඩු බුරති. එදා කොල කොටියා යැයි රනිල්ට බැණ වැදුණුවුන් අද රනිල්ට අත්වැල් ගායනා කරති. එදා පාර්ලිමේන්තු කොටි යැයි සම්බන්ධන්ලා ගැරහු අය අද සම්බන්ධන්ගේ මුර බල්ලන් ලෙස හැසිරෙති. එදා යුද හමුදා මාණ්ඩලික ප්‍රධානියාට බලතල දී රට හමුදා පාලනයකට බිලි දෙතැයි කී උන් අද ඒ වෙනුවෙන් හෙළුවෙන් පෙනී සිටිති. මේ විපරිතයන් ජනතාව අවබෝධ කරගන්නේ කෙසේ ද?

1994 සිට 2005 දක්වා ප්‍රගතිශීලි ගමනක් ගිය ජවිපෙ සමග සිටි කලාකරුවන් දැන් එකෙක් එහි නැත. ඉතිරි වූවන් සිටියත් නැති ගාණය. රට අමු සොහොනට ඇද ගෙන යනු දැක දැක සංවේදි කලාකරුවෙකුට තව දුරටත් ඒ වෙනුවෙන් පෙනී සිටිය හැකි ද? 2005 එජාපයට සහය දැක්වූ කලාකරුවන් අද මහින්දගේ ජයග්‍රහනය වෙනුවෙන් පෙනී සිටිති. පගා බලකායට අනුව නම් ඒ මුදලට ය. කලාකරුවන් මුදලට ගත හැකි විණි නම් මේ සියලු කලාකරුවෝ අද ෆොන්සේකාගේ වේදිකවේ රඟනු අති බවට කවර නම් සැකයක් ද?

රූකාන්ත ගුණතිලක, සනත් නන්දසිරි, අබේවර්ධන බාලසූරිය, ලතා වල්පොළ, උපුල් ශාන්ත සන්නස්ගල, සමන් ද සිල්වා, හඩ්සන් සමරසිංහ ආදි එජාපය වෙනුවෙන් එදා පෙනි සිටි අය අද ඔවුන් අතැර ගියේ ඇයිදැයි අවංකව සොයා බලනු වෙනුවට වල්පල් දොඩවති. කඩේ යනවා යැයි කියති. කඩේ යනවා නම් යන්නේ සිය ජීවිත ආරක්ෂාව පතා විය යුතුය.

එදා භීෂණය රජ කළ එජාප පාලන සමයේ කලාකරුවන් මාධ්‍යවේදීන් 40ක් පමණ එජාප සහ ජවිපෙ මිනිමරුවන් මරා දැම්මේ තරගයට මෙනි. ප්‍රේමකීර්ති ද අල්විස්, තේවිස් ගුරුගේ, ස්වර්ණලතා කවීශ්වර, විජය කුමාරතුංග, රිචඩ් ද සොයිසා ආදීන් මරා දැමූ මහා භීෂණ යුගය එදා එජාප නායකයින් ජනතාව අතරට ගෙන ගියේ ධර්මිෂ්ට සමාජය නම් සුන්දර දවටනයේ ඔතා සරසා බව අප අද දවසේ සිහිපත් කරගත යුතුය. මෙදා යහපාලන පොරොන්දුවල ඔතාගෙන රැගෙන එන හලාහල විෂ හෙට දවසේ රටේ තවත් පරපුරක් අමුසොහොනට ඇද නොදමනු ඇතැයි කිව හැක්කේ කාට ද? එසේ දංගොඩියට දක්කන මුල් පෙළේ ම ජවිපෙ දෙවන පෙළ සාමාජිකයින්ට ලොකු ඉඩක් ලැබෙනු ඇත. එහෙයින් වරක් දෙවරක් නොව සිය දහස් වරක් සිතා ඔබේ ඡන්දය පාවිච්චි කරන්න. මුළු රටක් අසීමිත කැපකිරීම් මැද නිදහස් කරගත් දේශය නැවත අමුසොහොනක් වන්නට ඉඩ නොදෙමු. අපි කොටි වෙනුවෙන් නොව රට වෙනුවෙන් නැගී සිටිමු.


Thursday, January 21, 2010

පාවා දෙනවුන්ගේ මූණට කෙළ ගසනු!

සම්බන්ධන් සමග ජෙනරාල් සහ රනිල් අත්සන් කළ ගිවිසුම ගැන මේ රටේ ප්‍රගතිශීලි ජනාතව චෝදනා කළ කල්හි එජාපය සහ ජවිපෙ 'දිවි පරදුවට තබා රටේ ඒකීයභාවය ආරක්ෂා කර දුන් ජෙනරාල් රට බෙදයි ?' යි පෙරළා ප්‍රශ්න කරති. එහෙත් මෙසේ ජනතාව ප්‍රශ්න අසන්නේ කවුද?

කෙනෙක් එජාපයේ පතාක යෝධයින් වූ ආර්.පේමදාස, ලලිත් ඇතුලත්මුදලි, ගාමිණි දිසානායක ආදින් ඝාතනය කළ කොටි සංවිධානයට 2002 සටන් විරම ගිවිසුමෙන් රට පාව දුන් දොන් ජුවාන් වික්‍රමසිංහය.

අනෙකා ජවිපෙ නායක රෝහණ විජේවීර ඇතුලු සාමාජිකයින් 60 000ක් මරා දැමු එජාපයට සිය පක්ෂය පාවා දුන් සෝමවංශ අමරසිංහය.

යුගයේ දැවැන්ත පාවා දීම් දෙකක පියවරු මැද සුරතලා බවට පත්ව ඇති ජෙනරාල් ගැන ජනතාව තුළ බිය සැක ජනිත වීමේ කවර අරුමයක් ද?

දැන් අපි ජෙනරාල් දෙසට හැරෙමු. විශ්‍රාම යන්න දින 12ක් තිබිය දී ඔහුට හමුදාපති තනතුර ලබා දෙන්නේ ගෝඨාභයගේ නිර්දේශය මත මහින්ද ය. විපක්ෂයෙන් ඔහුට අනේක නින්දා අපහාස කරද්දි ඔහු ආරක්ෂා කළේ රජයයි. මාරාන්තික තුවාල ලැබූ විට සිංගප්පූරුවට යවා ඉහළ වෛද්‍ය ප්‍රතිකාර ලබා දී සුවපත් කළේ රජයයි. ඔහු නිල කාලය තුළ ලංකාවේ ප්‍රථම ජෙනරාල් කළේ රජයයි. මාණ්ඩලික ප්‍රධානි කළේ රජයයි. මිලියන 300ක් පමණ වටිණා ඉඩමක් ද මිලියන 40ක නවීන රථයක් ද දුන්නේ රජයයි. තවමත් ඔහුගේ දියණියන් ඇමරිකාවේ ඉගෙන ගන්නේ ජනපති අරමුදලින් යැවෙන මුදලිනි. මේ සියල්ල ලබා ඔහු කළේ රජය පාව දීමයි.

හමුදාවේ තවත් එක් නිලධාරියෙකු ලෙස විශ්‍රාම යාමට නියමිතව සිටි ෆොන්සේකා යුද වීරයෙක් වූයේ 4 වැනි ඊළාම් යුද ජයෙනි. එහිදි ඔහු සිටියේ සටන් බිමේ නොවේ. රටේ සේනාධිනායක මහින්දගේ නියෝග ඔහු ක්‍රියාත්මක කළේ කොළඹ යුද හමුදා මූලස්ථානයේ සිට ය. නැතහොත් වවුනියාවේ සිට ය. (ඔහුට ප්‍රහාර එල්ල කරන්නට කොටින්ට යුද හමුදා මූලස්ථානයට ඒමට සිදු වූයේ ඒ නිසා ය.) සටන්බිමේ සිට යුද්ධය මෙහෙය වූයේ සේනාංකාධිපතිවරුය. එහිදි කොටි අඩවියේ විශාලතම භූමි ප්‍රමාණයක් නැවත ශ්‍රී ලංකා භූමියට එක් කළේ 58 වැනි සේනාංකයයි. එයට නායකත්වය දුන්නේ ශවේන්ද්‍ර සිල්වා ය.

ඔහු කවුද ? 2002 එවක අගමැති වික්‍රමසිංහගේ ගිවිසුම යටතේ A 9 මාර්ගය විවෘත කළේ ය. එහි දී දකුණේ ජනතාවට උතුරට යාමට අවස්ථාව උදා විය. එකල ඇතැම්හු හකුරු කෑල්ලටත් කොටින්ට බදු ගෙවා උතුරට ගිය අයුරු අපට මතකය. කොටි පොලිසි,උසාවි,නීති විද්‍යාල, මුදල්,මුද්දර ඈ සියල්ලෙන් සමන්විත රාජ්‍යයකි: එකල උතුර. එදා A 9 මාර්ගය විවෘත කරද්දි සියලු දෙනා කොටින්ට අතට අත දෙද්දි උන්ට සිය අත නොපා නිහඬව සිය විරෝධය පළ කළ වීරයා ශවේන්ද්‍රය. 4 වැනි ඊළාම් යුද්ධය යුද බිමේ සිට මෙහෙය වූ ශවේන්ද්‍ර, එවක හමුදාපතිගේ සිය අණ ක්‍රියාත්මක කළ ශවේන්ද්‍ර ජාත්‍යන්තර අධිකරණයට පාව දුන්නේ ෆොන්සේකාය.

තමා වීරයෙක් කළ යුද්ධය යුද බිමේ සිට මෙහෙ වූ තමා යටතේ සේවය කළවුන් පාව දෙන්නෙකු ජනතාව කෙසේ විශ්වාස කරන්න ද? තමා ඉහළට ඔසවා තැබූ ඉණිමගට පයින් ගහන කෘතගුණ නොදත්තකු ජනතාව කෙසේ විශ්වාස කරම් ද? ඡන්දය වෙනුවෙන් අවි නොදරන කොටි සමග එක පෙළට සිට ගත් මිනිසෙකු රටේ ආරක්ෂාව තහවුරු කරතැයි කෙසේ විශ්වාස කරන්න ද? යුද, ගුවන්, නාවික, පොලිස්, සිවිල් ආරක්ෂක ආදී සියලු විරුවන් එකතු වී දේනාධිනායක මහින්ද සහ ගෝඨභයගේ අධීක්ෂණය මත ලද සහ සියලු ජනතා අසීමිත කැපකිරීම් මත ලද යුද ජය යුද හමුදාවට අණ දුන් තමා ලද ජයකැයි උදාම් අනන්නෙකු ජනතාව කෙසේ විශ්වාස කරන්න ද? ඇමරිකාවේ වොෂින්ටන් විහාරයට ගොස් හිරේ සිටින කොටි 10 000 විනාශ කළ යුතු යැයි කියා සතියක් ගිය තැන ඔවුන් නිදහස් කරමියි පවසන්නකු කෙසේ අදහම් ? තමා දේශපාලනයට කිසිදා නොඑනා බවත් ආවොත් ලොව අසාර්ථකම දේශපාලකයා තමා වනු ඇතැයි කියා දේශපාලන වේදිකාවට ගොඩ වී මම කී දේ කරමියි කියා නන්දොඩවන්නෙකු ජනතාව කෙසේ අදහම් ද?

සම්බන්ධන් සමග ගිවිසුමක් අත්සන් නොකළේ නම් රට පාවා නො දේ නම් ඔවුන් කළ යුත්තේ රනිල්, මංගල, හකීම්, මනෝ, සම්බන්ධන්, සෝමවංශ එක මාධ්‍ය සාකච්ඡාවක් පවත්වා රටේ ඒකීයභාවය සුරකින බවට ජනතාවට පොරොන්දු වීමය. එසේම ෆොන්සේකාට සහය දෙන, තමා සහ ෆොන්සේකා අතර ගිවිසුමක් ඇතැයි කියන සම්බන්ධන්ගේ ගෝළයින් වන තුරෙයිරත්නසිංහම්, තංගේශ්වරී, ශිවශක්ති ආනන්දන් ලවා එසේ ගිවිසුමක් නැතැයි යළි ප්‍රකාශ කරවීම ය. සම්බන්ධන් සහ ෆොන්සේකා ගිවිසුමක් ගැහුවා යැයි කියන ශවාජිලංගම්ගෙන් නිදහසට කරුණු විමසීමය.

එවන් සුළු දෙයක් කළ නොහැක්කේ ද්‍රෝහී ගිවිසුමක් රටට බෙදන ගිවිසමුක් අත්සන් කළ නිසා නොවෙ ද? එහෙයින් ජනතාව මේ ද්‍රොහී හවුල පරාජය කරන්නට අදිටන් කරගත යුතුය. පාවා දෙනවුන්ට ඡන්දය නොව මූණට කෙළ ගැසිය යුතුය.





Tuesday, January 19, 2010

කවුද ජේවිපිකාරයෝ?

බොහෝ වැඩ ගැස්සි යෑමෙන් පසු පාත්ත සන්ධානයේ ඇත්තෝ මහත් මුසුප්පුවෙන් යුතුව නැවත රැස් වූහ. එහිදී ඇති වූ කතාබහෙන් බිඳක් මෙසේ ය.
අනුර - රවි, ඔයාල තමා sfගේ කැම්පේන් එක අෆ්ෂට් කළේ. අරූව සල්ලිවලට ගන්න ගිහින්. දැන් ඉතින් ආයේ ඔළුව උස්සනවා බොරු.
රවි - එහෙම අපිට චෝදනා කරන එක වැරදියි. ඔයා අපි දැනුවත් කරලා තිබ්බා නම් මේ කරුමෙට අපි කරගහන් නෑනෙ. අපි හිතුවෙ ඌත් ඔයාල වගෙ කියලනෙ.
මුස්තාප - යැත්ත තමා. මාත් ඉතුවේ ඌ යපි වගේ කියලා. යපේ ඩාතියේ නම්පුවත් නෙති කළා. පරයා.
අනුර - මේ රවි, තමුසෙට පිස්සුද? උන් කොහොමද අපි වගේ වෙන්නේ. ඕකුන්ට කිසිම ප්‍රතිපත්තියක් නෑ. පංතිය පාව දෙන හතුරො.
රවි - මෙතන නිකන් බුරන්න එපා. මොකක් ද තමුසෙලගෙ ප්‍රතිපත්තිය? දානව බල්ලට ඒක.මගෙ කට අවුස්ස ගන්න එපා. අපි හිතුවෙ තමුසෙලා වගේ උනුත් සල්ලිවලට ගන්න පුළුවන් කියලා. අනෙක අපි තමුසෙලට දුන්න ගාණ වගේ දෙතුන් ගුණයක් දීලත් ඌව ගන්න බැරි වුණා. ඒ කියන්නේ නියම ජේවීපිකාරයෝ කවුද කියලා අපි දැනගත්තා. රටත් දැනගත්තා.
අනුර - ආ .. එහෙම කතා කරන්න එපා. තමුසෙ කියන්නේ මුසාම්මිල්ලා නියම ජේවීපිකාරයෝ. අපි තමා පාව දෙන අය කියලද?.
රවි - ඔව් එහෙම තමා. මිනිහා අපිට කෙළිය තමා. නමුත් මිනිහා ගැන ඇත්තට ම මට පැහැදීමක් තියෙන්නේ.
අනුර - එහෙම කියන එක වැරදයි. අපටයි පක්ෂයේ නීතිමය අයිතිය තියෙන්නේ.
රවි - ඔව් තමුසෙල තමා බෝඩ් ලෑල්ල උස්සන් යන්නේ.
අනුර - හරි හරි අපේ ප්‍රතිපත්ති ගැන පස්සෙ කතා කරමු. දැන් sf දිනවන විදිහ ගැන කතා කරමු.
රවි - තමුසෙලට නම් හොදටම පිස්සු. මිනිහට දිනන්න තියා ඡන්ද ලක්ෂ 47ක් ගන්න පුළුවන් නම් අපේ ලොක්කා කවදාවත් ඔය අපේක්ෂකත්වය දන් දෙනව ද?
අනුර - එතකොට sf පරදිනවද?
රවි - ඔව් ඉතින් දෙන්නෙකුට දිනන්න බෑනේ. තමුසේ අපේ වේදිකාවේ නැගලා කෑ ගහලා කීවේ මහින්ද රාපක්ෂගේ ජයග්‍රහනය වළක්වන්න බෑ කියලා.
අනුර - ආ අපි විතරද? එතකොට මැංගි කීවේ අපේ පරාජය වළක්වන්න බෑ කියලා.

