දැන් White House සහ White Elephant දෙක ම එකයි!

ඇමරිකාව ISIS ඇතුළු ත්‍රස්ත කල්ලි මාර්ගයෙන් සිරියාවේ දේශපාලන ගැටුම් නිර්මාණය කළේ 2011 වසරේ සිට සිරියානු ජනාධිපති බෂාර් අල්-අසාද් විදේශ් සංචාරවලට සහභාගී වුණේ නෑ. ඒ අතර ISIS මර්දනය කරන බව පවසමින් ISIS ඇතුළු ත්‍රස්ත කල්ලි වර්ධනය කළේ ඇමරිකාව.

නමුත් රුසියාව ත්‍රස්ත මර්දන ප්‍රහාර ආරම්භ කරලා මාසයක් තුළ සිරියානු රජය සහ හමුදා ශක්තිමත් වුණා. ඒ ශක්තිය කෙතරම් ද කිවහොත් අල්-අසාද්ට විදේශ සංචාරයකට සහභාගී වෙන්න පුළුවන් තරමට ඔවුන් ශක්තිමත්. ඒක ISIS ඇතුළු ත්‍රස්ත කල්ලි මාර්ගයෙන් අල්-අසාද්ගේ ඇමරිකන් සහ බටහිර ගැති නොවන ශියා පාලනය පෙරළා දමා ඇමරිකන් සහ බටහිර ගැති සුන්නි පාලනයක වියරු සිහින දුටු ඇමරිකාවට මේක කනේ පහරක්.

මේ අව් අස්සේ කැනඩා නව අගමැති ජස්ටින් ට්‍රඩියෝ ඇමරිකාව ප්‍රමුඛ ඊනියා ISIS ප්‍රහාර කණ්ඩායමෙන් තමන්ගේ යානා ඉවත් කරගන්නා බව ප්‍රකාශ කිරීම ගහෙන් වැට්ට ඇමරිකාවට ගොනා ඇන්නා වගේ වැඩක්. ඉතින් අවයිට් හවුස් එක සිරියානු ජනාධිපති බෂාර් අල්-අසාද්ගේ රුසියානු සංචාරය හෙළා දකිනවා කියලා කියනවා. හෙළා නෙමේ, හෙළුවෙන් දකිනවා කියලායි මට හිතෙන්නේ.

අපේ ගෙදරට එන එවුන්, අපි යන තැන තීරණය කරන්නේ අපි මිස ගමේ චණ්ඩියා නෙමේ කියලා පූටින් හිනාවෙනවා ඇති. ඒ ගොං චණ්ඩි පාට් බටහිර ඉන්දිය කොදෙව්ව වගේ පොන්නයෝ පාලන කරන රටවල්වලට මිස පුටීන්ලා වගේ නායකයෝ පාලනය කරන රටවල්වලට දාන්න ගියාම ඔහොම පීචං වෙන්න වෙනවා. දැන් White House සහ White Elephant දෙක ම එකයි!. ඇත්ත ඒක තමා. මුල දී ඉතින් දරා ගන්න අමාරු තමා.

කුමාරසිංහ සිරිසේන යනු පියදාස සිරිසේනගේ මල්ලී ය

ලංකාවට යහ පාලන වසන්ත කාලය උදා වන විට ටෙලිකොම් සභාපතිගේ වැටුප ලක්ෂ 2කි. කුමාරසිංහ සිරිසේන මහතා සභාපතිත්වයට පත් වු වහා එය ලක්ෂ 9 බවට පත්ව පසුව ලක්ෂ 30ක් බවට පත් විය. සියලු දීමනා සමඟ ලක්ෂ 90ක් ඔහුට මාසිකව ලැබිණි. දැන් ඔහු වැටුප ලෙස රුපියල් කෝටියක් ඉල්ලා සිටින බව වාර්තා වේ.

මහින්ද රාජපක්ෂ දූෂිත පාලන සමයේ බොහෝ දුක් විඳිමින් ඉතා ම දුෂ්කර ජීවිත ගත කළ රාජ්‍ය සේවකයෙකු රට නිවැරදි මාවතේ ගමන් කරන මෙවන් කාලයක හොඳ වැටුපක් ඉල්ලා සිටීම පිළිබඳ ඇතැමුන් කුහක ලෙස අදහස් ප්‍රකාශ කරන්නේ ඇයි ද යන්න ජනතාවට ගැටලුවකි.

රටේ ජනතාවට තේ දළු කිලෝවක් රුපියල් 150-160ක මිලකට අලෙවි කළ හැකි රටක, වී කිලෝවක් රුපියල් 90-110ට අලෙවි වන රටක, රබර් ෂීට් කිලෝවක් රුපියල් 750ට වැඩි මිලකට අලෙවි වන රටක එවැනි ඉඩකඩම් දේපොල කිසිවක් නැති අසරණ රාජ්‍ය සේවකයෙකු රුපියල් කෝටියක වැටුපක් ඉල්ලුවේ යැයි කෝපවන්නෝ යහ පාලනයට නින්දා නොකරත් ද? අනෙක් අතට මේ ඔවුන් නින්දා කරන්නේ ජනවාරි 08 වෙනිදා වනතුරු විළිරුදාවෙන් මොරදී බිහි කර ගත් කුළුඳුල් යහ පාලන නොදරුවාට නොවෙද?

අනෙක් අතට මේ කුමාරසිංහ සිරිසේන යනු අපේ ජනාධිපති මෛත්‍රීපාල සිරිසේන මහතාගේ බාල සොහොයුරා බවට ගෙන යන ප්‍රචාරය ද මහා බොරුවකි. සරල දිවිපෙවෙතක් ගත කරන එතුමා ජනාධිපති මන්දිරයේ වාසය කිරීම පවා ප්‍රතික්ෂේප කළ සැබෑ මහත්මයෙකි. එතුමා රාජපක්ෂ පවුල් පාලනයට මෙන් ම ඕනෑම පවුල් පාලනයකට එරෙහිවන ජන නායකයෙකි. නාස්තියට, ගසා කෑමට හෝ වංචාවට එතුමාගෙන් කිසි බුරුලක් නැත.

කෙසේ වුව ද මේ කුමාරතුංග සිරිසේන මහතා යනු පියදාස සිරිසේන නැමැත්තාගේ මල්ලි වීමට බොහෝ දුරට ඉඩ තිබේ. ඔහු විමලතිස්සි හාමුදුරුවන්ගේ මුදල් පෙට්ටිය නමින් පොතක් ද ලියා තිබේ. ඒ සිරිසේන මුදල් පසු පස්සේ දිව ගියා පමණක් නොව හාමුදුරුවන්ගේ මුදල් පෙට්ටි වෙත ද ඇස ගසා ගෙන සිට තිබේ. කුමාරතුංග සිරිසේන පියදාස සිරිසේනගේ සොහොයුරාා බව සනාථ කිරීමට මේ සාධක ප්‍රමාණවත් ය. එහෙයින් ලොවට ම ආදර්ශයක් වූ සිරිසේන ජනාධිපතිවරයාට අවලාද නඟන කණ්ඩායම් පිළිබඳ ජනතාව අවදියෙන් සිටිය යුතු ය.

එන්න අපි පිල්ලෙයාන්ට ගල් ගහමු!

2005 වසර යනු කොටි ත්‍රස්තවාදය දරුණු ලෙස ක්‍රියාත්මක වූ සමයකි. එකල සිදු වූ ඝාතන බොහෝ ය. ඒ සියල්ල ප්‍රභාකරන්ගේ අණින් කළ ඒවා ය. ශිවනේෂතුරෙයි චන්ද්‍රකාන්තන් නමැති පොඩි එකා ළමා සොල්දාදුවෙකු ලෙස කොටි සංවිධානයට බඳවා ගන්නේ ද ඔහුට පිල්ලෙයාන් යනුවෙන් නමක් ලබා දෙන්නේ ද ප්‍රභාකරන්ගේ අණ අනුව ය. මොළ සෝදා කුඩා දරුවන් වූ චන්ද්‍රකාන්තන්ලා පමණක් නොව පමණක් නොව විනයාගමූර්ති මුරලිදරන්ලා මිනි මැරීම සඳහා යොමු කළේ ප්‍රභාකරන් ය. ඒ ම්ලේච්ඡ කටයුතු අපේ ළමයින්ගේ දඟකාරකම් ලෙස සලකා කටයුතු කළේ දෙමළ ජාතිවාදී දේශපාලකයෝ ය. ඒ සඳහා අවශ්‍ය මූල්‍ය ශක්තිය සහ ජාත්‍යන්තර සහාය ලබා දුන්නේ සුරේන් සුරේන්ද්‍රන්ලා ප්‍රමුඛ දෙමළ ඩයස්පෝරාවයි. එසේ බලන කල චන්ද්‍රකාන්තලා යම් අපරාධයක් කළේ නම් ඊට සහාය දුන් දෙමළ ජාතික සංවිධානය ද දෙමළ ඩයස්පෝරාව ද වගඋත්තරකරුවන් විය යුතු ය.

එහෙත් හිටපු පාර්ලිමේන්තු මන්ත‍්‍රී ජෝෂප් පරරාජසිංහම් මහතා 2005 වසරේදී ඝාතනය සම්බන්ධයෙන් සැක පිට හිටපු නැගෙනහිර පළාත් මහ ඇමති චන්ද්‍රකාන්තන් පමණක් අත් අඩංගුවට ගෙන තිබේ. ඒ ඔහු ප්‍රජාතන්ත්‍රවාදයට පැමිණීමට පෙර කළ වරදකට ය. එසේ අත්අඩංගුවට ගන්නා ලද්දේ දෙමළ ජාතික සන්ධානය ද දෙමළ ඩයස්පෝරාව ද සිය මිතුරන් ලෙස සලකන ආණ්ඩුව විසිනි. චන්ද්‍රකාන්තන්ලා අත්අඩංගුවට ගත් ආණ්ඩුවේ විදේශ ඇමතිවරයා නොබෝදා සුරේන් සුරේන්ද්‍රන්ගේ එංගලන්ත නිවසේ රාත්‍රී සම්භාෂණයකට පැමිණි බව වාර්තා වේ. චන්ද්‍රකාන්තන්ලාට අපරාධ කිරීමට අනුබල දුන්නේ සුරේන්ද්‍රන්ලාගේ දෙමළ ඩයස්පෝරාවයි. ඒවා සාධාරණීකරණය කළේ දෙමළ ජාතික සන්ධානයයි. 

මේ උභතෝකෝටිකය අප තේරුම් ගන්නේ කෙසේ ද? සැබවින් ම මේ අත්අඩංගුවට ගන්නේ ඔවුන් සඳහන් කර ඇති අපරාධය නිසාම ද? නො එසේ නම් විනයාගමූර්ති මුරලිදරන් සමඟ කොටි සංවිධානයෙන් බිඳී අවුත් ශ්‍රී ලංකා හමුදාව සමඟ එක්ව කොටි පරාජය කරන යුද්ධයේ තීරණාත්මක කාර්යභාරයක් ඉටු කළ නිසා ද?ජනවාරි 08 වෙනිදා සිට බන්ධනාගාරව ගතව සිටි දරුණු ගණයේ කොටි නිදහස් කළ ආණ්ඩුව චන්ද්‍රකාන්තන්ලා පසුපස හඹා යන්නේ ඇයි? මෙවැනි චෝදනා යටතේ කොටින්ට ද්‍රෝහි වූ නිසා ම විනයාගමූර්ති මුරලිදරන් වුව අත් අඩංගුවට ගත හැකි ය. බෞද්ධයින්ගේ මුදුන් මල්කඩ වූ ජය ශ්‍රී මහා බෝධියට ප්‍රහාර එල්ල කිරීම ඒ සඳහා කදිම චෝදනාවකි. එහෙත් සැබවින් ම ඔවුන් අත් අඩංගුවට පත් වන්නේ තිස් වසරක් මේ රට වෙළා ගෙන පැවති ම්ලේච්ඡ කොටි ත්‍රස්තවාදය පරාජය කිරීමට කටයුතු කළ නිසා ය. ඊට අනුබල දුන් නිසා ය. මහින්ද රාජපක්ෂ සමඟ සිටගත් නිසා ය. 

එහෙයින් ප්‍රභාකරන්ගේ පුතා බාලේන්ද්‍ර වෙනුවෙන් කිඹුල් කඳුලු හෙළු මේ රටේ මානව හිමිකම් අයිතිකාරයින්ට කිසි විටෙක චන්ද්‍රකාන්තන්, මුරලිදරන් වැනි එදවස ළමා සොල්දාදුවන් වූ අහිංසකයින්ගේ ලමා අයිතිවාසිකම් සිහිපත් නොවනු ඇත. ඔවුන්ගේ ළමා කාලය උදුරා ගෙන අත රැඳී පෑන පොත වෙනුවට තුවක්කුව සහ බෝම්බය ද ගෙලට සයනයිට් කරල ද ලබා දුන් ප්‍රභාකරන් ද දෙමළ ජාතික සන්ධානය ද දෙමළ ඩයස්පෝරාව ද කිසිවෙකු ප්‍රශ්න නොකරනු ඇත. ඊනියා ළමා අයිතිවාසිකම් වෙනුවෙන් නොව ශ්‍රී ලංකා හමුදාවට අපහාස කිරීමට ඔවුන් රටට දිනා දුන් ජයග්‍රහණය අවප්‍රමාණ කිරීමට බාලේන්ද්‍ර ගැන කවි ලියු කවීන් ඊට සුදු කොඩි එසවූ මානවහිතවාදීන් කවි නොලියනු ඇත. සුදු කොඩි නො උස්සනු ඇත.   ඉතින් අපි සම්බන්ධන්ට සහෝදරත්වයේ දෑත් දිගු කරමු. සුරේන්ද්‍රන්ලා සමඟ සව්දිය පුරමු. පිල්ලෙයාන්ට ගල් ගහමු. කරුණාට ගල් ගහමු. 

බදු බොන එකා බේබද්දාය

ලාල් කාන්තා කියනවා ගල් අරක්කු බෝතලයක් රුපියල් 1060 වෙද්දී, එයින් රුපියල් 888ක් බදු කියලා. එතකොට ගල් බෝතලයක සැබෑ වටිනාකම රුපියල් 172යි. එහෙම බලද්දී අනිත් අරක්කුවල ගණන්වල වුණත් ලොකු වෙනසක් නැතිව ඇති.

කිසිම බදු මුදලක් නොගෙවන දේශීය නිෂ්පාදනයක් වන කසිප්පු බෝතලයකුත් මං හිතන්නේ දැන් රුපියල් 300ක් වත් වෙනවා ඇති. ඒ කියන්නේ මහ ලොකු අරක්කු, කසිප්පු තරම්වත් වටින දෙයක් නෙමේ. බලන් යද්දී අපේ ටයි කෝට් දාන පොරවල් උජාරුවෙන් සෙට් වෙලා බොන්නේ බදු නේ.

හවසට සෙට්වෙනවා. බදු බොනවා. මඟුලේ දී සෙට් වෙනවා. බදු බොනවා. මරණෙදී සෙට් වෙනවා. බදු බොනවා. දානේ දී සෙට් වෙනවා. බදු බොනවා. බොන්නෙම බදු. 'බොනවා' කියන ක්‍රියා පදය 'බිව්'වෙලා 'බේ' වෙනවා. 'බදු' ඒක වචනයේ දී 'බද්ද' වෙනවා. 'අා' ප්‍රත්‍යය යෙදිලා 'බද්දා' කියන නාම පදය හැදෙනවා. බේ + බද්දා = බේබද්දා. බදු බොන එකා බේබද්දා ය. බදු බොන එවුන් රංචුව බේබද්දෝ ය.

නැටුම කෙළවර

"රනිල්-මෛත්‍රී දෙපළම එකතුවී අප වැන්නන්ගේ රෙදි ගැලවීමට සෑහෙන මහන්සියෙන් කටයුතු කරමින් සිටී." - ආචාර්ය නිර්මාල් රංජිත් දේවසිරි
අත්තික්කා මල් වගේ කෙප්ප යහ පාලනයක් ගැන කියලා රටේ ජනතාවගෙන් සැලකිය යුතු පිරිසක් ගොනාට අන්දවන්න නිර්මාල් මහතා ප්‍රමුඛ උගත්තු විශාල කාර්යභාරයක් කළා. එහෙම කළේ අද තිබෙන තත්ත්වයට රට පත්වෙනවා කියලා නොදැන, අවංකවම නම් එතුමන්ලාට අනුකම්පා කරන්න ඕන. යම් දේශපාලන ව්‍යපාරයක අතීතය සහ වර්තමාන මත සිට එහි අනාගතය විනිවිද දැකිය නොහැකි අය උගත්තු වුණාට බුද්ධිමතුන් නම් නෙමේ.
ජනවාරි 08 වෙනිදා ඉඳලා ම නිර්මාල් මහතා ප්‍රමුඛ උගත්තු මොනර නැටුම් නැටුවේ ඊනියා යහ පාලන සීතාම්බර සළුව ඇඳ ගෙන. මේ නැටුම් දැකපු බොහෝ උගත්තු සළුව වර්ණනා කරන්න ඇති. නමුත් එහෙම සළුවක් ඇඳලා තිබුණේ නෑ. නිරුවස්ත්‍රාභරණයෙන් සැරසිලා නැටුවේ. ඒක දැකපු මෝඩයෝ පිරිසකුත් රටේ හිටියා. යහ පාලන සීතාම්බර සළුව නොපෙනෙන ඒ මෝඩයෝ 'ඔබබතුමන්ලා නිරුවතින්' කියලා ඇඟිල්ල දික් කරලා මුණට ම කියන කොට දැන් එතුමන්ලා තමන්ගේ ඇඳුම් හොයනවා. වැඩේ කියන්නේ දැන් ඇඳුම් ගලවලා දාපු තැනුත් මතක නෑ.

රැවටුණේ රනිල් නොව ඔබාමාය!

අගමැති රනිල් වික්‍රමසිංහ මහතා ජපන් පාර්ලිමේන්තුව ඇමතු ලොව තෙවන රාජ්‍ය නායකයා බව පසු ගිය දා මාධ්‍ය අනාවණරය කර තිබිණි. එහෙත් එය පට්ටපල් බොරුවකි. එතුමා ජපන් පාර්ලිමේන්තුව ඇමතු ලොව ප්‍රථම රාජ්‍ය නායකයා ය. එතුමාට අපහාස කළ මෝඩයින් දැන් වහාම එතුමාගෙන් සමාව ඉල්ලා සිටිය යුතුය. 

මීට පෙර බැරක් ඔබාමා, නරේන්ද්‍ර මෝඩි මෙන් ම චීන සහ භූතාන නායකයින් ද දේශන පවත්වා තිබුණේ ජපන් පාර්ලිමේන්තුවේ නොව ජපානයේ  හිරෝහිතෝ අධිරාජ්‍යයා රාජ්‍ය විචාළ රාජ සභාවෙහි ය. ඔබාමා, ෂී පෙන් රාජ සභාව අමතන පින්තූරවල ඇති පැරණි ගෘහ නිර්මාණ ලක්ෂණ එය සත්‍යයක් බව සනාථ කරයි.

තමන්ගේ රටට බෝම්බ දැමූ ඇමරිකාවේ රාජ්‍ය නායකයින් ලවා සිය ගම්භීර පාර්ලිමේන්තුව කිළුටු කර ගැනීමට අභිමාණවත් ජපන් ජාතිකයෝ කිසිසේත් ක්‍රියා නොකරති. එහෙත් ඔබාමා තරහ කර ගෙන බැරි නිසා ඔහුට පැරණි රාජ සභාව ඇමතීමට අවස්ථාවක් ලබා දී තිබිණි. එහෙත් එය රහසක් ලෙස තබා ගැනීම සඳහා ඊට පසු පැමිණි රාජ්‍ය නායකයින්ට ද ජපන් පාර්ලිමේන්තුව ඇමතීමට අවස්ථාව ලබා දෙන බව පවසා ජපනුන් කර ඇත්තේ පැරණි රාජ සභාවේ කතාවක් කරවා ඔවුන් සතුටු කරවීම ය.

එහෙත් නළුවෙක් නොව මොළයක් බව පැවසෙන ශ්‍රී ලංකා අග්‍රාමාත්‍ය රනිල් වික්‍රමසිංහ මහතා එසේ රැවටිය නොහැකි බව ජපනුන් දැන සිටි අතර ඔහුගේ මාමා වන ජේ. ආර්. ජයවර්ධන මහතා එක්සත් ජාතීන්ගේ සංවිධානය තුළ ජපානය වෙනුවෙන් පෙනී සිටිමේ ගෞරවය ආරක්ෂා කිරීමට ද ඔවුන්ට අවශ්‍ය විය.

එහෙයින්ය; ඔවුන්ගේ සැබෑ පාර්ලිමේන්තුව අමතන ප්‍රථම විදේශ රාජ්‍ය නායකයා ලෙස රනිල් වික්‍රමසිංහ මහතා තෝරා ගනු ලැබූවේ. එය අපට මහත් ආඩම්බරයකි. 

කෙසේ වුව ද මේ සමඟ ජපානය සහ ඇමරිකාව අතර රාජ්‍ය තාන්ත්‍රික ගැටුමක් ඇති වී තිබේ. ඒ ජපානය සිය රාජ්‍ය නායකයා ලවා ජපාන පාර්ලිමේන්තුව යැයි පැරණි රාජ සභාව ඇමතවීම සිය රටට කළ මදි පුංචිකමක් ලෙස ඇමරිකාව සලකන නිසා ය. අනෙක් අතට තම අගමැතිවරයා ඇමතුවේ ජපන් පාර්ලිමේන්තුව නොව එහි රැස්වීම් ශාලාවක රැස් වූ මන්ත්‍රී පිරිසක් යැයි ලංකා ආණ්ඩුව වරදවා තේරුම් ගැනීම නිසා එම සංචාරය නිමා වනවාත් සමඟ ජපන් වාහනවල බදු ගණන් ඉහළ දමා තිබේ. 

ඔබාමා මහතාට මෙන් ම රනිල් මහතාට ද සැබෑ තත්ත්වය අවබෝධ කර ගැනීමට මේ ලිපිය ප්‍රමාණවක් යැයි සිතමි. සත්‍ය අවබෝධ කර ගෙන ජපන් වාහනවල බදු පහත දමා අඩුවට වාහනයක් ගැනීමට එජාප ආණ්ඩුවක් උදා වන තුරු ස්කුටියක නැඟී වැස්සේ තෙමුණු සුදු නංගිටත් ඒ සුන්දර සිහින දුටු සුදු අයියාලාටත් මල්ලිලාටත් අවස්ථාවක් ලබා දෙන මෙන් ඉල්ලා සිටිමි.

මානව හිමිකම් නමැති ආයුධය!

ඇමරිකාව ඇෆ්ගනිස්ථානයේ කුන්දූස් නගරයේ රෝහලකට බෝම්බ දාලා කාර්ය මණ්ඩලයේ 12ක් සහ රෝගීන් 10ක් සමඟ 22ක් මරණයට පත්වුණේ ය. තව 30 දෙනෙක් අතුරුදහන් වී ඇති බව ඇතැම් මාධ්‍යවල කියැවිණි. මෙය අත්වැරදීමක්ලු. ඔබාමා පූර්ණ පරීක්ෂණයක් ද කරන්නේලු. මේ පරීක්ෂණයෙන් රෝහලේ මිය ගිය කාර්ය මණ්ඩලය සහ රෝගීන් වැරදිකරුවන් වෙන්න තියෙන ඉඩ බොහොම වැඩිය. දැනටමත් ඔවුන් දඩුවම් ලබලා නිසා ලොකු ප්‍රශ්නයක් නොවනු ඇත.

ඒ කොහොම වුණත් මෙවන් සිද්ධියක් ඇමරිකාව සහ බටහිර විරෝධි රටක් අතින් සිදු විණි නම් මේ වන විට ලෝක දේශපාලන නායකයින්ගේ සහ සංවිධානවල හැසිරීම කුමක් විය හැකිව තිබුණි ද? BBC, CNN, අල්-ජසීරා ඇතුළු මාධ්‍යවල හැසිරීම කුමන ස්වරූප ගනු ඇත් ද? මේ කොදෙව්වේ ජීවත් වන NGO උගතුන් කුමක් කරනු ඇත් ද?

