නික්ම ගිය නීලාවන් ගැන..

නීලා වික්‍රමසිංහ මා වඩාත් ආකර්ෂණීය වන, මට වඩාත් දැනෙන කට හඬ හිමි ගායිකාව ය. ඒ, ගුවන්විදුලියෙන් අප ඇසූ ඇගේ මුල් කාලීන ගැඹුරු හඬට නොව කාලයක් තිස්සේ ගීත ගායනා කිරීමෙන් සුසර වූ ඉසියුම් මධුරතර හඬට ය. සිලිං බිලිං, බලා හිඳිමි, දස්කොන් සකිසඳ වැනි ගීතවල මට ඇසෙන්නේ ඒ මධුර හඬය. ඈ නික්ම යන්නට පෙර ද මම මේ පිළිබඳ කිහිප වරක් ලියා තැබීමට අවස්ථාව ලැබීමට ඉඩ ලැබීම සැනසිල්ලකි.

නීලා තුළ ගායිකාවක, සංගීතවේදිනියක, ගුරුවරියක මෙන් ම තම නිජබිමට ආදරය කළ, ඊට අනතුරක් වනු දුටු සඳ ඊට එරෙහිව නිර්භයව නැඟී සිටි අනාගතය විනිවිද දුටු අභීත ගැහැනියක් ද සිටියා ය. එදා 2015 මහින්ද රාජපක්ෂ පරාජයට පත්කළ අවස්ථාවේ ඈ සිදුකළ ප්‍රකාශයෙන් එය මොනවාට තහවුරු වෙයි.

රටේ සමස්ත භූමියෙන් 3/4ක පමණ ප්‍රදේශයක් පරාජයට පත් වූ බහුතර සිංහලයන් ප්‍රතික්ෂේප කළ මෛත්‍රීපාල සිරිසේන උතුරු නැගෙනහිර ඇතුළු සුළු ජන ඡන්දවලින් බලයට පත්වූ අවස්ථාවේ ම රට වන නස්පැත්තිය නීලා දුටුවාය. ඈ ඉවසීමේ සීමාව ද අහිමිව හඬා වැටෙමින් උක්ත ප්‍රකාශය කළේ එහෙයිනි. මත්තල ගුවන්තොටුපළේ වී ගබඩා කොට ආරම්භ වූ ඒ කලියුගයෙහි හම්බන්තොට වරාය විකුණා දැමීම, මහා බැඳුම්කර කොල්ලය, රණවිරුවන් ජිනීවා දංගෙඩියට යැවීම, උතුරු නැඟෙනහිර බෞද්ධ උරුමය බුල් ඩෝසර් කර මිරිස් වැවීම, රට දෙකඩ කරන MCC ගිවිසුම අත්සන් කරන මුව විටට ම රට ඇදගෙන ඒම සහ අවසානයේ පාස්කු ප්‍රහාරය එල්ල වන තැනට ජාතික ආරක්ෂාව දුර්වල කර ජන සංහාරයක් සිදුකිරීම වැනි අපරාධ මිස රටට සිදු වූ සෙතක් නැත. ඒ බව නීලා දුටුවේ සියලු ද්‍රෝහී බලවේග එකතු වී 2015 මහින්ද රාජපක්ෂ පරාජය කළ අවස්ථාවේ ය.

එම වසර පහ තුළ සමස්ත ආර්ථිකය බිඳ වැටුණි. ආර්ථික වර්ධන වේගය, දළ ජාතික නිෂ්පාදනය, ඒක පුද්ගල ආදායම, විදේශ සංචිත ආදී සියල්ල කඩා වැටුණේ කොවිඩ් වැනි දැවැන්ත වසංගතයක් තිබී නොව රාජපක්ෂ පාලනය අවසන් කිරීම සඳහා ම රටට බෝ කළ යහපාලන වසංගතය නිසාවෙනි. මේ රටේ ප්‍රධාන ආදායම් මාර්ගයක් වූ සංචාරක කර්මාන්තය කඩා වැටුණේ කොවිඩ් නිසා නොව අන්තවාදය සුරතල් කළ යහපාලන වසංගතයේ අනිවාර්ය ප්‍රතිඵලයක් වූ පාස්කු ප්‍රහාරය නිසාවෙනි. කොවිඩ් වසංගතය අපට දැඩි බලපෑමක් එල්ල කිරීමට මූලික හේතුව ද ලෝකය එක වසංගතයකට මුහුණ දෙන විට අපේ රට වසර 05ක් තිස්සේ යහපාලන වසංගතයට මුහුණ දී හෙම්බත්ව සිටීම නිසා ය. 

ඒ කලියුගය අවසානයේ යහපාලන ක්ෂාපාලකයින්ට උදම් අනන්නට ඉතිරි වුණේ ජිනීවාවල දී බැරක් ඔබාමා සිරිසේන අසලට පැමිණ කතා කිරීම, රුපියල් පහ සමග කහ ඉර සුදු කිරීම වැනි විහිළු කිහිපයක් පමණි. ඒ ව්‍යසනය එදා නොදුටු ජනතාව ද එක්ව අවසානයේ යහපාලන ආණ්ඩුව ගෙදර යැව්වේ එජාපයට යන එන මං නැති කරමිනි. ශ්‍රීලනිපයට පොහොට්ටුවේ එල්ලීම නිසා යන්තම් පණ නළ ගැටගසා ගැනීමට හැකි විය. මේ ව්‍යසනය එදා නීලා වික්‍රමසිංහ ඉතා ම නිවැරදිව දුටුවාය. ඒ වෙනුවෙන් ඈ හඬ නැගුවාය. ඒ සඳහා අවශ්‍ය ශක්තිය ඒ කලාකාරිනිය තුළ තිබිණි. නීලා වික්‍රමසිංහ කලාකාරිනියට උතුම් වූ නිර්වාණය ප්‍රාර්ථනා කරමි.

බලා හිඳිමි දුර ඈතක ඇයි ඔබ

මා රඳවා පියවර මැන්නේ ....

හෙළා සුසුම් රැළි දුක සඟවන්නෙමි

මා කතරක තනි වූ වැන්නේ ....

බලා හිඳිමි දුර ඈතක ඇයි ඔබ ....

නාමල් උඩලමත්ත