Monday, January 18, 2010

පුංචි පහේ මං

මෙවර සිරසක් නැතිවුන්ගේ නාළිකාවේ පුංචි පහේ මං වැඩසටහනට සහභාගී වූයේ දයාසිරි ජරාජසේකර මැතිතුමා ය. ගියවර ජනාධිපතිවරණයේ දී sms ජනාධිපති පත් කර මුළු ලෝකය ම හිනැස්සු එකී කවට නාළිකාව මෙවර ව්‍යාජ මධ්‍යස්ථ බවක් පෙන්වීමට මේ ප්‍රශ්න මාලාව සකසා ඇත. එහෙත් මෙහි ඇතැම් පිළිතුරු උඩයට මාරු වී ඇත. ඇතැම් පිළිතුරු පාත්ත සන්ධානය අප හමුවේ මවාපාන වර්තමාන දේශපාලන පරිසරයට උචිත ලෙස සකසා ඇත.

ලංකාවේ රජවරු කී දෙනකේ පාලනය කළා ද?
1187

ඒ අතරින් රට එක්සේසත් කළ රජවරු කී දෙනා ද?
11

මේ නාමාවලියට අලුතින් නම ඇතුළත් කරගත් රජතුමා කවුද?
සරත් ෆොන්සේකා

රුවන්වැලි සෑය තැනුවේ කවුද?
දුටුගැමුණු රජුගේ ගෝඨයිම්බර නම් සෙනවියා

තොප්පිගල වනාන්තරයක් බව සොයා ගත්තෙ කවුද?
දොන් ජුවාන් වික්‍රමසිංහ

ඕන ගොනෙකුට යුද්ධ කළ හැකි බව පැවසූ ශ්‍රේෂ්ඨ දේශප්‍රේමියා කවුද?
ලක්ෂ්මන් කිරිඇල්ල

කළුතර නම් දරන්නේ මැංගුස්ටින් සඳහා නම් අම්බලන්ගොඩ ප්‍රසිද්ධ මොනවාට ද?
රූකඩවලට

1964 රු. 75 000ට ශ්‍රීලනීප ආණ්ඩුව පාවා දුන් උතුමාගේ පුත්‍ර රත්නය කවුද?
අවමංගල හැකරවීර

එවන් උතුමන් ගොඩ නැඟු පාත්ත සන්ධානය යහපාලනය ගොඩ නැගීමට සහ දූෂණ මුලිනුපුටා දැමීමට මන්ත්‍රිවරයෙකුට ලබා දෙන තුටු පඬුරේ වටිණාකම කීය ද?
ලක්ෂ 300යි

ඩෙන්සිල් කොබ්බෑකඩුව මුල් වී ඇරඹු ජයග්‍රාහි වඩමාරච්චි මෙහෙයුම ඉන්දිය බලපෑම් හමුවේ නතර කළේ කවුද?
එකල හමුදාපති ජේ.ආර්.ජයවර්ධන

සිය ධූරයේ සිට ඇමරිකන් ග්‍රීන් කාඩ් ඉල්ලූ ලොව ප්‍රථම හමුදාපති කවුද?
මහින්ද රාජපක්ෂ

තැන තැන කඳවුරු බැඳ සිටි සොළින් එළවා රට එක්සේසත් කළේ 2 වන පැරකුම් රජතුමා (1250-1285) නම් 2009 ලංකාව එක්සේසත් කළ රජතුමා කවුද?
සරත් ‍ෆොන්සේකා

තමා හමුදා පාලනය ගැන මිස දේශපාලනය කිසිවක් නො දන්නා බවත් දේශපාලනයට පැමිණිය හොත් ලොව අසාර්ථකම දේශපාලකයා තමා වන බවත් පැවසුවේ කවුද?
මහින්ද රාජපක්ෂ

'ලොවෙන් එකෙක් එක දෙයකට වෙයි සමත' නමැති රුවන් වැකියේ ඊළඟ පදය කුමක් ද?
‘ලොවින් එකෙක් එක් දෙයකට වෙයි සමත
දෙකක් කළොත් අවසානෙදි දෙක ම නැත’

පේක්ෂක ඔබට යොමු වන ප්‍රශ්නය -
ඉහත කියමන ලබන 26 වෙනිදා සත්‍යයක් බව තහවුරු කරන්නේ කවුද?

නිවැරදි පිළිතුර වහාම කසාපබ්බතට ලියන්න. ජයග්‍රාහකයාට වටිණා දඩමස් පාර්සලයක් සහ තල් රා මුට්ටියක් තෑගි.
සැනසිලි තෑගි - රු. 10 000ක් වටිණා ගංජා සුරුට්ටු 100ක්

මමයි දිනුවේ

ප්‍රශ්නය - සිව් වැනි ඊළාම් යුද්ධය ජය ගැනීමට ජනාධිපතිවරයාගේ දේශපාලන නායකත්වය බලපෑවේ කොහොමද ?

පිළිතුර - පිස්සු කොළඹ බිම් ගෙවල් යට හැංගිලා ඉඳලා පුළුවන් ද යුද්ධ කරන්න. මගේ නායකත්වයෙන් යුද්ධය දිනුවේ. දැන් එනවා ජයග්‍රහණය බෙදා ගන්න.

ප්‍රශ්නය - ආරක්ෂක ලේකම්ගේ දායකත්වය කොහොම ...?

පිළිතුර - මනස්ගාත ඇමරිකාවේ අවු. 15ක් කොම්පියුර් ගහලා ආව එයා මොනවද යුද්ධය ගැන දන්නේ. මම මේ මෙහෙයුම සම්පූර්ණයෙන් සැලසුම් කළේ.

ප්‍රශ්නය - මාවිල් ආරුවලින් පටන් ගෙන මුළු නැගෙනහිර ම දිනපු මෙහෙයුමට නායකත්වය දුන්නේ දයා රත්නායක ...?

පිළිතුර - හැබෑට විකාර ද මේ වගේ ගොන් කතා දොඩවන්නෙ. මම මාවිල්ආරුවේ කර වටක් බැහැලා දිවි නොතකා සටන් කරලා නැගෙනහිර දිනාගත්තේ.

ප්‍රශ්නය - නාවික හමුදාව කොටි නැව් 10ක් විනාශ කළා ඒක ජයග්‍රණයට විශාල ...?

ප්‍රශ්නය - 58 වැනි සේනාංකයේ ශවේන්ද්‍ර සිල්වා තමා විශාල බිම් ප්‍රමාණයක් නැවත අල්ල ගත්..

පිළිතුර - බම්බුව තමා. එයා සුදු කොඩි අරන් එන එවුන්ට වෙඩි තිබ්බා. වෙන කරපු දෙයක් නෑ.

පිළිතුර - ඔය වගේ පාහර කතා කියන්න එපා. යුද්දේ තිබ්බේ ගොඩබිම. මමයි යුද්ධය දිනුවේ.

ප්‍රශ්නය - ගුවන් හමුදාව කොටි ඉදිරි ආරක්ෂක වළලුවලට පහරදීම විශාල ...?

පිළිතුර - ඔය ඔක්කොම බොරු කතා. අද ආණ්ඩුවට ඕන මේ ජයග්‍රහණයේ ගෞරවය මගෙන් උදුර ගන්න. ඒකයි ඔය බොරු කියන්නේ.

ප්‍රශ්නය - එතකොට ලක්ෂ්මන් කිරිඇල්ල මහත්තයා කියන කතාව ඇත්ත ද?

පිළිතුර - ඔව්, සත්තකිත් ම ඇත්ත, එතුමලා එදත් අදත් ඇත්ත වෙනුවෙන් පෙනී හිටපු අය. කවදාවත් බොරු කීවේ නෑ රටට.

ප්‍රශ්නය - ඒ වුණාට මම හිතන්නේ ..

පිළිතුර - නෑ නෑ දෙපාරක් හිතන්න දෙයක් නෑ. අපි ගැන ඇත්ත කියනවට තමුසෙලා කැමති නෑ. ඒකයි ඕවා හංගන්නේ. කියනවා රටට ම මොනව ද එතුමා කීවේ කියලා?

පිළිතුර - ඕන ගොනෙකුට යුද්ධ කරන්න පුළුවන් කියලා.

Thursday, January 14, 2010

මහා නාග කතා වස්තුව


තවද එක් සමයෙක්හි රජගහ නුවර බ්‍රහ්මදත්ත නම් රජ්ජුරු කෙනෙක් රාජ්‍ය විචාරන කල මිහින් නම් අහිකුණ්ඨකයෙක් සිය හීලෑ නාගයා නගරට ගෙන ගොස් නටවා ජීවිකාව කර ගත්තේ ය. මිහින්ගේ නාළා හඬට සුන්දර රැඟුම් පාන නාගයා ටික දිනකින් මුළු නුවර ම ජනප්‍රිය විය. තම තමන්ට විවේක ඇති විට මිහින් නයි නටවන්නා වෙත පැමිණ නාග රැගුම් බලා සතොසින් කහවණුයෙක් දෙකෙක් දී යෑම නුවරු පුරුද්දක් කරගත්හ. මෙහෙයින් කෙමෙන් මිහින්ගේ අතමිට සරු විය. හෙතෙම ඒ මුදලින් සිය නාගයා රස මසවුලෙන් සනහා සිය සුතඹුවන් සන්තර්පණය කරමින් යුතුකම් ඉටුකරමින් යෙහෙන් දිවි ගෙවීය.

එකල ඒ නුවර ම තවත් තැනක නයි නටවන්නකු දෙන්නෙකු සිටිය ද උන් වෙත එකදු වැසියෙක් ගියේ නොවේ. කෙමෙන් කෙමෙන් සිය දිවි ගැටගසා ගැනීම උන්ට මහ සටනෙක් විය. ආ උන් පවා මෙකල කලාකකරුවන්, විද්වතුන් මෙන් උන්ට සමච්චල් බසින් සංග්‍රහ කර යන්ට හැරුණෝ ය. මේ ගැන මුසුප්පුවට පත් නයි නටවන තෙමේ තම නැටුමින් සන්තෝෂ නොවන්නේ මන්දැයි නුවරුන්ගෙන් විමසූහ. එකල උන් මෙසේ පිළිතුරු දෙති.

ඇදුර තුටු නො වෙතියි
නො සිත'ප සිප් නො දනිතියි
සිතිමු සැරසීතියි
නොදත්තෙමු නා නැටුම් පාතියි

මේ තෙපුලින් මහත් නින්දාවට පත් ඒ නයි නටවන්නෝ පෙර කී මිහින් නයි නටවන්නාගේ සමත්කම් අසා උන් කෙරෙහි වෙර බැඳ ගත්හ. තම ජීවිකාව අහිමි කළේ මිහින්ය යන බොළඳ සිතුමෙන් අඳ ව ගිය උන් සිය නැටුමෙහි අඩු තැන් සදා ගනු වෙනුවට මිහින් නයි නටවන්නා විනාශ කළ හැකි මං සොයමින් දිවා රෑ නිදි නො ලබමින් මහත් තැවුලින් දවස් ගෙවන්නට විය.

මේ කිසිවක් නොදත් මිහින් නයි නටවන්නා පෙර සේ සතුටින් සිය ජීවිකාව කර ගෙන ගියේ ය. නාගයා ද උතුරා යන ස්වාමි භක්තියෙන් යුතු ව දින දින නේක අසිරිමත් රැඟුම් පා නුවරුන්ගේ සිත් දිනමින් ද ස්වාමියා වෙත යසස ම සදමින් ද හුන්නේ ය. මිහින් කෙරෙහි පමණක් නො ව උහුට යසස සදන නාගයා නෙරෙහි ද මහත් වෙර බැඳ ගත් වෛරී නයි නටවන්නෝ මුන් කෙසේ වනසමි දැයි සහස් අත කල්පනා කරන්නට වූහ. උන් දෙදෙන අතර ඇති තර බැඳීම කෙසේ හෝ වනසා මිස සිය පාපිෂ්ට ආශා සතපා ගත නො හැකි බැව් දැන ගත් වෛරී නයි නටවන්නන් ඒ බැඳුම් බිඳ මිහින් ද නාගයා ද විනාශ කරලන්නට මර උගුලෙක් ඇටවීය. ඒ උපාය නම් නාගයාගේ අසමත්කම්, දූෂණ ගැන කියා මිහින්ගේ සිත නාගයා කෙරෙහි බිඳවීම ය. මෙවැනි ආනන්තරිය ගණයේ මහා පාප කර්ම සඳහා ම නම් දැරූ දිව දෙකේ පොළඟා ඒ සඳහා යෙදවිණි.

"මේ මෝඩ නාගයා මිහින් යටතේ නැටීමට නො ව ගැලවීමේ හමුදාවේ නැටීමටවත් සුදුසු නැත. වහා මේ ගැරඬියා ඉවත් කර අහවල් නාගයා මිහින් විසින් නැටවිය යුතුයි" කියා ඒ දුෂ්ට පොළඟා නාගයාට මහත් පරිභව කළේ ය.

එහෙත් මේ මරු උගුලෙක් බැව් වහා වටහා ගත් මිහින් නේක නින්දා ගැරහුම් හමුවේ නාගයා ආරක්ෂා කරමින් පෙර සේම සිය ජීවිකාව කරගෙන ගියේ ය. යසස කීර්තිය මිහින් වටා පොදි ගැසෙන්නට විය. නේක දේශවලින් ප්‍රශංසා ගලා එන්නට විය. ඒ එසේ වන කල වෛරී නයි නටවන්නෝ අයසින් අයසට ම වනසින් වනසට ම පිළිපන්හ.