එසේ වී නම් අදාළ රටේ නායකයා ජිනීවා රැගෙන යාමට අවශ්‍ය සියලු මතවාද මේ වන විට සමාජයට මුදා හැර අවසන් ය. ඊට එරෙහිව ලොව පුරා ජනතාව වීථි බස්වා අවසන් ය. දහස් ගණනින් පෙත්සම්වලට අත්සන් තබා අවසන් ය. බෑන් කී මූන් පැයෙන් පැයට නිවේදන නිකුත් කරනු ඇත. හියුමන් රයිට්ස් වොච්ලාට වෙන වැඩක් නැති වනු ඇත. ලංකාවේ උගත්තු ලිප්ටන් වටරවුමේ නිහඬ උද්ඝෝෂණයක් කර අදාළ රටේ තානාපති කාර්යාලයට විරෝධතා සන්දේශයක් රැගෙන යනු ඇත. අදාළ රටේ පාලකයා කිලර්, බුචර් වැනි නම්වලින් හඳුන්වමින් ලෝකය විනාශ කරන්නට පැමිණි අති භයානක චරිත ලෙස හුවා දක්වනු ඇත. එහෙත් මේ අවස්ථාවේ ඒ කිසිවක් සිදු නොවේ.

එසේ වන්නේ ඇයි? ඒ අන් කිසිවක් නිසා නොව මානව හිමිකම්, ප්‍රජාතන්ත්‍රවාදය, මාධ්‍ය නිදහස ආදි සියල්ල ලෝක බලවතුන් සිය දේශපාලන සතුරන් දඬයම් කිරීම සඳහා භාවිත කරන භයානක ආයුධ නිසා ය. මේ වන විට ලෝකයේ මානව හිමිකම්, භාෂණ නිදහස, ප්‍රජාතන්ත්‍රවාදය ආදිය කිසියම් ජනතාවකට හිමි යැයි බටහිර සහ ඇමරිකාව පිළිගනු ලැබීමට නම් ඒ රටවල පාලකයින් ඇමරිකන් සහ බටහිර ගැති නොවිය යුතු ය. ඇමරිකන් අභිලාෂයන්ට පටහැනිව ක්‍රියා කළ යුතු ය. එකල්හි ඒ රටේ පාලකයින් ජනතාව පෙළන බවට වසර ගණනාවක් තිස්සේ ලෝක මට්ටමින් මතවාද නිර්මාණ කරනු ලැබේ. විරුද්ධ පක්ෂ කණ්ඩායම්වල රටේ ප්‍රජාතන්ත්‍රවාදය ස්ථාපිත කිරීම සඳහා ඇමරිකාව විසින් නොමිලේ ආයුධ සහ පුහුණුව ලබා දෙනු ලැබේ. ඒ රටවල ප්‍රජාතන්ත්‍රවාදී පාලකයින් පැන්නීම සඳහා ගැටුම් නිර්මාණය කරනු ලැබෙන අතර ඒවා මර්දනයට අදාළ ආණ්ඩු ක්‍රියා කරන විට රටේ ජනතා මර්දනය කරන බව පවසමින් තමන් ආධාර කළ ත්‍රස්ත කල්ලි ආරක්ෂා කරනු ලැබේ. දැන් සිරියාවේ සිදු වන්නේ එයම ය. කෙසේ වුව ද කිසියම් රටක් ඇමරිකාවේ මිතුරන් නොවුණ ද ඇමරිකාවේ දේශපාලන සතුරන්ගේ සතුරන් නම් ඒ රටවල ජනතාවට අර පැකේජය නොමිලේ ලැබේ.

ප්‍රජාතන්ත්‍රවාදය රැකගමු ද? ඇමරිතන්ත්‍රවාදය පිළිගමු ද?

සිරියාවේ ඉල්ලීමක් හෝ එක්සත් ජාතීන්ගේ සංවිධානයේ ඉල්ලීමක් හෝ නොමැතිව අවුරුද්දක පමණ කාලයක් ISISලාට පහර දෙන්නේ යැයි කියමින් සිරියාවට බෝම්බ හෙළු ඇමරිකාවට, සිරියානු රජයේ ඉල්ලීම සහ සිය රටේ අනුමැතිය සහිතව රුසියාව ISISලාට පහර දෙන විට මේ තරම් රිදෙන්නේ ඇයි? ඇමරිකාව සැබවින් ම ISISලාට එරෙහි නම් කළ යුත්තේ අවුරුද්දක් තිස්සේ බෝම්බ හෙළා තමන්ට කිසිදු ප්‍රගතියක් අත්කර ගත නොහැකි වූ කටයුත්ත සාර්ථක කර ගැනීමට රුසියාවට සහාය වීම නොවෙද? එහෙත් අවුරුද්දක් තිස්සේ ISISලාට පහර දෙන බව පවසමින් එය මර්දනයට නොව වර්ධනයට කටයුතු කළ ඇමරිකාව, රුසියාව සිය ප්‍රථම ගුවන් ප්‍රහාරය එල්ල කිරීමට ද පෙර රුසියානු ප්‍රහාරවලින් සාමාන්‍ය සිරියානු වැසියන් මියෙන බව ප්‍රකාශ කිරීම අප අවබෝධ කර ගත යුත්තේ කෙසේ ද? එම ප්‍රකාශයට අත්පොළසන් දෙන සෞදි, කුවෙට්, තුර්කි සුන්නි ත්‍රස්තවාදය අප තේරුම් ගෙන තිබේ ද? එම ප්‍රකාශය නිකුත් කර පැය ගණනක් ඇතුළත ඇෆ්ගනිස්ථානයේ රෝහලකට බෝම්බ දමා එම රෝහල විනාශ කර 20 අධික පිරිසක් මරා දැමූ ඇමරිකාව මිනිස් ජීවිතවලට ලබා දී ඇති වටිනාකම කුමක් ද? 

එම ප්‍රහර එල්ල වූ රෝහල් සේවකයෙකු BBCයට ප්‍රකාශ කර ඇති පරිදි පැයක පමණ කාලයක් එම රෝහලට ප්‍රහාර එල්ල කර තිබේ. එහෙත් රෝහල් පරිශ්‍රයේ තාලිබාන් හෝ කිසිදු ත්‍රස්තවාදියෙකු සිට නැත. ඔහු ප්‍රකාශ කරන පරිදි දැඩි සත්කාර ඒකකයේ ප්‍රතිකාර ලබමින් සිටි රෝගීන් සිව් දෙනෙකු ප්‍රහාරය සමඟ පණ පිටින් දැවී ගොස් තිබේ. වෛද්‍යවරු ඇතුළු රෝහල් කාර්ය මණ්ඩලය 10ක් ද රෝගීන් 10ක් පමණ ද මිය ගොස් ඇත. එහෙත් ඇමරිකාවේ ම්ලේච්ඡ ත්‍රස්තවාදයට එරෙහිව සුන්නි ත්‍රස්තවාදීහු කිසිවක් නොකියති. මේ අනුව ඇමරි ත්‍රස්තවාදය සහ සුන්නි ත්‍රස්තවාදය ලොව සියලු සංකල්ප නැවත අර්ථ කතනය කරමින් සිටින බව පැහැදිලි ය. ඔවුන්ගේ අර්ථයෙන් ත්‍රස්තවාදය යනු අන් කිසිවක් නොව ඇමරිකාවට සහ සුන්නි ත්‍රස්තවාදය එරෙහි වීම ය. ඔවුන්ගේ අභිලාෂයන්ට පටහැනිව ක්‍රියා කිරීම ය. එසේ ක්‍රියා කරන විට තම දේශපාලන සතුරන් සකල විධ මානව හිමිකම් කඩ කරන බව පවසමින් BBC, CNN සහ අල්-ජසීරා අති දැවැන්ත ත්‍රස්ත ප්‍රචාරණ ජාලයක් ලෝකයට මුදා හරින අතර ඉන් සැබෑ ත්‍රස්තවාදීන්, විමුක්තිවාදීන් බවට ද ඊට එරෙහිව සටන් කරන පිරිස් ත්‍රස්තවාදීන් බවට ද පත් කෙරේ. මේ දැවැන්ත ප්‍රචාරණ ජාලයට ලෝක ජන මනස වහා ගොදුරු වන අතර ඔවුහු ඉන් සිහි විකල්ව එය අනුමත කරමින් ඊට පක්ෂව ක්‍රියා කරති. ලෝක ජනතාව නැවත සිහි එල්බ ගන්නා විට සියලු විනාශයන් සිදු වී හමාර ය. 

මේ තත්ත්වය නිවැරදිව අවබෝධ කර නොගතහොත් රුසියාව, සිරියාවේ ISISලා මර්දනයට එරෙහි මේ ප්‍රධාන ත්‍රස්ත කල්ලි දෙක ගෙන යන ප්‍රචාරණය ද කෙළවර වනු ඇත්තේ මහා විනාශයක් ඉතිරි කරමිනි. ඇමරිකාව ප්‍රමුඛ බටහිර තමන්ගේ දේශපාලන අභිලාෂයන්ට අනුව නො හැසිරෙන, ඊට එරෙහි වන සිරියානු අල්-අසාද් පාලනය බිඳ දැමීමට ISIS ඇතුළු ත්‍රස්ත කල්ලි නිර්මාණය කර රට අස්ථාවර කර තිබේ. ISIS කල්ලියේ වැඩ කරන කුළී හේවායන් සිය ස්වාමීවරුන්ගේ අභිලාෂ වෙනුවෙන් ISIS ක්‍රියාකාරකම් මෙහෙයවයි. ඒ සඳහා සුන්නි-ෂියා ගැටුම ඇමරිකාව මැනවින් භාවිත කරයි. අල්-අසාද්ගේ ෂියා පාලනය බිඳ දමා සිරියාවේ සුළුතර සුන්නි පිරිස අතට බලය ලබා ගැනීම සඳහා ලෝක සුන්නි ත්‍රස්තවාදය පිස්සු වැට්ටීම මගින් සෞදි, කුවෙට්, තුර්කි සහාය දිනා ගැනීමට ඇමරිකාව සමත්ව තිබේ. සිරියානු විපක්ෂය යැයි බටහිර මාධ්‍ය පුල පුලා පවසන්නේ මේ සුන්නි ත්‍රස්තවාදය විසින් පෝෂණය කර මෙහෙය වනු තබන ත්‍රස්ත කල්ලි වේ. එහෙත් එරට පැවති ජනාධිපතිවරණයෙන් 80%කට වැඩි කැමැත්තකින් බලයට පත් අසාද්ට සිය රට පාලනය කිරීමට ඇමරි සහ සුන්නි ත්‍රස්තයෝ ඉඩ නොදෙති. ඒ හුදෙක් ඔවුන්ගේ දේශපාලන අභිලාෂයන්ට අල්-අසාද් පාලනය අහිතකර නිසා පමණි. මේ අනුව නූතන මානව හිමිකම්, ප්‍රජාතන්ත්‍රවාදය යනු බටහිර විසින් සිය දේශපාලන සතුරන් මර්දනය සඳහා භාවිත කරන සමූල ඝාතන පරමාණු බෝම්බයකි. 

මේ වන විට රුසියානු ප්‍රහාර හමුවේ අල්-අසාද් පාලනය බිඳ දැමීමට ඇමරි-සුන්නි කල්ලිය ඇටවූ ISIS කෙමන දෙදරා තිබේ. එහි කුලී හේවයින් හය සියයක් පමණ නැවත යුරෝපයට පැන යාමට සැරසෙති. ප්‍රහාරය සමඟ ISIS මධ්‍යස්ථාන, සන්නිවේදන මධ්‍යස්ථාන, යුද ටැංකි විනාශ වී ඇති අතර බ්‍රිතාන්‍ය යේ සිට ක්‍රියාත්මක සිරියානු මානව හිමිකම් සංවිධානයක් ප්‍රකාශ කළ පරිදි එක් ප්‍රහාරයකින් ISIS ත්‍රස්තයින් 12 දෙනෙකු මිය ගොස් තිබිණි. ඇමරි-සුන්නි ත්‍රස්තවාදයට එරෙහි සියලු දෙනා මේ අවස්ථාවේ කළ යුත්තේ ඔවුන්ගේ ව්‍යාජ සාමවාදී වෙස් මුහුණු ගලවමින් සැබෑ මිනි මරු මුහුණ ලොව හමුවේ නිරුවත් කර සිරියාවේ ජනතා කැමැත්තෙන් පත් වූ පාලනය ආරක්ෂා කර ගැනීම සඳහා ජන මතයක් නිර්මාණය කිරීම ය. එසේ නොවුණහොත් ඉක්මණින් ම ප්‍රජාතන්ත්‍රවාදය මිය ගොස් ඇමරිත්‍රන්තවාදය උපදිනු ඇත. ඇමරිතන්ත්‍රවාදය යනු ඇමරිකන් කැමැත්ත සහිත පාලක ගැත්තන් විසින් ලොව අනෙකුත් රටවල් පාලනය කිරීම ය.    

දැන් ළමා අපචාර දෙකයි!

පස් හැවිරිදි සේයා දැරියි දූෂණය කර මරා දැම්මේ යැයි දා හත් හැවිරිදි පාසල් සිසුවෙකු අත් අඩංගුවට ගත් කොටදෙනියාව පොලිසිය ඔහුට නිරුවත් කර පහර දී තිබේ. තරුණයාගේ නිරුවත් ඡායාරූප ද ගෙන තිබේ. දැරිය මිය විට ෆේස් බුක් ඔස්සේ ප්‍රචාරය වූ ඇගේ ඡායාරූපයක් පාසල් සිසුවාගේ දුරකතනයේ තිබී ඇත. එසේ ම ඔහුගේ පරිගණකයේ නිල් චිත්‍රපට තිබිම ද මෙලෙස ඔහු අත් අඩංගුවට ගෙන පහර දෙමින් චෝදනා පිළිගන්නා ලෙස බල කිරීමට හේතු වී ඇත. එහෙව් පොලිසිය ලබා දුන් තොරතුරු සුවිශාල කර රටට කුණු රසය බෙදා සිය ගුවන් කාලය සහ පත්තර ටික විකුණා ගත්තේ මෙරට ජඩ මාධ්‍යයයි. කොණ්ඩයාගේ පාපොච්චාරණය හමුවේ වුව ද මේ තරුණයාට බුරුලක් නො ලැබිණි. පසුව DNA සාම්පල වෙනස්වීම ඔහුට නිදහස ලැබිණි.

මෙසේ බලන කල කොණ්ඩයා නමැති මැරයෙකු තනිව ම සේයා දැරිය දූෂණය කර මරා දමද්දි පොලිසිය නමැති රාජ්‍ය ආයතනය සියලු රාජ්‍ය වරප්‍රසාද ලබමින් තවත් දරුවෙකු දූෂණය කර නොමරා මරා තිබේ. ෆේස්බුක් ඔස්සේ පාසල් සිසුවාගේ දුරකතනයේ තැන්පත් වූ සේයාගේ ඡායාරූපය නිසා පාසල් සිසුවා අත් අඩංගුවට ගත් පොලිසිය, තරුණියකට අමානුෂික ලෙස පහර දෙන තරුණ පොන්නයින් දෙදෙනෙකු ඇතුළත් වීඩියෝව තවම නුදුටුවේ ද? ඒ තරුණ පොන්නයින් දෙදෙනා සහ අසරණ තරුණියට පහර දෙන ආකාරය වීඩියෝ ගත කළ පොන්නයා අත් අඩංගුවට ගැනීමට පොලිසියට තවත් සාක්ෂි අවශ්‍ය ද? ඊට එරෙහින නීතිය ක්‍රියාත්මක වී ද? පොලිසිය අසරණ තරුණයෙකුට කළ අසාධාරණයට එරෙහිව නීතිය ක්‍රියාත්මක වන්නේ ද?

නො එසේ නම් මෙලෙස නීතිය වල් වැදීමට දෙන්නේ ප්‍රධාන ජාතිය තුළ ම සිදූ වූ ළමා අපචාරයක වරදකරුවෙකුට කාන්තා හිංසනයක වරදකරුවෙකුට එරෙහිව නීතිය ක්‍රියාත්මක නොවන ගෝත්‍රික රටක සුළු ජාතීන්ට සිදු වන අසාධාරණයක් හමුවේ එරට නීතියේ සරණ පැතීම නිශ්ඵල බව සනාථ කර ඇමරිකන් අධිකරණයේ යුධ අපරාධ නඩු ඇසීම සාධාරණීකරණය කිරීමට ද?

ජනපති ධූරයට අපහාස කරන්නේ කවුද?

ජනපති ධුරයට අපහාස කළේ යැයි සම්පත් අතුකෝරළ සිරගත කර තිබේ. ඔහු දකුණු පලාත් සභා මන්ත්‍රීවරයෙකි. මාධ්‍ය නිදහස, මානව අයිතිවාසිකම්, නිදහස් අදහස් දැරීමේ අයිතිය ගැන නරිවාදන් දෙඩු නිදහස් මාධ්‍ය ව්‍යාපාරික ප්‍රජාව සහ බඩගෝස්තරවාදී ඊනියා උගත්තු ඩොලර් උස්මුරුත්තාවෙන්දෝ එහෙන් මෙහෙන් පුංචි පුංචි බලු කෙඳිරිලි හඬක් දෙකක් නඟා යළි නින්දට වැටෙති. ඒ එවුන් පැතූ දැන් මාධ්‍ය නිදහස ද ප්‍රකාශන නිදහස ද ස්ථාපිත වී ඇති හෙයින් විය යුතු ය.

පසු ගිය ආණ්ඩු සමයේ ෆේස් බුකියේ මහින්ද විරෝධීන් මේ චෝදනාව යටතේ අත් අඩංගුවට ගත්තේ නම් මත්තල වී ගබඩාව වැනි නව සිරගෙවල් තැනීමට සිදුවනු ඇත. කෙසේ වුව ද එසේ එකෙකු අත් අඩංගුවට ගත්තේ නම් මෙරට නිදහස් මාධ්‍ය ව්‍යාපාරික රංචුව, NGO කල්ලිය, ඊනියා උගතුන් ඇතුළු පල්ලිය ඇතුළු සකලවිධ බලවේගව එක පෙළට ලිප්ටන් වටරවුමෙහි, කොටුව දුම්රිය පොළ ඉදිරිපිට බඩ පිනුම් උඩ පිනුම් ගසනු දැකිය හැකිව තිබිණි.

ඇතැම් තනතුරුවලට බෙහෙවින් අපහාස කරන්නේ, නින්දා කරන්නේ අන් අය නොව ඒ තනතුරු දරන අයම ය. යම් යම් තනතුරු කටුස්සාගේ කරේ රන් බැන්දා මෙන් වූ අය ය. රටේ ගෞරවනීය තනතුරු රට්ටු හිනස්සන විකට තනතුරු බවට අපහරණය කළ අයම ය. ඒ අර්ථයෙන් ගත් කල ජනපති ධූරයට අපහාස කිරීමේ චෝදනාව යටතේ සිරගත කළ යුත්තේ සම්පත් අතුකෝරළ නොවන බව නම් ඉතා ම පැහැදිලි ය.

රුසියානු විපක්ෂයේ ජවනිකා තුනක්

ප්‍රථම ජවනිකාව:
රුසියානු හමුදාපති ගැලවීමේ හමුදාවටවත් සුදුසු නෑ. ඕන ගොනෙකුට යුද්ධ කරන්න පුළුවන්. ඩමස්කස් කියන්නේ කැලයක්. රුසියානු හමුදාව සිරියාවේ යනවා කියලා කොරියාවේ යනවා.
දෙවන ජවනිකාව:
පූටින් කරපු යුද්ධයක් නෑ. මිනිහා මොස්කව්ල හැංගිලා හිටියේ. හමුදාපතියි විරෝධාර රණවිරුවොයි යුද්ධ කළේ. පූටින් තමන් යුද්ධ කළා කියන එක වැරදියි. පූටින් මහ රජා වෙන්න හදන එකත් වැරදියි.
තෙවන ජවනිකාව:
පූටින් හොරා පූටින් හොරා.... හොරා...
ඒකාධිපතියා .... ඒකාධිපතියා... ඒකාධිපතියා...
මිනිමරුවා .... මිනිමරුවා.... මිනිමරුවා....

උඹලා හරි මෝඩයි බං...

උඹලා දැක්කේ නැද්ද ඇමරිකන් ජනාධිපති බැරක් ඔබාමාගේ ගෙදර උන්දෑ මිචෙල් ඔබාමා ජිනීවා ඇවිත් උජාරුවෙන් මානව හිමිකම් ගැන කතා කළ හැටි?
උඹලා දැක්කේ නැද්ද චීන ජනාධිපති ශී පෙන්ග්ගේ ගෙදර උන්දෑ පෙන්ග් ලියුවාන් ජිනීවා ඇවිත් චීන කටු චිකිත්සාව ගැන කතා කළ කළ හැටි?
උඹලා දැක්කේ නැද්ද බ්‍රිතාන්‍ය අගමැති ඩේවිඩ් කැමරන්ගේ ගෙදර උන්දෑ සමන්තා කැමරන් ජිනීවා ඇවිත් ස්කොට්ලන්ත ස්වයං නිර්ණන අයිතිය ගැන හඬ නගපු හැටි?
උඹලා දැක්කේ නැද්ද ඕස්ට්‍රේලියානු අගමැති මැල්කම් ටර්න්බල්ගේ ගෙදර උන්දෑ ලුසි ටර්න්බල් ජිනීවා ඇවිත් සමලිංගික අයිතිවාසිකම් ගැන කතා කළ හැටි?
උඹලා දැක්කේ නැද්ද කැනඩාවේ අගමැති ස්ටෙෆන් හාෆර්ගේ ගෙදර උන්දෑ ටර්න්බල් ලොරීන් හාපර් ජිනීවා ඇවිත් බහු-සංස්කෘතිය ගැන කතා කළ ගිය හැටි?
උඹලා දැක්කේ නැද්ද නවසීලන්ත අගමැති ජෝන් කීගේ ගෙදර උන්දෑ බ්‍රෝනා කී ජිනීවා ඇවිත් සිරියාව ගැන කතා කළ හැටි?
උඹලා දැක්කේ නැද්ද දකුණු අප්‍රිකානු ජනාධිපති ජේකොබ් සුමාගේ ගෙදර උන්දෑ ග්ලොරියා නේග්මා ජිනීවා ඇවිත් දීර්ඝ පවුල් ජීවිතයක රහස් හෙළ කළ හැටි?
අන්න ඒ විදිහට හැම ලෝක නායකයෙක්ගේම ගෙදර උන්දෑ ආපු නිසා තමා ඔබාලාගේ, පෙන්ගේ, කැමරන්ගේ දරුවෝ ජිනීවා ආවේ නැත්තේ. ගෙදර උන්දැලා ආවේ නැත්නම් ඉතින් අපට බලන්න තිබුණා එවුන්ගේ දරුවෝ හැත්ත බුරුත්ත රොත්ත පිටින් ගෙහුන් ජිනීවා සමුළුව පවත්වපු ශාලාව මිදුලේ ඔළිඳ කෙළින හැටි. ඒකවත් නොරේන මහින්දගේ මෝඩ වහල්ලු එනවා රට හදන්න. ඉදකින්..... උඹලා හරි මෝඩයි බං...

නොසියා කරොමතුල්ලෝ

මම නොසියා කරොමතුල්ලෝගේ ගීත රස විඳිනවා. නගෝ නගෝ කියන ගීතය ඒ අතර විශේෂයි. ඇය තජිකිස්ථාන තරුණියක්. ඔවුන්ගේ සංස්කෘතිය තව ම සෞදි ඉස්ලාම් සංස්කෘතික ආක්‍රමණයට සම්පූර්ණයෙන් ම ගොදුරු නෑ. එහෙම වුණා නම් ඇයත් කළු පැහැ රෙදි ගෝණියක ඔතලා ගෙයි මුල්ලට දාලා අහවරයි.

දැන් ඇයට අන්තවාදී ඉස්ලාම් කල්ලි වෙතින් මරණ තර්ජන එල්ල වන බව අහන්න ලැබෙනවා. ඇත්තට ම මේ ජනතාව අයිති වෙන්නේ 1970 විතර ඇෆ්ගනිස්ථානයේ පැවති ආසියානු සංස්කෘතියට මිස දැන් ලොව පුරා මුස්ලිම් ජනතාව අතර වසංගතයක් වගේ බෝ වන තාලිබාන් සංස්කෘතිය නෙමේ. හැබැයි අන්තවාදය තව බොහෝ කලක් නොසියාලාට මේ නිදහස භුක්ති විඳින්න ඉඩ දෙන එකක් නෑ. ඇතැම් විට ඇයට ජීවිතයෙන් වන්දි ගෙවන්න වෙයි අන්තවාදයට.

