මීට කලකට පෙර දුම්රියේ සිඟමන් යැදීම තහනම් කිරීමේ නීති ගෙන ආ අතර දැන් එම නීතිය බලාත්මක වේයැයි සිතමි. අද දිවයිනේ මුල් පිටුවේ පුවතක පැවසෙන පරිදි මැයි 01 දා සිට පෞද්ගලික බස්වල සිඟමන් යැදීම තහනම් ය. එය නිතර බස්වල යනෙන මගීන්ගේ අමන්දානන්දයට හේතු වනු ඇත.
බස්වල හිඟන වේශයෙන් එන බොහෝ දෙනකු විසින් හිඟාකනු වෙනුවට මංකොල්ලකනු දක්නා ලැබේ. මුදල් නොදුන් අයට හිත රිදෙන දෑ පැවසීම, සුළු මුදලක් දුනි නම් එය මුහුණට ම දමා ගැසීම නැතහොත් දුන් මුදල ප්‍රසිද්ධියේ පැවසීම ඉතා සුලබය. පොල් පටවන්නා සේ මගීන් පටවන බස්වල කොන්දොස්තරගේ කන්දොස්කිරියාව ද විඳිමින් කරබා ගෙන හැකිලි ගමන් කරන මගීන් මේ හිඟන කරදරයෙන් මුදවා ගැනීම ගැන ගැමුණු විජේරත්නට අපි ස්තූතිය පළ කරමු.
මේ නීතිය පෞද්ගලික බස්වල පමණක් නොව ලංගම බස්වල ද ක්‍රියාත්මක කිරීමට අදාළ බලධාරීන් ක්‍රියා කරනු ඇතැයි අපි විශ්වාස කරමු. මෙරට නීතිය අනුව ප්‍රසිද්ධ ස්ථානවල හිඟාකෑම තහනම් බව ද පොලිසියට ඇත්තේ අදාළ නීති බලාත්මක කිරීම පමණක් බව ද පොලිසියට මතක් කරමු. දේශපාලන බලය ඇති හඟන මුදලාලිලාට මේ නීතිවලට විරුද්ධව ක්‍රියා කිරීමට උල්පන්දම් නොදෙන්නැයි අපි දේශපාලන උතුමන්ගෙන් ඉල්ලා සිටිමු.
නුදුරේදීම සමස්ත රටේ ම හිඟාකෑම තහනම් කරනු ඇතැයි අපි බලාපොරොත්තු වෙමු. හිඟාකෑම කිසිවෙකුගේ අයිතිවාසිකමකැයි ලිප්ටන් රවුමේ උපවාස කිරීමට ද බැරි නැත. කසිප්පු පෙරීම කුඩු විකිණීම යමෙකුගේ අයිතියක් නම් පමණක් උක්ත අයිතිය ලබාදුන්නාට කම් නැත. එහෙත් ඇතැම් දේශපාලන හෙංචයියලාට අර පහත කී මානව අයිතිය ඇති බව කිවයුතු නොවේ.
No comments:
Post a Comment