සිය ස්වාමියා සමග අනේක සැප සම්පත් විඳිමින් දිවි ගෙවන නාගයාගේ සිත දිනක් පාප සිතිවිල්ලෙක් පහළ විය. මිහින් මේ සියලු සැප විඳින්නේ මාගේ මන මෝහනීය රැඟුම් දැක නුවරින් නොමසුරුව දෙන තුටු පඬුරින් නොවෙද? එම මුදලින් මිහින් මට රිසි සැප සියල්ල දී මා සනසන බව ද සැබෑ ය. මට මැ කියා අගනුවරින් බිම් කඩක් ද දිව්‍ය සැපැති රථයක් ද තවත් නේක සැප සම්පත් ද දුන් බැව් සැබෑ ය. එහෙත් මිහින් වෙත ගලන සියලු ධනය මා වෙත ලබා ගත හැකි නම් කෙතරම් යහපත් ද? එකල මට අනන්ත නාග රාජයා මෙන් සතුටින් සිටිය හැකි නොවේද? ඈ අනේක පාප සිතිවිල්ලෙන් නාගයාගේ සිත කිළිටි විය. සිය ස්වාමියා කෙරෙහි විරසකයක් සිතේ ඇති විය.

මේ විරසකය ඉව වැටුණු වෛරී නයි නටවන්නෝ සිය සැතැඟි සපුරා ගන්නට මේ හොඳ ම නැකත යැයි සිතා නාගයාට ළං වන්නට වූහ. කේජු කනු රිසි සිවලා මෙන් උන් 'මිතුරු නාගය, තොපගේ රැඟුම් මනහරය. ඉන් ලද කීර්ති කදම්භ සඳ තරු රැස් පරයා මුළු සක්වළේ විහිදෙයි. නුඹේ කඳ රන් වැලක් මෙනි. එහි පිපි පුල්ලි නිල් මිණි වැනි ය. නුඹේ පෙණ ගොබය රත්තරන් කුල්ලකි. නුඹේ අං දෙක අපේ මන පොබයයි' ඈ නේක චාටු බස් දොඩන්නට විය.

'තොපගේ ස්වාමියා නම් අදමිටුවවෙකි. උහු නුඹට අවැසි කිසිවක් නොදෙයි. දුනු ඊතල ගෙන ආ ඔරුවක් නැවත හරවා යැව්වේ නුඹේ බෑණනුවන් කෙරෙහි ඉරිසියාවෙනි ' ඈ වැහි නැති හෙණ වදින මුසාවාදවලින් නාගයාගේ දූෂිත සිත කුදූෂිත කරවා සිය බසට නම්මවා ගත්තේ ය. මෙසේ එක ගලෙන් සියොතුන් දෙදෙනා නියායෙන් මිහින් ද නාගයා ද විනාශ කරනු රිසින් නැවතත් මෙසේ කියති. 'සබඳ නාගය, තොප තව දුරටත් මිහින් ළඟ නැටිය යුතු නැත. නුවරට ගොස් තනිව ම නැටීමට තොපගේ කුසලතා හොඳට ම ප්‍රමාණවත්ය. තොපගේ තනියට මේ අප මැ සිටී. එහෙයින් වහා තනිවම නුවර රඟන්නට අදිටන් කරගනුව'

නුග ගස මහත් වුවත් එහි ඵලය කුඩා වන්නා සේ උස මහත කඳක් ඇතක් නුවණ මද හෙයින් ඒ මෝඩ නාගයා සිය සතුරන්ගේ උගුලේ වැටුණේ ය. එහෙත් ඉබ්බා දියේ දැම්මා ම ඇන්නෑවේ කීවා සේ අහෝ මා ලද භාග්‍යයකැයි සිතා මෝඩ නාගයා පුරාජේරු කියවමින් නුවර දෙසට ඇදෙන්නට විය. වෛරී නයි නටවන්නෝ අපරාධකාරයෙකු අමු සොහොනට ගෙන යන වධකයින් මෙන් ටිකක් පිටුපසින් ඔහු පසුපස ම ඇදෙති. 'උණු වෙන තුරු කකුළුවා දිය සැලියේ කෙළිතියි' මග දුටු තවත් නයි විස්සෝප වූහ.

දැවැන්ත නයෙක් විශාල පෙණයක් පුප්පා ගෙන නුවරට ඇතුළු වූ බැව් ළැව් ගින්නක් සේ නගරයේ පැතිරි ගියේ ය. මුළු නුවර ම බඹරයට ගල් ගැසුවා සේ ඇවිස්සී, නුවරු පොලු මුගුරු කඩු මන්නා ගෙන නයා සොයා නුවර පීරන්නට විය. මොහොතකින් කැබලි වූ නාග සිරුර මහ මග දක්නට ලැබිණි. මේ අර මිහින් නයි නටවන්නාගේ නාගයා නොවේ දැයි කෙනෙක් ඇසූහ. 'පව් අසරණයා' තවෙකෙක් කීවේ ය. 'ඇඟිල්ලේ තරමට එපායැ ඉදිමෙන්න' තරුණයෙක් කෝපයෙන් කීවේ ය. 'දැන් ඉතින් කම්පා වී කුමට ද වුණ දේ වුණා. මේවා කාටත් හොඳ පාඩම්' යැයි මහල්ලෙක් කීවේ ය.

එකල මිහින් නම් නයි නටවන්නා අද --- ය. අසීමිත තණ්හාව සහ මෝඩකම නිසා වනසට පත් නාගයා අද---ය.

Tuesday, January 12, 2010

මහින්ද හමුදාපති කරමු !

මහින්දට වසර 40ක දේශපාලන පසුබිමක් තිබේ. ඔහුගේ පරම්පරාවට වසර 70ක් පමණ දේශපාලන ඉතිහාසයක් තිබේ. ඔහුගේ මහප්පා, තාත්තා රාජ්‍ය මන්ත්‍රණ සභාව නියෝජනය කළේය. මහින්දගේ පියා ලංකා ජාතික සංගමය ද එක්සත් ජාතික පක්ෂය ද නියෝජනය කළේ ය. පසුව බන්ඩාරනායක මහතා සමග ශ්‍රීලනිපය තනන කල එහි ද ඔහු සිටියේ ය. ඒ පරපුරෙන් දේශපාලනයට බට මහින්ද 1970 දශකයේ පාර්ලිමේන්තු දේශපාලනයට පිවිසියේ ලාබාලම පාර්ලිමේන්තු මන්ත්‍රී ලෙස ය.

අණතුරුව රටේ ප්‍රජානත්ත්‍රවාදය වළපල්ලට ගොස් තිබූ අවධියක මානව අයිතිවාසිකම් අමු අමුවේ උල්ලංඝණය කළ අවධියක ඒ වෙනුවෙන් හඬ නැගුවේ ය. අනතුරුව ඔහු ලංකාවේ කම්කරු ඇමති, ධීවර ඇමති, අගමැති සහ ජනාධිපති තණතුරු දැරුවේ ය. මේ සියලු කරුණු සලකා බලා වසර 40ක දේශපාලන පළපුරුද්දක් ඇති මහින්දට මේ රටේ හමුදාපති තණතුර ලබා දීමට ක්‍රියා කරමු.

මගේ යෝජනාවට එකඟ වෙමින් බොහේ පිරිසක් කීවේ මහින්ද හමුදාපති තණතුරට සුදුසු බවය. ඔහුට හමුදාව පාලනය ගැන කිසිදු අවබෝධයක් නැතත් වසර 40ක දේශපාලන අවබෝධයක් තිබේ. විවිධ දේශපාලන මතවාද දරණ හමුදා සෙබලුන් මැනවින් පාලනය කිරීමට ඒ දැනුහ අවශ්‍ය ය. අනෙක් අතට කිසියම් අවස්ථාවක සාම සාකච්ඡා සඳහා හමුදාවට පෙරමුණ ගැනීමට සිදුවුවහොත් ඒ සඳහා අවශ්‍ය වෙන්නේ කෙහෙම්මල් හමුදා දැනුම නො ව දේශපාලන දැනුමයි. එමෙන්ම ඊළාම් යුද්ධය අවසන් කිරීම සඳහා දේශපාලන තීන්දුව ගත්තේ එවකට සිටි හමුදාපති බැවින් ඒ සඳහා දේශපාලන දැනුම අනීවාර්ය බව සක්සුදක් සේ පැහැදිළිය.

මහින්ද හමුදාපතිකමට සුදුසු යැයි කීම වඩා සාධාරණීකරණය කරන්නට ජනතාව නැඟු ප්‍රබල තර්කය නම් ඔය හමුදාපති ධූරය ගැළවීමේ හමුදාවටත් සුදුසු නැති ඕනෑම පඟර නැට්ටෙකුට කළ හැකි බව ය. අනෙක යුද්ධය ඕනෑම ගොනෙකුට කළ හැකි කජ්ජකි. ඒ බවට මංගල සමරවීර සහ ලක්ෂ්මන් කිරිඇල්ල සාක්ෂි ය. එවන් දෙකේ පනහේ වැඩකට අණදීමට මහලොකු යුද දැනුමක් අවශ්‍ය නැත. අනෙක

ඔය යුද්දේ දරුණු විදිහට ගිය අන්තිම සතියේ හමුදාපති හිටියේ චීනයේ. උන්නැහේ සිය පවුල සමග සිටියේ චීන මහාප්‍රාකාරයේ, ඔලිම්පික් ගම්මානයේ සොඳුරු සිරි නරඹමිණි. සෙබලු එකා පිට එකේ මැරී වැටෙද්දි, ලක්ෂ ගණන් ජනතාව කොටි අතහැර හමුදාව පැත්තට එද්දී, ප්‍රභාකරන් සෙත්තාපොච්චි වෙද්දී හමුදාපති රටේවත් නැත. එහෙයින් ඒ වැනි තණතුරකට මහින්ද සුදුසු බව තව කෙනෙක් කීවේ ය.

4 වෙනි ඊළාම් යුද්ධය ඇරඹුණු දා සිට හමුදාපති යුදබිමේ පස්පෑගුවේවත් නැත. ඒ නිසා හමුදාපති යනු යුදමය දැනුමක් අවැසි තනතුරක් නොවේ. සියලු කරුණු සලකා බැලූ අපි හමුදාපති තණතුර සඳහා වසර 40ක දේශපාලන දැනුමක් ඇති මහින්ද සුදුසු යැයි යෝජනා කරමු.

මහින්ද හමුදාපති කිරීමේ මේ මෙහෙයුම ගැන ඔබේ අදහස් සුබ අනාගතයක් සඳහා රටට ඉතාම වැදගත් වනු ඇත.

ටිප්පණිය - ඇතැම්හු මහින්ද දේශපාලනය මිස හමුදා පාලනය පිළිබඳ කිසිවක් නොදන්නා හෙයින් හමුදාපති තණතුරට සුදුසු නැතැයි කියති. 'මේ මිනිහා තුවක්කුවක් අල්ලන්නවත් දන්නේ නෑ'. 'වඳුරාට දැලි පිහිය දුන්නා වගේ තියේවී මිනිහට හමුදාව භාර දුන්නොත්'. 'නිකන් කොටි අතින් වෙඩි කාලා මැරෙයි' ආදී නොයෙක් කතා කීවේ ඒ පිළිබඳ අදහස් දැක්වූ ජනතාව ය. 'කටුස්සගේ කරෙ රන් බැන්දා වගේ තියේවි 'පියදාස අයියා ඔලොක්කුවට සිනාසෙමින් කීවේ ය. 'බූරුවා උගේ වැඩක් බලා ගන්න ඕනෑ' යැයි තව කටහැකරයෙක් කීවේ ය. ගමේ සියදෝරිස් ආතා "මළ හත්තිලව්වේ මේ කරන්න යන නස්පැත්තිය මොකක්ද?. අර ෆොන්සේකාට ජනාධිපතිකම දුන්නා වගේ තියේවි. මූට හමුදාපතිකම දුන්නොත්" කියා දෑත කම්මුලේ ගසා ගසා ගත්තේ ය.

Monday, January 11, 2010

මේ ඔබේ වාරයයි

2005 මහින්ද වෙනුවෙන් පෙනී නොසිටි, නැතහොත් රනිල් වෙනුවෙන් පෙනී සිටි බොහෝ බලවේග මහින්ද වටා රොක් වී තිබේ. රටේ බොහෝ විද්වත්හු මහින්දගේ ජයග්‍රහණය වෙනුවෙන් අද එළිපිටම කතා කරති. ඊට හේතු කිහිපයකි.
අප සිතන පරිදි පළමුවැන්න මේ රට පකිස්ථානයක්, බංගලිදේශයත්, මියන්මාරයක් වනු දකින්නට ඔවුන් තුළ ඇති අකමැත්තයි. ප්‍රජාතන්ත්‍රවාදය වළ දමා මර්දනකාරී හමුදා පාලනයක් තුළ එකී රටවල මිනිසුන් ගතකරන ඛේදනීය ජීවිත අප උරුම කර ගත යුතු නැත යන මතවාදයේ ඔවුහු සිටිති.

එමෙන් ම යම් යම් අඩුපාඩු යටතේ වුව 2005 සාපේක්ෂව රට ඉදිරි ගමනක යෙදෙයි. (බලන්න -http://kasapabbatha.blogspot.com/2010/01/blog-post_10.html )ඒ පිළිබඳ සාධනීය ස්ථාවරයක ඔවුහු සිටිති. 2005 ඇ.ඩො. 1 000ට අඩු ඒක පුද්ගල ආදායම අද ඇ.ඩො. 2000කි. 2005 පෙර බටහිර රටවල් පස් පාගන්න එපා යැයි සිය රටවල සංචාරකයින්ට අවවාද කළ ලංකාව අද ලොව වඩාත් සංචාරයට හිතකර පාරාදීස 30 අතරින් අංක එක යැයි නිව්යෝර්ක් ටයිම්ස් පුවත්පත කියයි. ඉන් නොනවතින ඔවුහු මේ හිතකර තත්ත්වය උදා වූයේ මහින්ද රාජපක්ෂගේ පාලන ක්‍රමය නිසා බව ද කියන්නට නිර්ලෝභි වූහ.

එපමණක් ද ලොව අංක දෙකේ කොටස් වෙළඳපොළ ලංකාවේ ය. ආසියාවේ අංක එක ලංකාවය. ඉකොනොමිස්ට් සඟරාව පවසන පරිදි ලොව වඩා වේගයෙන් වර්ධනය වන ආර්ථිකයකි; , ලංකාව. ලොව මහ බලවත්තු කඩා වැටෙද්දි අප මෙසේ ඉදිරියට යාමට රටක් ලෙස අප අනුගමනය කළ දේශීයත්වයට නැඹුරු අර්ථ ක්‍රමය පිටුවහල් වූ බව නොරහසකි.

මේ සියල්ල මෙන්ම මහින්ද රටේ සියලු ජනවර්ගවල විශ්වාසය දිනාගත් නායකයා බවට පත්ව තිබේ. සිංහල දෙමළ මුස්ලිම් ඈ විවිධ ජන වර්ගවල නායකයෝ ඔහු වටා සිටිති. ඩග්ලස්, කරුණා, පිල්ලෙයාන්, ෆෙරියල් අෂ්රොෆ්, තොණ්ඩමෑන්, ෆවුසි ඒ පදනම මැනවින් පෙන්වයි. එක්සත් ජාතීන්ගේ සංවිධානය දෙමළ බසින් ඇමතූ ප්‍රථම නායකයා මහින්ද ය. ඔහු උතුරට ගොස් ඒ ජනතාව සිය බසින් ඇමතුවේ ය. ප්‍රභාකරන්ගේ මරණ වරෙන්තුව ඉරා විසි කර ඒ ජනතාවට නිදහස දුන්නේ ඔහුය.