ලොව පුරා ඒ ඒ රටවල මුස්ලිම් ජනතාවගේ ස්වකීය අනන්‍යතාෙ විනාශ කරන සෞදි තාලිබාන් සංස්කෘතික වියාදියට අප විරුද්ධ විය යුතුයි. එවිට මුස්ලිම් අන්තවාදීන් සමඟ සිට ගන්නා ඊනියා බුද්ධීමතුන් අද දෙමළ බෙදුම්වාදය සහ ත්‍රස්තවාදය සාධාරණීකරණය කරන්නාක් මෙන් ම අපට මුස්ලිම් අභිලාෂයන් තේරුම් ගත නොහැකි බව කියමින් තාලිබාන් ත්‍රස්තවාදය සාධාරණීකරණය කරනු ඇත.
https://www.youtube.com/watch?v=s86JCGbPby4

මරණ දඬුවම අපරාධවලට තිත තබන මැජික් පොල්ලක් ද?

පසුගියදා සිදු සේයා ළදැරියගේ හදිසි මරණයය සමඟ ළමා අපචාර සහ ස්ත්‍රී දූෂණයට එරෙහිව මරණ දඬුවම ඉල්ලා බොහෝ දෙනා හඬ නැඟූහ. අපරාධකරුවන්ට මරණ දඬුවම ඉල්ලන පින්තූර සිය ගණනින් ෆේස් බුක් පිටුවල හුවමාරු විය. රටක් කම්පිත කළ එවැනි අපරාධයක් සමඟ හැඟීම්බර මිනිසුන්ගෙන් එවැනි ප්‍රතිචාර බලාපොරොත්තු විය යුතු ය. එහෙත් අප අතර උගත් යැයි පිළිගැනීමක් තිබූ ඇතැම් පිරිස් විශේෂයෙන් ඇතැම් උගත් බෞද්ධ පිරිස් මේ අතර සිටීම කනගාටුව කරුණකි. 

උගත් පිරිස් මෙවැනි තීරණයකට එළඹීමට පෙර ලොව මරණ දඬුවම ක්‍රියාත්මක වන සහ නොවන රටවල සිදු වන මෙවැනි අපරාධ ප්‍රමාණයේ සැලකිය යුතු වෙනසක් තිබේ ද යන්න සොයා බැලිය යුතුව තිබිණි. දැනට මරණ දඬුවම ක්‍රියාත්මක වන මුස්ලිම් ලෝකයේත්, ඇමරිකාවෙත්, චීනයේ සහ උතුරු කොරියාවෙත් අපරාධවල අඩුවක් තිබේ ද? අනෙක් අතට මරණ දඬුවම යනු ශිෂ්ට ලෝකයට කෙතරම් උචිත ද? සියලු දේශපාලන අගතීන්ගේ, නිලධාරිවාදයෙන්, අල්ලසින් දූෂණයෙන් පිරුණු දේශපාලන ක්‍රමයක් තුළ ක්‍රියාත්මක වන අධිකරණ පද්ධතියකින් යුක්තිය ඉටු වනු ඇති ද? සැබෑ අපරාධකරු එල්ලා මරයි ද? නැතහොත් කැකිල්ලේ තීන්දු මගින් අනෙකෙක් එල්ලා මරයි ද? එවැනි වරදක් වුවහොත් එය යළි නිවැරදි කරන්නේ කෙසේ ද? ආදි බොහෝ ප්‍රශ්නවලට පිළිතුරු සොයා ගත යුතුව තිබිණි. 

හේතුඵලවාදය පිළිගන්නා බෞද්ධයින් ලෙස අප මේ අපරාධ කිසියම් හේතුවක් නිසා හටගත් ඵලයක් ‍බව හඳුනා ගත යුතු ය. ඉතින් ඵලය නැති කිරීමට නම් කළ යුත්තේ හේතුව ඉවත් කිරීම මිස ඵලය විනාශ කිරීම නොවේ. එම ඵලය විනාශ කිරීම ගඟට ඉනි කැපීමක් පමණක් නොවන්නේ ඒ ඔස්සේ පිරිසක් නැවත අකුසල් රැස්කර ගැනීමක් සිදු කරන හෙයිනි. එමගින් සසර ගමන දිගු කර ගනු පමණි. ඒ අනුව බෞද්ධයින්ගේ අවධානය යොමු විය යුත්තේ මේ ළමා අපචාර, ස්ත්‍රී දූෂණ පිටුපස ඇති හේතුව හඳුනා ගැනීමට ය. ඒ හේතුව ඉවත් කළ කල්හි ඵලය ඉබේම අහෝසි වෙයි. 

බුදු දහමින් සහ මේ රටේ පරිසරය විසින් ඔප දැමූ අපගේ හර පද්ධති, ඉන්දියානු බමුණු මතිමතාන්තර සහ වික්ටෝරියානු සුචරිතවාදය සමඟ මිශ්‍ර වී සිදු වූ බිඳවැටීම නිසා ආදරය, ප්‍රේමය සහ ලිංගිකත්වය දෙස කුහක ලෙස බැලීමට සමාජය හුරු වීම ද ඒ ඔස්සේ සමාජයේ ඇති වන ලිංගික අතෘප්තිය නූතන වානිජ මාධ්‍ය විසින් සිය ලාභ උපරිම කර ගැනීම සඳහා භාවිත කිරීම ද මේ පරිහානිය පිටුපස ඇති ප්‍රභල හේතුවකි. මේ කුහකත්වය නිසා පුද්ගලයාට සිය ස්වභාවික අවශ්‍යතා ඉටු කර ගැනීමේ විකල්ප මාර්ග වසා දමනු ලැබේ. 

ලිංගිකත්වය එක අතකින් පූජනීත්වයට නංවන අතර අනෙක් අතින් ගර්හිත මී කුණක් ලෙස පිළිකෙව් කරනු ලැබේ. එම පීඩනය පහත් තැනින් වතුර ගලන නියා දහම අනුව පුපුරා ගිය කල්හි මාධ්‍යයන්හි ගොදුරක් වෙයි. පසු ගිය දා සේයා ළදැරිය දූෂණය කර මරා දැමූ අපරාධකරුවාට වඩා ඈ දූෂණයට ලක් කළේ මේ රටේ මාධ්‍ය විසිනි. සමාජය වෙලා පවත්නා ලිංගික කුහකත්වය සහ එහි ප්‍රතිඵලය වන අපරාධ විකුණනමින් ලාභ උපයන මාධ්‍ය පිළිබඳ ව ද අප ගැඹුරු සමාජ කථිකාවතක් නිර්මාණය කළ යුතු ය. එසේ නොවන තාක් නැවත මෙවැනි අපරාධයක් සිදු වූ කල්හි මරණ දඬුවම ඉල්ලා අප අතීසාරයට අමුඩ ගසනු ඇත. අපේ උගත් පාලකයින් ද පිට රටින් එල්ලුම් ගහට කඹ ගෙනෙනු ඇත. මරණ දඬුවම දෙමියි හිස් ගැලරි කතා දෙසාබානු ඇත.  

කරාපිටියට සංවර්ධනයේ අරුණලු!

නව රජය බලයට පත්වුණා විතරයි කරාපිටිය නව බස්නැවතුම අසල පදික වේදිකාවට යාබදව සුපිරි වෙළඳ සැල් සමූහයක් ඉදිකරනවා. 2x2 පොලුවලින් නිමවුණු මේ සුපිරි වෙළඳ සැල් සමූහයේ වහලයට ලොකු ඇන්කර් පෙට්ටි බෝඩ් ගහලා ඊට උඩින් තාරසීට් ගහලා 21 වන සියවසේ නව තාක්ෂණය අනුව හදලා තිබුණා. බිත්තිවලට ඉටි රෙදිවලට අමතරව රටට ම අරපිරිමැස්ම ගැන කදිම පාඩමක් කියා දෙමින් ටියුෂන්කාරයින්ගේ බෝඩ් ලෑලි භාවිත කරලා තිබුණා.

ඇත්තට ම දැන් ඉස්සර වගේ නෙමේ, අලුත් වෙළඳ සැල් සමූහයත් එක්ක කරාපිටිය බස් නැවතුම හරි ම ලස්සනයි. මේ වෙළඳ සැල් ව්‍යාපෘතිය රටට ම ආදර්ශයක්. මෙතෙක් කල් අසරණ වෙලා කාගිල්ස්, කීල්ස්, ලාෆ්, ආපිකෝ වගේ ඊනියා ධනපතින්ගේ කඩ දිහා දුකින් බලා හිටපු අපේ රටේ පීඩිත ජනතාවට දැන් අනුන්ට අත නොපා ආඩම්බරෙන් තමන්ගේ කියන්න පුළුවන් වෙළඳ සැලක් තියෙනවා. ගමේ කළුකඩ මුදලාලිලාගේ ගෑස් බලපු කලේ ඉවරයි.

ඇත්ත ට ආඩම්බරයි මේ තරම් කෙටි කාලයක් තුළ අලුත් ආණ්ඩුව රටට උදා කරලා දීපු දැවැන්ත සංවර්ධන යෝජනා ක්‍රම ගැන. දැන් මහරගම, කඩවත පැත්තේ කෙනෙකුට වුණත් අධිවේගය දිගේ ගාල්ලට ඇවිත් කරාපිටියේ මේ සුපිරි වෙළඳ සැල්වලින් බඩු අරන් ගෙදර යන්න පුළුවන්. මහජන සල්ලි කන්න මහින්ද හදපු කිසි වැඩක් නැති අධිවේගී මාර්ගයට වුණත් වටිනාකමක් ලැබෙන ව්‍යාපෘතියක් මේක.

මේ සංවර්ධන කටයුතු දකිද්දි ඇහේ ඉඳිකටු ඇනෙනවා වගේ දැනෙන ගෝත්‍රික ජාතිවාදී අතීතකාමී රාජපක්ෂවාදී මෝඩයින්ගේ කන්කෙඳිරිගෑම් ආණ්ඩුව පයිසෙකට ගණන් ගත යුතු නෑ. කන්දක් බිරුවට බල්ලෙක් පාත් වෙන්නේ නෑ කියලා උන්ට ටික දවසකින් තේරෙයි. අපේ අගමැතිතුමා අපේ රට චෙන්නායි වගේ සුන්දර සශ්‍රීක දේශයක් කරන දිනය වැඩි ඈතක නෙමේ.

මේ රටේ ජාතික විඥානය තීරණය කිරීම බටහිර පරවේණිගත අයිතියක් ද?

සුපුරුදු පරිදි නිර්මාල් රංජිත් දේවසිරි මහතා සම්බන්ධ විපක්ෂ නායක වීමට මම අකමැති මන්ද යන්න විස්තර කළ මගේ ලිපියකට සිය වෝලයේ ප්‍රතිචාර දක්වමින් මා ඉන් අදහස් නොකළ දෑ මතු කර සතුටු වෙයි. ඒ දැක තවත් පිරිසක් පිනා ගොස් තිබේ. ඒ සතුටට මම බාධා නොකරමි. ඔහු සඳහන් කරන පරිද මා එහි දෙමළා සම්බන්ධ සිංහල විඥානය ඉතා කදිමට ගොණු කරනු ලැබ ඇත. "අපි කැමති වන්නේ අපිට අභිමත දෙමළෙකුටයි. දෙමළා සිය දෙමළභාවය නිර්වචනය කරගත යුත්තේ සිංහලයාගේ පරිකල්පනයට ගැලපෙන ආකාරයටයි." නිර්මාල් මහතාගේ තර්කය නිවැරදි නම් ආනන්ද කුමාරස්වාමි, ලක්ෂ්මන් කදිරගාමර්, ආනන්ද සංගරි, ඩග්ලස් දේවානන්ද, ආරුන් තම්බිමුත්තු ආදීන් සිය දෙමළ භාවය නිර්වචනය කර ඇත්තේ සිංහලයාගේ පරිකල්පනයට ගැලපෙන ආකාරයටයි. එහෙයින් එය දෙමළ විඥානය නොවේ. එය ව්‍යාජ විඥානයකි. එහෙයින්  නිර්මාල් මහතා ඒ වෙනුවෙන් පෙනී නොසිටියි.

එය නියත ලෙස ම ව්‍යාජ විඥානයක් බව තමන්ට ලැබී ඇති කුමක්දෝ බලයක් ඇසුරින් නිගමනය කරන නිර්මාල් මහතා සම්බන්ධන් ප්‍රමුඛ සැබෑ දෙමළ විඥානය නියෝජනය කරන පිරිස දෙසට මලට ඇදෙන බමරෙකු මෙන් සතුටින් ඉගිල යයි. එලෙස තමා ඊට ආශක්ත වන්නේ ඔවුන්ගේ දේශපාලන දැක්ම තමන්ගේ දැක්ම හා සමපාත වන හෙයින් බව ඔහු නොකියයි. සම්බන්ධන්ලා මෙන් ම නිර්මාල් රංජිත් මහතා ද දෙමළ බෙදුම්වාදය වෙනුවෙන් පෙනී සිටින්නෝ වෙති. දෙමළ විඥානය බෙදුම්වාදයට ලඝු කරන්නෝ වෙති. ඔවුහු බෙදුම්වාදය වෙනුවෙන් පෙනී සිටින්නෝ වීරත්වයෙහි ලා දේවත්වයෙහි ලා සලකති. බෙදුම්වාදය ප්‍රතික්ෂේප කළෝ දෙමළ අභිලාෂය පවා දුන් ජුදාස්ලා ය. ආනන්ද කුමාරස්වාමි, ලක්ෂ්මන් කදිරගාමර්, ආනන්ද සංගරි, ඩග්ලස් දේවානන්ද, ආරුන් තම්බිමුත්තු පමණක් නොව මුරලිදරන් වුව ජුදාස් කෙනෙකි. ඒ ජුදාස් ලා අගයන අප පව්කාරයෝ ය. පව්කාරයින්ට කිසිදා පවක් නොකළ ශාන්ත පිලිප් වැනි ශාන්තුවරුන් සමඟ එක්ව ගල් ගැසිය යුතුය.

යම් දිනෙක සම්බන්ධන් බෙදුම්වාදය අත හැරියහොත් (එසේ මොහොතකට උපකල්නය කරමු) නිර්මාල් මහතාට එතැන් සිට ඔහු සිංහල විඥානයට සමපාත ලෙස සිය දෙමළභාවය නිර්වචනය කරගත් ජුදාස් කෙනෙකි. කෙසේ වුව ද දෙමළ බෙදුම්වාදය ප්‍රතික්ෂේප කළ දිනක සම්බන්ධ මෙන් ම නිර්මාල් මහතා ද බටහිරට හප කළ නොවටිනා උක් දණ්ඩක් පමණි. කෙසේ වුව ද තමන් සේවය කරන්නේ එදා යටත්විජිතවාදීන් සිය කොලනි පසුවෙන් පාලනය කිරීම සඳහා හඳුන්වා දුන් බෙදා වෙන් කර පාලනය කිරීමේ ක්‍රමවේදයට බව මේ යටත්වජිත විරෝධි මාක්ස්වාදී උගතුන් නොදැන සිටීමට කිසිම හේතුවක් නැත. එහෙත් තමන් තුළ පවතින සිංහල බෞද්ධ වෛරය පිරිමසා ගැනීමට ඔවුහු ඕනෑ ම ආයුධයක් භාවිත කරති. එවන් පිරිස් සිය අරමුණු ඉටු කර ගැනීම සඳහා බටහිර විසින් නියමින් හා අනියමින් පාවිච්චි කෙරති. සිය පැවැත්ම වෙනුවෙන් රටවල් ජාති, ආගම්, ගෝත්‍ර ලෙස බෙදා වෙන්කර ඒ රටවල් අස්ථාවර කිරීමේ තම උවමනාව ඉටු කරන මේ දේශීය ඒජනත්වරු බටහිර රටවල් ඔවුන්ගේ මෙහෙයුම් ඔස්සේ මහා බුද්ධිමත්තු ලෙස හුවා දක්වති. 

අනෙක් අතට නිර්මාල් මහතාට, රනිල් වික්‍රමසිංහ සහ මෛත්‍රීපාල සිරිසේන මහතාට එරෙහිව අනේක බාධා කිරීම් මැද ලැබුණු ආසන 95ක් නොතකා හරිමින් ඒ ජනවරම එජාප ආණ්ඩුවේ පාවඩයක් ලෙස සලකමින් ඒ ජනවරම යටපත් කර ආසන 15ක් දිනා ගත් සම්බන්ධ මහතා විපක්ෂ නායක කිරීම පැහැදිලි කළ හැක්කේ ප්‍රජාතන්ත්‍රවායේ කවර මූලධර්ම අනුව ද? නිර්මාල් මහතා 1983 UNP මැරයින් සමඟ දෙමළ කඩ කොල්ලකෑවේ අපට වඩා හොඳින් ඉතිහාසයේ සිට ම දෙමළ විඥානය තේරුම් ගෙන ඇති නිසා ද? අද දෙමළ පිළිබඳ කිඹුල් කඳුලු හෙළන නිර්මාල් මහතා සැබවින් ම ඉටු කරන්නේ මේ රටේ අපේක්ෂා නොව අවම වශයෙන් දෙමළ සමාජයේ අපේක්ෂා නොව බටහිර අවශ්‍යතා ය. ටිමෝරය, යුගෝස්ලෝවියාව, කොසෝවෝ, දකුණු සුඩානය, හයිටිය, ඇෆ්ගනිස්ථානය, ඉරාකය, ලිබියාව, සිරියාව ආදි රටවල් මේ පාර දිගේ ටික දිනකට කලින් මහත් උජාරුවෙන් ප්‍රජාතන්ත්‍රවාදයේ මහ දෙවොල වෙත රැගෙන ගිය අයුරු අපි දුටිමු. දැන් ඔවුන්ට ප්‍රජාතන්ත්‍රවාදය ද යහ පාලනය ද මානුෂික අයිතිවාසිකම් ද මාධ්‍ය නිදහස ද සුළු ජන අයිතීන් ද මදි නොකියන්න ලැබී තිබේ. කෙතරම් ලැබී ඇත්ද කිවහොත් ඒ රටවල් අමු සොහොන්, මස්කඩ බවට පත්විණි. දහස් ගණනින් මැරී වැටිණි. පළා යමට ගොස් දහස් ගණනින් මුහුදේ ගිලී මැරුණි. ඉන් මිදුණු දහස් ගණනක් සිය මව්බිම අතැර දිවි පරදුවට තබා යුරෝපයට පළා යති.

කෙසේ වුවද මේ රට ඒකීය රටක් ලෙස පැවතිය යුතු බව සිතන, බටහිර බෙදුම්වාදී උවමනාවන්ට ඉඩ නොතැබිය යුතු බව සිතන, මේ රට තවත් අමු සොහොනක් නොකළ යුතු බව සිතන සිංහලයින් පමණක් නොව දෙමළ, මුස්ලිම් මිනිස්සු ද මේ රටේ ජීවත් වෙති. ඔවුන්ට බටහිර උවමනාව විසින් මෙහෙය වන ඇතැම් දෙමළ පිරිස්වලට සහ නිර්මාල මහතාට මෙන් මේ රටේ වෙනම කොටසක වෙනම ජීවත්වීමේ ආශාවක් නැත. විශේෂයෙන් හින්දු ජනතාවට එවැනි ප්‍රශ්න නැත. (මතවාදිමය ආධිපත්‍යට ඔවුන් මෙහෙයවීමට හැකි වීම වෙනම කරුණකි.) පෙර වසරක ජිනීවා වෙත පෙත්සමක් අත්සන් කර යැවූ උතුරේ ආගමික පූජකවරු අතර කිසිඳු හින්ද පූජකයෙකු සිටියේ නැත. එහෙයින් නිර්මාල් මහතා අවංක නම් මගේ ප්‍රකාශය දෙමළ සම්බන්ධ සිංහල විඥානය ලෙස නොව මේ රටේ ඒකීයභාවය අගය කරන බටහිර න්‍යාය පත්‍රයට එරෙහි සිංහල දෙමළ මුස්ලිම් ජනතාවගේ විඥානය ලෙස තේරුම්ගත හැකිව තිබිණි. එහෙත් දෙමළ විඥානය බෙදුම්වාදී, සිංහල බෞද්ධ විරෝධි එකක් විය යුතු බව ද එය දෙවියන් වහන්සේගේ නියමය බව ද ඊට කිසිසේත් සිංහල විඥානය සමඟ සමපාත වීමට ඉඩ නොතැබිය යුතු බවත් ද ප්‍රකාශ කෙරෙන සිය බටහිර හාම්පුතුන්ගේ උවමනාව, ආශාව ඇඳලි බැඳ දෝත් මුදුන් දී පිළිගන්නා තැනින් ආරම්භ කොට දිවි හිමියෙන් ඊට සේවය කිරීමේ දේශපාලන දේව කාර්යයට අත ගසා සිටින නිර්මාල් රංජිත් දේවසිරි මහතා ඒ සඳහා කිසි දිනක සුදානම් නොවනු ඇත. මන්ද මේ රටේ ජාතික විඥානය ද තීරණය කිරීමේ පේටන්ට් අයිතිය බටහිර සහ බටහිර නියෝජිතයින්ගේ පරවේණිය යැයි ඒ මහතා සිතන හෙයිනි. 

ක්‍රිස් නෝනිස් අමතක ද?

සජින් වාස් ගුණවර්ධනගේ අශිෂ්ට ක්‍රියාදාමය නිසා ආචාර්ය ක්‍රිස් නෝනිස් බ්‍රිතාන්‍ය මහ කොමසාරිස් ධූරයෙන් ඉවත් වුණා. නෝනිස් ඉතා ම දුෂ්කර කාලයක රට වෙනුවෙන් තමන්ගේ යුතුකම් වගකීම් ඉතා ම හොඳින් ඉටුකළ රාජ්‍ය තාන්ක්‍රිකයෙක්. ඒ සිද්ධිය සිදු වුණු සමයේ නම් විපක්ෂය වගේ ම විවිධ සමාජ ක්‍රියාධරයන් නෝනිස්ට සිදු වූ අසාධාරණය පිළිබඳ කතා කළා; කම්පා වුණා අපට මතකයි.

නමුත් දැන් බ්‍රිතාන්‍ය මහ කොමසාරිස් ධූරය සඳහා යෝජනා වෙන්නේ වෙනත් නම්. මුලින් ද පැරදුනු රෝසි නෝනා මහ කොමසාරිස් කරන්න යෝජනා වුණා. පස්සේ ජනාධිපතිවරයා සංගක්කාරට එංගලන්තේ මහ කොමසාරිස්කම භාර ගන්න ආරාධනා කරනවා කියලා හිටං කීවා. ඇත්තට ම සංගක්කාර හොඳ දක්ෂ ක්‍රීඩකයෙක් බවට කිසිදු සැකයක් නෑ. නමුත් ඔහු මෙවැනි තනතුරකට සුදුසුයි කියලා මට නම් හිතෙන්නේ නෑ. ඔහු ක්‍රීඩකයෙක් විදිහට විවිධ වෙළඳ ආයතන 200ක පමණ තානාපතිවරයෙක් විදිහට කටයුතු කරනවා. ඇන්ලීන්, නෙස්ටමෝල්, ඒෂියන් පේන්ට්, කීල්ස් සුපර්, TVS කින්ග්, එයාර්ටෙල්, හච්, කොකාකෝලා, ඩයලොග්, ඩිමෝ පමණක් නොව මැගි නූල්ඩ්ස් පවා අන්තිමට සංගක්කාර විකිණුවා. සංගාගේ හච් එකේ ඇඩ් එක යද්දී ම සංගා තමන්ගේ එයාටෙල් ඇඩ් එකක කීවා "දන්නවාද මම එයාර්ටෙල්වලට මාරු වුණා" කියලා. ඒක දැකපු මට ඇතත්ට ම පොඩි අපුල ගතියක් දැනුණා.