මේ කරුණු සලකා මහාචාර්ය කාලෝ ෆොන්සේකා, මහාචාර්ය සුනන්ද මහේන්ද්‍ර, මහාචාර්ය මැන්ඩිස් රෝහණධීර,මහාචාර්ය ජගත් වික්‍රමසිංහ, මහාචාර්ය ජයසේන කොට්ටේගොඩ, කථිකාචාර්ය ආරියරත්න කළුආරච්චි, කථිකාචාර්ය ධම්ම දිසානායක, පණ්ඩුල ඇඳගම, ගුණදාස අමරසේකර, ආදී විද්වත්හු මහින්ද දිනවා රට සුරකින්නට පෙළ ගැසී සිටිති. ජැක්සන් ඇන්තනී, මාලනි ෆොන්සේකා, රෝහණ බැද්දගේ, එඩ්වඩ් ජයකොඩි, සේනක විජේසිංහ, ශ්‍රියන්ත මෙන්ඩිස්, අවීන්ද්‍ර රන්දෙනිය, රෝහණ වීරසිංහ සමස්ත කලාකරුවන්ම මෙවර මහින්ද වටා පෙළ ගැසී සිටිති.

එකල එජාපයේ මහබලකොටුවක් වූ හුණුපිටිය ගංගාරාමයේ පොඩි හාමුදුරුවෝ මහින්ද දිනවිය යුත්තේ ඇයි ද යන කරුණ විග්‍රහ කරමින් ඉරිදා ලංකාදීපයට ලිපියක් ලියා තිබිණි. එකල එජාපය වෙනුවෙන් පෙනී සිටි රූකාන්ත ගුණතිලක, සනත් නන්දසිරි, අබේවර්ධන බාලසූරිය, උපුල් ශාන්ත සන්නස්ගල අද ඔවුන් වෙනුවෙන් පෙනී නො සිටියි. සමන් ද සිල්වා ප්‍රසිද්ධියේ ම මහින්ද වෙනුවෙන් පෙනී සිටියි. රූකාන්තලා මහින් ගැන බලවත් ප්‍රසාදයකිනි ඉන්නේ.

මේ සියල්ලන්ගෙන්ම නියෝජනය වන්නේ ලංකීය ජන මනසයි. සැබෑ ශ්‍රී ලාංකීය හදවතේ රිද්මයයි. එහෙයින් මහින්ද ජයග්‍රහණය ඉරහඳ මෙන් විශ්වාසය. ඔබ ක්‍රියා කළ යුත්තේ එය විජයග්‍රහණයක් කිරීමට ය. 2005 අප ලද ජයග්‍රහණය සහතික කරගැනීමේ සාඩම්බර පංගුකාරයෙක් වන්නට ය. එහෙයින් 2005 ජනාධිපතිවරණයෙන් රනිල් sms ජනපති කළ සිරස නාලිකාව පන්නයේ කෙප්පවලට ඔබ හසුවිය යුතු නැත. අවමංගලගේ කටකතා කුණු ලොරියට ඔබ හසුවිය යුතු නැත. එසේ රැවටී ඔබේත් රටේත් අනාගතය අපායක් කරගත යුතු නැත.
2002 මුදල් අමාත්‍යංශ ලේකම් චරිත රත්වත්තෙගේ 16 වන චක්‍රලේඛයට අනුව රජයේ කම්කරු තනතුරක් දීම තහනම් කළ එජාපයේ ආර්ථික පිළිවෙත ඉදිරියට ගෙන යන්නට සපථ කර සිටින පුද්ගලයාට ඔබ හසුවිය යුතු නැත. 2004 අයවැයේ යෝජනාවේ කොටසක් මෙසේ ඔබ වෙනුවෙන් සටහන් කරමි.

'අපගේ ඉලක්කය වන්නේ රාජ්‍ය අංශයේ මධ්‍යම හා පහළ ආදායම් ශ්‍රේණිවල සේවකයන් අතරින් 100 000ක් 2004 වන විට ද තවත් 200 000ක් 2006 වන විට ද අඩු කිරීමය. (2004 අයවැය කතාව - 34 පිටුව)'

එදා මෙසේ විනාශ කරහරින්නට උත්සාහ කළ රාජ්‍යය සේවයේ අද ලක්ෂ 12ක් සිටී. 2003 බිලියන 93ක් වූ වැටුප් වැය අද බිලියන 269කි. 2006 රු. 1000ක් වූ ජීවන වියදම් දීමනාව අද 5250කි. 2003 බිලියන 31ක් වූ විශ්‍රාම වැටුප් බිල අද බිලියන 89කි. ඉතින් ඔබ තවත් සිතිය යුතුද? මව්බිම දිනවමු. රට සුබ අනාගතයකට රැගෙන යමු.

Sunday, January 10, 2010

පෝඩ මහින්ද වාන්ගෝ හිට්ලර්

දැන් අපි 2005 වසරට හෝ ඉන් ඔබ්බට යමු. ඒ ශ්‍රී ලංකාවේ භූමියෙන් 3/1ක් ද සාගරයෙන් 3/2ක් ද රටට අහිමිව පැවති යුගයකි. මුළු දකුණම එකම මළ ගෙයකි. තැනක බෝම්බයකි. තැනක වෙඩි තැබීමකි. මහ මග, බස්රියේ, දුම්රියේ, පාසැලේ, රෝහලේ, පන්සලේ ,දේවස්ථානයේ මරුවා නිදැල්ලේ හැසිරුණේය. මිනිසුන් කැබලි කර රට ලේ විලක් කර රිසි සේ බිළි ගත්තේ ය. රටේ කොතැන හෝ තරුණයෙකුගේ මළ ගමකි. කොටින්ම මේ රට තුන්බියෙන් ඇළලි ගිය එකම විශාල මහනුවරකි. හමුදා සෙබලෙකු සිටින නිවසක දෙමාපියන් බිරිය දරුවන්හැඬු කඳුලිනි. නිවෙස අසලින් පොලිස් රථයක් ගිය ද අශුභ පුවතක් ගෙන එතැයි හදගිනි ඇවිලෙයි. ඒ සියල්ල මැද ජනතාව නිවැරදි තීන්දුවක් ගෙන මහින්ද ජනපති කරවූහ.
අප පක්ෂ භේදයකින් තොරව අද භුක්ති විඳින්නේ ඒ තීන්දුවේ ප්‍රතිඵලය. අද රටේ යුද්ධයක් නැත. සමහරුන්ට යුද්ධයක් තිබුණු බවක් මතකයේ ද නැත.

එපමණ ද? නැත. එදා ලක්ෂ හයේ රාජ්‍ය සේවක පිරිස අද ලක්ෂ 12කි. උපාධිධාරින් 44 000ට රජයේ රැකියා ලැබිණි. එදා රාජ්‍ය සේවක වැටුප් බර රුපියල් බිලියන 94ක් පමණ විය. අද එය බිලියන 200 ඉක්මවා ඇත. රුපියල් බිලියන 34ක් පමණ වූ විශ්‍රාම වැටුප් ප්‍රමාණය අද රු.බි. 90 ඉක්මවා ඇත. මේ සියලු පහසුකම් අද භුක්ති විඳින්නේ එදා 2002 එජාප රජය දිය කර හරින්නට සැලසුම් කළ රාජ්‍ය අංශය බව අමතක නොකළ යුතුය. තව ද එජාපය රාජ්‍ය අංශයට කාර්යාල කම්කරුවෙකු පවා නොගත් බව ඔබ සිහි කළ යුතුය.

එපමණ ද? නැත. රට වටා විශාල වරාය 5ක් ඉදිවෙයි. ර‍ට පුරා බහුකාර්ය ජල යෝජනා ක්‍රම 10ක් ක්‍රියාත්මක වෙයි. ප්‍රධාන නගර ආවරණය වන පරිදි ගුවන් පාලම් ඉදිවෙයි. රට පුරා මාර්ග පද්ධතිය නවිකරණය වෙයි. ගම්බද බොරලු පාර කොන්ක්‍රීට් පාරක් බවට පෙරලෙයි. මේ සියල්ල හරහා ගලා එන සංවර්ධන අරුණළු රටේ හෙට දවස සුඛිත මුදිත කරනු නියත ය.

එපමණ ද? නැත. වී ගොවියාට රු. 9 000 පොහොර රු. 350ට ලැබෙයි. පුරන් කුඹුරු අස්වැද්දෙයි. තේ සඳහා ඉහළ මිලක් ලැබෙයි. සියලු භවභෝගවලින් රට ස්වයංපෝෂිත වෙයි. එජාපය බටහිර තුප්පහි සංස්කෘතිය කරට ගෙන පිළිකන්නට විසි කළ දේශීයත්වය නැවත පිබිදී එයි. රට ගැන අභිමාණයක් සිතට දැනෙයි. අපේකම අපේ අභිමාණයට හේතුවන යුගයකි.

එපමණ ද? නත. තවත් උපාධිධාරීන් 16 000ට රජයේ රැකියා ලබාදීමට අයදුම්පත් කැඳවා ඇත. රාජ්‍ය සේවක වැටුප් රු. 2500න් ඉහළ දමනු ඇත. පාසැල් ළමුන් සඳහා දිවා ආහාරය නොමිළේ ලැබෙනු ඇත. රටේ ආර්ථික වර්ධන වේගය ජේ. ආර්. යුගයේ ඉහළ තත්ත්වයට පත් වී ඇත. විරැකියාව 9% දක්වා පහත බැස ඇත. උද්ධමනය තනි ඉලක්කමකට ගෙනැවිත් ඇත.

මේ සියල්ල සිදුකර ඇත්තේ තිස් වසරක් පැවිත යුද්ධය කෙළවර කරන අතරය. ලෝකය උග්‍ර ආර්ථික අර්බූදයක පැටලී සිටින අතරය. ලොව බැංකු රක්ෂණ ආයතන කොම්පැනි කඩා වැටෙන අතරය. ලොව පුරා දශ ලක්ෂ ගණනින් මිනිසුන් රැකියාවලින් දොට්ට දමන අතර ය. ජාත්‍යන්තර විවිධ සම්බාධක පනවමින් අප යන ගමන ආපස්සට හැරවීමට වළිකන අතරය. රටේ කිසිදු රාජ්‍ය ආයතනයක් නොවිකුණා රාජ්‍ය ආතයන ශක්තිමත් කරන අතරය. දේශීය කර්මාන්තකරුවා නඟා සිටුවන්නට ක්‍රියා කරන අතරය.

මේ සියල්ල ඔබට අමතක කරවා මහ පොළව නූසුලන බොරු කියන, කටකතා පතුරු වන ද්‍රෝහීන්ට නොරැවටෙන්න. බසයේ දුම්රියේ කාර්යාලයේ අනේක පච ප්‍රචාරය කරන අයට නො රැවටෙන්න. මේ සියල්ල පසුපස ඇත්තේ ඔබ මෝහනයට පත් කර ඔබේ රට ලද ජය මංකොල්ල කෑමට එන මාර සෙනඟ බව වටහා ගන්න. ඔබේ පවුලේ අය අසල් වැසියන් ඒ ගැන දැනුවත් කරන්න. 1977 ජේ. ආර්. සිය මැතිවරණ ප්‍රචාරක රැළි පවත්වන නගරවලට රැස්වන ජනතාවට පෙනෙන්නට කුණු බක්කි අවුස්සන හිඟන මිනිසුන් යෙදවූ බව මතක තබා ගන්න. පන්සල් වටකර කටු කම්බි ගසා, එදිරිවීර සරච්චන්ද්‍රට පහර දී 80 ජූලි වර්ජකයින් නොමරා මරා, 1983 කළු ජුලිය ඇති කර, යාපනේ පුස්තකාලය ගිනිබත් කර මුළු රට තිස් වසරක් ගිනි තැබුවේ ධාර්මිෂ්ට සමාජය උදා කරන්නට ජනතාවට පොරොන්දු වී බව හොඳින් මතන තබාගන්න. ඒ කෙප්පයට රැවටුණු අපට වසර තිහක් අපා දුක් විඳන්නට විය. රෑ වැටුණු වළේ දවල් නො වැටෙමු.

මේ සියල්ල දෙස බලා ඔබ ඔබේ ඡන්දය පාවිච්චි කළ යුතුය. තමා ආර්ථික විද්‍යාව නො දන්නා බවත් එහෙයින් එජාප ආර්ථික ප්‍රතිපත්තිය අනුගමනය කරන බවත් කී අයෙකුට නැවත 2002ට රට රැගෙන යන්නට ඉඩ නො දෙමු. අප අභිමාණයෙන් 2005 ඇරඹු ගමන විජයග්‍රහණයෙන් කෙළවර කරමු. ලැබූ ජය රට බෙදා කොටින්ට බන්දේසියක පුදන්නට ඉඩ නො දෙමු. ගලේ පැහැරූ බළලා මෙන් උදේ එකක් ද හවස එකක් ද උතුරේ එකක් ද දකුණේ එකක් ද දොඩවන හිට්ලර්ලාට රට බිළි නො දෙමු.

Friday, January 8, 2010

ඛේදවාචකය සහ භේද වාචකය

ඔබ ගංජා මල්ලේ කතාව අසා තිබේ ද? දවසක්‌ ගංජා මල්ලක්‌ රැගත් මිනිසෙක්‌ බස්‌ රථයකට නැග ගංජා මල්ල බස්‌රියේ ඉදිරියෙන් තබා මැදපෙළේ අසුනක වාඩිවී සිටියේය. ඔහු එසේ කළේ ගංජා පිළිබඳව ඇති අනාදරයකට හෝ තමන් මේ ගංජා තොගය තමන්ට අවශ්‍ය ස්‌ථානයට ගෙනගියාට පසු ලැබෙන ලාභය අමතක කර දැමූ නිසා හෝ නොවේ. ගංජා තොගය සමඟ ඒ මොහොතේ අත්අඩංගුවට පත්වීමෙන් වළකින්නටය.

කොටින්ම මේ ගංජා කාගේදැයි පොලිසියෙන් පැන විමසුවොත් ඔහුද සෙසු මගීන් මෙන්ම "අනේ මගේ නොවෙයි මං දන්නේ නෑ" න්‍යායෙන් කවුළුවෙන් ඉවත බලා සිටිනු ඇත. එබඳු කරදරයක්‌ නොවී ගංජා මල්ල අදාළ ගමනාන්තයටම ගමන් කළේ නම් ඔහු හීන්සීරුවේ මල්ල ද රැගෙන බසයෙන් බැසයනු ඇත.