නමුත් ඔහු ක්‍රීඩකයෙක් විදිහට එය හොඳ යැයි සිතනවා විය හැකියි. එහෙම හිතන වෙනත් අයත් ඉන්න පුළුවන්. මම නම් හිතන්නේ ක්‍රීඩකයෙක් විදිහට වුණත් ඔහු අනවශ්‍ය විදිහට විකිණුනා කියලයි. පසුගිය කාලයේ අපි දැකපු ඇතැම් තානාපතිවරුන්ට, කොමසාරිස්වරුන්ට වඩා ඔහු හොඳ නැද්දැයි කෙනෙකු ඇසිය හැකියි. නමුත් අසාර්ථක දෙයක් සමඟ හෝ වැරදි දෙයක් සමඟ සසඳා යමක් පිළිබඳ නිර්ණය කිරීම හොඳ දෙයක් නෙමේ. පරාජිත දේශපාලකයින් තානාපති තනතුරුවලට පත් කිරීම ද හොඳ දෙයක් නොවේ. මම නම් හිතන්නේ ක්‍රිස් නෝනිස්ට යුක්තිය ඉටු කිරීමට මේ හොඳ ම අවස්ථාව බව ය. විපක්ෂය එදා නෝනිස් සම්බන්ධව හෙළුවේ කිඹුල් කඳුලු නෙමෙයි කියලා සනාථ කරන්න එමගින් ඔවුන්ට ස්වර්ණමය අවස්ථාව උදා වෙනවා.

සජිත්, සුජීව, චතුර, තමන්ගේ තරම දැන ගෙන කල් අරිනු!

මහා මැතිවරණයට කලින් මහින්ද රාජපක්ෂට හැකි නම් තමන් සමඟ තරඟ කර ජය ගන්නැයි අභියෝග කළ එජාප මන්ත්‍රීවරු තිදෙනෙක් පිළිබඳ මට මතක ය. පළමු වැන්නා සජිත් ප්‍රේමදාස ය. ඔහු කීවේ තමන්ට බයේ මහින්ද කුරුණෑගලට පළා ගිය බව ය. එසේ කී සජිත් ලබා ගත්තේ මනාප ඡන්ද 112 645ක් පමණි. නාමල් රාජපක්ෂ මනාප ඡන්ද 127 201ක් ලබා ගෙන තිබිණි. විළිලැජ්ජාවට කාරණය තම අසුන දිස්ත්‍රික්කය ද පරාජයට පත්වීම නොවේ. මහින්දට අභීයෝග කර නාමල්ට දේශපාලනේ ගැන ටියුෂන් දීමට ගොස් ඔහුට වඩා මනාප 15 000ක් පමණ අඩුවෙන් ලබා ගැනීම ය. 

දෙවැන්නා සුජීව සේනසිංහ ය. ඔහු කීවේ හැකි නම් මහින් රාජපක්ෂට තමන්ට වඩා එක මනාපයක් අර ගෙන පෙන්වන ලෙස ය. මහින්ද මනාප 423 529ක් ලබා ගන්නා විට සුජීව මනාප ඡන්ද 117 049ක් ලබා තිබිණි. මහින්දට අභියෝග කළ සුජීවට ලබා ගෙන ඇත්තේ නාමල්ට වඩා මනාප 10 000ක් පමණ අඩුවෙනි. 

තෙවැන්නා රාජිත සේනාරත්නගේ පුත් චතුර ය. චතුර කීවේ තමන් බෙලිඅත්තට පැමිණ මහින්ද රාජපක්ෂ පරාජය කරන බව ය. ගියවර පළාත් සභා මැතිවරණයේ නමේ මුලට අ, ආ, දැම්මේ යැයි බැණ වැදුණු 'අ.අ. රංජන් රාමනායක සද්ද විද්ද' ගම්පහින් මනාප 216 463 ගනිත්දී චතුර මනාප 71 243ක් ලබා ජයග්‍රාහී ලැයිස්තුවේ අවසානයට කලින් සිටී. මහින්දට අභියෝග කළ චතුරගේ තරම කෙසේ ද යත් නාමල් වඩා මනාප ඡන්ද 55 000ක් පමණ අඩුවෙනි. කළු ගඟෙ මුල නොදත් කාවින්ද ජයවර්ධන චතුරට වඩා මනාප 10 000ක් ලබා තිබේ.

මට නාමල් රාජපක්ෂ ලොකුවක් නැත. ඔහුගේ දේශපාලන මට නම් පතෝල වගේ ය. එය අනාගතේ මොනවා වගේ වේ දැයි මට දැන් කින නො හැකි ය. එහෙත් මහින්දට අභියෝග කළ කොලු කුරුට්ටන්ට මහින්දගේ පුතාවත් පසු කර යාමට නොහැකි වී තිබේ. ඒ ඔස්සේ හැදෙන එකෙකුට නම් උගත හැකි පාඩම් බොහෝ ය.   

ගොඩැල්ලේ තරම දැන ගෙන ළිඳ     කපනු

බොරැල්ලේ තරම දැනගෙන උඩ       පනිනු

කඩුල්ලේ තරම දැනගෙන කද            බඳිනු

තමන්ගේ තරම දැනගෙන කල්           අරිනු

මාරයින් සමඟ සටන් වැද..

අසමාන සටනකින් ජාතිකවාදී පෙරමුණ පරාජයට පත්ව තිබේ. එය මාර සෙනඟ සමඟ කළ යුද්ධයකි. අනිත් පස රනිල් ය. තවත් පසෙක අනුර ය. පිටුපස පාඨලී ය. පැත්තෙන් චන්ද්‍රිකා ය.  නව පරපුරේ කලාකරුවෝ ය. ඊනියා සිංහල විරෝධි උගත්තු ය. රතන හිමිගේ පිවිතුරු හෙට ය. සෝභිත හිමිගේ සාධාරණ සමාජය ය. මාධ්‍ය බලය ය. NGO කාරයෝ ය. RAWකාරයෝ ය. CIAකාරයෝ ය. මේ සියල්ල මැද එජාප ජනවරමින් පක්ෂ නායකත්වය ඩැහැ ගත් සිරිසේන ය. ඇතුළත අප්පච්චි මළෝ කල්ලියේ සතුරෝ ය. මේ සියලු පෙරමුණුවල එකම සතුරා බවට පත්වූයේ මහින්ද ප්‍රමුඛ පිරිස ය. ඉලක්කය වූයේ මහින්ද ය. මේ පිරිස මහින්ද ප්‍රමුඛ සන්ධාන මැතිවරණ ව්‍යාපාරය විනාශ කිරීම සඳහා කළ හැකි සියල්ල කළ අතර එහි ප්‍රධානීන් නිතර FCID කැඳවමින් මාධ්‍ය සන්දර්ශනය පැවත්වූහ. මලමිනි ගොඩගත්හ. සිරිසේන මහතා පක්ෂ යාන්ත්‍රණය දුර්වල කිරීම සඳහා කළ හැකි සියල්ල කළේ ය. චන්ද්‍රිකා එජාප වේදිකාවට ගොඩ වුවා ය. 

එවන් පසු බිමක ජාතිකවාදී පිලට පරාජය හිමි වුව ද එය හොඳ සටනක් ලබා දී ලැබූ විශිෂ්ට පරාජයකි. පරාජයට පත්ව මාස 8ක් තුළ මෑත කාලයේ බිහි වූ ශක්තිමත් ම විපක්ෂය නිර්මාණය වී තිබේ. සැබවින් ම රනිල් ප්‍රමුඛ එජාපය ජය ගත්තේ දුර්වල කළ, බෙලහීන කළ සෛන්ධවයෙකු සමඟ දිවීමෙනි. රනිල් ප්‍රමුඛ එජාපය සමතලා පොළවක හැල්මේ දුවන විට ජාතිකවාදී පිළට කඳු හෙල්, ගිරි දුර්ග, මාරක ප්‍රපාත ඔස්සේ මාර උගුල් මඟහැර දිවීමට සිදුව තිබිණි. එහෙත් එවන් අතපය බැඳ දැමූ පිරිසක් සමඟ තරඟ කර පවා 1977 මෙන් විශාල ජයග්‍රහණයක් තබා පැහැදිලි බහුතරයක් ලබා ගැනීමට පවා රනිල්ට නොහැකි වීමෙන් ඔහුගේ දුර්වලතාව පැහැදිලි වෙයි. කෙසේ වුව ද රනිල්ට අසීමිත බලයක් හිමි නොවීම රටේ වාසනාව ය. මහින්ද සිය අභිමාණය සහ ජීවිත අවධානම පවා නොතකා සිදු කළ මැදිහත් වීම නොවන්නට රනිල්-සිරිසේන දෙදෙනා එක්ව 1977 මෙන් 5/6 බලයක් සහිතව එජාප ආණ්ඩුවක් පිහිටු වනු ඇත. 

එහෙත් මෙවර මහින්ද නිසා ම පාර්ලිමේන්තුවට තේරි පත් වූ පිරිසක් සිරිසේනගේ ආශිර්වාදය පිට හෙට දින රනිල්ගේ ඇමති මණ්ඩලයට එක් වනු ඇත. එය තමන්ගේ කැමැත්ත නොව පක්ෂයේ සහ නායකතුමාගේ කැමැත්ත බව ඔවුහු පවසනු ඇත. ඒ පිළිබඳ අප එතරම් තැකිය යුතු නැත. පහනට ඇදෙන කුහුඹුවන් මෙන් ඇතැම්හු බලයට ඇදෙන්නාහ. කෙසේ වුව ද ජනතාව අනාගත දේශපාලඥයින් වෙත කෙරෙන අනතුරු ඇඟවීමක් ලෙස එවැනි ප්‍රබල චරිත බොහොමයක් මෙවර පරාජයට පත් කර තිබේ. ඔවුන් නැවත ජාතික ලැයිස්තු හිලෙන් පාර්ලිමේන්තුවට ගෙන ඒමෙන් නිරුවත් වන්නේ යහ පාලන සීතාම්බර සළුව මිස අනෙකක්  නොවේ. ඔවුන්ට ජනතා කැමැත්තෙන් පාර්ලිමේන්තුවට ඒමට නොහැකි වූයේ පසු ගිය යහ පාලන ආණ්ඩුවට මුක්කු ගැසීම නිසා බව ද ඔවුන් වංචාකාරී ලෙස නැවත පාර්ලිමේන්තුවට පැමිණීමට කොල්ල කෑ ජාතික ලැයිස්තුව පවා ඔවුන්ගේ එකී ක්‍රියාදාමයට එරෙහි ජනමතය බව ද සිහි කටයුතු ය.

කෙසේ වුව ද JR ගේ දෙවන ඉනිම ක්‍රීඩා කිරීමට පියිට පිවිසීමට පුල පුලා සිටි රනිල් වික්‍රමසිංහ සුළුතර ආණ්ඩුවකට සීමා කොට ඒ මාරකයෙන් රට ගලවා ගැනීම පිළිබඳ මහින්දඑ ප්‍රමුඛ ජාතික බලවේගවලට මේ රටට ආදරය කරන ජනතාව කෘතඥ විය යුතු ය. මේ වන විට මැතිවරණ ප්‍රතිඵලවල ඇතැම් අසාමාන්‍ය වෙනස්කම් පිළිබඳ සාකච්ඡාවක් ගොඩ නැඟෙමින් තිබේ. කිසිදු අභ්‍යන්තර දූෂණයක් සිදු නොවිණි නම් මේ ප්‍රතිඵලය සැබෑ ජන මතය නම් අපි ඊට ගරු කළ කරමු. බොක්සිං වළල්ල තුළ යමෙක් පරාජයට පත් වන්නේ සතුරාගේ ප්‍රහාරයකින් බිම වැටුණු විට නොව නැවත නැඟී සිටීම ප්‍රතික්ෂේප කළ විට ය. මේ පරාජය තුළ අනාගත ජයග්‍රහණයේ පණ ගැහෙන බිජුවට සැඟව තිබේ. ඒ සියල්ල රැක ගත යුතු ය. නිසි පොහොර දිය සපයා විසල් තුරු බවට පත් කළ යුතු ය. ජාතික කඳවුරේ පරාජයට හේතු වූ ඊට අවේනික දුබලතා ඇත්නම් ඒවා වියළි පත් මෙන් පොහොර බවට පත් කර ගත යුතු ය. එවිට ඒ තුරු මාතෘ භූමියට අවැසි ම මොහොතේ සෙවණ සදනු ඇත. දැයට මඟ කියනු ඇත.

ආඬි හත්දෙනාගේ ජවිපෙ!

මේ රටේ UNP උගතුන් ප්‍රධාන විපක්ෂය කළ යුතු බව කී ජනතා විමුක්ති පෙරමුණට සිදුව ඇත්තේ මාර සන්තෑසියකි. මොවුන් කැට තබා දිවුරා කීවේ ජනතා විමුක්ති පෙරමුණ ආසන 25ක් දිනාගනු ඇති බව ය. එහෙත් ප්‍රතිඵල නිකුත් වූ විට මට සිහියට ආවේ ආඬි හත් දෙනාගේ කැඳ හැලියේ කතාව ය. අවසානයේ ඡන්දය දෙන බව කී කිසිදු UNP ආඬි උගතෙකු JVP එකට ඡන්දය ලබා දී නොමැත. අනුර කුමාර පසු කර ඔහුට වඩා කොළ පැහැ රනිල් අසල ඒ ඡන්ද නතර වී තිබේ. අනුර කුමාර දිසානායක ද බොහෝ විට නොදැනම එජාපයට ඡන්ද ලබා දෙන්නට ඇත.  

කෙසේ වුව ද අවසානයේ අනුර කුමාරගේ නැවුම් හරිත පැහැ නායකත්වය යටතේ ජනතා විමුක්ති පෙරමුණ සීනුව ලකුණ යටතේ තරඟ කර ඉතිහාසයේ ලබා ගත් අඩුම ඡන්ද ප්‍රතිශතය මෙවර වාර්තා කර තිබේ. ඒ 4.87%කි. මෙයට පෙර 2000 වසරේ ඔවුන් 5.99%ක ඡන්ද ප්‍රතිශතයක් ලබා ගත් අතර පාර්ලිමේන්තු ආසන 10ක් පක්ෂයට ලැබිණි. 2001 වසරේ ඔවුන් 9.10%ක ප්‍රතිශතයක් වාර්තා කළ අතර මන්ත්‍රී ආසන 16ක් පක්ෂයට ලැබිණි. 2004 සන්ධානය තුළ මන්ත්‍රී ආසන 41ක් දිනා නැවත දෙකක් ශ්‍රීලනිපයට ද ලබා දුන්නේ ය. එකල අපි ඒ පක්ෂයේ සාමාජිකයින් වූයෙමු. එහෙව් ජනතා විමුක්ති පෙරමුණ 2015 නැවත වසර 15කට පෙර ලැබූ ජයග්‍රහණය පවා ලබා ගත නොහැකි තැනට පත් කිරීමට අනුර කුමාර දිසානායකගේ එජාප නායකත්වය සමත්ව තිබේ. 

මෙවර ජනතා විමක්ති පෙරමුණට ආසන 4ක් දිනාගත හැකිව ඇති අතර ජාතික ලැයිස්තු ආසන 2 ද සමඟ ආසන 6කි. ජාතික ලැයිස්තුවේ ප්‍රථමයා වන හිටපු විගණකාධිපති සරත් චන්ද්‍රසිරි මායාදුන්නේ තමන් පාර්ලිමේන්තුවට පත් වුවහොත් ජවිපෙ ප්‍රතිපත්ති අනුව නොව ස්වාධීනව කටයතු කරන බව කීවේ ඇත්ත වැඩසටහනට සහභාගී වෙමිණි. එම ලැයිස්තුවේ දෙවැන්නා සහ තෙවැන්නා හොඳ UNPකාරයින් බව රටට කීවේ සෝමවංශ අමරසිංහ ය. රනිල් වික්‍රමසිංහලාට වර්තමාන ජනතා විමුක්ති පෙරමුණ රවටා කඩේ යැවිය හැකි වූ අතර ඔවුන් ඇමතු ජනතාව ද පණිවිඩ නිවැරදිව තේරුම් ගෙන එජාපයට ඡන්දය ලබා දී තිබේ. අනුර කුමාර දිසානායක පසුගිය සමය පුරා කටයුතු කළේ එජාපයේ ප්‍රබලතම කථිකයා ලෙස මිස ජනතා විමුක්ති පෙරමුණේ නායකයා ලෙස නොවේ. දැන් වැපිරු බිජුවල අස්වැන්න ලැබී තිබේ. 

අවසානයේ උගතුන්ට ඡන්දය දෙන්න යැයි කෑ ගැසූ ගිය වර කරූ ජයසූරියටත් උඩින් ගම්පහින් පබා පාර්ලිමේන්තු එවූ UNP උගත්තු මෙවර රන්ජන් රාමනායක පාර්ලිමේන්තු එවා හඳුන්නෙත්ති පාර්ලිමේන්තු එව්වේ නැතැයි ද නිශාන්ත මුතුහෙට්ටිගම සහ ගීතා කුමාරසිංහ පාර්ලිමේන්තු එව්වේ යැයි ද නාහෙන් අඬති. ගාල්ලේ ජනතාව ජනතා වරම පාවා නොදුන් නිශාන්තලා පාර්ලිමේන්තු එව්වා පමණක් නොව පාවා දුන් පියසේන ගමගේ ලා ගෙදර යැව්වේ ය. නිශාන්ත ගැන කතා කරන මේ UNP උගත්තු රන්ජන් රාමනායක, රවී කරුණානායක, පාලිත තෙවරප්පෙරුම හෝ පාලිත රංගෙබණ්ඩාර ලා ගැන කතා නොකරති. කෙසේ වුව ද පාඨලි චම්පික රණවකලාට මෙන් ජනතා විමුක්ති පෙරමුණට මෙවර එජාපය සමඟ එක්ව තරඟ කළේ නම් ජාමේ බේරා ගැනීමට තිබිණි. එජාපයේ අනුර කුමාර සහ ඔහුගේ ඇම කන සෙසු නායක පිරිස මෙවැනි ජයග්‍රහණ පක්ෂයට දිගට ම ලබා දෙනු ඇත. 

මේ පිළිබඳ 2009 වසරේ අහෝ! ජවිපෙ නොදිටි මොක් පුර යනුවෙන් මා තැබූ සටහනකින් මේ ලිපිය අවසන් කරමි. "ජවිපෙ සිය ගමන් මග නැවත ආවර්ජනය කළ යුතු ය. තමන් දැන හෝ නොදැන සේවය කරන්නේ විජාතික පෙරමුණට බව අවබෝධ කරගත යුතු ය. සිදු වූ බලවත් පීලි පැනීම හඳුනා ගත යුතු ය. පක්ෂය දිනවිය හැක්කේ තමන් පෝෂණය කළ මතවාදය වෙත නැවත පැමිණීමෙන් බව එහිදි ඔවුනට පසක් වනු ඇත." http://sanhindha.blogspot.com/2009/01/blog-post_20.html

ජවිපෙට සමහරක් උගත්තු ආස ඇයි?

බෞද්ධ විරෝධි, සිංහල විරෝධි එහෙයින් ම මහින්ද විරෝධි උගතුන් සහ කලාකරුවන් යැයි කියා ගන්නා අයට බෞද්ධ විරෝධි සිංහල විරෝධි නායකත්ව කල්ලියක් විසින් පාලනය කරන හෙයින් ම ඔවුන් ආකර්ශනය වන එක්සත් ජාතික පක්ෂයට ඡන්දය දෙන ලෙස එම පක්ෂයේ වියරු පාලන ඉතිහාසය පිළිබඳ සවිඥානික මේ රටේ ජනතාවට ඍජුව කිව නොහැකි වී තිබේ. මාස 8ක පමණ කාලය තුළ ඔවුන් ගෙන ගිය ප්‍රජාතන්ත්‍ර විරෝධි යහ පාලන විරෝධි පාලනය නිසා එසේ කිවහොත් මේ ඊනියා බුද්ධිමතුන්ගේ සහ කලාකරුවන්ගේ සිංහල සහ බෞද්ධ විරෝධය නිසා ම කොළ පැහැ ගත් හෘද සාක්ෂියේ නිරුවත හෙළි වනු ඇත. අනෙක් අතට මොවුන්ගේ කරුමයට රත්තරන් අශ්යින්, ලැම්බෝගිනි, මාළිගා එකතු කොට ගැයූ ප්ලැටිනම් වටිනාකමක් සහිත බොරු සියල්ල හෙළි වී තිබේ. එහෙයින් මේ පිරිස දැන් එක පෙළට ජනතා විමුක්ති පෙරමුණට ඡන්දය ලෙස ජනතාගෙන් ඉල්ලා සිටිති. එයට හේතුව කුමක් ද යන්න ඔවුන් නොපැවසුව ද අපට අවබෝධ කරගත හැකි ය.

සාම්ප්‍රදායික වමට විකල්පයක් ලෙස රෝහණ විජේවීර ජනතා විමුක්ති පෙරමුණ නිර්මාණය කළේ සෙසු මාක්ස්වාදීන් මෙන් මේ රටේ ජාතිකත්වය ප්‍රතික්ෂේප කර ඊනියා පන්තිය පදනම් කර ගත් දේශපාලන ව්‍යාපාරයක් ලෙස නොවේ. ආරම්භයේ සිට ම ජනතා විමුක්ති පෙරමුණ අධිරාජ්‍ය විරෝධි දේශපාලන පක්ෂයක් විය. එමෙන් ම මාක්ස්වාදයේ සහ දේශප්‍රේමයේ සංකලනයක් විය. සාම්ප්‍රදායික වමේ පක්ෂ ත්‍රීවිල් පක්ෂ බවට පත් වෙද්දී දෙවරක් මර්දනය කළ ද එම පක්ෂය 2004 වන විට පාර්ලිමේන්තු ආසන 41ක් සහ පලාත් පාලන ආයතන මන්ත්‍රී ධූර 580ක් ලබා ගන්නා තැනට පත් වූයේ එහෙයිනි. 

එහෙත් 2007 පමණ වන විට එම ව්‍යාපාරය වල්මත් විය. ත්‍රස්තවාදය කෙළවර කිරීමේ සටන අවස්ථාවේ එනම් 2007 අයවැය පරාජය කර මහින්ද රාජපක්ෂ පාලනය පෙරළා දැමීම සඳහා ජවිපෙ සුදානම් විය. ඒ සමඟ ජාතිකත්වය නියෝජනය කළ විමල් වීරවංශ ඇතුළු පිරිස ආණ්ඩුවට සම්බන්ධ වී ඒ මර උගුලින් රට ගලවා ගත් අතර එහි ප්‍රතිඵලය ලෙස අද අප ත්‍රස්තවාදය කෙළවර කළ රටක නිදහසේ වෙසෙමු. 

එයින් අනතුරුව පක්ෂය තුළ මාක්ස්වාදී නැඹුරුව නියෝජනය කළ කුමාර් ගුණරත්නම් ඇතුළු පිරිස වෙන්ව යන අතර අවසානයේ පසුගිය මැයි මාසය වන විට එහි හිටපු නායක සෝමවංශ අමරසිංහ මහතා ද පක්ෂයෙන් ඉවත්ව යයි. දැන් සැබවින් ම ජනතා විමුක්ති පෙරමුණ යනු කුමක් ද?

දැන් ජනතා විමුක්ති පෙරමුණ යනු සැබවින් ම මාක්ස්වාදය ද නොමැති දේශප්‍රේමය ද නොමැති එක්සත් ජාතික පක්ෂයට කුලියට වැඩ කරන අනුර කුමාරගේ බූදලයකි. ඒ සත්‍ය දැක බලා ගැනීමට ජනතා විමුක්ති පෙරමුණේ ජාතික ලැයිස්තුව කදිම කැඩපතකි. 

එහි ජාතික ලැයිස්තුවේ තුන් වැන්නා එනම් නීතිඥ උපුල් කුමාරප්පෙරුම එක්සත් ජාතික පාක්ෂිකයෙකි. සෝමවංශ කියන පරිදි මංගල සමරවීරගේ හොඳ කකුලකි. ඔහු එක්සත් ජාතික පක්ෂ කොළඹ දිස්ත්‍රික් අපේක්ෂක විජේදාස රාජපක්ෂගේ පමණක් නොව උපුල් ශාන්ත සන්නස්ගලගේ ද මැතිවරණ වේදිකාවල සුලබ දසුනකි. සෝමවංශ අමරසිංහ පවසන පරිදි ම අනුර කුමාරලා අලියාගේ බෙල්ලේ සීනුව ගැටගසා අවසන් ය. 

එම ලැයිස්තුවේ දෙවැන්නා වන නීතිඥ අරුණ ක්‍රිෂ්මාල් වර්ණසූරිය ඇමරිකා එක්සත් ජනපදයට සම්බන්ධ ආයතනයක සේවය කළ CIAකාරයෙකි. එක්සත් ජාතික පක්ෂයට සම්බන්ධව කටයුතු කළ අයෙකි. මේ අනුව ජනතා විමුක්ති පෙරමුණ සිය අධිරාජ්‍ය විරෝධය ද ඇමරිකන් අධිරාජ්‍යවාදය හමුවේ නිර්ලජ්ජිත ලෙස පාවා දී තිබේ. ජනතා විමුක්ති පෙරමුණේ ජාතික ලැයිස්තුවෙන් ආසන 3ක් දිනා ගත හොත් එයින් දෙකක් ම එක්සත් ජාතික පක්ෂයට ලැබෙයි. මේ වන විට අනුර කුමාර දිසානායක නිල නොවන එක්සත් ජාතික පක්ෂ හොඳම කථිකයා බවට පත් වන්නේ සියලු එජාප කථිකයින් අභිබවා මහින්ද රාජපක්ෂ විවේචනය කිරීමෙනි. ඔහුට ඒ සඳහා විජේදාස රාජපක්ෂලා යහමින් ගෙවන බව කීවේ අප නොව විජේදාසලා ම ය. 

ජාතිකත්වයෙන් ඈත් වුණු මාක්ස්වාදයෙන් ඈත් වුණු අලියා ගිලපු දිවුල් ගෙඩියක් බවට පත් වුණු ජනතා විමුක්ති පෙරමුණ වටා මෙතෙක් එක්සත් ජාතික පක්ෂය වටා රොක්ව සිටි NGO කල්ලි රොද බැඳ ගන්නේ මේ නිසා ය. පසු ගිය යහ පාලන ආණ්ඩුය ගැන කලකිරී ආපසු හැරෙන ජනතාව රවටා මෙවර ද ඡන්දය ඩැහැ ගැනීම සඳහා JVP කෙමන අතරමඟ අටවා තිබේ. ඔවුන් පවසන්නේ එක්සත් ජාතික පක්ෂය විශ්වාස කළ නො හැකි වුව ද ජනතා විමුක්ති පෙරමුණ විශ්වාස කළ යුතු බව ය. 

එහෙත් යහ පාලන ආණ්ඩුව කළ සියලු වැරදිවලට අනුර කුමාරලා වගකිව යුතු අතර එයින් ඔහුට කිසිසේත් මිදිය නො හැක්කේ කැබිනට් අනුමැතියෙන් පත් කළ මූල්‍ය අපරාධ සොයන ආයතනයේ ප්‍රධානියා ඔහු හෙයිනි. එහෙත් ඔවුන් නොකියන්නේ එක්සත් ජාතික පක්ෂය මෙන් ම ජාතිකත්වයෙන් වියෝ වූ ස්ථාවරයක මේ අවස්ථාවේ ජනතා විමුක්ති පෙරමුණ පසු වන හෙයින් ඔවුන්ට ඡන්දය ලබා දෙන ලෙස ය. එහි අරමුණ මේ මොහොතේ රටේ බෙදුම්වාදයට එරෙහිව ලැබෙන ඡන්ද ප්‍රමාණය කිහිපයකන් හෝ අඩු කිරීම හැර අනෙකක් නො වේ.

ඒ නිසා ජනවාරි 08 රෑ වැටුණු වලේ අගෝස්තු 17 මහ දවල් නොවැටී සිටීම ඒ ජනතාවගේ වගකීම ය. 1815 යහ පාලන සීතාම්බර සළුවට රැවටී අපේ රජු සුද්දාට පාව දුන් ප්‍රභූන් නිසා අපට වසර 150ක් බටහිර යටත් විජිත වැසියන් ලෙස අනන්ත දුක් විඳින්නට සිදු විය. මෙවර එවැනි වරද්දා ගැනීමක් සිදු වුවහොත් අපේ මතු පරම්පරා ගණනාවකට සියවස් කිහිපයක් එහි රුදුරු ප්‍රතිඵල භුක්ති විඳින්නට සිදු වනු නො අනුමාන ය. එහෙයින් සියලු පක්ෂ, පාට, ආගම් පසෙකලා රට වෙනුවෙන් මේ අවස්ථාවේ ගතයුතු නිවැරදි ම තීන්දුව ගනිමු. 

මාගේ මාතෘ භූමිය දිනේවා! දිනේවා! දිනේවා!!!

රාත්‍රී රජුන් සේ නිදන ඔබ හෙට රාත්‍රී ඇඳට යන විට ඔබ වෙනුවෙන් ඉදිරි වසර 5-6 සඳහා ඔබේ රට දැය සමය පිළිබඳ තීරණ ගැනීමේ පූර්ණ බලය කිසිවෙකුට පවරා අවසන් ය. ඔබ ඒ තීරණය ප්‍රකාශ කළ පසු ඔබට එය කිසිදු හේතුවක් නිසා නැවත ඉල්ලා අස්කර ගත නො හැකි ය. ඔබ ලබා දෙන බලය මත ඔවුන් ඉදිරි වසර කිහිපය තුළ ගනු ලබන තීන්දු තීරණ අපේ රටේ අනාගත ඉරණම තීන්දු කරනු ඇත. ඔබේ දුවගේ පුතාගේ පමණක් නොව ඔවුන්ගෙන් ඔබ්බට යන අනාගත පරම්පරාවේ ද ඉරණම ඔබේ කැමැත්ත ලබා බලයට පත්වන පාලකයින් තීරණය කරනු ඇත. 

ඒ අනුව මෙය හුදු ඊළඟ ආණ්ඩුව හෝ අගමැතිවරයා තෝරනු ලබන මැතිවරණයක් නොව රටේ අනාගතය තීන්දු කරනු ලබන අවස්ථාවයි. මේ රටේ අනාගතය තීරණය කිරීමට අපට ලැබෙන අවසාන අවස්ථාවයි. එහෙයින් ඔබ හෙට ගනු ලබන්නේ අතිශය බරපතල දේශපාලන තීන්දුවකි. එමගින් 2009 බෙදුම්වාදී කොටි ත්‍රස්තවාදය පරාජය කර අප ලබා ගත් ජයග්‍රහණය ආරක්ෂා විය යුතු ය. ඒ ජයග්‍රහණය වෙනුවෙන් සිය තාරුණ්‍යයේ සියලු සිහින සමඟ මාතෘභූමිය වෙනුවෙන් ප්‍රාණ වායුව පූජා කළ 26 000ක් වන මහා ජීවිත පූජාවට නිසි ගෞරවය ලබා දිය යුතු ය. එහිදි අත පය ඇස කන අහිමිව සදාකාලික ආබාධිතයින් බවට පත්ව මේ රටේ කොතැනක හෝ යහනක උඩුබැලි අතට වැතිර අප ගන්නා තීරණය දෙස බලා සිටින වීරයින්ගේ මහා කැපකිරීම්වලට නිසි වටිනාකම ලබා දිය යුතු ය. මේ රට දැය සමය සුරකිනු පිණිස වසර දහස් ගණනක් තිස්සේ අපේ වීර මුතුන් මිත්න් සිදු කළ මහා ජීවිත පූජාවන්ට අප කෘතඥ පූර්වක විය යුතු ය. ඒකීය දේශයක මතු උපදින්නට පෙරුම් පුරන්නන්ගේ සිහින බොඳ නොකළ යුතු ය.

එහෙයින් වරක් නොව, දෙවරක් නොව, තෙවරක් නොව සිය දහස් වරක් සිතා ඔබේ මාතෘ භූමිය වෙනුවෙන් නිවැරදි තීන්දුව ගන්න. අප පසු කළ දුෂ්කර කාලකන්නි අඳුරු යුගය අපේ අනාගත පරම්පරාවට නැවත උරුම කර දිය යුතු නැත. බොරු පොරොන්දු, බොරු චෝදනාවලින් රැවටිය යුතු නැත. අභූත අසත්‍ය වෛරී ප්‍රකාශ හමුවේ සැලිය යුතු නැත. බලපෑම් හමුවේ පසුබෑ යුතු නැත. තර්ජන ගර්ජන හමුවේ හිස නැමිය යුතු නැත. දේශද්‍රෝහි කල්ලි සමඟ දීග ගිය සිංහ සම් පොරවා ගත් ව්‍යාජ දේශප්‍රේමි ව්‍යාඝ්‍රයින්ට රැවටිය යුතු නැත. වැදි බණ දෙසන NGO භික්ෂූන්ගේ උගුල්වලට හසු විය යුතු නැත. රෑ වැටුණු වලේ දවල් වැටිය යුතු නැත. එහෙයින් රට වෙනුවෙන් ඔබේ අනාගත පරපුර වෙනුවෙන් නිවැරදි තීන්දුව ගනිමු. 

මෙවර ඔබ වැරදි තීන්දුවක් ගතහොත් එය කිසිදා නැවත නිවැරදි කළ නොහැකි වනු ඇත. අපට විකල්ප නැත. අත්හදා බැලීම් කරනට මේ කාලය නොවේ. රටේ අනාගතය සුරක්ෂිත කළ හැක්කේ වර්තමානය සුරක්ෂිත කළ නායකයාට ම පමණි. අපට විශ්වාස කළ හැක්කේ ඔහු ම පමණි. ඉතින් අපි රට වෙනුවෙන් නිවැරදි තීන්දුව ගනිමු. අපි අපේ යුතුකම මතු පරපුර වෙනුවෙන් හෙට ගැඹුරින් සටහන් කර තබමු. 2009 මැයි 18 ත්‍රස්ත බෙදුම්වාදය පරාජය කොට දිනාගත් ඒකීය දේශය 2015 අගෝස්තු 17 දින ප්‍රජාතාන්ත්‍රික බෙදුම්වාදය පරාජය කොට සුරක්ෂිත කරමු. මාගේ මාතෘ භූමිය දිනේවා! දිනේවා! දිනේවා!!!  

මොකක් ද මේ හැදුණු ළදරු වලිප්පුව?

එළඹෙන මහ මැතිවරණයේ මහින්දට අපේක්ෂකත්වය නොදෙමියි කී, පසුව ඔහු මැතිවරණයට එන්නේ නම් හම්බන්තොටින් පැමිණිය යුතු බව කී, කුරුණෑගලින් එන විට අගමැති අපේක්ෂකවත්වය හෝ මැතිවරණ මෙහයුමේ නායකත්වය නොදෙන බව කී සිරිසේන මහතාගේ බොරු පුරසාරම් සියල්ල මහා ජන රැල්ල හමුවේ වැල්ලේ තැනූ මාළිගා බවට පත් විය. අනතුරුව ශ්‍රීලනිප මධ්‍යම කාරක සභාව කැඳවීම අධිකරණයට මුවා වී තහනම් කර සිය ජාමේ බේරා ගැනීමට ඔහුට සිදු විය.

ගිය මස මහින්ද රාජපක්ෂට ජයග්‍රහණය කළ නො හැකි බව කී සිරිසේන මහතා පෙරේදා මහින්ද ජයග්‍රහණය කළ විට වෙනත් ජ්‍යෙෂ්ඨයෙකු අගමැති කිරීමට සහාය දෙන්නැයි ඉල්ලා සිටියේ ය. ඊයේ එම හෑල්ලෙන් අගමැති තනතුරට පවා සුදුසු යැයි සහතික කළ සුසිල් ප්‍රේමජයන්ත මහතා සහ අනුර ප්‍රියදර්ශන යාපා මහතා ඊයේ එක්සත් ජනතා නිදහස් සන්ධානයේ සහ ශ්‍රී ලංකා නිදහස් පක්ෂයේ මහ ලේකම් තනතුරුවලින් ඉවත් කර පක්ෂ සාමාජිකත්වය ද අහෝසි කර ඇත. ඒ අනුව පැය 24ක් තුළ අගමැතිකමට සුදුසු අය පක්ෂ සාමාජිකත්වයට ද නුසුදුසු අය බවට පත්ව තිබේ.

මෙසේ පක්ෂ ජ්‍යෙෂ්ඨයින් පිළිබඳ කිඹුල් කඳුලු සලන සිරිසේන මහතා පක්ෂයේ ජ්‍යෙෂ්ඨත්වය අනුව ගතහොත් එහි අන්තිම කොණේ මුල් හරියේ සිටින සිය අන්තේවාසියෙකු වන දුමින්ද දිසානායක ශ්‍රීලනිප වැඩ බලන මහ ලේකම් ලෙස පත් කර තිබේ. මේ සියල්ල මෙසේ සිදු කරන අතර ලංකාවට පැමිණි යුරෝපීය මැතිවරණ නිරීක්ෂණ කණ්ඩායම හමු වී සිරිසේන මහතා සිංහලෙන් ප්‍රකාශ කළේ තමන් ජනාධිපති ලෙස මේ මැතිවරණයේ දී ස්වාධීනව සිටින බව සහ ජනාධිපති බලතල කිසිසේත් ඒ සඳහා භාවිත නොකරන බවත් ය. ඔහුගේ දේශපාලන භාවිතය සහ ප්‍රකාශ අතර ඇති පරස්පරතාව අවබෝධ කර ගැනීමට මේ සිද්ධි කිහිපය සප්‍රමාණවත් ය.

යහ පාලනය වෙනුවෙන් කලක් තිස්සේ හංස ගීත ගයන ඊනියා උගතුන්ට අනුව නම් සිරිසේන මහතා මේ රටේ යහ පාලනය, ප්‍රජාතන්ත්‍රවාදය ස්ථාපිත කරනු පිණිස පෙරුම්පුරා උපන් දේව නියෝජිතයෙකි. එහෙත් තමන්ට බලය ලැබුණු මොහොතේ සිට සිරිසේන මහතා සිය බලය අවභාවිත කළා මිස වෙන කිසිවක් සිදු කර නොමැත. තමන් පසුගිය රජයෙන් වෙන් වූයේ යහ පාලන ඉටි ගෙඩියක් නිසා නොව බැසිල් රාජපක්ෂ සමඟ ඇති වූ පෞද්ගලික කෝන්තරයක් නිසා බව උක්ත ලිපියෙහි ලා පැවසීමෙන් ඔහු විසින් විළි වසා ගැනීමට තිබූ අවසන් ඇඳුම ද ගලවා නිරුවත් කරන්නේ පෙර කී හංස ගීත ගැයූ යහ පාලන උගතුන් නොවෙද? එදා හංස ගීත ගයා මෙදා ජනතා විමුක්ති පෙරමුණේ ගෙජ්ජි බැඳ ගෙන ඩෙඟා නටන පිරිස ද ඊට අයත් ය.

කෙසේ වුව ද 2004 මේ රටේ ප්‍රගතිශීලි ජනතාව මහින්ද ප්‍රමුඛ පොදු පෙරමුණු සන්ධානය ජයග්‍රණය කරවා පරාජය කළේ රනිල් වික්‍රමසිංහ පමණක් නොව පොදු පෙරමුණු නායිකා ජනාධිපති චන්ද්‍රිකා කුමාරතුංග ප්‍රමුඛ දේශද්‍රෝහි පිරිස ය. එහි දී රනිල් වික්‍රමසිංහ ජයග්‍රහණය කරවීමට කළ හැකි සියල්ල කළ චන්ද්‍රිකා කුමාරතුංග, සිය පක්ෂයෙන් තරඟ කළ මහින්ද වෙනුවෙන් සිය පක්ෂයට මැතිවරණ ප්‍රචාරණ පත්‍රිකාවක් පවා මුද්‍රණය කිරීමට අවස්ථාවක් ලබා නොදී මෙදා සිරිසේනගේ නායකත්ව භූමිකාවේ මුල් කොටස රඟ දැක්වූවා ය. 

1991 දකුණ වමට හැර වූ දකුණු පළාත් සභා මැතිවරණයේ දී පාලක එක්සත් ජාතික පක්ෂය මහා භීෂණයක් වැපිරුව ද දිනා ගත හැකි වූයේ ආසන 28කි. ශ්‍රීලනිපය ප්‍රමුඛ විපක්ෂයට ආසන 29ක් ලැබිණි. පාලක එක්සත් ජාතික පක්ෂය ආසන 28ක් දිනා ගත් එජාපයේ එම්. එස්. අමරසිරි මහ ඇමති කළ ද අධිකරණය එය අක්‍රිය කර අමරසිරි දොඩංගොඩ මහ ඇමති කරවීය. එහෙයින් කිසිවෙකුටය ජනතා පරමාධිපත්‍ය සමඟ සෙල්ලම් කළ නොහැකි බව තේරුම් ගත යුතු ය. 

මෙසේ බලන කල 1991, 2004 සහ 2015 අතර කිසි වෙනසක් නැත. එක ම වෙනස මහින්ද රාජපක්ෂ වටා පෙර නොවූ විරූ ලෙස මේ රටේ ජනතාව පෙළ ගැසීම පමණි. අතීතයෙන් පාඩම් ඉගෙන ගන්නේ නම් 1991 මෙන් ම 2004 මහ මැතිවරණය සහ ඒවායේ ප්‍රතිඵලය වර්තමාන ජනාධිපතිවරයාට තක්සලාවක් විය යුතු ය. තමන් දරන තණතුරු තාවකාලික බව ද ජනතා පරමාධිපත්‍ය ඊට වඩා බෙහෙවින් බලවත් බව ද පාලකයින් තේරුම් ගත යුතු ය. 

එදා මේ රටේ ඊනියා උගතුන් ඒකාධිපතියා යැයි කී මහින්ද ජනවාරි 08 වෙනිදා ජන වරමට හිස නමා ගෙදර ගියේ ය. මෙදා යහ පාලනය රටට උදා කිරීමට සපථ කර අර කී උගතුන්ගේ කර මතින් බලයට පැමිණි බලයට කැමති නැති ප්‍රජාතන්ත්‍රවාදී සිරිසේන එළඹෙන මහ මැතිවරණ ප්‍රතිඵලය හමුවේ ක්‍රියා කරන ආකාරය දෙස රට වැසියෝ බල සිටිති. 

මෙගා බොරු මෙගා මිත්‍යා සහ යහ පාලන ආලාපාළුව

සංවර්ධනය 

1948 සිට 2005 දක්වා මේ රට පාලනය කළ සියලු ආණ්ඩු කරන ලද සංවර්ධන ව්‍යාපෘතිවලට වඩා වැඩි අති දැවැන්ත සංවර්ධන ව්‍යාපෘති ප්‍රමාණයක් 2005-2015 දක්වා මහින්ද රාජපක්ෂ පාලනය සමය තුළ රටට ලැබිණි. මේ සංවර්ධන විප්ලවය සිදු කළේ වසර 30ක් මේ රටේ පැවති බිහිසුණු ත්‍රස්තවාදී අරගලය නිමාවට පත් කිරීම නම් මිල කළ නොහැකි මහා ප්‍රාතිහාර්යයට අමතරව එම කාලය තුළ රටට නව ජාත්‍යන්තර වරායක්, නව ජාත්‍යන්තර ගුවන් තොටුපලක්, අධිවේගී මාර්ග පද්ධතියක්, ජාත්‍යන්තර මට්ටමේ නෙළුම් පොකුණ රංග ශාලාව, ගුවන් පාලම්, නෙළුම් කුළුණ, ඈත ගම් දනව් දක්වා කාපට් ඇතිරූ මාර්ග, උතුර-දකුණ යා කළ දුම්රිය මාර්ගය, මහින්ද්‍යෝදය විද්‍යාගාර, පෝර්ට්සිටි ව්‍යාපෘතිය, දැදුරු ඔය සංවර්ධන යෝජනා ක්‍රමය, මොරගහකන්ද සහ රඹකැන් ඔය ජල යෝජනා ක්‍රම, දක්ෂිණ වරාය සංවර්ධන ව්‍යාපෘතිය, සුන්දර නගර, උද්‍යාන, ගමන් පථ, වෙළඳ සංකීර්ණ, දික්ඕවිට ආදි නව සංවර්ධිත ධීවර වරාය ආදි බොහෝ යෝධ සංවර්ධන ව්‍යාපෘති ලැබිණි. 

ඒ ඔස්සේ රට යෝධ සංවර්ධන පියවර තබමින් ආසියාවේ ආශ්චර්ය කරා ගමන් කරමින් තිබිණි. ලෝක බැංකු වාර්තා අනුව 2005-2015 කාලය තුළ රටේ දළ දේශීය නිෂ්පාදිතය ඇ.ඩො. බිලියන 24.4 සිට ඇ. ඩො. බිලියන 74.9 දක්වා ඉහළ ගොස් තිබූ අතර රටේ ණය ප්‍රමාණය දළ දේශීය නිෂ්පාදිතයෙන් 96% සිට 75% දක්වා පහත වැටී තිබිණි. 10%ක් ව පැවති උද්ධමනය 5% දක්වා පහත වැටුණු අතර ඒක පුද්ගල ආදායම ඇ. ඩො. 1210 සිට ඇ. ඩො. 3400 දක්වා ද ආර්ථික වර්ධන වේගය 6% සිට 7% දක්වා ද ඉහළ ගොස් තිබිණි.

සොරකම 

කෙසේ වුව ද මේ දැවැන්ත නැතහොත් මෙගා සංවර්ධන ව්‍යාපෘති රට පුරා ක්‍රියාත්මක කරනුයේ බිලියන, ට්‍රිලියන ගණන් කොමිස් ගසා කෑමට බව ද සංවර්ධනයට මුවා වී රට ණය උගුලේ සිර කරමින් ජනතා මුදල් කොල්ල කන බවට ද මහින්ද රාජපක්ෂ ආණ්ඩුවට චෝදනා එල්ල විය. විශේෂයෙන් අධිවේගී මාර්ග කොමිස් උල්පතක් බව කියැවිණි. කෙන්යාවේ අධිවේගී මාර්ග කිලෝ මීටරයකට වියදම ලංකා මුදලින් රුපියල් මිලියන 2.7ක් වන විට ලංකාවේ එය රුපියල් මිලියන 7.1ක් වන්නේ අධිවේගී මාර්ගය රනින් සදන නිසා දැයි එජාපය, ජවිපෙ සහ හෙළ උරුමය ප්‍රධාන එවක විපක්ෂය විමසා සිටියේ ය. මෙලෙස සියලු සංවර්ධන ව්‍යාපෘති ඔස්සේ රටේ අනාගතය උගසට තබා මහින්ද රාජපක්ෂ රජය මුදල් වංචා කර ඇතැයි මතයක් සමාජගත කෙරිණි. දකුණේ ජනතාව (උතුරු නැඟෙනහිර නොවන) අතර විශේෂයෙන් සිංහල ජනතාව අතර මේ අදහස් ව්‍යාප්ත කෙරිණි.

වත්කම් 

වංචා කළ මුදල් රාජපක්ෂවරු විදෙස් බැංකුවල සඟවා ඇති බව ද විදෙස් රටවල මාළිගා මිලට ගෙන ඇති බව ද පැවසිණි. මහින්ද රාජපක්ෂ පවුලේ සියලු දෙනාට වෙන වෙන ම හෙලිකොප්ටර් හයක් ඇති බව ද දරුවන්ට ලොව වටිනාම මෝටර් රථ වර්ගයක් වන ලැම්බොගිනි ඇති බව ද ඔවුන්ගේ පෙම්වතියන් උදෑසන හෙලිකොප්ටරයෙන් නුවරඑළියට ගොස් ඇමරිකාවේ බකිංහැම් මාලිගාවෙන් ගෙන ආ රත්තරන් අශ්වයින් පැද දහවල් කෑමට නැවත ගුවනින් කොළඹ එන බව ද පැවසිණි. රට පුරා මහජන මුදලින් මහින්ද මාළිගා තනන බවට කටකතා පතුරුවා හැරිණි. මහින්ද රාජපක්ෂගේ වාර්ෂික වියදම රුපියල් කෝටි 10 000ක් බව වැය ශීර්ෂ ඉදිරිපත් කරමින් පෙන්වා දුන්නේ ය. එපමණක් නොව මහින්ද රාජපක්ෂ ජනතා මුදලින් තමන්ගේ පෞද්ගලික පරිහරණය සඳහා ගුවන් යානයක් ඇනවුම් කර ඇති බවට ද චෝදනා ලැබිණි.