අපට මේ උපහැරණ කතාව කීමට සිදු වූයේ දෙමළ සන්ධානය ජනාධිපති ධුරාපේක්‍ෂක ජෙනරල් සරත් ෆොන්සේකා සමඟ අත්සන් කළ ගිවිසුමේ ඇතැයි කියෑවෙන ශ්‍රී ලංකා රාජ්‍යයට සහ ජනතාවට අතිශය අනතුරුදායක මට්‌ටමේ කොන්දේසි කිහිපයක්‌ පිළිබඳව ජනතා විමුක්‌ති පෙරමුණ දක්‌වන විශ්මයජනක නිහැඬියාවට ඒ කතාව අතිශයින්ම සමාන නිසාය.

අදාළ ගිවිසුමේ කොන්දේසි කවරේ ද යන්න දෙපාර්ශ්වය විසින්ම තවම නිල වශයෙන් ප්‍රකාශයට පත්කොට නැතත්, (එසේ නොකොට නිහඬව සිටීමද ප්‍රශ්නයකි). දෙමළ සන්ධාන මන්ත්‍රී කේ. තුරෙයි රත්නසිංහම් වසන්තම් එෆ්. එම්. හි මාධ්‍යවේදියකු සමඟ මේ අරභයා කළ දුරකථන සාකච්ඡාවක්‌ ඊයේ පුවත්පත්වල පළකරනු ලැබ තිබේ.

වසන්තම් එෆ්. එම්. මාධ්‍යවේදියා ඉතා පැහැදිළිව මෙසේ අසයි.

"විශේෂ කොන්දේසි මොනවා හෝ ඉදිරිපත් කළාද? උදාහරණයක්‌ වශයෙන් ස්‌වයංපාලන අයිතිය, හමුදා කඳවුරු ඉවත් කිරීම, සමානුපාතික ක්‍රමය, අත්අඩංගුවේ පසුවන එල්. ටී. ටී. ඊ. සැකකරුවන් නිදහස්‌ කිරීම වගේ දේවල් ගැන"

තුරෙයි රත්නසිංහම් මන්ත්‍රීවරයා මෙසේ පිළිතුරු දෙයි.

"ඔව් අපි ඉදිරිපත්කරලා තියෙනවා. අපි අපේ කොන්දේසි ලැයිස්‌තුවක්‌ ලබා දුන්නා. අප දුන්න ඒ ඉල්ලීම් ඇතුළත් ලිපිය පිළිගන්නා බව ෆොන්සේකා මහතා පැවසුවා. ඔහු අත්සන් තබා එය අපට භාර දුන්නා. ඉස්‌සර අපි අත්සන් කළ ගිවිසුම් වගේ නොවෙයි මේක. විපක්‍ෂ නායක රනිල් වික්‍රමසිංහ හා සරත් ෆොන්සේකා අපේ කොන්දේසි ඉටුකරලා දෙන බවට සහතික වෙලා අත්සන් කරලා තියෙනවා".

මේ දේශපාලන මගඩි නාටකය අප වටහාගත යුත්තේ කවර ආකාරයකටද?

උතුර - නැගෙනහිර ස්‌වයං පාලන අයිතිය, හමුදා කඳවුරු ඉවත්කිරීම, අත්අඩංගුවට පත්වන එල්. ටී. ටී. ඊ. සැකකරුවන් නිදහස්‌ කිරීම, කාගේවත් හිතුවක්‌කාරකමට ගත හැකි සරළ, චූන් තීරණ ද?

ස්‌වයං පාලන අයිතිය හෙවත් ෆෙඩරල් යනු මේ රටේ අති බහුතරයක්‌ ජනතාව එකහෙලා විරුද්ධ වන ඊළාම් රාජ්‍යයට පාර කැපීමක්‌ බව නොදන්නා බබ්බු මේ රටේ මොනම දේශපාලන පක්‍ෂයකවත් නැත. දහස්‌ සංඛ්‍යාත ජීවිත, කෝටි සංඛ්‍යාත වටිනා දේපළ විනාශ කර ගනිමින් රාජ්‍ය වසර 30 ක්‌ මුළුල්ලේ යුද වැදුණේ ඊට එරෙහිවය.

ජනාධිපති අපේක්‍ෂක ජෙනරාල් සරත් ෆොන්සේකා මහතා නිර්පාක්‍ෂික යෑයි කියෑවෙන හෙයින් ඔහුට මේ රටේ ඉරණම හා බැඳුනු එබඳු බරපතල කාරණාවක්‌ පිළිබඳ අවබෝධයක්‌ නැද්දැයි අපි නොදනිමු.

එහෙත් ඔහු වටා සිටින දෙවර්ගයක උදවිය අතරින් රනිල් වික්‍රමසිංහ, මංගල සමරවීර වැනි දේශපාලනඥයන්ට නම් ෆෙඩරල් පිළිබඳව කිසිම ගැටලුවක්‌ තිබිය හැකි නොවෙතත් ජ. වි. පෙ. සෝමවංශ අමරසිංහ, අනුර දිසානායක වැනි මහත්වරුන්ට එහි කිසිදු ගැටලුවක්‌ නැතැයි අප කිසිදා අසා නැත.

එය එසේ නම්, ඉන් කියෑවෙන්නේ ජ. වි. පෙ. තම දේශපාලන ගමන් මඟ මුළුමනින්ම වෙනත් අක්‌ෂයකට කරකවා ඇති බවද? නැතහොත් රනිල්, මංගල මහත්වරුන් මේ නටන මළ මඟුල් පිළිබඳව ඔවුන් මුකුත්ම නොදන්නා බව ද? එසේත් නැතහොත් ඔවුන් අප මුලින් උපහැරණයේ දැක්‌වූ රංගනයේ යෙදෙන බව ද?

හමුදා කඳවුරු ඉවත් කිරීම සහ අත්අඩංගුවට පත්වන එල්. ටී. ටී. ඊ. සැකකරුවන් නිදහස්‌ කිරීමෙන් රාජ්‍ය ආරක්‍ෂාවට සිදුවිය හැකි හානිය ද ජෙනරාල් සරත් ෆොන්සේකා නොදන්නේ යෑයි යන්න නම් අපට විශ්වාස කළ නොහැකිමය.

කෙසේ වුවත් දෙමළ සන්ධානයේ තුරෙයි රත්නසිංහම් මහතා ප්‍රකාශ කොට ඇත්තේ මුසාවක්‌ නම් සත්‍ය කුමක්‌ද යන නිල නිවේදනය ඉක්‌මනින් නිකුත් කිරීමට කටයුතු කිරීම ජෙනරාල් පාර්ශ්වයේ සියල්ලන්ගේම යුතුකමය.

(දිවයින - 10/01/09)

ටිප්පණිය - මාතෘ භූමියේ රීරි ඉල්ලා පෙළ ගැසී සිටින සර්ප පෙරමුණ ඔළු සයේ මාර විසැති පොළඟකු වැනිය. උතුරු නැගෙනහිර වෙන් කරන්නැයි උසාවි ගොස් ඒ ‍ඓතිහාසික ජයග්‍රහණය මව්බිමේ සිරත මත පැළැන්දු ජවිපෙද ඒ ‍ඓතිහාසික තීන්දුව ලබා දුන් සරත් සිල්වා ද නැවත උතුරු නැගෙනහිර එක් කළ යුතු යැයි අත්සන් කළ ගිවිසුමක් ඇතැති TNA කොටි හපුවන් ද එක ම වේදිකාවේ සිටගෙන සිටිති. 2002 සිය කැබිනෙට්ටුවටත් හොර තෑගි ඔප්පුවකින් උතුරු නැගෙනහිර කොටියාට ලියාදුන් දොන් ජුවාන් ද සරත් ෆොන්සේකා ගැලවීමේ හමුදාවටවත් සුදුසු නැතැයි කී අවමංගල ද එහි සිටිති. දකුණේ ආණ්ඩුව අපේ ක්‍රිෂ්ණ දෙවියන් ඉල්ලන දේ දිය යුතුය එසේ නැත්නම් ඔහු කොළඹ ලේ විලක් කරනු ඇතැයි කී දෙවියා නන්දිකඩාල් කළපුවේ සෙත්තපෝචච්චි වූ පසු අද ක්‍රිෂ්ණ දෙවියන් ලෙස රඟන ෆොන්සේකා ඒ මැද ය.

එදා සිට දිනූ දේශයට එරෙහිව පෙළ ගැසී සිටි මේ නරා වළට ජවිපෙ වැට්ටේ ද පැන්නේ ද යන්න අපට තේරුම්ගත නොහැකි ය. තමන් මව් බිමට ලබා දුන් ජයග්‍රහණයන් එකිනෙක යළි උදුරා ගැනීමෙන් ඔවුන් මව්බිමෙන් පළිගන්නේ ඇයිදැයි අපට නො තේරෙයි. කලක් ප්‍රබුද්ධ දේශපාලන ගමනක යෙදුණු ජවිපෙ, කිසිදු ආණ්ඩුවකට ආධ්‍යාත්මක වශයෙන් විනාශ කළ නොහැකි වූ ජවිපෙ, අද එහි පිංගුත්තර නායකත්වය විසින් දේශපාලන හෝම්පළට දක්කා ගෙන යන කල අපට ඇත්තේ මහා කණගාටුවකි. 2005 වන තුරු අප එහි සාමාජිකයින් ලෙස අපේ ගම්වල දහදිය වැගුරුවේ මව්බිම දූෂණය කරන බලවේගලවට පාවඩ එලන්න ද? මේ මහා ව්‍යසනය පෙන්වා දෙන්නට තරම් කොන්දක් ඇති මිනිහෙක් එහි නැද්ද?

සිංහයෙක් අශූචි වළකට පැන්න විට ඒ අශූචි වළට සිංහානුභාවය පහළ නොවේ. වන්නේ සිංහයා බලු වීමය. අද ජවිපෙට සිදුවී ඇත්තේ ඒ ටිකම ය. එහෙත් ඉන් මිදි නිවැරදි වන්නට ඔවුන්ට තවම කාලය තිබේ. නැතහොත් මව්බිමට ද්‍රෝහී විමේ පව්කඳ කර ගහන්නට ඒ අයට සිදු වනු ඇත. මහ උන් නිවැරදි නො වේ නම් පොඩි උන් ඉන් ඉවත් විය යුතු ය. යමෙක් කලක් බුද්ධ ශාසනයේ මහණ දම් පුරණ කල අපි ඔහුට 'ස්වාමින් වහන්සේ' යැයි කියමු. නොඉඳුල් පැනින් ආහාර පිස ගෙන ගොස් දන් පිළිගන්වමු. අපි යන එන, කන බොන ගමන් උන්වහන්සේ වඩින, වළඳන බැව් ගෞරවයෙන් පවසමු. අපි මැරෙන කළ එතුමා අපවත් වෙන සේක.

එහෙත් ඔහු සිවුරු අතැර ගිය කල පෙර බුහුමන් කිසිවක් නො ලැබෙයි. එසේ ගොස් සමාජ විරෝධි ක්‍රියා කරයි නම් ඉන් කෝපයට පත් වන්නෝ 'හීරලුවා' යැයි ඔහු ගරහති. අද ජවිපෙ සහ ෆොන්සේකා දේශප්‍රේමි පිළ අතැර ගියා පමණක් නො ව ඊට එරෙහිව අවි අමෝරා ගෙන සිටින නිසා තව දුරටත් දේශප්‍රේමියා යැයි පිස්සකු හැම කිසිවෙකු අමතන්නේ නැත. සිවුරු හළ එකෙකු හාමුදුරුවන් යැයි කියන්නා පිස්සකු වන්නා සේ ය. ඔවුන් ඇමතිය යුත්තේ දේශද්‍රොහියා යන වදනින් පමණි. එහෙයින් ඊයේ දේශප්‍රේමියා අද දේශද්‍රෝහියා වෙයි. ඒ ඔහුගේ එකල මෙකල චර්යාව අනුව තීරණය වන්නකි. ඒ නියාමය ජෙනරාල්ට අදාළය. ජවිපෙට අදාළය. මට ද අදාළ ය. ඕනෑ ම ශක්‍රයෙකුට අදාළය.

Thursday, January 7, 2010

සංඥව ෆෙඩරල්: මොකද කියන්නේ ජෙනරල්?



ජෙනරාල් සරත් ෆොන්සේකා සහ දෙමළ සන්ධානය අතර දැනට හටගෙන ඇතැයි කියන එකඟතාව ගැන අපට මුලින් ම දැන ගන්නට ලැබුණේ පසුගිය වසරේ දෙසැම්බර් 22 වැනිදා නිකුත් වූ වීරකේසරී පත්‍රයෙනි. විපක්‍ෂය නියෝජනය කරමින් රනිල් වික්‍රමසිංහ මහතා මේ සාකච්ඡාවට සහභාගි වු නමුත් ජ.වි.පෙ. නියෝජිතයන් සහභාගි නොවූ බව එම පුවතේ පළවිය. ඒ අතර ඊයේ (7 වැනිදා) ප්‍රවෘත්ති පත්‍රවල පළ වූ එකඟතාවන් අතුරෙන් අපගේ වැඩිම අවධානය දිනා ගන්නේ උතුර - නැගෙනහිර යළි ඒකාබද්ධ කිරීමට ජෙනරාල් එකඟ වී යෑයි කියන කාරණයයි. එහෙත් ජෙනරාල් සමඟ කිසිදු කොන්දේසියකට තමන් එළැඹ නැතැයි දෙමළ සන්ධානයේ නායක ආර්. සම්බන්ධන් පවසයි. කෙසේ වුව ද උතුර - නැගෙනහිර එක්‌ කිරීමට අමතරව දැනට අත්අඩංගුවේ සිටින කොටි සාමාජිකයන් නිදහස්‌ කිරීම, රජයේ බුද්ධි අංශවල සාමාජිකයන් අඩු කිරීම, යුද හමුදාවේ පිරිස්‌ බලය අඩු කිරීම, අධි ආරක්‍ෂිත කලාප ඉවත් කිරීම යන කාරණාවලට ද ජෙනරාල් එකඟ වී යෑයි ජනමාධ්‍ය ඇමැති ලක්‍ෂ්මන් යාපා අබේවර්ධන මහතා පවසා තිබේ. ඡන්දයක්‌ ළඟ එන විට මෙවැනි කට කතා පැතිරීම සහ පතුරුවනු ලැබීම ස්‌වභාවිකය. චන්ද්‍රිකා කුමාරතුංග මැතිනිය ජනාධිපතිව සිටි කාලයේ එ.ජා.ප.යේ ජයලත් ජයවර්ධන මන්ත්‍රීතුමා සහ කොටි සංවිධානය අතර රහස්‌ ගිවිසුමක්‌ අත්සන් කළ බවට මංගල සමරවීර මැතිතුමා රජයේ මාධ්‍ය හරහා පැතිර වූ කට කතාව අපට මේ මොහොතේ දී සිහිපත් වෙයි. සමරවීර මැතිතුමාම කී බැවින් කවරෙක්‌වත් එය පිළිගත්තේ නැත. අද වන විට ජයවර්ධන සහ සමරවීර දෙදෙනා එකම පිළේ ය. දේශපාලනයේ හැටි ඔහොම තමයි. එය බෙහෙවින් ගඳ ගසන ව්‍යාපාරයකි. කෙසේ වුවද දෙමළ සන්ධානය සහ ජෙනරාල් ෆොන්සේකා අතර කිසියම් හෝ එකඟතාවයක්‌ හටගෙන ඇතැයි කියන කාරණය අපගේ සිත් තුළ බලවත් කුහුලක්‌ ඇති කිරීමට හේතු වී තිබේ. එතැන් සිට මේ කතාව පටන් ගනිමු.