මහින්ද රාජපක්ෂ ගෙදර යවා තමන්ට බලය ලබා දුනහොත් මේ සියලු දූෂණ නතර කොට මහින්ද කරන සංවර්ධනය මෙන් දහ ගුණයක් වේගයෙන් මේ රට සංවර්ධනය කරන බව ද මහජන දේපළ කොල්ල කෑ සොරුන් අල්ලා දඬුවම් කරන බව ද යහ පාලනයක් උදා කරන බව ද පැවසිණි. දින සියයෙන් වැඩ සියයක් කරන බව කියැවිණි. ජනතාව මේ චෝදනා විශ්වාස නොකරනු ඇතැයි සිතූ ආණ්ඩුව එය තර්ජනයක් සේ නොගත් අතර ඊට නිසි ප්‍රතිචාර දැක්වීමට ද උත්සාහ නො කළේ ය. එහෙත් එවකට පැවති විපක්ෂය දිගින් දිගට ම මේ චෝදනා නැවත නැවත එල්ල කළ අතර අතිශ්‍යෝක්තියට නැංවු එම පුවත් දකුණේ ගම්දන දක්වා අත්තටු ලැබ පාවි ගියේ ය. දකුණේ ජනතාව තුළ ද ආණ්ඩුව සොරකම් කරන්නේය යන අදහස ක්‍රමයෙන් මුල් බැස ගත්තේ ය. 

බල පෙරළිය

මහින්ද රාජපක්ෂ දකුණේ ජනතාව අතර සිංහල ජනතාව අතර දූෂිතයෙකු ලෙස හංවඩු ගැසීම මගින් යම් කිසි ඡන්ද ප්‍රතිශතයක් දිනා ගැනීමට විපක්ෂය සමත් විය. ඊට සමගාමීව උතුරේ ජාතිවාදය අවුලා දෙමළ ජනතාවට උතුරු නැඟෙනහිර ඒකාබද්ධ කළ ඒකීය රාජ්‍යයෙන් ඔබ්බට ගිය විසඳුමක් ලබා දෙන බවට පොරොන්දු වී දෙමළ ඡන්ද සාතිශය බහුතරයක් දිනා ගැනීමට හැකි විය. ඒ අතර බොදුබල සේනාව වැනි සංවිධාන ඔස්සේ මුස්ලිම් ජනතාව මහින්දගෙන් ඈත් කළ අතර නැඟෙනහිර වෙන ම මුස්ලිම් කළාපයක් දෙන බවට ඔවුන්ට පොරොන්දු විය. ජාතිවාදය, බෙදුම්වාදය සහ ආගම්වාදය ඔස්සේ එකතු කර ගත් සුළු ජාතික බහුතර ඡන්ද සමඟ එකතු වුණු පෙර කී දූෂණ විරෝධි සිංහල සුළුතරය ජනවාරි 08 වෙනිදා මහින්ද පරාජයට පත් කළහ. ඒ ඔස්සේ සිංහල ජනතාව වේගවත් සංවර්ධනයක් ද දෙමළ ජනතාව ෆෙඩරල් රාජ්‍යයක් සහ මුස්ලිම් ජනතාව මුස්ලිම් කළාපයක් බලාපොරොත්තු වුහ.

යථාර්ථය

මේ වන විට යහ පාලන ආණ්ඩුව දින සියය ද සමඟ මාස හයක් රට පාලනය කර තිබේ. වසර 10ක් පුරා රටේ නැඟෙමින් පැවති සංවර්ධන රැල්ල පොරොන්දු වූ පරිදි 10 ගුණයකින් වැඩි වනු වෙනුවට මුළුමනින් ම ඇනහිට තිබේ. මේ කාලය තුළ ආර්ථික සංවර්ධන වේගය 7% සිට 6.4% පහත බැස ඇත. විදේශ් සංචිත ප්‍රමාණය ඇ. ඩො. බිලියන 9 සිට ඇ. ඩො. බිලියන 6.3 දක්වා පහත වැටී ඇති අතර රාජ්‍ය ණය ප්‍රමාණය බිලියන 850 සිට බිලියන 1250 දක්වා ඉහළ නැඟ ඇත. අයවැය හිඟය 6.5% සිට 9.5% දක්වා ඉහළ යන අතර රුපියල් 131කට මිලට ගත හැකිව තිබුණු ඇමරිකානු ඩොලරයක වටිනාකම රුපියල් 140 දක්වා ඉහළ ගොස් ඇත. එනම් රුපියලේ මිල දී ගැනීමේ හැකියාව පහත වැටී තිබේ. එපමණක් නොව 2015 වසර සඳහා අයවැයෙන් රජයට ගැනීම සඳහා අනුමත කර ඇති රුපියල් ට්‍රිලියන 7.8ක් වන දෙස් විදෙස් ණය ප්‍රමාණයෙන් රුපියල් ට්‍රිලියන 7.71 හෙවත් 96%ක් වසරේ මුල් කාර්තුව එනම් මුල් මාස හතර තුළ ලබා ගෙන ඇති අතර ඉදරි මාස අට සඳහා ඇත්තේ අනුමත ණය ප්‍රමාණයෙන් 4%ක් පමණි. මේ අනුව වසර අවසාන වන විට අයවැයෙන් අනුමත ණය ප්‍රමාණය මෙන් තුන් ගුණයක් එනම් රුපියල් ට්‍රිලියන 23 ඉක්මවූ ණය බරක් රටේ ජනතාව මත පැටවෙනු ඇත. මේ සියලු වියදම් පරිභෝජන වියදම් මිස සංවර්ධන වියදම් නොවේ. රටේ සියලු සංවර්ධන ව්‍යාපෘති නතර කර පරිභෝජනය සඳහා ණය ගනිමින් රට ණය උගුලේ සිර කළේ වත්මන් යහ පාලන ආණ්ඩුව බව මේ දත්තවලින් මොනවාට පැහැදිලි වෙයි.

මෙගා ඩීල් මිත්‍යාව

අධිවේගී මාර්ග කිලෝ මීටරයක් ඉදි කිරීම සඳහා රුපියල් මිලියන 7.1ක් වැය වන්නේ ඒවා රනින් කරන නිසා දැයි ප්‍රශ්න කළ යහ පාලන විපක්ෂය, ආණ්ඩු බලය ලබා ගෙන කඩවත කෙරවලපිටිය අධිවේගි මාර්ගයේ කිලෝ මීටරයක් ඉදි කිරීම සඳහා රුපියල් මිලියන 7.5ක් හෙවත් ඉතිහාසයේ අධිවේගී මාර්ග කිලෝ මිටරයක් සඳහා වැඩිම මුදල වැය කිරීම සඳහා ගිවිසුම් අත්සන් කර අධිවේගී මාර්ග ඔස්සේ රාජපක්ෂ රජය මහජන මුදල් ගසා කෑ බවට නැඟූ චෝදනාව නිශ්ප්‍රභ කළේ ය. නැතහොත් රාජපක්ෂ රජය වියදම් කළ මිලියන 7.1 ඔස්සේ ගසා කෑ මුදලට වඩා වැඩි මුදලක් මිලියන 7.5 ඔස්සේ යහ පාලන ආණ්ඩු ගසා කෑ බව ඔවුන් පිළිගත යුතු ය.

මහජන දේපළ සොරකම් කළ අයට දඬුවම් ලබා දෙන පැවසුව ද එවැනි කිසිවෙකු වැරදිකරුවෙකු කිරීමට තබා පිළිගත හැති දූෂණ චෝදනාවක් මගින් නැඟීමට පවා යහ පාලන රෙජිමය අසමත් වී තිබේ. මෙගා මාධ්‍ය සංදර්ශන පවත්වමින් ඇතැම් මැත ඇමතිවරුන් අත් අඩංගුවට ගත්තේ ස්වේච්ඡාවෙන් විශ්‍රාම ගිය නිලධාරීන්ට භාණ්ඩාගාරයෙන් මුදල් ලැබෙන තුරු කැබිනට් අනුමැතිය ද සහිතව දිවි නැඟුම අරමුදලින් වන්දි ගෙවීම, ගං වතුර ආපදාව අවස්ථාවේ අවතැන් ජනතාවට බෙදා දීම සඳහා සතොසෙන් රුපියල් ලක්ෂ 50ක ණයට බඩු ගැනීම වැනි චෝදනාවලට ය. අධිකරණය හමුවට එම මුදල් ගෙවා දැමූ බවට සඳහන් ලිපි ලේඛන ඉදිරිපත් වීම සමඟ මේ චෝදනා හුදු ද්වේශ සහගත දේශපාලන පලිගැනීම් පමණක් බව අනාවරණය විය. විමල් වීරවංශට එරෙහිව නැඟු චෝදනා සිය දේශපාලන විරුද්ධවාදීන් දඩයම් කිරීම සඳහා ම අටවා ගත් නීති විරෝධි “මූල්‍ය අපරාධ විමර්ශන කොට්ඨාශය” තුළ ම නිශ්ප්‍රභ වීම ය. 

ජනාධිපතිවරණ සමයේ වේදිකාවල ඉගිල ගිය රාජපක්ෂලාගේ හෙලිකොප්ටර්, ලැම්බෝගිනි, මාළිගා, විදෙස් බැංකුවල මුදල් තැන්පතු ආදි සියල්ල බොරු සහ බොරුම පමණක් බව දැන් අනාවරණය වී තිබේ. රට පුරා ඉදි කළ තරු පන්තියේ හොටෙල් මහින්දගේ මාළිගා යැයි ප්‍රචාරය කර තිබිණි. ශ්‍රී ලාංකික ව්‍යාපාරිකයින්ට හිමි විදෙස් රටවල හොටෙල් මහින්දගේ බවට කටකතා පතුරුවා තිබිණි. මේ සියල්ල නොව එකක් සත්‍ය නම් ඒය ජනතාව හමුවේ සනාථ කිරීම සඳහා වරදකරුවන් නීතිය හමුවට ගෙන ඒම සඳහා මාස 6ක කාලය හොඳට ම ප්‍රමාණවත් ය. එහෙත් ඒ කිසිවක් සිදු නොවූ අතර මේ වන විට රාජ්‍ය මාධ්‍ය ද භාවිත කරමින් තව තවත් මෙගා බොරුවලින් ජනතාව නිර්වින්දනය කරමින් සිටී. 

යාපනයේ පාසල් දැරියක දූෂණය කළේ මහින්දගේ සගයෙකු බවට එජාප නිල Face Book පිටුව ඔස්සේ චෝදනා කළ අතර එය බොරුවක් බව අනාවරණය වුව ද නිවැරදි කළේ නැත. මහින්ද ආණ්ඩුවට එතනෝල් ගෙන්වන බවට චෝදනා කළ අය යහ පාලන රෙජිමය පිහිටුවා මාස 6ක් තුළ අලුතින් එතනෝල් ආනයන බලපත්‍ර 28ක් ලබා දී එතනෝල් මිලි ලීටර් ලක්ෂ 13.9ක් රටට ගෙන්වා තිබේ. එහෙත් 2014 වසර තුළ රටට ගෙන්වා ඇති මුළු එතනෝල් ප්‍රමාණය මිලි ලීටර් ලක්ෂ 14.7කි. එහෙත් මහින්ද රාජපක්ෂ පසුගිය වසර 10 තුළ ම කිසිදු නව එතනෝල් බලපත්‍රයක් නිකුත් කර නොමැති අතර මීට පෙර බලපත්‍ර 21ක් එනම් වැඩි ම එතනෝල් බලපත්‍ර ප්‍රමාණයක් නිකුත් කර ඇත්තේ ප්‍රේමදාස පාලන සමයේ දී ය. 

මාගම්පුර වරායට නැව් නො පැමිණෙන බව කී යහපාලන රජය පසුගිය දා එහි දෙවැනි අදියර විවෘත කළේ සිය චෝදනාව පුස්සක් බව සනාථ කරමිනි. මහින්ද රජයේ විදේශ ගමන් වියදම් පිළිබඳ කතා කර බලය දිනා ගත් යහ පාලන රෙජිමයේ ඇමති කෙනෙකු සහ පුතෙකු දින 100 තුළ විදේශ සංචාර සඳහා රජයේ මුදල් රුපියල් කෝටියක් පමණ වියදම් කර ඇතැයි මාධ්‍ය වාර්තා කර තිබිණි. මහින්ද රාජපක්ෂ මහතාගේ වාර්ෂික වියදම් ලෙස විපක්ෂය ජනතාව ඉදිරිපත් කර තිබුණේ ජනාධිපතිවරයා යටතේ පැවති සියලු ආයතනවල වාර්ෂික වියදම වූ රුපියල් කෝටි 9593 වූ අතර එම ආයතන ජනාධිපතිවරයාගෙන් ඉවත් කර අදාළ වැය ශීර්ෂ ද වෙන වෙන අමාත්‍යංශවලට පවරා ජනාධිපති වියදම රුපියල් කෝටි 256 දක්වා ම අඩු කළේ යැයි යහ පාලන රෙජිමය උජාරුවෙන් කීවේ රට ම හිනස්සවමිනි. මහින්ද පෞද්ගලික ගුවන් යානයක් ඇනවුම් කළ බවට චෝදනා එල්ල කළේ ශ්‍රී ලංකන් ගුවන් සමාගමට එයාර් බස් සමාගමේන් යානා මිල දී ගත් විට ලබා දෙන ප්‍රභූ පැකේජ කුටියක් පදනම් කර ගෙන බව පසුව හෙළි විය.

හිටපු එජාප පාර්ලිමේන්තු මන්ත්‍රී නලින් බණ්ඩාර මාධ්‍ය හමුවක් පවත්වමින් රාජපක්ෂලාගේ උදේ කෑම  වේලක වියදම රුපියල් ලක්ෂ 94ක් වන්නේ යැයි බිල්පතක් ප්‍රදර්ශන කරමින් චෝදනා කළ අතර ඒ බිලෙහිම ඉහළ කෙළවරේ එය රාජ්‍ය නායකයින් සහ නිලධාරීන් 1300ක් පමණ සහභාගී වූ පොදු රාජ්‍ය මණ්ඩල සමුළුව පැවති දින උදෑසන කෑම සඳහා වියදම බව සඳහන් ව තිබිණි. එම අභූත චෝදනාව පසුදාම මාධ්‍ය මගින් නිවැරදි කළ අතර එවැනි සාපරාධි චෝදනාවක් එල්ල කිරීම පිළිබඳ රටේ ජනතාව හමුවේ මෙගා බොරු කීම පිළිබඳ එජාපය සමාව ඉල්ලා සිටියේ නැත. එම චෝදනාව බොරු බව රට ම දැන සිටින පසුබිමක රනිල් වික්‍රමසිංහ එජාප සමුළුවේ දී ඒ බොරුවම කිසිදු හිරිකිතයකින් තොරව නැවත කීවේ ය. 

මේ අතර යහ පාලන රෙජිමයේ විදේශ ඇමති මංගල සමරවීර මාධ්‍ය හමුවක් පවත්වමින් රාජපක්ෂ පවුලේ විදෙස් වත්කම් ප්‍රමාණය රුපියල් බිලියන 18ක් එනම් ට්‍රිලියන 3.2ක් බවට විදේශ බුද්ධි අංශ තමන්ට තොරතුරු සපයා ඇතැයි කීවේ ය. පසුගිය වසර 10 තුළ මේ රටට ලැබුණු සියලු ආයෝජන සහ ණය ප්‍රමාණය ද මෙලෙස හොරකම් කළේ යැයි කියන මුදලට වඩා බෙහෙවින් අඩු වීමෙන් මෙය ද සුපුරුදු මෙගා බොරුවක් පමණක් නොව රටේ විදේශ ඇමතිවරයා මෙන් ම ඔහුට තොරතුරු බුද්ධි අංශ ද බිලියන සහ ට්‍රිලියන මොනවා දැයි නොදන්නා බව ද මෙම ප්‍රකාශයෙන් හෙළි විය. මිලියන 1 000ක් බිලියනයකි. බිලියන 1 000ක් ට්‍රිලියනයකි. ඒ අනුව බිලියන 18ක් යනු ට්‍රිලියන 1.8කි.

සිය හොරකම බොරුවෙන් වැසීම 

යහ පාලනය උදා කරන බව පවසා බිහි කර ගත් යහ පාලන ආණ්ඩුවේ භාණ්ඩාගාර මගඩිය නිසා රටට සිදු පාඩුව රුපියල් කෝටි 6000ට ආසන්න වෙමින් පවතින බව ආර්ථික විශ්ලේෂකයින් පවසන විට ඊට එරෙහිව නැඟෙන විශ්වාසභංගය යටපත් කිරීම සඳහා තමන් පාර්ලිමේන්තුව විසුරුවා හැරි බව ජනාධිපති සිරිසේන මහතා රට අමතා ගාම්භීර ලෙස ප්‍රකාශ කර සිටියේ ය. එපමණක් නොව ජනතාවගේ තොරතුරු දැන ගැනීමේ අයිතිය තහවුරු කරන බව පවසා බලයට පැමිණි යහ පාලන රෙජිමය භාණ්ඩාගාර බැඳුම්කර පිළිබඳ කෝප් වාර්තාව මහජනතාව අතරට යාම වළක්වනු වස් අධිකරණ වාරණ නියෝගයක් ද ලබා ගත්තේ ය. 

කෙලෙස් අවුලන මැතිවරණ ව්‍යාපාරය

මේ අනුව යහ පාලනය යනු අනෙකක් නොව බොරුවට, වංචාවට, දූෂණයට පර්යාය පදයක් ලෙස මේ රෙජිමය භාවිත කරන බව පැහැදිලි ය. ජනවාරි 08 වෙනිදා දක්වා ප්‍රකාශ කළ සියලු සියලු චෝදනා බොරු බව ජනතාව පසක් කර ගන්නා විට ඔවුන්ට වැරදි තීරණයක් ගෙන අවසන් ය. එහෙත් යහ පාලන රෙජිමය කරනුයේ ජනවාරි 08 වෙනිදා දක්වා කී බොරු මත තව තවත් බොරු ගොඩ ගසමින් ජනතාව නිර්වින්දනය කර රටේ බලය ඩැහැ ගැනීම සඳහා ක්‍රියා කිරීම ය. රනිල් වික්‍රමසිංහ මහතා ඇමරිකාවට ගොස් මහින්ද පරාජය කරන ආකාරය ඉගෙන ගෙන පැමිණි බව කියන තියරිය මේ මෙගා බොරු ලෝ දියෙහි ජනතාව ගිල්වා ජනතා මතය කොල්ලකෑම විය යුතු ය. හොරකම් පිළිබඳ මෙගා බොරු කියමින් ජනතාව තුළ ඊර්ෂ්‍යාව, වෛරය, කෝපය, රාගය ඇවිළවීම ඉතා පහසු ය. අපහසු ඒවා මැඩලීම ය. තමන්ගේ මුදලින් අනෙකා සුරසැප විඳී යන අදහස ජනතාව තුළට කිඳා බස්සවා ඔවුන් තුළ වෛරී ජාගර හැඟීම් මතු කිරීම ඉතා පහසු ය. අපේ ආගමික සංස්කෘතික හර පද්ධති විසින් පිළිකුලින් ප්‍රතික්ෂේප කරන මේ පහත් සිතුවිලි ජනතාව තුළ ව්‍යාප්ත කර ප්‍රතිවාදියා පරාජය කිරීම යහ පාලන රෙජිමයේ උපාය වී තිබේ. ගණිකා වෘත්තිය ජීවිකාව කරගත් ගැහැනියක සිය අඟ පසඟ ප්‍රදර්ශනය කර මිනිසුන්ගේ හැඟීම් කුපිත කර තමන් වෙත ආකර්ෂණය කර ගැනීම සහ මේ මෙගා බොරු මැතිවරණ ව්‍යාපාරය අතර අතර කිසිදු වෙනසක් නැත. මේ ප්‍රෝඩාව පරාජය කළ යුත්තේ එය දේශපාලන පිළිලයක් පමණක් නිසා නොව අපගේ හර පද්ධතිය පවා විනාශ කරන භයානක සංස්සෘතික පිළිලියක් ද වන හෙයිනි.

ලිබියාවට දිනා දුන් යහ පාලනය

ඩේවිඩ් කැමරන්ලාගේ දේශපාලන ක්‍රියාමාර්ග මොන තරම් විශිෂ්ට ද කියලා පසු ගිය අවුරුද්දක දෙකක ඉතිහාසය අමතක නොකර David Cameron orders plans for military intervention in Libya to take the fight to 'death cult' ISIS  ලිපිය කියෙව්වා නම් අවබෝධ කර ගන්න අමාරු නෑ.

ලිබියාව කියන්නේ ගඩාෆිගේ කාලයේ අප්‍රිකාවේ තිබුණු ධනවත් ම රාජ්‍යය. එකල ලිබියාව හැඳින්වූයේ අප්‍රිකාවේ ස්ව්ට්සර්ලන්තය නමින්. ඇත්තට ම ගඩාෆි තමන්ගේ ජනතාවට ලබා දුන් පහසුකම් ධනවත් යුරෝපා රටවල් පවා තම ජනතාවට ලබා දී තිබේ ද යන්න සැබවින් ම ප්‍රශ්නයක්.

බටහිරට සිතු සේ ලිබියාවේ තෙල් සම්පත කොල්ල කෑම සඳහා පැවති ලොකුම බාධකය ගඩාෆි. ඉතින් එහෙව් ගඩාෆි ඒකාධිපතියා කියලා ඒ රටේ ජනතාව අන්දනවා.

ඉතින් ගඩාෆිගෙන් ලිබියාව බේර ගන්න ලිබියා ජනතාව ගැන උතුරා යන සෙනෙහසින් ජිහාඩ් කල්ලිවලට සියලු අවි ආයුධ සහ ආධාර ලබා දෙන්නේ බටහිර. ගඩාෆි අයින් කළා. අද ලිබියාව කියන්නේ අමු සොහොනක්.

එදා ජිහාඩ් කල්ලිවලට බටහිර ලබා දුන් අවි ආයුධ සහ පහසුකම්වලින් උපන් ISISගෙන් ලිබියාව බේර ගන්න දැන් බටහිර නව සටනක් සුදානම්. එදා ගඩාෆි ඒකාධිපතියා කීවා. අද ISIS කියන්නේ ලෝකය හමුවේ ඇති විශාලතම තර්ජනයක්ලු.

බටහිර යම පාලන ඇම ගිල්ල ලිබියානුවන්ට තව කල්පයකට ඉන් ගොඩ ඒමක් නම් නැත. ඔවුන් තමන්ගේ රට දිව්‍ය විමානයක් කළ නායකයා පමණක් නොව ඒ සියලු සම්පත් සමඟ සිය රටේ අනාගතය ද අහිමි කර ගෙන අවසන් ය.

බටහිර ප්‍රජාතන්ත්‍රවාදය, මානව අයිතිවාසිකම්, මාධ්‍ය නිදහස, යහ පාලනය ආදි සියල්ල තමන්ට අවනත නොවන රටවල් ශිෂ්ටාචාර පිටින් මිහිපිටින් අතුගා දමන පරමාණු බෝම්බ පමණි.

මේ යහ පාලන පරමාණු බෝම්බ එදා ඇමරිකාව ජපානය මතට හෙළු පරමාණු බෝම්බවලටව වඩා භයානක ය. ඒ මේ යහ පාලන පරමාණු බෝම්බ පිපිරීමෙන් විනාශයට පත් වන, ඊට ගොදුරු වන රටවල ජනතාව විසින් සතුරා ලබා දෙන බෝම්බ දෝතින් ම බදා ගෙන තමන් විසින් ම පුපුරුවා ගැනීම ය.

1815 වැටුණු වලට 2015 පනිමු ද?

එදා යහ පාලනය

අප රට 1505 හෝ 1506 පෘතුගීසි ආක්‍රමණයට ගොදුරු වූ අතර අනතුරුව පිළිවෙළින් 1656 ලන්දේසී ද 1796 ඉංග්‍රීසි ද කඩා වැදුණහ. එවකට යුද නාවික බලය අතින් ලොව සිටි බලසම්පන්නම ජාතීන් වූ මොවුන් ලතින් ඇමරිකාව, අප්‍රිකාව සහ ආසියාව ආශ්‍රිතව යටත් විජිත ගොඩනඟා ගෙන මහා අධිරාජ්‍ය බිහි කර තිබිණි. අසල්වැසි මහ භාරතය ඔවුන්ගේ යටත් විජිතයක් බවට පත් ව තිබිණි. 