දෙමළ සන්ධානය යනු ප්‍රභාකරන්ගේ දේශපාලන බළල් අත ය. ප්‍රභාකරන් විසින් කරන ලද සියලු මනුෂ්‍ය ඝාතන සහ බෙඳුම්වාදී මෙහෙයුම් පාර්ලිමේන්තුව තුළදී සාධාරණීය කරන ලද්දේ දෙමළ සන්ධානය විසිනි. මෙයට මාස හතකට පමණ පෙර ජෙනරාල් සරත් ෆොන්සේකා යනු ප්‍රභාකරන්ගේ පරම සතුරන්ගෙන් කෙනෙකි. ඔහු මැරීමට ප්‍රභාකරන් නොගත් උත්සාහයක්‌ නැත. එයින් එක උත්සාහයකදී ජෙනරාල් නො මැරී මළේ ය. මේ අර්ථයෙන් ගත් කල ජෙනරාල් ෆොන්සේකා යනු ප්‍රභාකරන්ගේ දේශපාලන සේවක ආර්. සම්බන්ධන්ගේ ද පරම සතුරෙකි. සම්බන්ධන් මෙයට පෙර ජනපති රාජපක්‍ෂ හමු විය. එහෙත් ඔහුගේ ඉල්ලීම්වලට ජනාධිපතිවරයා කැමැති වූයේ නැත. එ බැවින් සාකච්ඡා බිඳ වැටින. අද වන විට සිය නායකයා වන ප්‍රභාකරන්ගේ ප්‍රධාන සතුරන්ගෙන් කෙනෙකු වන ජෙනරාල් ෆොන්සේකා සමඟ එකඟත්වයකට ඒමට සම්බන්ධන් කැමැති වී තිබේ.

අපගේ සැකය පටන් ගන්නේ මෙ තැනිනි. මෙසේ පටන් ගත් අපගේ සැකය උතුර - නැගෙනහිර නැවත එක්‌ කරන්නැයි සම්බන්ධන් කළ ඉල්ලීම ජෙනරාල් ෆොන්සේකා විසින් පිළිගත්තේ යෑයි කියන නිසා තවදුරටත් පුළුල් වෙයි. සම්බන්ධන් මේ ඉල්ලීම ජනාධිපති රාජපක්‍ෂ වෙතින් ද කළේය. එහෙත් ඔහු එයට විරුද්ධ විය. උතුර - නැගෙනහිර එක්‌ කරන ලද්දේ මෙයට වසර 22 කට පෙර ඉන්දු - ලංකා ගිවිසුම මගිනි. උතුර පමණක්‌ ඊළම ලෙස ලබා ගැනීමේ මූලික බලාපොරොත්තුවෙන් සිටි ප්‍රභාකරන් නැගෙනහිර පළාත ද එයට එක්‌ කිරීමෙන් පසු සටනක්‌ නැතිවම ඊළම විශාල වූ නිසා බලවත් සේ සතුටට පත් විය. ආණ්‌ඩුව සරත් ෆොන්සේකා හමුදාපති ලෙස තබා ගෙන කරන ලද යුද්ධයේ දී මුලින් ම පරාජය කරන ලද්දේ නැගෙනහිර කොටි බලයයි. නැගෙනහිර ජයග්‍රහණයෙන් පසු උතුරට අත තබන ලද්දේ ඉතා පරෙස්‌සමිනි. එයට හේතුව එහි ජන ඝනත්ත්වය ඉතා ඉහළ මට්‌ටමක පැවතීමය. එහෙත් දෙමළ ත්‍රස්‌තවාදීන් දහස්‌ ගණනක්‌ ඝාතනය කළ යුද හමුදාපති සරත් ෆොන්සේකාගේ සෙබළ පිරිස ප්‍රභාකරන් ද මරා යුද්ධය නිම කළේ ය. ඊට පෙර උතුර - නැගෙනහිර පළාත නැවත දෙ පළාතක්‌ කරන ලෙස ඉල්ලා ජ. වි. පෙ. උසාවි ගියේ ය. ජ.වි.පෙ. නඩුව දිනූ අතර උතුර - නැගෙනහිරින් වෙන් කරන ලදී.

මේ රටේ දෙමළ බෙදුම්වාදීන් පාර්ලිමේන්තු දේශපාලනය හරහා එන විට ඊළම ඉල්ලන ලද්දේ ෆෙඩරල් ප්‍රාන්තයක්‌ ලෙස ය. ආණ්‌ඩුක්‍රම ව්‍යවස්‌ථාවේ 13 වැනි සංශෝධනය හරහා ප්‍රකාශයට පත් කළ පළාත් සභා බලතල ප්‍රමාණවත් නොවන බව කිවූ ඔවුහු පොලිස්‌ බලතල ඉඩම් බලතල යනාදිය ද ඉල්ලූහ. වෙනම රාජ්‍යය යන සංකල්පය මේ හරහා සම්පූර්ණ කිරීමෙන් පටන් ගැනීමට පුළුවන. අද සම්බන්ධන් සරත් ෆොන්සේකාට දෙන්නේ ද මේ ෆෙඩරල් සංඥවම ය. උතුර නැඟෙනහිර නැවත එක්‌ කළොත් ජ.වි.පෙ. කිවූ නඩුව කුණු කූඩයට වැටෙයි. යුද හමුදාව සහ බුද්ධි අංශය කප්පාදු කළොත් සටන් විරාම කාලයේදී සිදු වූ සියලු විනාශයන් ආපසු පටන් ගැනෙයි. රට යුද්ධය පටන් ගත් තැනටම ආපසු ගමන් කරයි. මියගිය රණවිරුවන්ගේ ආත්ම විලාප නඟන්නට පටන් ගනී. රෙජිමේන්තුගත මානසිකත්වයක්‌ ඇති විනයානුකූල ජෙනරාල්ට මේ තත්ත්වය නොවැටහෙන්නේ ද? නැතහොත් එ.ජා.ප.ය ජ.වි.පෙ. සහ දෙමළ සන්ධානය එබන්දක්‌ නොතේරෙන තැනට ඔහු තල්ලු කර තිබේ ද?
(දිවයින - 10/01/08)

ටිප්පණිය -බළලා මල්ලෙන් එළියට පැන්නේ එසේ ය. තව දුරටත් ෆොන්සේකා මේ රටේ බහුතර අභිලාෂයන් වෙනුවෙන් පෙනී සිටින්නකු නො ව ෆෙඩරල් හරහා ඊළමට පාර කපන භයානක බුල් ‍ඩෝසරයක් බවට පත්ව තිබේ. සම්බන්ධන් වැනි ඊළාම්වාදීන් කලකට පෙර සිය සතුරෙකු ලෙස සැලකූ දුටු තැන බිළි ගන්නට කළු කොටි යෙදවූ ෆොන්සේකා අද වික්‍රමබාහු පරදා සම්බන්ධන්ලාගේ සුරතලා බවට පත්ව තිබේ. ඒ උතුරු නැගෙනහිර එක්කිරීම උතුරේ අධි ආරක්ෂිත කළාප ඉවත්කිරීම, හමුදාව අඩු කිරීම, බුද්ධි අංශ අඩු කිරීම හරහා නැවත ඊළමට පාර කැපීම, හිරේ සිටින කොටි 10 000 නිදහස් කර නැවත යුද්ධයට පණදීම ආදී දොළ පිදේනි දීමෙනි.

එදා රටේ ජනතා අභිලාෂය වෙනුවෙන් පෙරමුණ ගෙන උතුරු නැගෙනහිර වෙන් කරන්නට අධිකරණයට ගිය ජවිපෙ අද මංමුලා එදා තමන් මුල් වී ලද ජය පාවා දෙන්නන්ට ආවැඩීම කෙතරම් ජුගුප්සාජනකද? අපට ආපසු ඇසීමට ඇත්තේ ලාල්කාන්තය තොපට කොන්දක් තිබේ ද? කියා පමණි. ඔවුන්ට තවමත් නිවැරදි වීමට අවස්ථාව තිබේ. එසේ නැත්නම් ජනතාව විසින් ඔවුන් නිවැරදි කළ යුතුය.

මේ රටේ තරුණයින් 26000ක් ජීවිත පූජා කොට එක්සේසත් කළ රට නැවත මිනි කන්දක් කරනවාද? කලකින් ‍නොපිපුරුණු බෝම්බවලට පණ දී ඔබේ දරුවා ස්වාමියා බිරිය හිතවතා කැබලිවන්නට පාර කපනවාද? අප එසේ වන්නට ඉඩ නො දෙමියි ෆොන්සේකාට කිව හැකි ද? එසේ නම් නැවත උතුරු නැගෙනහිර එක් නොකරමියි ඔහු කිව යුතු ය. එසේ නැත්නම් මේ අම්බලන්ගොඩ පිළිමතලාවේ දතකන්නේ රට ලද ඓතිහාසික නිදහස බන්දේසියක තබා බෙදුම්වාදීන්ට පූජා කරන්න බව ජනතාව තේරුම් ගත යුතුය. ඊට එරෙහිව දිවි හිමියෙන් සටන් කළ යුතුය.





එම්බා ලාල් කාන්තය තොපට කශේරුකාවක් තිබේ ද?

ඊයේ දිනය ඉදිරි මැතිවරණයේ දිශානතිය තිරණය කළ තීරණාත්මක දවස විය. මෙතෙක් කවර පාර්ශවයකට ඡන්දය දිය යුතුදැයි සිතාගත නොහැකිව සිටි ජනතාවගේ දෑස් ඇරුණේ ඊයේ ය. ඒ ද්‍රවිඩ සන්ධානය සිය තීරණය ප්‍රකාශ කිරීමත් සමග ය.

ද්‍රවිඩ සන්ධානය යනු කලක් කොටි සංවිධානයේ ඔඩොක්කු කුක්කන් ලෙස ක්‍රියා කළ පිරිස බව ජනතාව දනියි. මේ කුක්කෝ පිරපාහරන්ගේ ගැම්ම ගෙන එකල හැසිරුණු ආකාරය අපට මතකය. යුද්ධය ආරම්භ කළ සමයේ හමුදාව වන්නියට යාමට සිතයි නම් මිනී පෙට්ටි 40000ක් සුදානම් කළ ගත යුතු බව කීවේ මින් එකෙකි. ඉන්දියාවට බරහිර රටවලට දුවමින් පරදින කොටි රැළ රැක ගන්නට විවිධ උද්ඝෝෂණ කළේ මොවුන් ය. ලොව පුරා යමින් ලංකා රජයට එරෙහිව පොළව සතරට පැලෙන පට්ට පල් බොරු කියමින් නොයෙක් සම්බාධක පනවන්නට වළිකෑවේ මොවුන්ය.

නන්දිකඩාල් කළපුවේ මහ කොටියා මිය යද්දි හඬා වැටුණු මේ හපුට්ටෝ ඒ සටනට නායකත්වය දුන් නායකයා සමග බද්ධ වෛරයෙන් පෙළෙයි. ඔවුන් ඒ සඳහා කළ යුත්තේ ඒ නායකයා පරාජය කිරීමට සතුරාට සහය දීම ය. යුද්ධයට නායකත්වය දුන්නේ ෆොන්සේකා නම් ඔවුන් තෝරා ගත යුතුව තිබුණේ මහින්දය. එහෙත් මේ රටේ සිටින ඇතැම් මොට්ටයින්ට නොවැටහුණ ද යුද්ධය ද සාමය ද යන්න තීරණය කරන්නේත් එය කොතැනින් නවත්වනවා ද යන්න ගැන තීරණය කරන්නේත් දේශපාලන නායකත්වය බව ඔවුන් හොඳින් දනියි. රාජ්‍ය නායකයාට අවැසි විණි නම් කිලිනොච්චිය අසල කඳවුරු ලා ගෙන සිටින්නැයි පෙර කල මෙන් හමුදාවට අණ කරන්නට හැකියාව තිබිණි. එහෙත් මහින්ද එසේ නොකළේ ය. එහෙයින් ඔවුන්ගේ තරහා ඇත්තේ මහින්ද සමග ය.

එසේ නොමැති නම් මීට මාස කිහිපයකට පෙර මේ සිංහලයින්ගේ රට බවත් සෙසු ජාතීන් සිංහලයින් යටතේ සිටිය යුතු බවත් කී කෙනෙකුට මොවුන්ට සහය දිය හැකි ද ? මාස කිහිපයකට පෙර ඇමරිකාවට ගොස් එහිදී සිරගතව සිටින කොටි ත්‍රස්තයින් 10 000 විනාශ කළ යුතු යැයි කී කෙනෙකුට කුමන සහයක් දිය හැකි ද? ඒ සියල්ල අමතක කර ෆොන්සේකා දිනවීමට එක් වන්නේ එදා මහින්දගේ නායකත්වයෙන් රට ලැබු විශිෂ්ට ජයග්‍රහණය ආපසු හැරවීමට ය. එයින් පළි ගැනීමට ය. එහෙයින් මේ කොටි රැළ ෆොන්සේකා වෙනුවෙන් පෙනී සිටීම සහ ඒ වෙනුවෙන් විවිධ හේතු කියාපෑම අපට නම් පුදුමයක් නොවේ. එය අපට ප්‍රශ්නයක් ද නොවේ. අපට ප්‍රශ්නය වන්නේ ඔවුන් මහින්දට සහය දීමට එක් වුණා නම් ය. කෙසේ වුව ද ඔවුන්ට බොරු පොරොන්දු දී ඡන්ද ටික ගරා ගන්නට මහින්ද සිතුවේ නැත. එහෙයිනි ඔහු ප්‍රසිද්ධියේ ම කීවේ තමා කිසි දිනක යළි උතුරු නැගෙනහිර එක් නො කරන බව. ඒ රුවන් ප්‍රකාශයට අපි සිරස නමා ආචාර කරමු.

උතුරට ගොස් අද ද්‍රවිඩ ජනතාවට නැවත ඊළාම් සිහින විකුණන කුහකයින් වහාම හදුනා ගත යුතුය. බටහිර රටවලට අවැසි ලෙස යුද රහස් එළි කරන කුහකයින් ජනතාව හදුනා ගත යුතු ය. උතුරු නැගෙනහිර යළි එක් කළ යුතු යැයි කියන ද්‍රොහීන් නියෝජනය කරන පිළ ජනතාව හදුනා ගත යුතුය. එදා උතුර දකුණෙන් වෙන් කළ මිනිහා අද කතා කරන්නේ කුමන කටින්දැයි සොයා බැලිය යුතු ය. උතුරේ කොටි සනසන්නට එකී පරයින් කියන කතා දකුණේ සමහන් කරමින් මේ විජාතික ගුබ්බෑයමට ජාතිකත්වයේ ව්‍යාජ සළුපිළි පොරවන එළඹෙන මහ මැතිවරණයේ දී මකබෑවෙන දේශපාලන පිශාචයින් රැළ ජනතාව හදුනා ගත යුතුය.