එහෙත් මේ කිසිඳු ජාතියකට අප රට මුළුමනින් ම සිය යුද මිලිටරි බලයෙන් යටත් කර ගත නො හැකි විය. 1505 හෝ 1506 සිට 1815 තෙක් ම සියවස් තුනකට අධික කාලයක් ඔවුන් අපගේ රාජධානිය යටත් කර ගත නොහැකි වූ අතර එල්ල කළ සියලු ප්‍රහාර සතුරාට බරපතළ හානි සිදු කර මැඩ පැවැත්වීමට අපේ මුතුන් මිත්තෝ සමත්වූහ. ඉංග්‍රීසින් අප රාජධානිය යටත් කර ගෙන මුළු දිවයින ම බ්‍රිතාන්‍ය කිරීටය යටතට පත් කිරීමට අනවරත වෙහෙසක් දැරුව ද එය ඔවුන්ට සිහිනයක් ම පමණක් විය. මහනුවර රාජධානිය ඉලක්ක කර ඔවුන් එල්ල කළ අවසාන ප්‍රහාරය ද 1810 අසාර්ථක විය.

යුද බලයෙන් කිසිදා අපේ රාජධානිය යටත් කර ගත නොහැක යන තිත්ත ඇත්ත අනතුරුව ඉංග්‍රීසිහු වටහා ගත්හ. එයින් පසු පැමිණියේ සීතල යුධ සමයයි. අපේ රට යටත් කර ගැනීම සඳහා යුදමය නොවන නව උපක්‍රම සොයා බලන, තෝරන සමයයි. ඒ සඳහා ජෝන් ඩොයිලි සහ ඔහුගේ ඔත්තුකරුවන් යොදා ගැනිනි. වෙළඳාම පිණිස මෙහි පැමිණි කණ්ඩායම් විවිධ වරප්‍රසාද ලබා දෙමින් මේ කාර්යය සඳහා භාවිත කෙරිණි. විශේෂයෙන් ජේ. ආර්. ජයවර්ධනගේ මුත්තා වන එහෙයින් ම රනිල් වික්‍රමසිංහගේ මී මුත්තා ද වන තම්බි මුහන්දිරම් නමැති ඉන්දිය ජා ජාතිකයා මේ ඔත්තුකරුවන් අතර ප්‍රමුඛ විය. ඉංග්‍රීසින් පැමිණීමට ප්‍රථම අපේ රටට එරෙහිව ලන්දේසීන්ගේ පැත්ත ගෙන කටයුතු කර නොයෙක් වරදාන ලබා සිටි තම්බි මුහන්දිරම් අනතුරුව ඉංග්‍රීසින්ගේ අතිශය විශ්වාසනීය දේශීය ඔත්තුකරුවා විය. අපේ රාජධානිය පිළිබඳ ඔහු දත් සියලු තොරතුරු නො පැකිලිව ඉංග්‍රීසින්ට ලබා දුන්නේ ය. 

යුරෝපා යුද බලය හමුවේ නොසැලුණු ශක්තිමත් උඩරට රාජ්‍ය දුර්වල කිරීමේ ආරම්භය ලෙස රාජධානිය වටා බැඳි මහා පවුරක් සේ පැවති භික්ෂු-ගිහි සම්බන්ධය, භික්ෂූවට රටේ හිමිව තිබූ බලය විනාශ කිරීමට ඉංග්‍රීසින් උගුල් ඇට වූ අතර ප්‍රභූන් සහ රජු අතර පැවති ඇතැම් ප්‍රශ්න, බල අරගල දක්වා උත්සන්න කිරීමටත් ඒ අරගල පදනම් කර ගෙන ජනතාව රජුගෙන් ඈත් කිරීමට සැලසුම් සකස් කෙරිණි. 

විශේෂයෙන් 1810 ඉංග්‍රීසින්ගේ උඩරට ආක්‍රමණය පරාජය කළ ශ්‍රී වික්‍රම රාජසිංහ රජු සහ ජනතාව අතර පරතරයක් නිර්මාණය කිරීමට රජු අසිංහලයෙකු බවත් රජු අත්තනෝමතික ලෙස ජනතාව පීඩනයට ලක් කරන කෘර පාලකයෙකු බවත් සමාජගත කරනට කටයුතු යෙදිණි. ඊට එරෙහිව යහ පාලනය දිනා ගැනීමට ප්‍රභවරුන් මෙන් ම ඔවුන් හරහා ජනතාව ද දිරිගැන්විණි. මේ සියලු කුමන්ත්‍රණ පිටුපස සිටියේ පන්සලට ගොස් බුලත් විට හපමින් භික්ෂූන් වහන්සේලාගෙන් ම සිංහල භාෂාව උගත් ජෝන් ඩොයිලි සහ තම්බි මුහන්දිරම් ය.  

ඉංග්‍රීසීහු ඩොයිලි මාර්ගයෙන් ප්‍රභූන් සමඟ වෙන ම සබඳතා ගොඩනඟා ගෙන ඔවුන්ගේ සිත් තුළ රජ වීමේ සිහින පැල කළ අතර ඒ සඳහා තමන් උදව් කරන බවට රහසේ ඉඟි කළහ. මේ අතර ඉංග්‍රීසි නියෝජිත පිරිස් රජු බැහැ දකින අවස්ථාවල රජුට විශේෂ මත්පැන් වර්ග විශාල වශයෙන් තුටු පඬුරු ලෙස ලබා දීමට වගබලා ගත්හ. නොබෝ කලකින් ම සතුරා අපේක්ෂා කළ ලෙස ම ප්‍රධාන නිලමේවරු එලිපිට ම රජුට එරෙහිව කටයුතු කළ අතර ඒ කටයුතුවලට ඉංග්‍රීසිහු අනුබල දුන්හ. නිලමේවරුන්ගේ ද්‍රෝහි ක්‍රියා නිසා ආතතියට පත් රජුගේ සුහද මිතුරා බවට ඉංග්‍රීසීන්ගේ මත්පැන් නිරායාසයෙන් ම පත්විය. 

සිය මැති ඇමතිවරුන්ගේ නොපනත්කම් සහ මත්පැන් නිසා රජු වඩාත් රෞද්‍ර ස්වරූපයක් ගන්නා අතර තමන්ට එරෙහි වූ ඇහැලේපොළගේ බිරිඳ සහ දරුවන් මරා දැමීම එහි කඩ ඉම සනිටුහන් කළේ ය. රාජද්‍රෝහීන්ට සිංහල රාජ නීතිය අනුව ලබා දෙන දඬුවම එය වුව ද ඇහැලේපොළ පවුලට ලබා දුන් දඬුවම නීතිය ක්‍රියාත්මක කිරීමක් නොව බේබදු අධර්මිෂ්ට රජුගේ හුදු පලිගැනීමක් බව සූක්ෂම ලෙස සමාජගත කිරීමට ඉංග්‍රීසිහූ මෙන් ම ඔවුන්ගේ උගුලට හසුව රාජ සිහින දුටු ප්‍රභූහු ද ක්‍රියා කළහ. 

මෙහි ප්‍රතිඵලය ලෙස මෙතෙක් ඉංග්‍රීසින්ට සිංහලේ අල්ලා ගැනීමට තිබූ ලොකු ම බාධකය වූ රාජධානියේ ආරක්ෂකයා වූ ද තම අභිලාෂයන්ගේ පරම සතුරා වූ ද රාජසිංහ රජු, සිංහලේ ප්‍රභූන් ප්‍රමුඛ ජනතාව අතර දුෂ්ටයෙකු බවට පත් කිරීමට ඉංග්‍රීසින්ට හැකි වූ අතර නොබෝ කලකින් ම තම්බි මුහම්දිරම් ලා විසින් රජු ඉංග්‍රීසීන්ට අල්ලා දෙන ලදි.

ඇහැලේපොළ ඉංග්‍රීසින් ඇටූ වූ උගුලට හසුව රජුට එරෙහිව කටයුතු කළ ද ඔහුට රජකම ලබා නොලැබුණා පමණක් නොව සිය මාතෘභූමියේ ජීවත් වීමේ භාග්‍යය ද අහිමිව මුරුසි දිවයිනේ සිර අඩස්සියේ මියැදෙන්නට සිදු විය. ඔහු සිය දරු පවුල ද අහිමි කර ගනිමින් රටේ සතුරන් පෙන්වූ රාජ සිහින ඔස්සේ දිව ගිය ද අවසන එය මිරිඟුවක් බවට පත් විය. තමන් රජුට විරුද්ධ වන්නේ යැයි සිතා සිදු කර ඇත්තේ වසර දහස් ගණනක් සිය මුතුන් මිත්තන් දිවි හිමියෙන් ආරක්ෂා කළ අපගේ අභිමාණවත් රාජධානිය සතුරාට බන්දේසියක තබා පූජා කිරීම බව ඇහැලේපොළලාට අවබෝධ වන විට සියල්ල සිදු වී හමාර ය. 

එදා ඉංග්‍රීසින්ගේ සටන් පාඨයක් වූ රජුගේ කෘර පාලනයට එරෙහි යහ පාලනය මිරිඟුවට රැවටුණු අපට සියවස් එකහමාරක් පමණ ඉංග්‍රීසි යටත් විජිත වැසියන් වීමට සිදු විය. අප මුතුන් මිත්තන් ගොඩනඟා ගත් මහා ශිෂ්ටාචාරය අපට අහිමි කෙරිණි. අපේ ඉතිහාසය, සභ්‍යත්වය, හර පද්ධති, අධ්‍යාපන ක්‍රමය යහ පාලනය නම් මිරිඟුව පෙන්වා අපෙන් උදුරා ගැනිණි. බුදු දහම රකින බවට සඳහන් උඩරට ගිවිසුම මහා රැවටීමක් පමණක් වූ අතර බුදු දහම විනාශ කර දැමීමට ඉංග්‍රීසීහු ගත හැකි සෑම පියවරක් ම ගත්හ.

උඩරට ප්‍රභූන්ගේ මේ මහා පවාදීමට එරෙහිව නැඟුණු විමුක්ති අරගල 1818 මෙන් ම 1848 ද ලෙයින් යකඩින් මර්දනය කරන ලද්දේ රාජසිංහ රජු කළේ යැයි කී ඇතැම් අපරාධ මෙන් ම සිය දහස් ගුණයකින් දරුණු මහා විනාශයක් අපට සිදු කිරීම මගිනි. වෙල්ලස්ස නිදහස් අරගලය යහ පාලන වේශධාරී ඉංග්‍රීසින් විසින් මර්දනය කරන ලද්දේ අවුරුදු 16 වැඩි සියලු සිංහල තරුණයින් මරා දැමීමෙනි. කෙත්වතු, භවභෝග, නිවාස විනාශ කොට ගිනි තැබීමෙනි. දේශීය සටන් කලාව වූ අංගම්පොර සටන් කලාව සම්පූර්ණයෙන් තහනම් කළ අතර සටන් කලාව දත් සියලු දෙනාට දණින් පහළට වෙඩි තබා සදාකාලික ආබාධිතයින් කරවන ලදි.

අද යහ පාලනය

පසු ගිය කාලය පුරා ඇමරිකාව ප්‍රමුඛ බටහිර මෙන් ම ඉන්දියාව ද මේ රටේ පාලනයට ඇඟිලි ගැසීම සඳහා භාවිත කළේ බෙදුම්වාදී කොටි ත්‍රස්තවාදයයි. ඒ ඔස්සේ අපේ රටේ පාලනයට ඇඟිලි ගැසීමට මෙන් ම නැඟී එන ආසියානු කළාපය පාලනය කිරීමේ අවස්ථාව ද ඔවුන්ට හිමිව තිබිණි. සිය අභිලාෂ ඉටු කර ගැනීම සඳහා කොටි කල්ලිය පෝෂණය කර නඩත්තු කරන ලද්දේ මේ බලවත් රාජ්‍ය විසිනි. 

එහෙත් මේ රට කිසිදා මිලිටරි බලයෙන් යටත් කළ නොහැකි බව නැවත සනාථ කරමින් 2009 වසරේ දී එනම් ඉංග්‍රීසින් උඩරට රාජධානියට අවසන් ප්‍රහාරය එල්ල කොට වසර 199ට පසු නව අධිරාජ්‍යවාදී සෙවණේ වැඩුණු කොටි ත්‍රස්තවාදය සම්පූර්ණයෙන් පරාජය කිරීමට අපට හැකි විය. එහි දී චීනය, රුසියාව, පාකිස්ථානය වැනි මිතුරු රටවල් අපට ශක්තියක් විය. එකල ආණ්ඩුව දක්ෂ ලෙස විදෙස් බලපෑම් කළමනාකරණය කිරීම සහ කොටි ත්‍රස්තවාදීන්ගේ බිහිසුණු අපරාධ ඒ ජයග්‍රහණයට රුකුලක් විය. බලසම්පන්න ප්‍රංශ සහ බ්‍රිතාන්‍ය විදේශ ලේකම්වරුන් මහින්ද රාජපක්ෂ හමු වී ප්‍රභාකරන් බේරා ගැනීමට අවසාන මොහොත දක්වා සටන් කළ ද එය ව්‍යවර්ථ විය. එජාපය සහ ජවිපෙ අනේක බාධා කිරීම් කරමින්, ගල් පෙරළමින්, නින්දා අපහාස කරමින්, බටහිරට ගතු කියමින් කොටි ආරක්ෂා කර ගැනීම සඳහා කළ සියලු කුමන්ත්‍රණ ද මව්බිමේ වාසනාවට පරාජයට පත් විය. 

වසර 30ක් හිඟන්නාගේ තුවාලය කර ගත් ප්‍රභාකරන්ගේ පරාජය සමඟ ජාත්‍යන්තරයට මේ රටේ පාලනයට ඇඟිලි ගැසීමට ඇති හැකියාව අවම වූ අතර රටේ යටිතල පහසුකම් ප්‍රවර්ධනය පිණිස චීනය විශාල වශයෙන් ආධාර කළේ ය. රට ආර්ථික වශයෙන් ශක්තිමත් වෙමින් ඉදිරියට යාම ආරම්භ කළේ ය. මෙය සිය අභිලාෂයන්ට පටහැනිය. එහෙයින් 1810 පරාජයෙන් පසු උඩරට රාජධානිය විනාශ කිරීම සඳහා යොදා ගත් උපක්‍රමය නැවත ක්‍රියාවට නැඟිණි. 

බටහිර තානාපතිවරු ජෝන් ඩොයිලිගේ කාර්ය ඉටු කළ අතර සිවිල් සංවිධාන සහ ඊනියා උගත්තු බලලෝභී දේශපාලකයින් බටහිරට හිස නොනමා ප්‍රභාකරන් පරාජය කළ මහින්ද රාජපක්ෂ මත ඒකාධිපති, හොර ලේබල් අලවමින් තම්බි මහම්දිරම්ගේ කාර්ය ඉටු කළහ. රටේ ජනතාව බොරුවෙන් නිර්වින්දනය කර රටට යහ පාලනය, ප්‍රජාතන්ත්‍රවාදය අවශ්‍ය බව කීහ. ජනාධිපති සිහින දකින සරත් ෆොන්සේකා, චම්පික රණවක වැනි අය ඇහැලේ පොළ භූමිකාවට පණ පෙවූහ. එකල ඉංග්‍රීසි ආණ්ඩුවට එරෙහිව ඇති වන අරගල පිළිබඳ ව වහා ඔවුන් දැනුවත් කිරීමට පැවරුණු මල්වතු-අස්ගිරි උභය විහාර නායකයින්ගේ කාර්ය මාදුළුවාවේ සෝභිත සහ අතුරලියේ රතන හිමි නොපිරිහෙලා ඉටු කළ සේක. 1815 රෑ වැටුණු වලේ 2015 ජනවාරි 08 වෙනිදා අපි දවල් වැටුණෙමු. 

යහ පාලනය නම් බලගතු අවිය භාවිත කොට එදා ඉංග්‍රීසින්ට එළව එළවා පහර දුන් රාජසිංහ රජු මෙන් ම මෙදා ප්‍රභාකරන් පරාජය කළ මහින්ද රාජපක්ෂ ද පරාජය කිරීමට ඔවුහු සමත් වූහ. කෙසේ වුව ද එදා රාජසිංහ රජ දවස අපට උදා නොවූ ස්වර්ණමය අවස්ථාවක් මෙදා අපට උදා වී තිබේ. ඒ යහ පාලන විසින් සිහිමුර්ඡා කොට නිර්වින්දනය කොට තිබූ ජාතියට පියවි සිහිය ලැබෙන විට ම සිය වරද නිවැරදි කර ගැනීමට දෛවෝපගත ලෙස අවස්ථාවක් අප ඉදිරියේ නිර්මාණය වීම ය. ඒ අන් කිසිවක් නොව එළඹෙන මහා මැතිවරණයයි. 

අගෝස්තු 17 වෙනිදා, ජනවාරි 08 වෙනිදා සිදු වූ වරද නිවැරදි කළ යුතු ය. නැතහොත් 2015 අගෝස්තු 18 වෙනිදා හිරු උදාවනු ඇත්තේ 1815 මාර්තු 4 වෙනි දා උඩරට ගිවිසුම අත්සන් කළ තැනින් ඇරඹෙන අඳුරු යුගය ඉතිහාස පොතේ ලිවීමට ය. එහෙයින් ජනවාරි 08 ලිහා බැලූ මල්ල අගෝස්තු 17 නැවත ඔබා බැලිය යුතු ද? 1815 සතුරාගේ යහ පාලන මිරිඟුවට රැවටී රෑ වැටුණු වලේ 2015 ජනවාරි 08 දවල් වැටුණු අපි නැවත අගෝස්තු 17 ඒ වලට පැනිය යුතු ද? විදෙස් රටවලින් ගලන ඩොලර්වලින් මාධ්‍ය ආයතන මිලට ගෙන කරනු ලබන මෙගා පච ව්‍යාපාරවලින් නැවත දෑස් අඳ කර ගෙන අපේ උදාර මාතෘ භූමිය පාවා නොදෙමු. ඉතිහාසයෙන් උගනිමු! අපේ රටේ අනාගතය සුරක්ෂිත කරනු පිණිස නිවැරදි මොහොතේ නිවැරදි තීන්දුව ගනිමු!

Thank you සිරිසේන

ජනාධිපති මෛත්‍රීපාල සිරිසේන එළඹෙන මහා මැතිවරණයේ දී මධ්‍යස්ථව සිටින බව මුලින් ම වාර්තා කළේ ඉන්දියාවේ The Hindu පුවත්පත ය. එය රනිල් වික්‍රමසිංහ කී බව පැවසුව ද ඉන්දියාවේ මෙන් ම ඇමරිකාව ප්‍රමුඛ බටහිර ද අපේක්ෂාව එයම බව පැහැදිලි ය. රනිල් වික්‍රමසිංහට මේ මැතිවරණය ජයගත හැක්කේ නොණ්ඩි අශ්වයෙකු තරඟ කළහොත් පමණක් බව ජනවාරි 08 වෙනස පිටුපස සිටි ඉන්දීය රෝ ඔත්තු සේවාවට අවබෝධ කර ගත නොහැකි වීමට හේතුවක් නොමැත. මහින්ද තනිව තරඟ කළහොත් සිදුවන්නේ ඔහු ජයග්‍රහණය කිරීම සහ සිරිසේන තුන් වැනි තැනට ඇද වැටීම පමණක් බව ද එය සිය ඉදිරි මෙහෙයුම්වලට අහිතකර විය හැකි බව ද ඔවුන් නොදන්නවා නොවේ. 

ඒ නිසා ඔවුන් කළේ සිරිසේන ලවා මහින්දට සන්ධානය තුළින් අපේක්ෂකත්වය ලබා දී අනතුරුව සිරිසේනගේ පක්ෂ නායක බලතල ද විධායක බලතල ද යොදා පක්ෂයේ ජයග්‍රහණය වැළැක්වීම සඳහා කටයුතු කිරීම ය. අනතුරුව සිරිසේන හිතවාදි මන්ත්‍රී පිරිසක් ද යොදා ගෙන රනිල් අගමැති කර ජාතික ආණ්ඩුව නමින් එජාප ආණ්ඩුවක් පිහිටුවා 2003 රනිල් වික්‍රමසිංහට නතර කිරීමට සිදු වූ තැනින් බෙදුම්වාදී ව්‍යාපෘතිය ආරම්භ කිරීම ඔවුන්ගේ අරමුණ විය.

මේ ව්‍යාපෘතිය මැතිවරණය අවසානය දක්වා ශ්‍රීලනිප ඡන්ද දායකයින්ට ද රනිල් ප්‍රමුඛ එජාප විරෝධි පිරිස්වලට ද රහසක් ලෙස තබා ගත යුතු වුව ද සිරිසේන ඊයේ කළ විශේෂ ප්‍රකාශයත් සමඟ සියල්ල අනාවරණය විය. එසේ නොකර ඔහු සන්ධාන වේදිකාවට ද නැඟ තම පක්ෂය ජයග්‍රහණය කළ විට සිය හිතවතුන් අතරින් පත් වන පිරිස ද රනිල් වික්‍රමසිංහට පූජා කර ඔහු අගමැති කර නැවත මහා පාවාදීමක් කිරීමට අවස්ථාව ලැබෙනු ඇත. එහෙත් පුදපු ගමන් කාපි යකා කියා මේ කුමන්ත්‍රණය ආරම්භයේ ම ඔවුන් බලාපොරාත්තු වූ පරිදි සන්ධාන සහ රනිල් ප්‍රමුඛ එජාප විරෝධි කණ්ඩායම් උකටලි වීම හෝ පරාජය භාර ගෙන කරළියෙන් බැස යාම සිදු නොවු අතර සිදු වූයේ ඔවුන් කිසිසේත් නොපැතූ දෙයකි.

සිරිසේනගේ ප්‍රකාශය සමඟ ශ්‍රීලනිපය තුළ ඔහුට කිසියම් බලයක් තිබිණි නම් එය ද ගිලිහී ගිය අතර ඔහු වෙනුවෙන් පෙනී සිටි පිරිස අන්ත අසරණ විය. පක්ෂය තුළ ඔහු වෙනුවෙන් පෙනී සිටි පිරිස පාවදීමකට ලක් විය. ඒ සමඟ විවිධ මතවාදී වෙනස්කම් නිසා දුරස් වී සිටි සන්ධාන නායකයින් සියලු වාද භේද අතැර නැවත එකතු විය. මෙය පසුගිය වසරේ සැප්තැම්බර් 21 කළ පාවදීමට සමාන මහා පාවදීමක් බව ඔහු විශ්වාස කළ අය ද අවබෝධ කර ගත් බව පැහැදිලි ය. එහෙයින් ඔවුහු සිය කඳවුර ආරක්ෂා කර ගැනීමට පෙළ ගැසුණහ. රනිල්ට තරඟ කොට දිනන්නට නොණ්ඩි අශ්වයෙකු තනන්නට ගොස් දැන් නිර්මාණය වී ඇත්තේ ජවාධික සෛන්ධවයෙකි.

අනෙක් අතට මහින්දට අගමැති අපේක්ෂකත්වය හෝ මැතිවරණ මෙහෙයුමේ නායකත්වය ලබා දීමට සිරිසේන අකමැති වුව ද මේ ප්‍රකාශය සමඟ රැස් වූ සන්ධාන නායකයින් මහින්ද සිය මැතිවරණ මෙහෙයුමේ නායකයා වශයෙන් පත් කර ගත්තේ ආරම්භයේ ම ඒ අවස්ථාව මහින්දට ලබා දීමට සිරිසේන ක්‍රියා කළේ නම් නොලැබෙන වටිනාමක් ඊට ලබා දෙමිණි. මේ නිසා සභාපති සිරිසේනට සන්ධානය තුළ හෝ ශ්‍රීලනිපය තුළ බලයක් නොමැති බව රටට ම අනාවරණය විය. මුල සිට ම ජනාධිපති බලතල ද සභාපති බලතල ද සහිත ජයග්‍රාහි සිරිසේන වටා  රොක් වනු වෙනුවට පාක්ෂිකයින් පරාජයට පත්ව මැදමුලනට ගිය මහින්ද වටා රොක් වීම නිසා සිරිසේන තුළ සිය පාක්ෂිකයින් පිළිබඳ නොපහන් හැඟීමක් ද තමන් පිළිබඳ හීනමානයක් ද ඇති වීම වැළැක්විය නො හැකි ය. 