ඒ සියල්ලට ම වඩා මේ තුප්පහි රොඩී ගුබ්බෑයමේ ළැග සිටින ලාල් කාන්ත වැනි මිනිසුන් නැවත සිය හෘද සාක්ෂිය තමාගෙන් ම ප්‍රශ්න කළ යුතුය. ජනතාව තමා පාර්ලිමේන්තුවට පත් කර යැව්වේ මේ මහා පාප කර්මයට දායක වී තමාට ඡන්දය දුන් එකාගේ හත්මුතු පරම්පරාව ද අපායට ඇද දමන්න‍ට දැයි සිතා බැලිය යුතු ය. එම්බා ලාල් කාන්තය තොපට කශේරුකාවක් තිබේද? තොප හැර තවත් කශේරුකා ඇතිවුන් ඔතැන තවත් ලැග සිටීද? එය තොපට තරම් නොවේ. එහෙයින් වහා තමන් අදීන මිනිසුන් බව දක්වව්!

මට පෙර කොටි කියා ගෙන එන අයියාගෙන් රට පරිස්සම් කර ගත යුතු ය. රනිල්, හකීම්, මනෝ, මංගල, සම්බන්ධන්, සෝමවංශ හවුල මේ වළි කන්නේ නැවත ඔබේ දෙපා මුළට යුද්ධය ගෙන ඒමට බව සිහි කළ යුතුය. බස්රියේ, වැඩපළේ, මග තොට, පන්සලේ පල්ලියේ බෝම්බ පුපුරමින් අප ගත කළ මහා භීම සමය ඔබට මතක නැතැයි අප නොසිතමු. මේ හංස වේසයෙන් එන්නේ මාරයා බව තරයේ මතක තබා ගන්න. ඒ යුගය නැවත උදා කර ගෙන ඒ බෝම්බවලට ඔබේ කිරි කැටි දරුවා බිළි දෙනවා ද?

දැන් ජනතාවට ඉතාම පැහැදිළිව රටට ආදරය කරන රට වෙනුවෙන් පෙනී සිටින නායකයා තෝරා ගත හැකි ය. තුප්පහි ද්‍රෝහි හවුල වමනය කරන අභූත දූෂණ චෝදනා මරු වළවල් මග හැර යන්න. යුද ජයග්‍රහණය වෙනුවෙන් එහි ආරක්ෂාව වෙනුවෙන් පෙනී සිටින්න. රටේ අභීවෘර්ධිය වෙනුවෙන් එකාවන්ව පෙළ ගැසෙන්න.

Tuesday, January 5, 2010

රට කඩ ඉමක!

ජනතා විමුක්‌ති පෙරමුණ දෙවන වරට සංහාරයට ලක්‌කර වසර විස්‌සක්‌ සපිරෙන මේ අවුරුද්දේදී එම පෙරමුණ ජනාධිපති මහින්ද රාජපක්‍ෂට එරෙහිව එක්‌සත් ජාතික පක්‍ෂය සමඟ දේශපාලන වශයෙන් අත්වැල් බැඳගැනීම සුවිශේෂ සිද්ධියකි. එසේම දවසේ පැය විසිහතර පුරාම යුද්ධයට විරුද්ධව කතා කළ දෙමළ ජාතික සන්ධානය හෙවත් ප්‍රභාකරන්ගේ පාර්ලිමේන්තු කණ්‌ඩායම ජෙනරාල් සරත් ෆොන්සේකාට සහය පළ කිරීමට තීරණය කිරීම ද සුවිශේෂ සිද්ධියකි. ජාතිවාදී මළකඩවලින් හිස පුරවා ගත් දෙමළ ජාතික සන්ධානය අද උදේ පුවත්පත් සාකච්ඡාවක්‌ පැවැත්වීමට නියමිතව තිබිණි. අප මෙය ලියන්නේ ඒ පුවත්පත් සාකච්ඡාවේ කියෑවුණු කරුණු පිළිබඳ තොරතුරු නොදැන ය. දෙමළ ජාතික සන්ධානය කිසියම් ප්‍රගතිශීලී පියවරක්‌ ගැනීමට කටයුතු කරන්නේ නම් අපි ද එයට එකඟ වෙමු.

එය ප්‍රතිගාමී මතයක්‌ නම් මේ රට යළිත් වරක්‌ දෙකඩ වනු දැකීමට නොකැමැති ජනයා සියලු ජාතික බලවේග සමඟ එක්‌ව එයට උත්තර බඳිනවා ඇත. මේ රටේ ඉදිරි දේශපාලනය ඉතා අනතුරුදායක තත්ත්වයක පවතී. හතරවන ඊළාම් යුද්ධයේදී නන්දිකඩාල් කලපුවේදී වෙඩි වැදුණේ ප්‍රභාකරන්ට පමණක්‌ නොවේ. මේ රටේ ඒකීයත්වයට එරෙහි විජාතික බලවේගවලටත් එම වෙඩිල්ල වැදින. එම වෙඩි පහරින් ප්‍රභාකරන් මැරී වැටුණත් විජාතික බලවේග මැරී වැටුණේ නැත. ඔවුහු තවමත් ජීවත් වෙති. මේ රට කැඩීමේ අරමුණ සාක්‍ෂාත් කර ගැනීම සඳහා ඔවුන් ඉදිරියේදී කටයුතු කරනවා ඇත. එය පැරදවීම සඳහා පළපුරුදු දේශපාලන නායකත්වයක අවශ්‍යතාව ඇත.

මේ රට තුළ ක්‍රියාත්මක රාජ්‍ය නොවන සංවිධාන ජනාධිපතිවරණයේදී මුදල් වැය කරන ආකාරය ගැන විමර්ශනය කිරීමට රජය තීරණය කර තිබේ. වසර 2005 ජනාධිපතිවරණයේදී රාජ්‍ය නොවන සංවිධාන 25 ක්‌ සහන කටයුතු සඳහා වැය කිරීමට පිටරටවලින් ගෙනා මුදල ජනාධිපතිවරණය වෙනුවෙන් වැය කර ඇත. මෙවර මේ රට ජාතික නායකත්වයක්‌ යටතේ වඩාත් ශක්‌තිමත්ව සිටින මොහොතක, එම ශක්‌තිය කඩාකප්පල් කර දැමීම සඳහා එන්. ජී. ඕ. කාරයන් ස්‌වකීය ධන සම්භාරයන් ගලා බස්‌නා ඇළවල් සහ මහ ගංගා සියල්ල ශ්‍රී ලංකාව දෙසට හරවනවා ඇත. ඉන්ෆ්ලුවන්සා වෛරසය අපගේ සිරුරේ ප්‍රතිශක්‌තිකරණ පද්ධතිය රැවටීම සඳහා විටින් විට සිය ස්‌වරූපය වෙනස්‌ කර ගන්නා පරිදි මේ මුදල් ද විවිධ ස්‌වරූපයෙන් රට තුළට ගලා ඒමට ඉඩ තිබේ. ඇතැම් විට ගංවතුරක්‌ නැතත් ගංවතුර සහනාධාර ලෙසද, නියඟක්‌ නැතත් නියං සහනාධාර ලෙස ද මේ මුදල් මෙහි පැමිණීමට ඉඩ තිබේ. මැතිවරණ පූර්වක ජනමත විචාරණ, සිවිල් සමාජය ශක්‌තිමත් කිරීම සහ දැනුවත් කිරීම වෙනුවෙන් සම්මන්ත්‍රණ පැවැත්වීම යනාදී කටයුතු උදෙසා ඩොලර් කෝටි ගණන් මෙහි ළඟා වනවා ඇත.

එහෙත් ස්‌ථිර වශයෙන්ම ඒවා පාවිච්චි වනවා ඇත්තේ නිශ්චිත අපේක්‍ෂකයකු හෝ ජාතික බලවේගයන් පැරදවීම පිණිස ය. බටහිර බලගතු කොටස්‌ එක්‌ව තුන්වන ලෝකයේ ආණ්‌ඩු පෙරළා තමන්ට අභිමත රූකඩ ආණ්‌ඩු බලයට ගෙනා අවස්‌ථා ඕනෑ තරම් තිබේ. ඒ පිළිබඳ කෙටි ඉතිහාසය මෙසේය. 1960 ගණන්වලදී වියට්‌නාමයේ තිබූ ඩීන් ඩියෙම්ගේ රජය ඇමරිකන් රූකඩ ආණ්‌ඩුවකි. එසේම එක්‌දහස්‌ නවසිය හැත්තෑ ගණන්වල කාම්බෝජයේ තිබූ හේන් සමරිංගේ රජය ඇමරිකන් රූකඩයකි. ඉරාකයේ සදාම් හුසේන් රජය පෙරළීම සඳහා සී. අයි. ඒ. සංවිධානය අවස්‌ථා කිහිපයකදී කටයුතු කළේය. බුරුමයේ රජය පහ කර අවුන්සාන් සුකී නමැති බටහිරට ගැති මහත්මිය බලයට ගෙන ඒමට එංගලන්තයට හා ඇමරිකාවට ලොකු වුවමනාවක්‌ තිබේ. ඉන්දියාව හා චීනය වැනි රටවලට අත ගැසීමට මේ රටවල් කොයිකත් බිය ය. හේතුව, ඉදිරියේදී ස්‌ථිර වශයෙන්ම මහ බලවතුන් බවට පත්වන මේ රාජධානි දෙක (චීනය දැනටමත් මහ බලවතෙකි,) තරහ කර ගැනීමට බටහිර ලෝකය තුළ කුහක භීතියක්‌ තිබේ.

මේ රටවල් සමඟ ගනුදෙනු කිරීම ඉතා අපහසු ය. ඒ සඳහා පළපුරුදු උපදේශකවරුන් නොව පළපුරුදු රාජ්‍ය නායකත්වයක්‌ අවශ්‍ය බව අපි නැවතත් කියමු. ජ.වි.පෙ. සහ එ.ජා.ප සුසංයෝගයට මේ රටවල් සමඟ ගනුදෙනු කළ හැකි වීමට ඉඩ තිබේ. එහෙත් ඔවුන් ඒ බව ඔප්පු කර නැත. ඒ බව ඔප්පු කිරීමට වසර 2001 දී එ.ජා.ප. ආණ්‌ඩුව ගත් ප්‍රථම උත්සාහයේදීම ඊළම බිහි වී ශ්‍රී ලංකාවේ ඉතිරි හරිය නෝර්වේ රටේ යටත් විජිතයක්‌ බවට පත්වීමට ගියේය. ඒ නිසා මෙය මේ රටේ අනාගතය විසඳුන තීරණාත්මක මංසන්ධියක්‌ බව සඳහන් කරමු.

(දිවයින -10/01/06)

ටිප්පණිය - අපේ රට දෙවන නිදහස් සටනේ අවසන් අදියරට මුහුණදෙමින් සිටියි. එය නන්දිකඩාල් කළපුවේ සටනට වඩා තීරණාත්මක වන්නේ සතුරා කැලේ නහන්නට කැලේ ගසක් න්‍යාය ක්‍රියාවට යොදා ඇති හෙයිනි. රටේ ප්‍රගතිශීලි ජනතාව සිය අනාගත නායකයා දෙස මෙන් ම ඔවුන් වටා පෙළ ගැසී සිටින අය ගැන ද සිතිය යුතුය. මේ සටනේ මුල් අදියර එනම් යුදමය කාර්යයේදී ඔවුන්ගේ කාර්යභාරය කුමක්ද? ඔවුන් ඒ සටනට දායක වුණේ කෙසේද? ඒ සටනේදී සතුරන් නියෝජනය කළේ කවුද? එදා දේශද්‍රොහී පිළ නියෝජනය කළවුන් අද දේශප්‍රේමි සළුපිළි ඇඳ සිටී ද? මේ සියල්ල සලකා බැලීමෙන් රට ඉදිරියට ගෙන යා යුතු නායකයා කවුදැයි තෝරා ගැනීම කිසිවෙකුට අපහසු නො වනු ඇත. රට මේ කඩ ඉමෙන් ද ජයග්‍රාහි ලෙස එතෙර කරන්නට දේශප්‍රේමි ජනතාව පෙළ ගැසිය යුතුය.

Monday, January 4, 2010

ගුටි ඉල්ලන විටදී ඒවා නොදිය යුත්තේ ඇයි?

නිර්පාක්‍ෂික ජෙනරාල් වෙනුවෙන් ප්‍රචාරක අත් පත්‍රිකා බෙදීමට කිරිබත්ගොඩ නගරයට ගිය එ.ජා.ප. සහ ජ.වි.පෙ. පාක්‍ෂිකයන්ට මැර පාක්‍ෂික පිරිසක්‌ විසින් පහර දෙනු ලැබීම ඊයේ (04 දා) පුවත්පත්වල පළවිය. මෙය සමස්‌ත ලංකා මට්‌ටමේ සිද්ධියක්‌ නොවුවද සාකච්ඡා කළ යුතු මට්‌ටමේ සිද්ධියක්‌ බව අපගේ වැටහීමය. එ.ජා.ප. සහ ජ.වි.පෙ. පාක්‍ෂිකයන්ට මැර පාක්‍ෂිකයන් පහර දීමට මූලික විය හැකි හේතු ලෙස අපට හැඟෙන්නේ මේවායá

1. ජ.වි.පෙ. සහ එ.ජා.ප.ය එක මඟ යන විට එය රෝහණ විඡේවීරගේ ප්‍රතිපත්තිවලට සහසුද්දෙන්ම විරුද්ධ බව සිතූ පිරිස්‌ ඒ නිසා සිහිය විකල් කරගෙන ප්‍රචණ්‌ඩ මාර්ගයට අවතීර්ණ වීම.

2. 88-89-90 අවුරුදුවල එ.ජා.ප.යෙන් මැරුම් කෑ තරුණයන්ගේ පවුල්වල අය හා ජ.වි.පෙන් මැරුම් කෑ අයගේ පවුල්වල අය දෙගොල්ලම එකවර හසුවන්නේ කලාතුරකින් බව සිතා පහර දීම.

3. ආණ්‌ඩුවේ මැර කණ්‌ඩායම් පහර දීම.

ඉහත සඳහන් කරුණුවලින් තුන්වන කාරණයට බර තැබීමට අපි වඩාත් කැමැත්තෙමු. මෙවර ජනාධිපතිවරණය ඉතාම උණුසුම් එකකි. මෙය මීළඟ ජනාධිපති මෙන්ම යුද්ධයේ නියම ජයග්‍රාහකයා තෝරා ගැනීම සඳහා ද පැවැත්වෙන ජනමත විචාරණයක්‌ බව අපට හැඟෙයි. ජ.වි.පෙ. නායක සෝමවංශ අමරසිංහයන්ගේ කටින්ම කියන ලද පරිදි ජ.වි.පෙ. තනියෙන් ඉල්ලුවත් පරාද වන එ.ජා.ප.ය තනියෙන් ඉල්ලුවත් පරාද වන මේ ජනාධිපතිවරණයට පක්‍ෂ දෙකේම ඉහළ මට්‌ටමේ සැලකිය යුතු පිරිසකගේ (සියලු දෙනාම නොවේ.) කැමැත්තෙන් නිර්පාක්‍ෂික ජෙනරාල් ඉදිරිපත් කරන ලදී. ජෙනරාල් ඇත්තටම නිර්පාක්‍ෂිකද නැද්ද යන්න ගැන අද මේ පිටුවේම පළවෙන ලිපියෙන් සාකච්ඡා කරන බැවින් ඒ ගැන මෙහිදී නොලියමු. ජෙනරාල්ගේ පත්‍රිකා බෙදුවන්ට පහර දුන්නේ ආණ්‌ඩුවට හිතවත් ජනයා නම් ඔවුන් ලොකු දේශපාලන වරදක්‌ කර තිබේ. ඒ වූ කලී ඕනෑම විපක්‍ෂයක්‌ මේ වෙලාවේදී ඉල්ලන දේ තේරුම් ගැනීමේ හැකියාවක්‌ ඔවුන්ට නොතිබීම ය.

ඕනෑම රටක විපක්‍ෂය මෙබඳු තරගයකදී ඉල්ලන්නේ මොනවාද?

1. විපක්‍ෂයේ ආධාරකරුවන්ට කවරකු විසින් හෝ පහර දෙනු ලැබීම. එවිට එය ආණ්‌ඩුවේ ගිණුමට බැර කළ හැක.

2. විපක්‍ෂයේ උද්ඝෝෂණවලට පොලිසිය පහරදීම සහ එහි වගකීම ආණ්‌ඩුවේ ගිණුමට බැර කිරීම.

3. නිර්පාක්‍ෂික අපේක්‍ෂකයාට සහ ඔහුqගේ ආසන්නතම මිත්‍රයන්ට හෙවත් ඔහු මෙතැනට තල්ලු කළ කිහිප දෙනාට ශාරීරික හානි සිදු කිරීම. එය ආණ්‌ඩුවේ ගිණුමට බැර කර සානුකම්පිත ඡන්දයක්‌ දිනා ගැනීම.

මෙය කොයි විපක්‍ෂයේත් ක්‍රමෝපායයකි. අපට පෙනෙන හැටියට මේ ක්‍රමෝපාය සාර්ථක කර ගැනීමට කිරිබත්ගොඩදී ආණ්‌ඩුව උදව් දී තිබේ. සාමාන්‍යයෙන් කිරිබත්ගොඩ, කැලණිය වැනි ප්‍රදේශවල හටගන්නා ඕනෑම ගැටුමකදී අපගේ අහිංසක මිත්‍ර කම්කරු ඇමැති මර්වින් සිල්වාගේ නම ගෑවෙයි. වැදගත්ම කාරණය වන්නේ සිද්ධියට ඔහු සම්බන්ධ නැතත් ඔහුගේ නම ඊට ගෑවීමය. සාමාන්‍යයෙන් සිදුවන්නේ මෙයයි. ඕනෑම ආණ්‌ඩුවක සිටින ඇමැතිවරුන්ගේ ආධාරකරුවන් සහ හිතවතුන් ඇමැතිතුමාගේ හිත තවදුරටත් දිනාගැනීම සඳහා ඔහුට නොදන්වා විපක්‍ෂයට පහර දෙයි. එවිට ඇමැතිගේ මැර ගිණුම තවදුරටත් බැරවෙයි. සියලු දේශපාලන කටවුට්‌ ගැලවිය යුතු බවට ජනාධිපතිතුමා විසින් පොලිසියට නියෝග කර තිබියදීත් පොලිසිය එය නොකරන්නේ ආණ්‌ඩුවේ හිත ගැනීමටය. ආණ්‌ඩුව කොහොමටත් මැතිවරණ කොමසාරිස්‌ට පොලිස්‌ බලතල දී තිබේ. එතුමාගේ අණ පරිදි දේශපාලන කටවුට්‌ ගලවා මුහුදේ පා කිරීම පවා කළ හැකිය. එහෙත් එතුමාගේ එම බලතල කවුරුත් ගණන් නොගනී. ඒ නිසා එතුමාගේ පොලිස්‌ බලතල හොරා පොලිස්‌ ක්‍රීඩාව වැනි ක්‍රීඩාවන්ට පමණක්‌ යොදාගත හැකිය. කෙසේ වුවද සරත් ෆොන්සේකාගේ කටවුට්‌ ගලවා විසි කරන පිරිස්‌ සිටින බවට විටින් විට පැමිණිලි ලැබේ. මේවා සිදුකරන්නේ 88-89-90 කාලයේදී හමුදාවෙන් මැරුම් කෑ ජ.වි.පෙ. අවතාර බව කෙනකු කියනු ඇති. එබඳු විඥ්ඥනවාදී විහිළුවලට අපි නොරැවටෙමු. මේවා ගලවන්නේ ද ආණ්‌ඩුවේ හිත දිනා ගැනීමට ප්‍රිය කරන උදවියට බවට අපි සැක කරමු. ජන්දයකදී දේශපාලන ඥනය ඉහළින්ම පාවිච්චි විය යුතුය. තීරණාත්මක මැතිවරණයකදී කෙනකු ආණ්‌ඩුවෙන් හෝ විපක්‍ෂයෙන් ගුටි ඉල්ලන්නේ නිකමටම නොවේ. එය හොඳ ආයෝජනයක්‌ නිසා ය. කිරිබත්ගොඩ සිද්ධිය ගැන රජය වහා පරීක්‍ෂණයක්‌ පැවැත්විය යුතුය. ඒ මාරයන් ගල ග්‍රහණයෙන් ගෙන උපරිහම දඬුවම් දිය යුතුය.
(දිවයින - 10/01/05)

ටිප්පණිය - දුර සිටින සතුරාට වඩා ළඟ සිටින මිතුරාගෙන් පරිස්සම් වන්නැයි ආප්තයක් තිබේ. ඒ මිතුරා මෝඩයෙක් වූ කල තත්ත්වය තවත් භයානක වෙයි. අපට ජනාධිපතිතුමාට ද කීමට ඇත්තේ ඒ ටිකම ය. එතුමා තව වරක් ජනාධිපතිවීම වැළැක්වීමට විපක්ෂ පතෝල එකතුවට නොහැකි බව දැන් පැහැදිළිය. එහෙත් ඒ ජයග්‍රහණය කිළිටි කිරීමට ඔහු වටා සිටින මෝඩයින්ට හැකිය. ඒ මෝඩයින් සැබවින්ම ජනාධිපතිතුමා ළෙන්ගතු නිසා ඔහු මොවුන්ට විරුද්ධව කිසිදු දැඩි තීරණයක් නො ගන්නා බව පෙනේ. එහෙත් ඉන් වන්නේ බලවත් විනාශයකි. ජනාධිපතිතුමාට හානියකි. එය රටටත් හිතකර නැත. සතුරාට පමණි හිතකර. රජතුමාගේ ආරක්ෂාවට සිටි විශ්වාසවන්ත වදුරා අතින් අවසාන රජතුමාගේ ජීවිතය කෙළවර වූ බව මෙහිදී අපට සිහිපත්වෙයි.

ඒ ජාතික නිදහස සුරකිමු

උදාවූ 2010 නව වසර ඔබ හැමට සුබ නව වසරක්‌ වේවායි පතමින්ම අපි අද ඔබ සමග එක්‌වෙමු. එහෙත් අපගේ මෙම සුබ පැතුම මෙයට පෙර හැම නව වසරක්‌ම උදාවන විට කරන ලද ගතානුගතික හා සම්ප්‍රදායානුකූල ප්‍රාර්ථනාවට වඩා බෙහෙවින්ම වෙනස්‌ බවද කිව යුතුය. ඒ මක්‌නිසාදයත් මෙයට පෙර අප විසින් කරන ලද සුබ ප්‍රාර්ථනා සුළඟේ ගසා ගියාක්‌ මෙන් විය. සුබ ප්‍රාර්ථනා වෙනුවට අපට ලැබුණේ අසුබ හා අමිහිරි අත්දැකීම් රැසක්‌ පමණි. එහෙත් ඒ අඳුරු, අවිනිශ්චිත, අසුබ යුගය අවසන්වී නව අරුණක ප්‍රාර්ථනා සමග 2010 උදාවී තිබේ.

2009 වසර වඩාත් නිවැරදිවම කිවහොත් 2009 මැයි 18 වනදා ඒ අඳුරු මූසල හිරු උතුරු සයුරෙහිම ගිලී ගියේය. ප්‍රකම්පිත වා ගැබ නිසංසල විය. විඩාපත් ගහ කොළද නිල් දියවරද සැනසුම් සුසුම් හෙලන්නට විය.
තිස්‌ වසරක්‌ මුළුල්ලේ ත්‍රස්‌තවාදයේ පීඩනයටද ගිනි ජාලාවන්හි වේදනාවටද පත්වු ජාතික වෘක්‌ෂයෙහි නව දලු මල් පල දරන සුලකුණුද පහළ විය. හැඬුම වෙනුවට සිනහවද විලාපය වෙනුවට උදානයද මුවින් මුව ඇඳුණි. ඒ දෙවන ජාතික නිදහසේ අසිරිමත් ලකුණුමැයි.

අප ඇරඹුමෙහි කී පරිදිම ගෙවී ගය ඒ හැම වසරකම, හැම දිනකම කොතැන හෝ නපුරක්‌, විපතක්‌ නොඇසූ දිනක්‌ ඔබට මතකද? දෙනෙත දුටුවේද දෙසවන ඇසුවේද මොන තරම් සෝබර දසුන්ද? සෝබර වදන්ද? 2009 වසර ඒ සියලු වධ වේදනා දුන් අශිෂ්ට පව්කාර මෘග මිනිසා සදහටම නිහඬ කරමින් වන්නි වනපෙතේ නන්දිකඩාල් කලපුවෙන් අහසට නැගුණු ජයගොස අපි ඇසීමු.

දෙවන ජාතික නිදහසේ පෙර ගමන් කරුවන්ට අපි සදා ණය ගැති වෙමු. වෙසෙසින්ම කිව යුතු දෙයක්‌ වේ. ඒ නොකිවහොත් අපි ගුණමකුවෝ වන්නෙමු. එනම් ජාතික නිදහසේ සටනට නායකත්වය සැලසූ මහින්ද රාජපක්‍ෂ ජනපතිඳුන්ට අපි අපගේ ප්‍රණාමය පලකරමු. ඒ ඓතිහාසික විමුක්‌ති සටනේ මුදුනෙහිම සිටි ගෝඨාභය රාජපක්‍ෂ විරුවාණන් ප්‍රමුඛ ත්‍රිවිධ හමුදාපතිවරුද පොලිසිපතිතුමන් ඇතුළු සියලු සිවිල් බල මුළුද අපි හද පිපෙන බැති මලින්ම පුදමු.

2010 අලුත් යුගයක, අලුත් නිදහසක සමාරම්භය වන්නේ මේ අසාමාන්‍ය පුරුෂයන් නිසා බව අපි යළිඳු කියමු. අප ලද ඒ නිදහස මත යළිත් අඳුරු වළා සෙවණැලි වැටෙයි. රැඳෙයි. පෙරදිග මුතු ඇටයේ රුව, ගුණ තෙද නොඉවසන අදිරදවාදී මකරුන්ටද ධනවාදී නග්න වෘතයන්ටද අපගේ උදාර මාතෘභූමිය යළිත් ගොදුරු කරගන්නට අපි ඉඩ නොදෙමු. 2010 අපේක්‍ෂාවද එයයි. අපි විමසිල්ලේ සිටිමු. අප වටා භ්‍රමණය වන ඒ අශිෂ්ට අසංස්‌කෘතික රූකඩවලට අපගේ දෙවන නිදහස්‌ සටනේ විජයග්‍රහණය ආපසු හරවන්ට ඉඩ නොදෙමු. ජාතික ගසේ නිදහස්‌ මල් පිපෙන තුරු සිය රුධිරයෙන්ම එය නැහැවු අපගේ විරු දරුවන්ගේ ඒ අප්‍රමාණ පරිත්‍යාගයන් පාවා නොදෙමු.

|සිංහල, දෙමළ. මුස්‌ලිම් ඇතුළු සියලු ලක්‌දරුවෝ ලක්‌මවගේ සදාදර උණුසුම හැර අන් කිසිවක්‌ නොපතන්නෝය. පෙර දිග මුතු ඇටයේ, මුතුහර සෝබාමත් කරනු ලබන්නේ ඒ සිංහල, දෙමළ, මුස්‌ලිම් ඈ සියලු මුතු ඇටමය. ඒ මුතුහර විසිරී ගියේ අපගේ පවකට වඩා අපගේ නොසැලකිල්ලට යෑයි අපි සිතමු. යළිත් ඒ මුතුහර නොවිසිරේවා, මුතු පබළු සිනා සේවා. එවන් අසිරිමත් දැයක්‌ කෙතරම් උදාරද?

සබඳ අපි එක්‌ව මේ රට නගමු. නැගෙන රළක්‌ සේද පිපෙන පියුමක්‌ සේද විචිත්‍රව විසිතුරුව සුවඳ දෙන මාතෘභූමිය සදා වාසනාවන්. 2010 වසරේ ඔබ හැමට යහපත්, පැහැපත්, සුවපත් හිතවත් වසරක්‌ම වේවා!

(දිවයින -10/01/04)

ටිප්පණිය - 2005 වසරේ මේ රටේ දේශප්‍රේමි ජනතාව අභීත මෙන්ම නිවැරදි තීන්දුවක් ගත්තේය. ඒ මහින්ද රාජපක්ෂ ජනපති තණතුරට පත් කිරීමටය. ඉන් අනතුරුව ඒ ජනතාව රටේ ත්‍රස්තවාදය අතුගා දමන්නට ඔහුට අවශ්‍ය ශක්තිය ලබා දුන්නේය. අනේක කැප කිරීම් කළේය. 2010 උදා වෙද්දී පිපිරී ගිය රතිඤ්ඤා හඬ බෝම්බ ප්‍රහාරයක් යැයි අප කිසිවෙකු නො සිතුවේ එහෙයිනි. ඒ නිදහස අප රටට සදාකාලික උරුමයක් වේවායි පතමි. ඒ නිදහස කිසිවෙකු උදුරා ගැනීමට ඉඩ නො දෙන්නැයි දෑ හිතැති ජනතාවගෙන් උදක්ම ඉල්ලා සිටිමු. ඔබ අද රට වෙනුවෙන් ගන්නා තීන්දුව හෙට ඔබේ දරුවාගේ ඉරණම තීන්දු කරන්නකි. එහෙයින් හැඟීම් බර නො වී රට ගැන හිතමු. 2005 බඩ ගැන නොසිතූ අප 2010 බඩ ගැන සිතා මකර කටට බිළි විය යුතු නැත. 2005 දරුවන් වන අපි ඉන් එක අඩියක් හෝ මව් බිම පසුපසට යාමට ඉඩ නොතිබිය යුත්තේ ය.
 
සිය රට දේ සිරි සැප දේ !