ශ්‍රී ලංකා නිදහස් පක්ෂය ප්‍රමුඛ සන්ධානය පසු ගිය කාලය තුළ පියවරු දෙදෙනෙකු අතර දෝලනය විය. ඒ නීත්‍යානුකූල පියා සහ ජානමය පියා අතර ය. එහි සැබෑ පීතෘත්වය මහින්දට හිමි අතර පක්ෂ ව්‍යවස්ථාවේ හිලකින් රිංගා සිරිසේන ඒ දරුවා තමාගේ නමට ලියා ගෙන තිබේ. හුණුවටයේ කතාවේ සැබෑ මව සහ ව්‍යාජ මව අතර සිදු වූ අරගලයේ දී මෙන් ම සිරිසේන ජනාධිපති බලය භාවිත කර පක්ෂය කැඩීමට උත්සාහ කරන විට මහින්ද එය අතහැරියේ ය. පසුව කෙටි කලකින් මහින්ද වටා ගොඩනැඟුණු ජන බලය පක්ෂය කඩා වෙනම ඉල්ලීමට ඕනෑ කරම් අවස්ථාව තිබුණ ද ඔහු එසේ නො කළේ ය. සිරිසේන සිය පක්ෂයට ද පක්ෂයේ අපේක්ෂකයාට ද එරෙහි වුව ද මහින්ද කිසිදා පක්ෂයට ද්‍රෝහි නොවිණි. මේ සියලු කරුණු කාරණාවලින් සිය පක්ෂයේ සැබෑ පීතෘවරයා මහින්ද බව සනාථ විය.

ජයග්‍රහණයට පියවරු සියයක් සිටිය ද පරාජය අවජාතක යැයි කියමනක් තිබුණ ද ජනතාව පරාජිතයා වටේ රොක් වූයේ ජයග්‍රහණය අවජාතක කරමිනි. සැබවින් ම ජනවාරි 8 රට ලැබුවේ ජයග්‍රහණයක් නොව පරාජයකි. ජනතාව මහින්ද වටා රොක් වන්නේ නැවත අවස්ථාවක් ලද වහා ඒ පරාජය නැවත ආපිට පෙරළන්නට ය. එහි දී රට ටික කලකට වුව පරාජයට පත් කරමින් ජයග්‍රහණය කළ විදෙස් බලවේගවල ඉත්තන් වන   රාජිත-පාඨලි-රණතුංග එජාපයට රිංගා ගැනීම ද සිරිසේන වේදිකාවෙන් බැස යාම ද රට ලද ජයග්‍රහණ වෙයි. 2005 එවකට ජනාධිපතිනිය සහ පක්ෂ නායිකාව වූ චන්ද්‍රිකා කුමාරතුංග ද සිය පක්ෂය පරාජය කිරීම සඳහා මහින්ද මතට ගල් පෙරළමින් දෙව්දත් චරිතය රඟමින් සටන ජයග්‍රහණයෙන් අවසන් කිරීමට අපට ශක්තිය ලබා දුන්නා ය. අද සිරිසේන ද එදා චන්ද්‍රිකාගේ චරිතයට පණ පොවමින් සිටියි. ප්‍රතිඵලය සක් සුදක් සේ පැහැදිලි ය.

කෙසේ වුව ද ඉදිරි මහ මැතිවරණය මේ රටේ අනාගතයේ ඒකීය සුරක්ෂිත රටක් ලෙස පවතින්නේ ද නො එසේ නම් රට මැදින් මායිම් ගම්මාන පෙළක් සහිත සදාකාලික ගැටුම්වලින් ආතුර රටවල් දෙකක් වන්නේ ද යන්න තීරණය කරන අවස්ථාව වෙයි. සුමන්තිරන් පවසා ඇති පරිදි උතරු නැඟෙනහිර ඒකාබද්ධ කර ඒකීය රට තුළ නොවන විසඳුමක් ලබා දීමට එනම් රට ෆෙඩරල් කොට ඊළමට පාර කැපීමට සිරිසේන මෙන් ම රනිල් ද එකඟ වී තිබේ. ඊට ඔවුන්ගේ ස්වාමියා වන නරේන්ද්‍ර මෝඩිගේ ආශිර්වාදය ද ලැබී ඇත. මේ අනුව අපේ මාතෘ භූමිය ඉදිරියේ ඇති අවධානම සුළු පටු නැති බව අවබෝධ කර ගත යුතු ය. එහෙයින් ජනතාව ඉතා ම සිහි බුද්ධියෙන් සිය ඡන්දය ලකුණු කළ යුතු ය. ඉන්දියාවේ නරේන්ද්‍ර මෝඩි සහ එංගලන්තයේ ඩේවිඩ් කැමරන්ගේ මැතිවරණ ව්‍යාපාර ජයග්‍රාහි ලෙස අවසන් කළ දැවැන්ත ප්‍රචාරණ සමාගම් දෙක ම මේ වන විට රනිල් ජයග්‍රහණය කරවනු පිණිස ක්‍රියාන්විතය අරඹා අවසන් ය. මේ සමාගම් පැමිණෙන්නේ තට්ටයින්ට පනා විකිණීමට හෝ ඇස්කිමෝවරුන්ට ශීතකරණ විකිණීමට නොව වසර 2500ක් අපේ මුතුන් මිත්තන් දිවි හිමියෙන් ආරක්ෂා කර අපට උරුම කරදුන් මාතෘ භූමිය දෙකඩ කිරීම නම් මහා බිය කරු යක්ෂයා යහ පාලනය, නීතිය හා සාධාරණත්වය, මානව අයිතිවාසිකම්, මාධ්‍ය නිදහස වැනි සළු පොරවා අපට අලෙවි කිරීම සඳහා ය. අපේ අනාගත පරම්පරාවේ මරණ වරෙන්තුව අපට අලෙවි කිරීම සඳහා ය.

මේ ගමන නතර කළ හැක්කේ සන්ධානයට සිය ඡන්දය ලකුණු කර පරාජය හමුවේ නොසැලි 58 ලක්ෂයේ ජන වරම දිවි හිමියෙන් ආරක්ෂා කළ ඒ වෙනුවෙන් පෙනී සිටි එය නැවත ඉතා ම කෙටි කලකින් මහ බලවේගයක් බවට පත් කළ සියලු දේශප්‍රේමි නායකයින් ඔබේ මනාපයෙන් පාර්ලිමේන්තුවට යැවීමෙනි. දුෂ්කර අවස්ථාවේ ජන වරම පාවා දුන් කිසිවෙකුට ඔබේ එක ම එක මනාපයක් ලබා දීම වුව එය මනාපයක් අපතේ යැවීමකට වඩා රටට කරන බරපතළ වරදකි. එම ද්‍රෝහීන් පිළිබඳ සියලු දෙනා දැනුවත් කළ යුතු අතර ඔවුන් අනාගතයේ ද ඔබේ ජන වරම රනිල් වික්‍රමසිංහ ඇතුළු මව්බිමේ සතුරන්ට පාවා දිය හැකි බැවින් ඔවුන් කෙරෙහි කිසිඳු විශ්වාසයක් නො තැබිය යුතු ය. ඔබේ දිස්ත්‍රික්කයේ සැබෑ මහින්ද පාක්ෂිකයින් තෝරා ගෙන ඔවුන්ට ඔබේ මනාපය ලබා දී මහින්ද රාජපක්ෂ අගමැති තනතුරට ඔසවා තැබීම, මේ රටේ ඒකීයභාවය ආරක්ෂා කර ගැනීම සඳහා ලැබී ඇති අවසාන අවස්ථාව ය.

මේ අවස්ථාවේ අප ගත යුතු මඟ කුමක් ද යන්න පැහැදිලිව හඳුනා ගත හැකි වූයේ ඉන්දියා සහ ඇමරිකාව ප්‍රමුඛ බලවේගවල උවමනාව සිරිසේන රට හමුවේ හෙළි කළ නිසා ය. ඔහුගේ පාවදීම අවසානයේ ඔහුට ම පාරා වළල්ලක් විය. ඒ සමඟ තවත් බලවත් වුණු බලවේගය අගෝස්තු 17 වෙනිදාට ජයග්‍රාහී ලෙස කෙළවර කිරීමට කටයුතු කළ යුතු ම ය. ජනවාරි 08 වෙනිදා යහ පාලන සළු අන්දා රැගෙන ආ කොටි පාලනයට රැවටුණු මේ රටට ආදරය කරන සියලු දේශප්‍රේමි ජනතාව එදා සිදු වූ වරද නිවැරදි කර ගැනීම උදෙසා කැපවීමෙන් කටයුතු කළ යුතු ය. කිසිදු බලයක් නොමැතිව නීති විරෝධීව බලය ඩැහැ ගෙන පසු ගිය මාස කිහිපය තුළ සිදු කළ මහා පාවාදීම් දෙස බලන විට නීත්‍යානුකූල ලෙස වසර පහකට බලය ලබා දුනහොත් මොවුන් මේ රට නැවත ගොඩගත නොහැකි අගාධයකට ඇද දමන බව ඉර හඳ මෙන් විශ්වාස ය. එහෙයින් සිදු වූ වරද නිවැරදි කරගෙන රට නැවත නිවැරදි දිශානතියට හරවමු. නො එසේ නම් තමන් ද ඒ මහා පාවාදීමේ කොටස්කරුවෙකුය යන හැඟීමෙන් මරණ මංචකයේ දී ඔබට ඔබේ හෘද සාක්ෂියෙන් සමාවක් නොලැබෙනු ඇත. 

එතකොට උඹලත්.... ?

මෛත්‍රීපාල සිරිසේනට ජනමතයට හිස නමා මහින්ද රාජපක්ෂට මහා මැතිවරණ අපේක්ෂකත්වය ලබා දීමට සිදු වීමත් සමඟ ම මෛත්‍රීපාලට හිතවත් එහෙත් බෞද්ධ විරෝධි සිංහල විරෝධි, එහෙයින් ම මහින්ද විරෝධි පිළ කෝපයට පත් විය. එයින් අයෙක් බුකියේ "බයියනි, තොපි දැනගනිල්ලා, උඹලාට අපි ජනවාරි 08 ගැහුවේ පොන්නයෙක් දාලා" යනුවෙන් ලියා තිබිණි. අපේ ප්‍රතිවාදියා එවැන්නෙක් බව අප දැනගත්තේ 2014 නොවැම්බර් මස 21 වෙනිදා වන අතර එය ජනවාරි 08 වෙනිදා ප්‍රත්‍යක්ෂ කර ගතිමු. එහෙත් උගත් ටොයි මහත්වරුන්ට එය අවබෝධ කර ගැනීම සඳහා මාස 6ක් පමණ ගත විය.

කෙසේ වුව ද ඊයේ රාත්‍රී සිරිසේනගේ ප්‍රකාශය සමඟ ඒ වටා සිටින ජන බලය නියෝජනය කරමින් ශ්‍රීලනිපයේ සහ එක්සත් ජනතා නිදහස් සන්ධානයේ ඉහළ පුටුවල වැජඹෙන අය ද අපට ජනවාරි 08 වැනිදා පහර දීමට පාවිච්චි කළ අය වැනි අය ද නැද්ද යන්න අවබෝධ කර ගැනීමට අවස්ථාව ලැබී තිබේ. ඒ සඳහා කෙටි කාලයක් ලබා දී අපි අපේ ඉදිරි සැලසුම් සකස් කිරීමට සුදානම් ය. 

ශ්‍රීලනිප නායකත්වයේ සිටීමෙන් සිය පක්ෂයේ ජයග්‍රහණයට කටයුතු නොකර සිටීම ම තම ප්‍රතිවාදි පක්ෂයේ ජයග්‍රහණයට කටයුතු කිරීමකි. අප මුල සිට ම කියා සිටියේ සිරිසේන ඒ සඳහා කටයුතු කළ යුතු බව හෝ කළ හැකි බව නොවේ. ඔහු විධායක බලය යොදා අල්ලා ගත් නායකත්වයෙන් ඉල්ලා අස්විය යුතු බව ය. මේ ඒ සඳහා හොඳ ම වෙලාව ය. නායකත්වයෙන් ඉල්ලා අස් වී රනිල් වික්‍රමසිංහගේ වේදිකාවට නැග්ග ද එය අපට ප්‍රශ්නයක් නොවේ. කෙසේ වුව ද ශ්‍රීලනිපයේ සහ එක්සත් ජනතා නිදහස් සන්ධානයේ නායකයින් තමන් සිය පක්ෂයට ආදරය කරන, එහි ජයග්‍රහණය සඳහා කැපවන අවංක නායකයින් බව ද ජනවාරි 08 වැනිදා පහර දීමට පාවිච්චි කළ අය පන්නයේ අය නොවන බව ද ක්‍රියාවෙන් ම ඔප්පු කළ යුතු ය. ඒ සඳහා සිරිසේනට විරුද්ධව පක්ෂය තුළ නැඟී සිටිය යුතු ය.

රාජිත-පාඨලි-අර්ජුන තුන් කට්ටුව රටට කියා දෙන පාඩම!

රාජිත-පාඨලි-අර්ජුන තුන් කට්ටුව නැවත එජාපයට ගොස් රනිල් අගමැති කිරීමේ සටනට වාඩි වී තිබේ. මේ තිදෙනා ම ඒ සඳහා එජාපය සමඟ එක් වූයේ ජනවාරි 08 වැනි දා පැවති ජනාධිපතිවරණය සමඟ ය. එහෙයින් මෙහි ඇති කිසිදු අපූර්වත්වයක් ද නැත. ජනාධිපතිවරයෙන් පසු පැමිණ කෙටි කලක් ලැගුම් ගත් ශ්‍රීලනිපයේ ඇත්තේ ඔවුන්ට එරෙහිම භාවිත කළ58 ලක්ෂයක් ඡන්ද ය.
මේ අවස්ථාවේ ආත්ම ගරුවත්වයක් යැයි කිසිවක් ඔවුන්ට තිබිණි නම් එය ද ටොමියාට දමා රනිල් සමඟ හිට ගැනීම මේ තිදෙනා දේශපාලන වශයෙන් ඉතා ම දුරදිග බලා ගත් තීරණයකි. මේ තුන් කට්ටුව ම ශ්‍රීලනිපය ප්‍රමුඛ සන්ධානයෙන් මහ මැතිවරණයට තරඟ කළේ නම් ජයග්‍රහණයට වඩා පරාජය ලැබීමට ඉඩ තිබිණි. විශේෂයෙන් ජනාධිපතිවරණයෙන් තමන්ගේ ශක්තිමත් ආණ්ඩුව පෙරලා රනිල් අගමැති කළ සිය පක්ෂයේ අපේක්ෂකයා පරාජයට පත් කර අනෙකෙකු ජනපති කිරීමට කුමන්ත්‍රණය කළ පිරිසකට ශ්‍රීලනිප සන්ධාන පාක්ෂිකයින් මනාප ලබා නොදීමට ඇති ඉඩ වැඩි ය.
මේ වන විට ශ්‍රීලනිප සන්ධානය වටා රොද බදින ඡන්ද දායකයින් මහින්ද කෙරෙහි විශ්වාසය තබන හෙයින් බොහෝ විට මහින්ද වෙනුවෙන් පෙනී සිටි පිරිස් සන්ධානය තුළ රාජිත-පාඨලි-අර්ජුන තුන් කට්ටුවට වඩා මනාප ලබා ගැනීම ඒකාන්ත ය. කොළඹින් විමල්, දිනේෂ්, සුසිල් පෙරමුණ ගනු ඇති අතර පාඨලිට පසු බැසීමට සිදු වනු ඇත. කළුතරින් වෙල්ගම, රෝහිත ඉදිරියට පැමිණෙනු ඇති අතර ගිය වරදත් යන්තම් සන්තම් දිනූ රාජිත පසු බසිනු ඇත. ෆීල්ඩ් මාර්ෂල්ගේ විලක්කුවෙන් අලියා මතට කරණමක් ගැසූ අර්ජුන සිය සහෝදරයා වන ප්‍රසන්න ලබන මනාපවලින් අඩක් හෝ නොලබනු නියත ය. එහෙයින් ලංකාවේ අමන දේශපාලඥයින් කුණු බක්කියට විසිවීමට මොහොතකට පෙර ලැගුම් ගන්නා එජාපය නම් නගර සභා කුණු ලොරියට සිය ආත්ම ආරක්ෂාව පිණිස මේ තුන් කට්ටුව නැඟ තිබේ.
මේ කරණම මගින් මේ තුන් කට්ටුව කිසියම් ආරක්ෂාවක් ලැබුව ද එජාපයේ ඒ ඒ දිස්ත්‍රික්කවල ප්‍රබලයින් සිය මනාප එජාප නොවන මේ වවුල් කල්ලියට යෑමට ඇති ඉඩ ඍජු සහ වක්‍ර ක්‍රියා මාර්ග ඔස්සේ වසා දමනු ඇත්තේ අනභියෝගීව සිය ආධිපත්‍ය ආරක්ෂා කර ගනු පිණිස ය. එහෙයින් දෙලොවක් අතර රඟන රාජිත, පාඨලි, අර්ජුන වැන්නෝ ගෙදර ගියත් තෝ නහී, මඟ හිටියොත් අඹු නහී තත්ත්වයට පත්ව සිටිති. එමෙන් ම පාඨලි සිය සැබෑ වෘක සම වැසෙන සේ පොරවා ගෙන බැටළු සමට රැවටී සිංහ කොඩිය උස්සා ගෙන ඔහු පසුපස ඒකීය රාජ්‍යය ආරක්ෂා කරනු පිණිස පසු ගමන් ගිය ජාතිකවාදීන් යැයි කියා ගන්නා ඊනියා දේශප්‍රේමීන් මෙවර පාඨලීට රනිල් වික්‍රමසිංහ සමඟ පඨිසෝතගාමීව ෆෙඩරල් රාජ්‍යයක් කරා යෑමට ගොම්පස් ඇල්ලිය හැකි ය. කෙසේ වුව ද අනපේකෂිත මහින්ද පුනරාගමනය නිසා එජාපය සමඟ පයුරු පාසානමකට යාම හැර සිය ආත්ම ආරක්ෂාව සඳහා මොවුන්ට වෙන කිසිඳු විකල්පයක් රටට ආදරය කරන ජනතාව ඉතිරි කර නොමැත. මේ වන විට සිරිසේන ජනාධිපතිවරයා මෙන් ම ඔහුට සහාය දැක්වූ ශ්‍රීලනිප කණ්ඩායම ද ජනපදනමක් නොමැති අනාථ බවට පත් කිරීමට ජනතාව නිවැරදි ලෙස කටයුතු කර තිබේ. රාජිත-පාඨලි-අර්ජුන තුන් කට්ටුව මේ උපාය මාර්ගය තේරීම සඳහා යොමු කරන්නේ එම යථාර්ථය විසිනි. මෙය එක්තරා ආකාරයකට දිට්ඨ ධම්මවේදනීය කර්ම ඵල දීමකි. මෙතෙක් එළිදැක ඇති ශ්‍රීලනිප සන්ධාන මහ මැතිවරණ අපේක්ෂක කටවුඩ්වලට සිරිසේනගේ රුව වෙනුවට මහින්දගේ රුව පැමිණීමෙන් සංකේතවත් කරන්නේ එය නොවෙද?

"අපේ කාලේ මැතිසබේ ප්‍රාඥයා" ....?

අප  යහ පාලන ආණ්ඩුව උදා වන තුරු දැන සිටියේ වාදිභසිංහ මිගෙට්ටුවත්තේ ගුණානන්ද හිමි ගැන පමණි. ඒ පානදුරාවාදය ඇතුළු පංචමහාවාද කරමින් මිෂනාරි දුර්මත පරාජය කර බෞද්ධ පුනරුද ව්‍යාපාරයට මුල්ගල් තැබූ ගුණානන්ද හිමි ය.  යහ පාලන ආණ්ඩුව අපට මාදුළුවාවේ සෝභිත හිමි නම් වාදිභසිංහයාණෝ කෙනෙක් ද දයාද කොට තිබේ. උන්වහන්සේ චතුර හඬින් බටහිර සහ ඉන්දීය කුමන්ත්‍රණය වෙනුවෙන් හඬ නැඟූ සේක.

අප  යහ පාලන ආණ්ඩුව උදා වන තුරු දැන සිටියේ කුඩාපොල හිමිවරු එක් නමක් පමණි. ඒ 1848 බ්‍රිතාන්‍ය යටත්විජිතවාදයට එරෙහිව නැඟුණු නිදහස් සටනට පන්සලේ නායකත්වය ලබා දී ජීවිතය පූජා කළ ජාතික කුඩාපොල හිමි ය. යහ පාලන ආණ්ඩුව අපට අතුරලියේ රතන හිමි නම් නූතන කුඩාපොල හිමි නමක් ද දයාද කොට තිබේ. උන් වහන්සේ බෙදුම්වාදීන්ට මේ රට නැවත අත්පත් කර ගැනීමට ජීවිතය පරදුවට තබා සටන් කළ සේක.

එදා අප දත් යතිවරු සිටියේ පන්සලේ ය. දැන් අපට යතිවර නාමය සහිත ටියුෂන් කඩකාරයෙක් ද ලෝක හොරෙක් ද සිටි. අප යහ පාලන ආණ්ඩුව උදා වන තුරු දැන සිටියේ කොග්ගල ප්‍රාඥයා, කන්නිමහර ප්‍රාඥයා වැනි ප්‍රාඥයින් ගැන පමණි. මාර්ටින් වික්‍රමසිංහ මහතා මෙන් ම කේ. ජයතිලක මහතා ද ඒ නමින් හැඳින්වීම ඒ නමට ගෞරවයකි. යහ පාලන ආණ්ඩුව අපට ප්‍රාඥයෙක් ද ලබා දී තිබේ. ඒ මැතිසබේ ප්‍රාඥයා ය. 

උපාධි කිහිපයක් ලැබූ පමණින් කෙනෙක් ප්‍රාඥයෙක් වේ නම් මර්වින් සිල්වා ද ප්‍රාඥයෙකි. කෙනෙකු ලබන උපාධිවලින් ප්‍රකට වන්නේ ඔහුගේ දැනුම මිස බුද්ධිය නොවේ. උපාධි ලැබූ පමණින් යමෙක් බුද්ධිමතෙක් නොවන අතර උපාධි නොලැබූ පමණින් යමෙක් බුද්ධිමතෙක් නොවන්නේ ද නැත. කෙසේ වුව ද එන්. එම්. පෙරේරා, කොල්වින් ආර්. ද සිල්වා වැනි එකල පාර්ලිමේන්තුව නියෝජනය කළ අය බුද්ධිමතුන් වූහ. එහෙත් ඔවුහු තමන් ප්‍රාඥයින් වම්හයි තාප්ප ගානේ පෝස්ටර් ඇලවුයේ නැත. ඒ ඔවුන් බුද්ධිමතුන් ලෙස පක්ෂ විපක්ෂ භේදයකින් තොරව රට පිළිගත් හෙයින් සහ සැබෑ බුද්ධිමතුන් වූ හෙයිනි. ඔවුහු අධිරාජ්‍යවාදයට එරෙහි අදීන මිනිසුන් වූහ.

අනෙක් අතට මේ රට සිංහලයින්ගේ වන්නේ කෙසේ දැයි ටයිකොට් ඇඳ පැමිණ රටෙන් අසන ඊනියා උගතුන් තමන් බුද්ධිමතුන් නොවනවා පමණක් නොව උගතුන් ද නොවන බව රටට පෙන්වා දී තිබේ. ඒ නූගත්කම සහ විලිලැජ්ජාවක් නැතිකම එකට එක් වූ විට සිදුවන සන්තෑසිය දැන් ඔබට කොළඹ තාප්පවල "අපේ කාලේ මැතිසබේ ප්‍රාඥයා" නමැති පෝස්ටරය දකින විට අවබෝධ කර ගත හැකි ය. මේ සියල්ල යහ පාලන ආණ්ඩුව විසින් අපට ලබා දුන් විපරිත ආදර්ශයන් ය.